Tabangan an Iba na Maglakaw na Angay ki Jehova

“Kami . . . dai nag-ontok sa pagpamibi para sa saindo asin sa paghagad na kamo . . . maglakaw na angay ki Jehova sa katuyohan na lubos na makapaogma sa saiya mantang kamo padagos na namumunga sa lambang marahay na gibo.”—COLOSAS 1:9, 10.

1, 2. Ano an partikularmenteng puedeng magin gikanan nin kagayagayahan asin satispaksion?

“NAG-IISTAR kami sa harong na de rueda sa sarong oma. Paagi sa pagpadanay na simple kan samuyang buhay, mas dakol kaming panahon sa pagpaabot kan maogmang bareta sa mga tawo. Kami mabungang marhay na binendisyonan kan pribilehio na matabangan an dakol na idusay an saindang buhay ki Jehova.”—Sarong mag-agom, bilog na panahon na mga ministro sa Aprika del Sur.

² Dai daw kamo maoyon na an pagtabang sa iba nagbubunga nin kagayagayahan? An iba regular na naghihingoang tumabang sa mga may helang, daing sukat, o namomondo—na nakamamate nin satispaksion sa paggibo kaiyan. Nakasisierto an tunay na mga Kristiano na an paghiras ninda sa iba kan kaaraman dapit ki Jehova Dios asin ki Jesu-Cristo iyo an pinakadakulang tabang na ikatatao ninda. Ini sana an puedeng maggiya sa iba na akoon an pantubos ni Jesus, pataluboon an marahay na relasyon sa Dios, dangan matawan kan buhay na daing katapusan.—Gibo 3:19-21; 13:48.

3. Anong klase nin tabang an maninigo niatong tawan nin atension?

³ Minsan siring, kumusta man an pagtabang sa mga naglilingkod na sa Dios, na nagsusunod sa “Dalan”? (Gibo 19:9) An saindong interes sa sainda daing duwa-duwa na dakula pirme, alagad tibaad dai nindo naheheling kun paano kamo makagigibo nin orog pa o paano nindo ipapadagos an ginigibo nang pagtabang. O an kamugtakan nindo tibaad garo baga linilimitaran kamo pag-abot sa pagtabang sa sainda, sa siring linilimitaran an satispaksion na puede nindong kamtan. (Gibo 20:35) Mapadapit sa duwang aspektong iyan, may manonodan kita sa libro nin Colosas.

4. (a) Ano an kamugtakan kan magsurat si Pablo sa mga taga Colosas? (b) Paano napalabot si Epafras?

⁴ Kan suratan ni apostol Pablo an mga Kristiano sa Colosas, yaon sia sa Roma na nakabilanggo sa sadiring harong, pero puede siang bisitahon. Siring sa lalaoman nindo, ginamit ni Pablo an saiyang limitadong katalingkasan na maghulit manongod sa Kahadean nin Dios. (Gibo 28:16-31) An mga kapwa Kristiano puedeng magbisita ki Pablo, tibaad an iba ngani ibinilanggo kaiba nia kun beses. (Colosas 1:7, 8; 4:10) An saro kaiyan iyo an maigot na paraebanghelyong si Epafras na taga siudad nin Colosas sa Frigia, sa buklod na puerang lugar sa sirangan kan Efeso sa Asia Minor (Turkiya sa presenteng aldaw). Si Epafras nagserbing instrumento sa pag-organisar nin sarong kongregasyon sa Colosas, asin sia nagmaigot sa pagtabang sa mga kongregasyon sa kaharaning Laodicea asin Hierapolis. (Colosas 4:12, 13) Taano ta nagbiahe si Epafras tanganing makaolay si Pablo sa Roma, asin ano an manonodan ta sa simbag ni Pablo?

