An mga Paraotob kan Tataramon nin Dios Nakakaeksperyensia nin Kaogmahan

“Rinerekonoser ta na an kombension na ini saro pa sa mga probisyon ni Jehova tanganing iandam kita para sa dugang pang aktibidad na pan-Kahadean,” sabi kan saro sa mga ispiker sa pagpopoon kan “Mga Paraotob kan Tataramon nin Dios” na Pandistritong Kombension kan Mga Saksi ni Jehova. Sia nagpadagos: “Inandam ta an satong sadiri tanganing tokdoan manongod sa maogmang buhay pampamilya, tanganing maparigon an boot na magdanay na dayupot sa organisasyon ni Jehova, tanganing motibaron na papagdanayon an satong kaigotan sa paglilingkod sa Kahadean, asin tanganing pagirumdomon kan pangangaipo na magdanay na mapagbantay.”

POON sa pagtatapos kan Mayo 2000, minilyon kan paraotob kan tataramon nin Dios asin kan saindang mga katood an nagtiripon sa rinibong lugar sa bilog na kinaban tanganing mag-ako nin mahalagang marhay na edukasyon sa Biblia. Ano an saindang nanodan durante kan tolong aldaw na kombension?

Enot na Aldaw—Dai Linilingawan an mga Gibo ni Jehova

Sa pambukas na pahayag, inagda kan tsirman an mga nagdadangog na namitan an mga bendisyon hale sa nagkakasararong pagsamba ki Jehova sa mga kombension. Inasegurar an gabos na nag-atender na an saindang pagtubod madudugangan asin na an saindang personal na relasyon ki Jehova pakokosogon.

Aram “kan maogmang Dios” kun ano an satong kaipuhan para sa satong indibiduwal na kaogmahan. (1 Timoteo 1:11) Sa siring, idinoon kan pahayag na “Nagbubunga nin Kaogmahan an Paggibo kan Kabotan nin Dios” na an Tataramon ni Jehova, an Biblia, sinasabi an pinakamarahay na paagi nin pamumuhay. (Juan 13:17) Ipinaheling kan dakol na interbio sa haloy nang mga Saksi ni Jehova kun paanong an paggibo kan kabotan nin Dios sa irarom nin manlaenlaen na kamugtakan nagtatao nin kahulogan sa satong buhay. Idinoon kan sunod na pahayag, na “Magin Makinang sa Karahayan ni Jehova,” na bilang “mga paraarog sa Dios,” gusto kan mga Kristiano na magpaluwas nin “gabos na klase nin karahayan” sa saindang buhay. (Efeso 5:​1, 9) An sarong marahayon na paagi nin paggibo kaini iyo an paghuhulit kan maogmang bareta asin paggibo nin mga disipulo.​—Salmo 145:7.

Ipinaheling kan pag-orolay na “Magpadagos na Marigon na Garo Baga Nakaheheling kan Saro na Dai Naheheling” kun paano nakatatabang sa sato an makosog na pagtubod na “maheling” an dai naheheling na Dios. Ipinaliwanag kan ispiker kun paano naaaraman kan espirituwal na mga tawo an mga kualidad nin Dios, pati an saiyang abilidad na maaraman dawa an satong iniisip. (Talinhaga 5:21) Isinaysay kan mga ininterbio an mga lakdang na ginibo ninda tanganing mapatalubo an mas makosog na pagtubod asin enoton sa saindang buhay an espirituwal na intereses.

Natapos an agang sesyon paagi sa pahayag sa pinakatema na, “Omawon si Jehova​—An Paragibo nin Makangangalas na mga Bagay.” Tinabangan kaiyan an mga nagdadangog na masabotan na mientras na kita nakakanood manongod ki Jehova, mas nagkakaigwa kita nin  mga dahelan na omawon sia bilang Paragibo nin makangangalas na mga bagay. An ispiker nagsabi: “Mantang hinohorophorop niato an makangangalas na mga gibo nin paglalang nin Dios patin an gabos na makangangalas na bagay na ginigibo nia para sa sato ngonyan mismo, an odok sa pusong apresasyon an mapahiro sa sato na omawon sia. Mantang hinohorophorop niato an milagrosong mga bagay na ginibo nia para sa saiyang banwaan kan suanoy na mga panahon, boot niatong omawon sia. Asin mantang hinohorophorop niato an mga panugang makangangalas na mga bagay na gigibohon pa ni Jehova, inaaram man niato an mga paagi tanganing ipahayag an apresasyon.”

