“Bolong sa Saimong Pusod”

SINASABI na an dakol na helang nin katawohan nagpopoon huli sa emosyonal na mga tension na arog baga kan takot, kapungawan, pagkauri, paghinanakit, pagkaongis, asin pakamate nin kasalan. Huli kaini, abaa kanakararanga kan tataramon kan Biblia na an ‘pagkatakot ki Jehova’ “bolong sa saimong pusod asin kaginhawahan sa saimong mga tolang”!​—Talinhaga 3:​7, 8.

An mga tolang iyo an pundamental na elemento na nagsusuportar sa hawak. Sa siring, ginagamit kan Biblia an terminong “mga tolang” sa piguratibong pagtaram, na nagrerepresentar sa mismong pagkatawo nin saro​—nangorogna mantang apektado nin hararom na mga pagmate asin emosyon. Alagad paanong an pagkatakot ki Jehova “bolong sa saimong pusod”?

An mga nag-espesyalisar sa Biblia nagkakalaenlaen sa saindang opinyon mapadapit sa pagkasambit kan “pusod” sa halipot na kotasyon na ini. Sinasabi nin sarong komentarista na huli ta iyan yaon sa “tahaw kan hawak,” an “pusod” tibaad nagrerepresentar sa gabos na organo na kaipuhan tanganing mabuhay. Isinusuherir nin saro pang nag-espesyalisar na an tibaad boot sabihon kan terminong “pusod” (navel) iyo an umbilical cord (an nagkokonektar kan feto sa saiyang ina), siring sa pagkagamit kaiyan sa Ezequiel 16:4. Kun siring kaini, tibaad idinodoon kan Talinhaga 3:​8 an satong pangangaipo na lubos na magdepende sa Dios​—siring nanggad sa sarong daing maginibong feto na biyong nagsasarig sa ina kaini para sa kakanon. Pero an saro pang ideya iyo na an “pusod” digdi tibaad nanonongod sa mga kalamnan asin kosog kan hawak. Sa konteksto kan bersikulong ini, tibaad an mga parteng iyan ikinokomparar an kalaenan sa “mga tolang”​—an mas masarig na sangkap kan hawak.

Ano man an espesipikong kahulogan, sarong bagay an sierto: An pagpaheling nin reberensial na pagkatakot ki Jehova iyo an dalan nin kadonongan. An pagsunod sa mga pamantayan nin Dios puedeng magkontribwir sa satong pisikal na ikararahay ngonyan. Labi pa dian, iyan puedeng magbunga kan pag-oyon sa sato ni Jehova, na magiya sa daing katapusan na buhay sa sangkap na salud​—sa pisikal asin emosyonal​—sa saiyang maabot na bagong kinaban.​— Isaias 33:​24; Kapahayagan 21:​4; 22:2.

[Picture Credit Line sa pahina 32]

Dr. G. Moscoso/SPL/Photo Researchers