Epektibong Tabang Para sa mga Taga Colosas

5. Taano ta isinurat ni Pablo an ginibo nia sa mga taga Colosas?

⁵ Tanganing ikonsulta ki Pablo an mga kamugtakan sa kongregasyon nin Colosas, ginibo ni Epafras an masakit na biahe pa-Roma. Ibinareta nia an dapit sa pagtubod, pagkamoot, asin paghihingoang mag-ebanghelyo kan mga Kristianong idto. (Colosas 1:4-8) Pero, siertong ipinahayag man nia an saiyang paghadit manongod sa negatibong mga impluwensia na nagsasapeligro sa espirituwalidad kan mga taga Colosas. Si Pablo nagsimbag paagi sa sarong ipinasabong na surat na kinokontra an nagkapira sa mga punto de vista na pinalalakop nin falsong mga paratokdo. Partikularmenteng idinoon nia an magigin pangenot na papel ni Jesu-Cristo. * An  ikatatabang sana daw nia iyo an pagdodoon kan importanteng marhay na mga katotoohan sa Biblia? Sa ano pang ibang paagi nia matatabangan an mga taga Colosas, asin anong mga leksion an manonodan ta manongod sa pagtabang sa iba?

6. Ano an idinoon ni Pablo sa saiyang surat sa mga taga Colosas?

⁶ Sa kapinonan kan saiyang surat, si Pablo nagtao nin pakarorop sa sarong klase nin tabang na tibaad malingawan ta. Iyan sarong paagi nin pagtabang na epektibo hale sa harayong lugar, ta si Pablo asin Epafras harayo sa Colosas. Nagpatotoo si Pablo: “Danay kaming nagpapasalamat sa Dios na Ama kan satong Kagurangnan na si Jesu-Cristo kun kami namimibi [nota sa ibaba, “danay na pamimibi”] para sa saindo.” Iyo, ini espesipikong mga pamibi para sa mga Kristiano sa Colosas. Idinugang ni Pablo: “Kaya ngani kami man, magpoon kan aldaw na madangog niamo iyan, dai nag-ontok sa pagpamibi para sa saindo asin sa paghagad na kamo mapano kan tamang kaaraman sa saiyang kabotan sa bilog na kadonongan asin espirituwal na pakatalastas.”—Colosas 1:3, 9.

7, 8. Sa parate anong bagay an nasasambitan sa satong personal asin pankongregasyon na mga pamibi?

⁷ Aram ta na si Jehova an “Paradangog nin pamibi,” kaya mapananarigan ta an saiyang pagigin andam na dangogon an satong mga pamibi na kaoyon kan saiyang kabotan. (Salmo 65:2; 86:6; Talinhaga 15:8, 29; 1 Juan 5:14) Pero pag-abot sa satong pamimibi para sa iba, anong klase an satong mga pamibi?

⁸ Tibaad parate tang naiisip asin ipinamimibi ‘an bilog na kasararoan nin satong mga tugang sa kinaban.’ (1 Pedro 5:9) O tibaad irinarani ta ki Jehova an manongod sa mga Kristiano asin iba pa sa sarong lugar na inagihan nin kalamidad o trahedya. Kan mabaretaan kan enot na siglong mga disipulo sa ibang lugar an dapit sa gutom sa Judea, sierto na kadakoldakol sindang ginibong pamibi para sa saindang mga tugang dawa bago pa nagpadara nin mga pondong pan-ayuda. (Gibo 11:27-30) Sa satong kaaldawan, an mga pamibi dapit sa bilog na kasararoan nin mga tugang o dapit sa sarong dakulang grupo nin mga tugang parateng nadadangog sa Kristianong mga pagtiripon, kun saen dakol an dapat na makasabot asin makapagsabi nin “Amen.”—1 Corinto 14:16.

Magin Espesipiko sa Pamibi

9, 10. (a) Anong mga halimbawa an nagpapaheling na tama an pamimibi para sa espesipikong mga indibiduwal? (b) Paanong si Pablo nagin tema nin espesipikong pamibi?

⁹ Pero, an Biblia nagtatao sa sato nin mga halimbawa nin pamibi para sa iba na mas espesipiko, partikular. Pensara an sinabi ni Jesus na nasusurat sa Lucas 22:31, 32. Nasa kaibanan nia an 11 fiel na apostol. Sinda gabos mangangaipo kan pagsuportar nin Dios sa masakit na mga panahon na maabot, asin si Jesus namibi para sa sainda. (Juan 17:9-14) Pero, ilinaen ni Jesus si Pedro, na naggibo nin espesipikong pagngayongayo para sa sarong disipulo na iyan. Iba pang halimbawa: Si Eliseo namibi na tabangan nin Dios an sarong espesipikong lalaki, an saiyang katabang. (2 Hade 6:15-17) Si apostol Juan namibi na si Gayo magpadagos na marahay an kamugtakan sa pisikal asin espirituwal. (3 Juan 1, 2) Asin an iba pang pamibi nagkonsentrar sa espesipikong mga grupo.—Job 42:7, 8; Lucas 6:28; Gibo 7:60; 1 Timoteo 2:1, 2.