An sesyon sa hapon pinonan kan pahayag na “Dai Mag-ontok sa Paggibo nin Marahay,” na ipinagirumdom sa gabos na nagdadangog na an pangigipit kan kinaban na ini nagpapatunay na an katapusan harani na. (2 Timoteo 3:1) Minsan siring, paagi sa dai pag-ontok, mapatutunayan niato na kita “an klase na may pagtubod sa ikapagdadanay na buhay kan kalag.”​—Hebreo 10:39.

Anong mga hatol sa Biblia an itinao mapadapit sa buhay pampamilya? An enot na simposium kan kombension​—“Magin Makinuyog sa Tataramon nin Dios”​—nagpoon sa kabtang na “Sa Pagpili nin Aagomon.” An pagpili nin aagomon iyo an saro sa pinakaseryosong desisyon na ginigibo nin mga tawo. Sa siring, boot kan mga Kristiano na maghalat sa pag-agom sagkod na sinda maygurang na, asin sinda minaagom “sanang dian sa Kagurangnan.” (1 Corinto 7:39) Ipinaliwanag sa sunod na kabtang kan simposium an pagmawot ni Jehova na an gabos na Kristianong pamilya makapanggana bilang makosog na espirituwal na grupo, asin iyan nagtao nin praktikal na mga paagi na ini puedeng magibo. Ipinagirumdom kan pangultimong kabtang sa mga magurang na an pagtotokdo sa saindang mga aki na mamotan an Dios minapoon sa pagkamoot kan mga magurang para sa saiya.

Tinabangan kan mga puntong iprinesentar sa pahayag na “Mag-ingat sa mga Huringhuding Asin Tsismis” an gabos na masabotan na minsan ngani may makangangalas na mga bagay na nangyayari, an satong reaksion maninigo na may kadonongan, bakong madaling maloko, kun nakadadangog kita nin nakabibiglang mga bareta. Mas marahay na an mga Kristiano magtaram manongod sa aram nindang totoo​—an maogmang bareta kan Kahadean. Nanompongan kan dakol na an sunod na pahayag, na “Pagkaya sa ‘Sarong Tonok sa Laman,’” nakararangang marhay asin nakapakokosog. Tinabangan sinda kaiyan na masabotan na sa ibong kan nagpapadagos na mga pagbalo na tibaad inaatubang niato, puede kitang pakosogon ni Jehova paagi sa saiyang banal na espiritu, saiyang Tataramon, asin satong Kristianong kasararoan nin magturugang. Dakulang pamparigon sa boot an nakua sa personal na eksperyensia ni apostol Pablo sa bagay na ini.​—2 Corinto 12:​7-10; Filipos 4:​11, 13.

Natapos an enot na aldaw sa pahayag na “Pakapagdanay na Kasabay  kan Organisasyon ni Jehova.” Inestudyaran an tolong kabtang nin partikular na pag-abante kan organisasyon nin Dios: (1) an nag-oorog na pakasabot sa espirituwal na liwanag hale ki Jehova, (2) an ministeryo na ipinaniwala nin Dios sa sato, asin (3) an napapanahon na mga pagliliwat sa mga prosedimiento sa organisasyon. Dangan an ispiker kompiadong nagsabi: “Kita ogmahon manongod sa mga tinatanaw sa ngapit.” Sia naghapot: “Igwa daw nin ano man na pagduda na igwa kita nin lambang dahelan na papagdanayon na marigon an kompiansa na yaon sa sato kan enot sagkod sa katapusan?” (Hebreo 3:14) Malinaw nanggad an simbag. Guminiya iyan sa pagluwas kan sarong bagong brosyur na may titulong Puede Kang Magin Katood nin Dios! Magagamit iyan bilang epektibong marhay na pantabang sa pagtotokdo sa mga indibiduwal na limitado an edukasyon o abilidad sa pagbasa tanganing makanood manongod ki Jehova.

