Tumindog na Lubos Asin May Marigon na Kombiksion

“Sarong Obra Maestrang Proyekto”

POON kan enot na mga aldaw kan saindang kasaysayan sa presenteng aldaw, an Mga Saksi ni Jehova interesadong marhay sa saro kan mga hula ni Jesu-Cristo: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Mantang padangadang an 1914​—an kapinonan kan “huring mga aldaw”​—an sinserong mga Estudyante sa Biblia pinonan na may marigon na kombiksion an sarong dai pa nangyari kaidto na pambilog na kinaban na kampanya nin pagtotokdo basado sa Banal na Kasuratan.​—2 Timoteo 3:1.

Tanganing magibo an saindang obheto na ipahayag an maogmang bareta sa bilog na daga, an mga lingkod na ini ni Jehova naggamit nin sarong paagi na bago, lataw, asin malinaw. Tanganing orog pang makaaram manongod dian, balikan ta an panahon kaidto.

Sarong Bagong Paagi Tanganing Ipahayag an Maogmang Bareta

Kaidto Enero kan taon 1914. Imahinara na kamo nakatukaw kaiba an 5,000 na iba pa sa sarong madiklom na auditoryum sa Siudad nin Nueva York. Nasa atubangan nindo an sarong dakulang tilon. Naglataw sa tilon an sarong lalaki na puti an bohok na nakasulot nin amerikana (frock coat). Nakadalan na kamo nin pelikula na mayong boses, alagad an lalaking ini nagtataram, asin nadadangog nindo an saiyang sinasabi. Kamo kabilang sa mga makaheheling kan primerong padalan nin sarong bago sa teknikal na paagi, asin daing kapareho an mensahe. An nagpapahayag iyo si Charles Taze Russell, an enot na presidente kan Watch Tower Society, asin an padalan iyo an “Photo-Drama of Creation.”

Nasabotan ni C. T. Russell an potensial nin pelikula sa pag-abot sa kadakol na tawo. Kun siring, kan 1912, pinonan niang andamon an “Photo-Drama of Creation.” Sa kahurihurihi, iyan nagin walong oras na potograpikong slide asin pasale, na de-kolor asin may tanog.

Dinisenyo na ipadalan sa apat na kabtang, an “Photo-Drama” ipinaheling sa mga nagdadalan an kapinonan kan paglalang dangan nagpapadagos sagkod sa kasaysayan nin tawo pasiring sa kulminasyon kan katuyohan ni Jehova Dios para sa daga asin sa katawohan sa katapusan kan Milenyal na Paghade ni Cristo. Dakol pang taon an malihis bago gamiton nin mapanggana sa komersio an siring na teknolohiya. Pero, minilyon an nakadalan kan “Photo-Drama of Creation” nin libre!

Piling isinaplakang mga togtog siring man 96 na pahayag na irinekord sa ponograpo an inandam para sa “Photo-Drama.” An mga slide na stereopticon mga ladawan na ginibo nin eksperto sa arte na ilinaladawan an kasaysayan nin kinaban. Kinaipuhan man na gumibo nin ginatos na bagong mga ipininta asin krokis. An nagkapira sa mga slide asin film na de-kolor maingat na gayong ipininta nin kamot. Asin ini paorootrong ginibo, huli ta, pag-abot nin panahon, 20  tig-aapat na kabtang an iinandam. Ini nagpangyaring magin posible na ipadalan an sarong kabtang kan “Photo-Drama” sa 80 laen-laen na siudad sa arin man na itinalaan na aldaw!

An Nasa Likod

Ano an nangyari sa likod durante kan mga pagpadalan kan “Photo-Drama”? “An Drama nagpoon paagi sa sarong pelikula na nagpapaheling ki Tugang na Russell,” an sabi nin sarong Estudyante sa Biblia na si Alice Hoffman. “Paglataw nia sa tilon asin paghuminiro na an saiyang mga ngabil, patatanogon na an sarong ponograpo . . . asin kami naoogmang maghinanyog sa saiyang tingog.”

Nananabihan an time-lapse sa potograpiya, nagigirumdoman ni Zola Hoffman: “Nakatukaw ako duman na biyong muklat an mata sa pagngalas mantang nagdadalan kami kan paglaladawan kan mga aldaw kan paglalang. May mga asusena duman na luway-luway na nagbubukad sa atubangan mi.”