¹⁰ Itinatampok kan mga surat ni Pablo an manongod sa espesipikong marhay na mga pamibi. Hinagad nia na mamibi para sa saiya o para sa sainda kan saiyang kairiba. An Colosas 4:2, 3 nagsasabi: “Magmaigot kamo sa pagpamibi, na nagdadanay na puka dian na may pagpasalamat, na kadungan kaiyan namimibi man para sa samo, na logod an Dios magbukas sa samo nin tata nin pagtaram, na itaram an sagradong hilom manongod sa Cristo, na huli ngani kaiyan, ako nasa mga gapos nin bilanggoan.” Horophoropa man an iba pang halimbawa na ini: Roma 15:30; 1 Tesalonica 5:25; 2 Tesalonica 3:1; Hebreo 13:18.

11. Kan nasa Roma, para kiisay namibi si Epafras?

¹¹ Nagin totoo man iyan sa kairiba ni Pablo sa Roma. “Si Epafras, na gikan sa tahaw nindo, . . . nagpapaabot sa saindo kan saiyang mga pangungumusta, na danay na nagmamaigot para sa saindo sa saiyang mga pamibi.” (Colosas 4:12) An termino na trinadusir na “nagmamaigot” puedeng magsuherir nin “paghihingoa,” arog nin sarong parakawat sa gimnasia sa suanoy na karawat. Si Epafras daw odok na namibi dapit sana sa pambilog na kinaban na grupo nin mga nagturubod o dapit pa ngani sa tunay na mga parasamba sa bilog na Asia Minor? Sinabi ni Pablo na si Epafras espesipikong namimibi para duman sa mga nasa  Colosas. Aram ni Epafras an situwasyon ninda. Dai ta sinda midbid gabos sa ngaran, ni aram ta kun anong mga problema an napaatubang sa sainda, alagad imahinara an nagkapirang posibilidad. Tibaad linalabanan kan hoben na si Lino an impluwensia kan lakop na pilosopiya, asin tibaad kinaipuhan ni Rufo an kosog tanganing labanan an pag-engganyo kan saiyang dating mga gibo sa Judaismo. Huling daing pagtubod an agom na lalaki, kaipuhan daw ni Persida an pakatagal asin kadonongan tanganing mapadakula an saiyang mga aki sa Kagurangnan, asin kaipuhan daw ni Asincrito, na igwa nin ikagagadan na helang, an dugang na karangahan? Iyo, midbid ni Epafras an mga kabilang sa saiyang sadiring kongregasyon, asin sia odok na namibi dapit sa sainda huli ta boot nindang duwa ni Pablo na an siring na mga deboto maglakaw na angay ki Jehova.

12. Paano kita puedeng magin mas espesipiko sa satong pribadong mga pamibi?

¹² Naheheling daw nindo an arogan para sa sato—an sarong paagi tanganing matabangan niato an iba? Siring sa nasabi, an pampublikong mga pamibi sa Kristianong mga pagtiripon sa parate bakong gayo espesipiko, huli sa laen-laen na nagdadangog. Alagad an satong personal o pampamilyang mga pamibi puedeng magin espesipiko nanggad. Minsan ngani kun beses tibaad hagadon ta sa Dios na giyahan asin bendisyonan an gabos na nagbibiaheng paraataman o espirituwal na mga pastor, dai daw kita puedeng magin espesipiko kun beses? Halimbawa, taano ta dai mamibi na sinasambit an ngaran kan paraataman sa sirkito na nasa pagsongko sa saindong kongregasyon o kan namamayo sa saindong Pag-adal sa Libro kan Kongregasyon? An Filipos 2:25-28 asin 1 Timoteo 5:23 nagpapaheling kan inespesipikong pagmakolog ni Pablo dapit sa salud ni Timoteo asin Epafrodito. Ikapahahayag ta man daw an siring na interes sa mga may helang na midbid ta sa ngaran?