Ikaduwang Aldaw—Padagos na Magtaram Manongod sa Makangangalas na mga Gibo nin Dios

Pagkatapos na konsideraron an pan-aroaldaw na teksto, an ikaduwang aldaw kan kombension nagpadagos sa simposium na “Mga Ministro kan Tataramon nin Dios.” Dinara kan enot na kabtang an atension sa presenteng kapangganahan kan satong lakop sa globong gibohon na paghuhulit. Minsan siring, an satong pakatagal sa gibohon na ini inaangat kan mayoriya, na habo kan mensahe kan Kahadean. Dakol na haloy nang parahayag an nagpaliwanag kun paano ninda napagdanay an saindang kagayagayahan sa ministeryo paagi sa pagpasarig kan saindang isip asin puso tanganing atubangon an angat nin pagkaindiperente o pagtumang. Ipinagirumdom kan ikaduwang kabtang sa mga kombensionista na an Mga Saksi ni Jehova nagmamaigot na maabot an mga tawo sa gabos na lugar, sa pormal sagkod impormal na paagi. Asin ipinaliwanag sa huring kabtang an manlaenlaen na paagi kun saen puedeng pahiwason kan gabos na Kristiano an saindang personal na ministeryo. Idinoon kan ispiker na tanganing magibo ini, maninigo tang ipaorog sa gabos an Kahadean nin Dios, dawa kun sa paggibo kaiyan napapalabot an pagkaabala asin pagdehar sa sadiri.​—Mateo 6:​19-21.

Mantang kita nabubuhay sa maraot na kinaban na sagom sa dai naiingustohan na paghimuyawot sa materyal na mga bagay, an pahayag na “Kultibaron an Diosnon na Debosyon na May Pagigin Naninigoan sa Sadiri” napapanahon na marhay. Ibinabasar an nagkapirang komento  nia sa 1 Timoteo 6:​6-10, 18, 19, ipinaheling kan ispiker kun paanong an diosnon na debosyon nakatatabang sa mga Kristiano tanganing malikayan an pagkamoot sa kuarta, na puedeng ikaparayo ninda asin magin dahelan nin dakol na kakologan. Idinoon nia na anoman an satong situwasyon sa pinansial, an kaogmahan minadepende sa satong relasyon ki Jehova asin sa satong espirituwal na kamugtakan. Napukaw na marhay an boot kan dakol sa mga puntong iprinesentar sa pahayag na “Dai Pagtao nin Kasusupgan sa Dios.” Idinoon an katunayan na nungkang linilingawan ni Jehova an saiyang fiel na mga Saksi. An daing kapantay na halimbawa ni Jesu-Cristo​—na “iyo man sana kasuodma asin ngonyan, patin sagkod lamang”​—an matabang sa dakol tanganing magpadagos na nagdadalagan sa paorumbasan para sa buhay na may pakatagal.​—Hebreo 13:8.

Natapos an sesyon sa aga paagi sa pahayag sa bautismo​—na pirmeng tampok na kabtang sa darakulang pagtiripon kan Mga Saksi ni Jehova. Kanigoan na kagayagayahan na maheling an bagong mga nagdusay na nagsunod sa mga lakad ni Jesus paagi sa pagpabautismo sa tubig! (Mateo 3:​13-17) An gabos na naggibo kan lakdang na ini dakol na an nagibo bilang paraotob kan tataramon nin Dios. Dugang pa, kun mabautismohan sinda magigin ordenadong mga ministro kan maogmang bareta, na nakakukua nin dakulang kagayagayahan sa pakaaram na sinda nakikikabtang sa pagsantipikar sa ngaran ni Jehova.​—Talinhaga 27:11.

Itinao an direkta sa puntong hatol sa pahayag na “Kaipuhan an Pagkamaygurang ‘Tanganing Mamidbid an Tama Sagkod an Sala.’ ” An kinabanon na mga pamantayan nin tama asin sala kulang na marhay. Kun siring kaipuhan niatong manarig sa mga  pamantayan ni Jehova. (Roma 12:2) Inenkaminar an gabos na maghingoang magkaigwa nin tamang pakasabot sa mga dalan nin Dios asin magtalubo sa pagkamaygurang. Dangan, paagi sa pagsasanay an satong kakayahan nin pakamansay mapapatood “na mamidbid kun ano an tama asin sala.”​—Hebreo 5:​11-14.