An mahilig sa musika na si Karl F. Klein kan Namamahalang Grupo kan Mga Saksi ni Jehova nagsabi pa: “Kadungan kan pagpaheling kan mga ladawan na ini, igwa nin akompanimento nin magayonon na musika, na arog kagayon kan Narcissus asin Humoreske.”

Igwa man nin dai malilingawan na mga pangyayari. “Kun minsan nagkakaigwa nin makangingising mga paltos,” an nagigirumdoman ni Clayton J. Woodworth, Jr. “Sarong beses an pinatatanog ‘Flee as a Bird to Your Mountain (sa Bicol, Dumulag Siring sa Sarong Gamgam Pasiring sa Saimong Bukid),’ asin an nagluwas sa tilon ladawan nin dakulaon na gigantosaurus, sarong labi-labi kadakulang hayop bago kan Baha”!

Apuera sa regular na “Photo-Drama of Creation,” dai nahaloy nagkaigwa nin “Eureka Drama” na kompuesto nin mga kabtang. (Helingon an kahon.) An saro kompuesto nin nakarekord na mga diskurso, siring man nin isinaplakang mga togtog. An iba kompuesto nin mga rekord sagkod slide. Dawa ngani an “Eureka Drama” mayo nin pelikula, iyan nagin mapangganang marhay kun ipinadadalan sa bakong gayong matawong mga lugar.

Sarong Mapuersang Kasangkapan sa Paghuhulit

Sa katapusan kan 1914, an “Photo-Drama” ikinapaheling na sa nagdadalan na may kabilogan na labing 9,000,000 sa Amerika del Norte, Europa, asin Australia. Dawa ngani kakadikit, an Mga Estudyante sa Biblia dai nawaran nin marigon na kombiksion na kaipuhan sa pagpahayag kan maogmang bareta na ginagamit an bagong paaging ini. Sinda maogmang nagkontribwir nin kinakaipuhan na mga pondo sa pag-arkila nin angay na mga lugar para sa mga padalan na ini. Kaya dakula an nagibo kan “Photo-Drama of Creation” sa pagtotokdo kan Tataramon asin mga katuyohan nin Dios sa mga nagdadalan.

Sa sarong surat para ki C. T. Russell, an sarong tawo nagsabi: “An primerong pagsongkong idto sa saimong Drama panahon nin dakulang pagbabago sa sakong buhay; o masasabi ko na an panahon nin dakulang pagbabago sa sakong kaaraman manongod sa Biblia.” An sabi nin saro pang indibiduwal: “Haros nalunod na an sakong pagtubod asin nagsasaboot na ako ikinaligtas kan ‘Photo-Drama of Creation’ na ipinadalan digdi kan nakaaging tig-init. . . . Igwa na ako ngonyan kan katoninongan na dai ikatatao kan kinaban asin dai ko iriribay sa gabos na kayamanan kaiyan.”

Si Demetrius Papageorge, haloy na nagin miembro kan mga tawohan sa opisina prinsipal kan Sosyedad, nagkomento: “An ‘Photo-Drama’ sarong obra maestrang proyekto, kun kokonsideraron niato an sadit na kabilangan kan mga Estudyante sa Biblia asin an kakadikit na kuartang makukua. Talagang nasa likod kaiyan an espiritu ni Jehova!”

[Kahon/Mga Ritrato sa pahina 8, 9]

An “Eureka Drama”

Walong bulan pakalihis kan primerong padalan kan “Photo-Drama,” namansayan kan Sosyedad an pangangaipo na maggibo nin saro pang bersion kaiyan na inapod “Eureka Drama.” Mantang an bilog na “Photo-Drama” padagos na ipinadadalan sa darakulang siudad, an “Eureka” na kompuesto nin mga kabtang nag-aatubang kan kaparehong pundamental na mensahe sa mga baryo asin puerang lugar. An sarong bersion kan “Eureka Drama” ilinadawan na nagtatao “nin pambihirang oportunidad sa mga tugang na babae” na maghulit. Taano man? Huli ta an lalagan kan mga rekord sa ponograpo kaiyan 14 kilos sana an gabat. Siempre, para sa pagpadalan, kakaipuhanon man na magdara nin ponograpo.