13. Anong klaseng mga situwasyon an tamang iiba niato sa personal na mga pamibi?

¹³ Totoo, dapat niatong likayan an pag-entremeter sa pribadong mga bagay nin iba, alagad tama na iparisa kan satong mga pamibi an tunay na interes sa mga midbid asin pinagmamakologan ta. (1 Timoteo 5:13; 1 Pedro 4:15) Tibaad may sarong tugang na lalaki na nawaran nin trabaho, asin dai ta man sia matawan nin trabaho. Pero, puede tang sambiton an saiyang ngaran asin magkonsentrar kita sa saiyang problema sa satong personal na mga pamibi. (Salmo 37:25; Talinhaga 10:3) May midbid daw kitang tugang na daraga na nagkakaedad na na mayo nin agom asin mga aki huli ta sia desididong mag-agom ‘sana sa Kagurangnan’? (1 Corinto 7:39) Sa pribadong mga pamibi nindo, taano ta dai hagadon ki Jehova na bendisyonan sia asin tabangan sia na magpadagos na maimbod sa saiyang paglilingkod? Bilang saro pang halimbawa, tibaad may duwang kamagurangan na nagtao nin hatol sa sarong tugang na lalaki na nagkasala. Taano ta dai sambiton kan balang saro sa sainda an ngaran nia sa saindang pribadong mga pamibi sa panapanahon?

14. Paano konektado sa pagtabang sa iba an espesipikong mga pamibi?

¹⁴ Kadakol kan posibilidad na ikaiba nindo sa saindong personal na mga pamibi an mga indibiduwal na aram nindong nangangaipo kan pagsuportar, karangahan, kadonongan, asin banal na espiritu ni Jehova, o nin arin man kan nagigin resultang mga bunga kaiyan. Huli sa pagigin harayo o iba pang kamugtakan, tibaad iniisip nindo na limitado an materyal o direktang tabang na ikatatao nindo. Alagad dai paglingawan na mamibi para sa saindong mga tugang na lalaki asin babae. Aram nindo na boot nindang maglakaw na angay ki Jehova, pero tibaad talagang kaipuhan ninda an tabang tanganing magibo iyan nin dagos-dagos. An sarong liabe sa pagtabang iyo an saindong mga pamibi.—Salmo 18:2; 20:1, 2; 34:15; 46:1; 121:1-3.

Maghingoa na Pakosogon an Iba

15. Taano ta dapat kitang magin interesado sa pantapos na kabtang kan Colosas?

¹⁵ Siempre, an odok, espesipikong pamibi bakong iyo sana an paagi nin pagtabang sa iba, nangorogna  sa mga harani sa saindo asin mahal nindo. Linilinaw iyan kan libro nin Colosas. Dakol na intelektuwal an naniniwala na pakapagtao ni Pablo nin doktrinal na instruksion asin praktikal na hatol, an idinagdag nia sana pagtaong-galang o personal na pataratara. (Colosas 4:7-18) Al kontraryo, naheling na niato na an huring kabtang na ini kan libro igwa nin hatol na mahalagang mangnohon, asin dakol pa an manonodan sa kabtang na ini.

16, 17. Ano an masasabi ta dapit sa mga tugang na lalaki na nasambitan sa Colosas 4:10, 11?

¹⁶ Si Pablo nagsurat: “Si Aristarco na kapwa ko bihag nagpapaabot sa saindo kan saiyang mga pataratara, asin iyo man si Marcos na pinsan ni Bernabe, (na may labot sa saiya nag-ako kamo nin mga pagboot na akoon sia kun halimbawa man sia magdian sa saindo,) asin si Jesus na inaapod Justo, mantang an mga ini kabilang sa mga tinuri. An mga ini sana an mga kapwa ko trabahador para sa kahadean nin Dios, asin an mga ini mismo nagin tabang na nagpapakosog sa sako.”—Colosas 4:10, 11.