Suminunod an simposium na “Maghingoang Kultibaron an Espirituwalidad.” Rinerekonoser kan tunay na mga Kristiano an importansia nin pagpapatalubo asin pagpapadanay kan espirituwalidad. Kalabot digdi an paghihingoa​—pagbasa, pag-adal, asin paghorophorop. (Mateo 7:​13, 14; Lucas 13:24) An espirituwal na mga tawo nagpapadagos man sa “gabos na porma nin pamibi asin pagngayongayo.” (Efeso 6:18) Narerealisar niato na ihinahayag kan satong mga pamibi an rarom kan satong pagtubod asin debosyon, an kamugtakan kan satong espirituwalidad, siring man kun ano an minamansay niato bilang “orog na mahalagang mga bagay.” (Filipos 1:10) Idinoon man an kahalagahan kan pagpapatalubo nin maogma, mamomoton na relasyon ki Jehova siring kan nakakamtan nin sarong makinuyog na aki sa sarong maboot na ama. Bako sanang may relihion kita​—maski iyan an tunay​—kundi gusto tang pataluboon an makosog na pagtubod, ‘na garo baga naheheling an Dios.’​—Hebreo 11:​6, 27.

Ipinaliwanag nin dugang pa an dapit sa espirituwal na pag-oswag sa pahayag na “Ihayag an Saindong Pag-oswag.” Inestudyaran an tolong langtad kan siring na pag-oswag: (1) pag-oswag sa kaaraman, pakasabot, asin kadonongan, (2) pagpaluwas kan bunga kan espiritu nin Dios, asin (3) pagsagibo kan satong mga responsibilidad bilang mga miembro nin pamilya.

Sa katapusan kan ultimong pahayag kan aldaw na iyan, na “Paglakaw sa Progresibong Liwanag kan Tataramon nin Dios,” naogmang marhay an mga kombensionista na akoon an bagong libro, na Isaiah’s Prophecy​​—Light for All Mankind I. Ini an enot sa duwang tomo na tinatratar an libro sa Biblia na Isaias kapitulo por kapitulo. “An libro nin Isaias igwa nin mensahe para sa sato ngonyan,” an sabi kan ispiker. Sia nagpadagos: “Iyo, dakol sa mga hula kaiyan an naotob kaidto pang kaaldawan ni Isaias. . . . Minsan siring, dakol sa mga hula ni Isaias an naootob ngonyan, asin an nagkapira maootob sa ipinanuga nin Dios na bagong kinaban.”

Ikatolong Aldaw—Magin mga Paraotob kan Tataramon ni Jehova

An huring aldaw kan kombension nagpoon sa pag-orolay sa teksto kan aldaw. Dangan suminunod an simposium na “An Makahulogan na Hula ni Sofonias Para sa mga Nag-ootob kan Kabotan nin Dios.” Ipinaheling kan tolong pahayag sa simposium na ini na, siring sa ginibo nia kaidtong kaaldawan kan sumbikalan na Juda, tatawan ni Jehova nin kasakitan an mga nagsasayuma ngonyan na maghimate sa saiyang patanid. Huling sinda nagkasala tumang sa Dios, sinda magraralakaw na daing maginibo siring sa butang mga tawo, na dai nakakukua nin kaligtasan. Minsan siring, an tunay na mga Kristiano fiel na hinahanap si Jehova, asin sinda matatago sa aldaw kan kaanggotan nin Dios. Dugang  pa, dawa ngonyan nagkakamit na sinda nin dakol na bendisyon. Igwa sinda nin maogmang oportunidad na magtaram kan “dalisay na tataramon” kan katotoohan sa Biblia. (Sofonias 3:9) An ispiker nagpaliwanag: “An kalabot sa pagtaram kan dalisay na tataramon bako sanang an pagtubod sa katotoohan asin pagtokdo kaiyan sa iba kundi pag-oyon man kan satong paggawe sa mga ley asin prinsipyo nin Dios.”

