Taano ta Naglilingkod Kamo sa Dios?

An sarong matatakton sa Dios na hade kaidto nagtao kan sadol na ini sa saiyang aking lalaki: “Midbida an Dios kan saimong ama asin maglingkod ka sa saiya sa bilog na puso asin nakaoogmang marhay na kalag.” (1 Cronica 28:9) Malinaw nanggad, gusto ni Jehova na paglingkodan sia kan saiyang mga lingkod na may mapagpasalamat, mapag-apresyar na puso.

BILANG mga Saksi ni Jehova, tolos na inaadmitir niato na kan enot na ipaliwanag an mga panuga sa Biblia, an satong puso napano nin pagpasalamat. Kada aldaw, nakakanood kita nin bagong bagay manongod sa mga katuyohan nin Dios. Mantang orog kitang nakakanood manongod ki Jehova, nagigin mas makosog man an satong pagmawot na paglingkodan sia “sa bilog na puso asin nakaoogmang marhay na kalag.”

An dakol na nagin Saksi ni Jehova padagos sa paglilingkod ki Jehova na may daing sagkod na kagayagayahan sa bilog nindang buhay. Minsan siring, may nagkapirang Kristiano na nagpoon na marahay, alagad pag-abot nin panahon, nalingawan ninda an mapuersang mga dahelan na nagmomotibar sa sato na maglingkod sa Dios. Iyan daw nangyari na saindo? Kun iyo, dai madesesperar. An nawarang kagayagayahan puedeng ikabalik liwat. Paano?

Pensaron an Saindong mga Bendisyon

Enot, horophoropon an aroaldaw na mga bendisyon na nareresibi nindo hale sa Dios. Isip-isipon an marahay na mga balaog ni Jehova: an saiyang dakol na gibo nin paglalang—na makukua kan gabos ano man an sosyal o pinansial na kamugtakan—an saiyang natural na mga probisyon na kakanon asin inomon, an marahay na kamugtakan nin salud na yaon sa saindo, an saindong kaaraman sa katotoohan sa Biblia, asin sa pangenot, an balaog na saiyang Aki. An saiyang kagadanan nagbukas nin dalan para saindo tanganing makapaglingkod sa Dios na may malinig na konsensia. (Juan 3:16; Santiago 1:17) Mientras na hinohorophorop nindo an karahayan nin Dios, orog man na matalubo an saindong pag-apresyar sa saiya. Kun siring pahihiroon kamo kan saindong puso na paglingkodan sia huli sa pagpasalamat para sa gabos na ginibo nia. Daing duda na mamamatean liwat nindo an namatean kan salmista na nagsurat: “Dakol an bagay na saimo mismong ginibo, O Jehova na sakong Dios, minsan an saimong makangangalas na mga ginibo asin an saimong mga pagmakolog samo; mayo nin ikakabaing saimo. . . . Iyan dai ko na kayang isaysay huli sa kadakolan.”—Salmo 40:5.

An mga tataramon na ini isinurat ni David, sarong tawo na an buhay bakong libre sa problema. Mantang hoben pa, si David nagdudulag sa kadaklan na panahon mantang hinahanap sia tanganing gadanon kan maraot na si Hadeng Saul asin kan saiyang mga tawohan. (1 Samuel 23:7, 8, 19-23) Si David igwa man nin personal na mga kaluyahan na linalabanan. Rinekonoser nia ini sa ika-40 Salmo: “Pinalibotan ako nin mga kalamidad sagkod na dai na iyan mabilang. Inabotan ako kan mga sala ko na mas dakol kisa kaya kong helingon; iyan nagin mas dakol kisa mga buhok sa sakong payo.” (Salmo 40:12) Iyo, si David igwa nin mga problema, alagad dai sia biyong nalunosan kaiyan. Nagkonsentrar sia sa mga paagi na binebendisyonan sia ni Jehova, sa ibong kan saiyang mga problema, asin naaraman nia na nakalalabi nanggad an mga bendisyon na idto kisa mga kasakitan nia.

Kun kamo nakamamateng napapano nin personal na mga problema o pakamate nin kadaihan nin kakayahan, marahay na umontok asin pensaron an saindong mga bendisyon, arog kan ginibo ni David. Daing duda, an pag-apresyar sa siring na mga bendisyon an nagpahiro sa saindo na idusay an saindong  sadiri ki Jehova; an siring na mga kaisipan puedeng makatabang man sa saindo na palaadon liwat an nawarang kagayagayahan asin tabangan kamo na maglingkod sa Dios hale sa mapag-apresyar na puso.