¹⁷ Ipinamidbid digdi ni Pablo an nagkapirang tugang na lalaki na mahalagang mangnohon. Sinabi nia na kabilang sinda sa mga tinuri, mga Judio. Dakol an tinuring Judio sa Roma, asin an nagkapira Kristiano na ngonyan. Pero, an mga nasambitan na idto ni Pablo tuminabang sa saiya. Posibleng marhay na dai sinda nag-alangan na makiasosyar sa mga Kristianong Hentil, asin sierto na maogma sindang nakikabtang kaiba ni Pablo sa paghuhulit sa mga Hentil.—Roma 11:13; Galacia 1:16; 2:11-14.

18. Paano kinomendaran ni Pablo an nagkapira na kaibanan nia?

¹⁸ Mangnoha an komento ni Pablo: “An mga ini mismo nagin tabang na nagpapakosog sa sako.” Ginamit nia an sarong termino sa Griego na digdi sana naglataw sa Biblia. An dakol na paratradusir trinadusir ini na “karangahan.” Minsan siring, may saro pang termino sa Griego (pa·ra·ka·le’o) na mas parateng tinatradusir na “karangahan.” Ginamit iyan ni Pablo sa iba pang kabtang kan mismong surat na ini alagad bakong sa Colosas 4:11.—Mateo 5:4; Gibo 4:36; 9:31; 2 Corinto 1:4; Colosas 2:2; 4:8.

19, 20. (a) Ano an kahulogan kan pananaram na ginamit ni Pablo para sa mga tugang na lalaki na nagtabang sa saiya sa Roma? (b) Sa anong paagi puedeng tinabangan kan mga tugang na lalaking idto si Pablo?

 ¹⁹ An mga sinambit ni Pablo an ngaran sierto na orog pa sa berbal na pagranga an ginibo. An termino sa Griego na trinadusir na “tabang na nagpapakosog” sa Colosas 4:11 kun beses ginagamit sa sekular na mga teksto para sa sarong bolong na panhale sa kapurisawan. An New Life Version nagsasabi: “Sinda nagin nanggad dakulaon na tabang sa sako!” An Today’s English Version ginagamit an frase na: “Sinda nagin dakulang tabang sa sako.” Ano daw an posibleng ginibo kan Kristianong mga tugang na lalaking idto na harani ki Pablo tangani na tabangan sia?

²⁰ Si Pablo puedeng bisitahon, alagad dakol na bagay an dai nia magigibo, arog baga kan pagbakal kan saiyang pundamental na mga kinakaipuhan—kakanon asin gubing para sa tiglipot. Paano sia makakukua nin mga balumbon para sa pag-adal o makababakal nin mga gamit sa pagsurat? (2 Timoteo 4:13) Bako daw na maiimahinar nindo an mga tugang na lalaking idto na tinatabangan si Pablo sa saiyang mga pangangaipo, na ginigibo an pundamental na bagay na arog kan pamamakal o nasusugosugo nia? Tibaad boot niang helingon an kamugtakan asin pakosogon an sarong kongregasyon. Huling nakabilanggo, dai nia iyan magibo, kaya an mga tugang na lalaking idto puedeng iyo an nagsongko para ki Pablo, na naghahatod nin mga mensahe, may darang mga bareta pagbalik. Kanigoan kanakapakokosog!

21, 22. (a) Taano ta maninigo kitang magin interesado sa mga tataramon sa Colosas 4:11? (b) Ano an nagkapirang paagi na puede tang iaplikar an halimbawa kan mga kaibanan ni Pablo?

²¹ An isinurat ni Pablo dapit sa pagigin “tabang na nagpapakosog” nagtatao nin pakarorop sa kun paano kita puedeng tumabang sa iba. Puedeng naglalakaw sinda na angay ki Jehova kun dapit sa saiyang mga pamantayan sa moral, nag-aatender sa Kristianong mga pagtiripon, asin nakikikabtang sa paghuhulit. Sa bagay na iyan maninigo ta sindang pahayagan nin apresasyon. Pero puede daw kitang gumibo nin orog pa, na magin “tabang na nagpapakosog” arog kan mga kaibanan ni Pablo?