Galagang hinalat kan mga kombensionista an drama na “Nagpapatanid na mga Halimbawa Para sa Satong Aldaw.” Ipinaheling sa kompleto an kostium na dramang ini kun paanong an rinibong Israelita nagadan sa linderos kan Dagang Panuga huli ta liningawan ninda si Jehova asin tinentaran sinda kan mga babaeng pagano sa pakikisaro asin falsong pagsamba. An saro sa pangenot na karakter​—si Jamin​—sa primero nababanga an atension sa pan-akit kan mga babaeng Moabita asin sa saiyang debosyon ki Jehova. An falsong pangangatanosan asin mapandayang kaisipan kan maraot na si Zimri an pangenot na pinalataw, siring man an pagtubod asin debosyon ni Fineas. An peligro kan pagigin imbuelto sa mga dai namomoot ki Jehova buhay na buhay an pagkaladawan.

Inandam kan drama an isip para sa kasunod na pahayag, na “Dai Magin Malilingawon na mga Paradangog.” Ipinaheling kan pag-analisar sa 1 Corinto 10:​1-10 na binabalo ni Jehova an satong pagkuyog tanganing madeterminaran kun kita maninigo na mag-ako nin pamana sa bagong kinaban. Para sa nagkapira, an makalaman na mga kamawotan inagawan nin lugar an espirituwal na mga pasohan dawa ngonyan, na harani na an satong paglaog sa bagong sistema. An gabos pinarigon an boot na dai iwara an oportunidad na ‘makalaog sa kapahingaloan ni Jehova.’​—Hebreo 4:1.

An pahayag-publiko may temang “Kun Taano ta Magin Atento sa Makangangalas na mga Gibo nin Dios.” An “makangangalas na mga gibo” ni Jehova nagpapatunay sa saiyang kadonongan asin sa saiyang autoridad sa pisikal na mga linalang na nasa palibot niato. (Job 37:14) An dakol na nagsisiyasat na hapot hale ki Jehova igo na tanganing itudok sa isip ni Job an kapangyarihan kan makakamhan sa gabos na Kaglalang. Magibo man si Jehova nin “makangangalas na mga gibo” sa ngapit para sa saiyang fiel na mga lingkod. An ispiker nagkonklusyon: “Kita igwa nin dakol na rason tanganing magtao nin atension sa makangangalas na mga gibo ni Jehova​—an mga ginibo nia kan nakaagi, an saiyang ginigibo sa palibot niato sa paglalang ngonyan, asin an mga ipinanuga niang gigibohon sa harani nang ngapit.”

Kasunod nin sumaryo kan artikulong pag-aadalan sa Torrengbantayan para sa semana, an ultimong pahayag kan kombension iinatubang. May titulong “Pahalagahan na Marhay an Saindong Pribilehio Bilang Paraotob kan Tataramon nin Dios,” idinoon kan nakapupukaw sa boot na pahayag na ini na sarong onra an magin paraotob kan tataramon nin Dios. (Santiago 1:22) Ipinagirumdom sa mga nagdadangog na daing kaagid an satong pribilehio bilang paraotob kan tataramon nin Dios, asin mientras na ginigibo ta iyan nin mas halawig, lalo ta iyan na pahahalagahan. An gabos na nag-atender inenkaminar na ipabanaag an kapakipakinabang na pag-engganyar sa pandistritong kombension na ini sa saindang pagmawot na magin paraotob kan tataramon nin Dios sa pinakalubos na paagi. Iyan an solamenteng paagi tanganing maeksperyensiahan an nakalalabi sa gabos na kaogmahan na mapupuede.

[Kahon/Ritrato sa pahina 25]

Puede Kang Magin Katood nin Dios!

Kan Biernes na hapon sarong bagong brosyur na may titulong Puede Kang Magin Katood nin Dios! an ilinuwas. Igwa nin dakulang pangangaipo para sa pinasimpleng edukasyon sa Biblia sa dakol na parte kan kinaban, asin an brosyur na ini an gagamiton tanganing mapanigoan an pangangaipong iyan. Iyan magigin dakulang bendisyon sa mga tawo na may limitadong edukasyon o abilidad sa pagbasa.

[Kahon/Mga Ritrato sa pahina 26]

Isaiah’s Prophecy—Light for All Mankind

Napalukso an puso sa kaogmahan kan mga kombensionista na maresibi an Tomo I kan duwang tomong Isaiah’s Prophecy​—Light for All Mankind. Sa publikasyon na ini, idinoon an praktikal na halaga kan mga hula ni Isaias para sa satong kaaldawan.