Puedeng Makatabang an mga Pagtiripon sa Kongregasyon

Apuera sa paghorophorop sa pribado kan mga karahayan ni Jehova, kaipuhan tang makiasosyar sa mga kapwa Kristiano. Nakaparirigon sa boot na regular na makipagtipon sa mga lalaki, babae, asin hoben na namomoot sa Dios asin determinadong paglingkodan sia. An saindang halimbawa puedeng pahiroon kita sa bilog na kalag na aktibidad sa paglilingkod ki Jehova. An satong presensia sa Kingdom Hall puedeng makaparigon man sa boot ninda.

Totoo, kun kita minauli sa harong pakatapos nin mapagal na aldaw nin pagtrabaho o kun nanluluya an boot niato huli sa sarong problema o kaluyahan, tibaad bakong madaling isipon na umatender nin pagtiripon sa Kingdom Hall. Sa siring na mga panahon, tibaad kaipuhan tang magin marigon sa satong sadiri, na ‘linalanog an satong hawak,’ sabi ngani, tanganing makasunod kita sa pagboot na makipagtipon sa mga kapwa Kristiano.—1 Corinto 9:26, 27; Hebreo 10:23-25.

Kun iyan kinakaipuhan, maninigo daw na isipon niato na dai ta talaga namomotan si Jehova? Dai man. An maygurang na mga Kristiano kan nakaagi na an pagkamoot sa Dios dai madidiskutir kinaipuhan na gumibo nin maigot na paghihingoa sa paggibo kan kabotan nin Dios. (Lucas 13:24) Saro si apostol Pablo sa siring na Kristiano. Hayag niang isinaysay an saiyang saboot sa paaging ini: “Aram ko na sa sako, an boot sabihon, sa sakong laman, mayo nin marahay na nag-eerok; huli ta an kakayahan na magmawot nasa sako, alagad an kakayahan na gumibo kan marahay mayo. Huli ta an marahay na minamawot ko dai ko ginigibo, kundi an maraot na hinahaboan ko iyo an ginigibo ko.” (Roma 7:18, 19) Asin sinabihan nia an mga taga Corinto: “Ngonyan, kun ako nagpapahayag kan maogmang bareta, bako iyan na dahelan na ako maghambog, huli ta iyan kaipuhan na gibohon ko. . . . Kun ini gibohon ko sa sadiri kong boot, igwa ako nin balos; alagad kun iyan gibohon ko na tumang sa boot ko, igwa pa man giraray ako nin pagkapinaniniwalaan na ipinaniwala sa sako.”—1 Corinto 9:16, 17.

Arog kan dakol sa sato, si Pablo igwa nin makasalan na mga tendensia na minaolang sa saiyang kamawotan na gibohon an tama. Minsan siring, sia nakikipaglaban nin maigot tumang sa mga tendensiang iyan, asin sa kadaklan na panahon, sia mapanggana. Siempre, ini dai nagibo ni Pablo sa sadiri niang kosog. Sia nagsurat: “Igwa ako kan kosog para sa gabos na bagay huli sa saiya na nagtatao nin puersa sa sako.” (Filipos 4:13) Si Jehova, an saro na nagtao nin puersa ki Pablo, matao man nin kosog sa saindo tanganing magibo an tama kun hahagadon nindo an saiyang tabang. (Filipos 4:6, 7) Kaya “makipaglaban nin maigot para sa pagtubod,” asin bebendisyonan kamo ni Jehova.—Judas 3.

Dai man kaipuhan na solo kamo sa pakipaglaban na ini. Sa mga kongregasyon kan Mga Saksi ni Jehova, an maygurang na Kristianong kamagurangan, na mismong nagmamaigot sa ‘pakipaglaban para sa pagtubod,’ andam na tumabang sa saindo. Kun madolok kamo sa sarong magurang sa kongregasyon para sa tabang, maghihingoa siang “magtaram na may pagranga” sa saindo. (1 Tesalonica 5:14) Pasohan niang humiro na “siring sa pailihan sa doros asin tagoan sa bagyo.”—Isaias 32:2.

“An Dios pagkamoot,” asin gusto nia na paglingkodan sia kan saiyang mga lingkod huli sa pagkamoot. (1 Juan 4:8) Kun an saindong pagkamoot sa Dios nangangaipong palaadon liwat, gumibo nin tamang mga lakdang sa paggibo kaiyan, siring kan nasambitan sa enotan. Maoogma kamong ginibo nindo iyan.