²² Kun may midbid kamong tugang na babae na may kadonongan na nangangapot sa 1 Corinto 7:37 alagad ngonyan mayo nin pamilya na harani sa saiya, puede daw nindo siang iiba sa nagkapirang aktibidad kan pamilya nindo, na tibaad iniimbitaran sia na umiba sa pagkakan o umatender sa sarong  sadit na pagtorotiripon nin mga magkakatood o magpaparyente? Kumusta man an pag-agda sa saiya na magbiahe kaiba kan saindong pamilya pasiring sa kombension o sa bakasyon? O agdahon siang umiba sa saindo sa sarong kombenyenteng panahon kun kamo masaod. Puede man niatong gibohon iyan sa mga balong babae o lalaki, o sa mga tibaad dai na ngonyan kayang magmaneho. Puede man na magin kapakipakinabang para sa saindo na madangog an saindang mga eksperyensia o makanood sa saindang kaaraman dapit sa ordinaryong mga bagay na arog kan pagpili nin mga prutas o mga bado para sa mga aki. (Levitico 19:32; Talinhaga 16:31) An sarong natural na epekto iyo an tibaad pagigin orog na magkadayupot. Sa siring tibaad dai na sindang gayo mag-aalangan na magpatabang sa saindo kun kaipuhan ninda nin bolong hale sa botika, o kaagid na mga bagay. An mga tugang na lalaking kaibanan ni Pablo sa Roma siertong nagtao nin praktikal, nakapakokosog na tabang, siring kan mga kaibanan nindo. Kaidto sagkod ngonyan an dugang na bendisyon iyo na an bogkos nin pagkamoot napakokosog, asin marigon kitang nagdedesidir na maimbod na maglingkod nin magkairiba ki Jehova.

23. Marahay na an lambang saro sa sato magtao nin panahon na gibohon an ano?

²³ Puedeng horophoropon kan lambang saro sa sato an mga situwasyon na nasambitan sa artikulong ini. An mga iyan halimbawa sana, alagad an mga ini puedeng magpagirumdom sa sato kan totoong mga situwasyon kun saen puede kitang magin orog pang “tabang na nagpapakosog” sa satong mga tugang na lalaki asin babae. An punto bako na magkaigwa kita kan aktitud nin mga humanitaryo. Bako iyan an pasohan kan mga tugang na lalaki na nasambitan sa Colosas 4:10, 11. Sinda “mga kapwa . . . trabahador para sa kahadean nin Dios.” An nakapakokosog na epekto direktang konektado dian. Logod na magin totoo man iyan sa sato.

24. Ano an pinakadahelan kan satong pamimibi para sa asin paghihingoang pakosogon an iba?

²⁴ Sinasambit niato an ngaran kan iba sa satong pribadong mga pamibi asin naghihingoa kita na pakosogon sinda dahel kaini: Nagtutubod kita na an satong mga tugang na lalaki asin babae boot na “maglakaw na angay ki Jehova sa katuyohan na lubos na makapaogma sa saiya.” (Colosas 1:10) An bagay na iyan konektado sa saro pang bagay na nasambitan ni Pablo kan sia magsurat manongod sa mga pamibi ni Epafras may labot sa mga taga Colosas, na sinda “makatindog na lubos asin may marigon na kombiksion sa gabos na kabotan nin Dios.” (Colosas 4:12) Paano niato personal na magigibo iyan? Helingon ta.

[Nota sa Ibaba]

Nasabotan daw Nindo?

• Paano kita puedeng magin orog na nakatatabang sa satong pribadong mga pamibi?

• Sa anong paagi na an nagkapirang Kristiano nagin “tabang na nagpapakosog” para ki Pablo?

• Sa anong klaseng mga situwasyon kita puedeng magin “tabang na nagpapakosog”?

• Ano an pasohan sa likod kan satong pamimibi para sa asin paghihingoang pakosogon an satong mga tugang na lalaki asin babae?

[Mga Hapot Para sa Pag-adal]

[Ritrato sa pahina 18]

Puede daw kamong mag-iba nin saro pang Kristiano sa pamamasyar kan saindong pamilya?

[Credit Line]

Sa karahayan nin boot kan Green Chimney’s Farm