Sarong Optiko na Nagsasabwag nin Banhi

Ano an koneksion kan mga paghihingoa nin sarong optiko sa Lviv, Ucrania, sa pagkabilog nin sarong kongregasyon kan Mga Saksi ni Jehova na nagtataram nin Ruso sa Haifa, Israel, mga 2,000 kilometros asin nagkapirang nasyon sa pag-oltanan an rayo? Ini salaysay na nagpapatunay kan pagigin balido kan kapahayagan kan Biblia sa Eclesiastes 11:​6: “Pagkaaga isabwag mo an saimong banhi asin sagkod sa banggi dai mo pagpahingaloan an saimong kamot; huli ta dai mo aram kun saen ini magigin mapanggana.”

AN SAMONG salaysay nagpopoon kaidtong 1990 kan si Ella, sarong hoben na babae na may Judiong pinaghalean, nag-eerok sa Lviv. Si Ella asin an saiyang pamilya nag-aandam na mag-imigrar sa Israel. Dai nahaloy bago sinda maghale, si Ella nakipaghelingan sa sarong optiko na saro sa Mga Saksi ni Jehova. Kan panahon na idto, an gibohon kan Mga Saksi ni Jehova prohibido sa Ucrania. Minsan siring, an optiko nagsadiring boot na ihiras ki Ella an saiyang pagtubod na basado sa Biblia.  Nasorpresa nia si Ella sa pagsabing an Dios may personal na ngaran. Nakapukaw iyan sa interes ni Ella, asin suminunod an sarong marahayrahay na orolay sa Biblia.

Nagustohan na marhay ni Ella an orolay kaya sia naghagad nin saro pa sa suminunod na semana asin saro pa pakatapos kaiyan. An saiyang interes nagtatalubo, alagad may problema. An panahon kan paghale kan pamilya pa-Israel marikas nang nagdadangadang. Kadakol pa kan dapat na manodan ni Ella! Tanganing lubos na makinabang sa natatadang panahon, sia naghagad nin pag-adal sa Biblia aroaldaw sagkod na sia humale. Minsan ngani dai ikinapadagos ni Ella an saiyang pag-adal kan enot niang pag-abot sa Israel, an banhi nin katotoohan nakagamot na sa saiyang puso. Sa katapusan kan taon, sia maigot na naman na nag-aadal sa Biblia.

Puminutok an guerra sa Golpo Persiano, asin an Israel inatake kan Iraq paagi sa misil. Ini an parateng topiko nin orolay. Sarong aldaw sa supermarket, nadangog nin dai tinutuyo ni Ella na nag-oorolay an sarong pamilya na nagtataram nin Ruso na bagohan na mga nag-imigrar. Minsan ngani sia mismo nag-aadal pa sana kaidto nin Biblia, dinolok ni Ella an pamilya asin ihiniras sa sainda an panuga kan Biblia na sarong matoninong na kinaban. Bilang resulta, an lola, si Galina; an ina, si Natasha; an aking lalaki, si Sasha (Ariel); asin an aking babae, si Ilana, nakiayon gabos ki Ella sa pag-adal sa Biblia.

Si Sasha an enot na miembro kan pamilya na nagpabautismo​—apisar kan dakol na pagbalo. Minsan ngani sia nag-anor sa klase, sia pinahale sa eskuelahan huli ta dai itinotogot kan saiyang Kristianong konsensia na sia makikabtang sa preparatoryong pagsasanay sa militar, sarong kahagadan na kabtang kan kurikulum kan eskuelahan. (Isaias 2:​2-4) An kaso ni Sasha nakaabot sa Korte Suprema nin Israel sa Jerusalem, na kaomaw-omaw na nagboot na ibalik si Sasha tangani na matapos nia an peryodo nin pag-eskuela. An kaso napabareta sa bilog na nasyon. Bilang resulta, dakol na Israeli an nakaaram kan mga pagtubod kan Mga Saksi ni Jehova. *

Pakagradwar nia sa haiskul, si Sasha naglaog sa bilog na panahon na ministeryo kan Mga Saksi ni Jehova. Ngonyan sia naglilingkod bilang espesyal payunir asin magurang sa kongregasyon. An tugang niang babae, si Ilana, uminiba sa saiya sa bilog na panahon na ministeryo. An saindang ina asin an saindang lola pareho na bautisadong Saksi. An banhi na isinabwag kan optiko namumunga pa!

Mientras tanto, si Ella nagpadagos sa pag-oswag sa espirituwal asin dai nahaloy naghuhulit na sa harong-harong. Sa kaenot-enote niang harong, namidbid ni Ella si Faina, na kaaabot kasuarin pa sana hale sa Ucrania. Si Faina may depresyon. Naaraman ni Ella kan huri na dai nahaloy bago sia nagtoktok sa pinto ni Faina, an napupurisaw na babae namibi sa Dios: “Dai ko kamo midbid, alagad kun nadadangog nindo ako, tabangi man nindo ako.” Sinda ni Ella nagkaigwa nin nakaaanimar na orolay. Si Faina kadakol kan ihinapot asin maingat na inestudyaran an mga simbag sa saiya. Pag-abot nin panahon, nakombensir sia na itinotokdo kan Mga Saksi ni Jehova an katotoohan hale sa Biblia. Inareglar nia an saiyang programa nin pag-adal sa unibersidad tanganing mas dakol na oras an magamit nia sa kongregasyon asin sa paghuhulit. Kan Mayo 1994, si Faina nabautismohan. Naglaog man sia sa paglilingkod bilang payunir, na sinusuportaran an saiyang sadiri paagi sa por ora sanang trabaho sa langtad nin komputer.

 Kan Nobyembre 1994, mantang naghuhulit, si Ella biglang nakamate nin biyong panluluya. Nagpaospital sia na duman naaraman paagi sa mga pag-eksamen an nagdudugong ulser sa bituka. Pagkabanggi an hemoglobin count ni Ella buminaba sagkod sa 7.2. An sarong magurang sa kongregasyon ni Ella, an tsirman kan lokal na Hospital Liaison Committee (HLC), tinawan an mga doktor nin impormasyon manongod sa kadakol na prosedimiento medikal na dai kinakaipo an paggamit nin dugo. * Mapangganang ginibo an operasyon na mayo nin dugo, asin si Ella naomayan na nin lubos.​​—Gibo 15:​28, 29.

An ginekologo ni Ella, si Karl, sarong Judio na namundag sa Alemania, naghangang marhay. Dangan nagirumdoman nia na an saiyang mga magurang, na mga natadang buhay sa Holocaust, midbid an mga Saksi ni Jehova sa mga kampo de konsentrasyon. Si Karl kadakol kan ihinapot. Minsan ngani sibot-sibot sa saiyang pagdodoktor, si Karl nagtao nin panahon para sa regular na pag-adal sa Biblia. Kan sumunod na taon, nag-aatender na sia sa semanal na Kristianong mga pagtiripon.

Ano an nagin resulta kan ikinasabwag na banhi kan optiko? Naaraman ta na an nangyari ki Sasha asin sa saiyang pamilya. Kun manongod ki Ella, sia saro nang espesyal payunir na ministro. An saiyang aking babae, si Eina, na kagagradwar pa sana sa haiskul, nagpopoon na sa sadiri niang karera bilang payunir. Si Faina naglilingkod man bilang espesyal payunir. Kun manongod ki Karl, an ginekologo ni Ella, sia bautisadong Saksi asin ministeryal na lingkod na ngonyan, na ihinihiras an nakakapaomay na kapangyarihan kan katotoohan sa Biblia sa saiyang mga pasyente asin iba pa.

An sadit na grupo nin mga nag-imigrar na nagtataram nin Ruso na nagpoon bilang kabtang kan Kongregasyon na Hebreo sa Haifa ngonyan nagin nang maigot na kongregasyon na Ruso na may labing 120 parahayag nin Kahadean. An pag-oswag na ini huli ta, sa sarong kabtang, inaprobetsaran nin sarong optiko sa Lviv an oportunidad na magsabwag nin banhi!

[Mga Nota sa Ibaba]

[Mapa sa pahina 29]

(Para sa aktuwal na format, hilingon an publikasyon)

UCRANIA

ISRAEL

[Credit Line]

Mountain High Maps® Copyright © 1997 Digital Wisdom, Inc.

[Mga Ritrato sa pahina 30]

Si Ella asin an saiyang aking babae, si Eina

[Ritrato sa pahina 31]

Sarong maogmang grupo nin mga Saksi na nagtataram nin Ruso sa Haifa. Poon sa wala patoo: Si Sasha, Ilana, Natasha, Galina, Faina, Ella, Eina, asin Karl