An Ibinalik na Banwaan ni Jehova Nag-oomaw sa Saiya sa Bilog na Daga

“Itatao ko sa mga banwaan an pagbago sa dalisay na tataramon, tanganing sinda gabos mag-apod sa ngaran ni Jehova.”—SOFONIAS 3:9.

1. Taano ta naotob an mga mensahe nin kalaglagan sa Juda asin iba pang nasyon?

ABAA kamapuersang mga mensahe nin paghokom an ipinasabong ni Jehova ki Sofonias na ipaabot! An bareta na iyan nin kalaglagan naotob sa nasyon nin Juda asin sa kabisera kaini, an Jerusalem, huli ta an mga namomoon asin an banwaan sa kabilogan dai ginigibo an kabotan ni Jehova. An kataraed na nasyon, arog kan Filistea, Moab, asin Amon, makaeeksperyensia man kan grabeng kaanggotan nin Dios. Taano? Huli sa maringis asin dakol nang siglong paglamag ninda sa banwaan ni Jehova. Sa dahelan man sanang iyan, lalaglagon an pankinaban na kapangyarihan nin Asiria, na nungka nang ititindog liwat.

2. Sairisay an minalataw na pinanonongdan sa Sofonias 3:8?

² Minsan siring, sa suanoy na Juda igwa nin nagkapirang indibiduwal na may tamang tendensia. Inantisipar ninda an paghokom nin Dios tumang sa mga maraot asin minalataw na iyo an pinanonongdan kan mga tataramon na: “‘Padagos kamong maghalat sa sako,’ an sabi ni Jehova, ‘sagkod sa aldaw na ako mabuhat sa samsam, huli ta an sakuyang hudisyal na desisyon iyo na tiriponon an mga nasyon, sararoon an mga kahadean, tanganing ibubo sa sainda an sakong kabangisan, an gabos kong naglalaad na kaanggotan; huli ta mauubos an bilog na daga kan kalayo nin sakuyang kaigotan.’”​—Sofonias 3:8.

“Dalisay na Tataramon” Para Kiisay?

3. Anong mensahe nin paglaom an ipinasabong ki Sofonias na ipaabot?

³ Iyo, ipinaabot ni Sofonias an mga mensahe ni Jehova na kalaglagan. Alagad pinasabngan man an propeta na iiba an marahayon na mensahe nin paglaom​—mensahe na makararangang marhay sa mga nagpadagos na fiel ki Jehova. Siring kan nakasurat sa Sofonias 3:​9, si Jehova Dios nagpahayag: “Sa panahon na iyan itatao ko sa mga banwaan an pagbago sa dalisay na tataramon, tanganing sinda gabos mag-apod sa ngaran ni Jehova, tanganing daramay na maglingkod sa saiya.”

4, 5. (a) Ano an mangyayari sa mga maraot? (b) Siisay an makikinabang digdi, asin taano?

 ⁴ May mga tawo na dai tatawan kan dalisay na tataramon. Tinawan sinda nin atension kan hula, na sinasabi: “Hahaleon ko sa tahaw mo an saimong mga maogmahon na may kapaabaw-abawan.” (Sofonias 3:11) Kaya hahaleon an mga mapaabaw-abaw na nagmemenus sa mga ley nin Dios asin naggigibo nin bakong matanos. Asin siisay an makikinabang digdi? An Sofonias 3:​12, 13 nagsasabi: “Wawalatan ko [ni Jehova] sa tahaw mo nin sarong banwaan na mapakumbaba asin mahoyo, asin sinda magpapaili nanggad sa ngaran ni Jehova. Kun mapadapit sa mga nawawalat kan Israel, dai sinda magibo nin karatan, ni magtataram nin kaputikan, ni may makukua man sa saindang ngoso na madayang dila; huli ta sinda mismo makarakan asin mahirigda nanggad, asin mayo nin siisay man na mapatakig sa sainda.”

⁵ Sarong fiel na natatada sa suanoy na Juda an makikinabang. Taano? Huli ta sinda naghiro kaoyon kan mga tataramon na: “Hanapa nindo si Jehova, kamo gabos na mahoyo sa daga, na naggibo kan Saiyang hudisyal na desisyon. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.”​—Sofonias 2:3.

6. Ano an nangyari sa enot na kaotoban kan hula ni Sofonias?

⁶ Sa enot na kaotoban kan hula ni Sofonias, kinastigo nin Dios an daing pagtubod na Juda paagi sa pagtogot sa Pankinaban na Kapangyarihan nin Babilonya na daogon ini asin bihagon an mga namamanwaan kaini kan 607 B.C.E. May nagkapirang naligtas, kabale si propeta Jeremias, asin an iba nagdanay na fiel ki Jehova dawa nasa pagkabihag. Kan 539 B.C.E., an Babilonya dinaog kan mga Medo asin Persiano sa pamomoon ni Hadeng Ciro. Pakalihis nin mga duwang taon, si Ciro nagpaluwas nin dekreto na nagtogot sa natatadang mga Judio na bumalik sa saindang dagang tinuboan. Pag-abot nin panahon, itinogdok liwat an templo sa Jerusalem, asin an mga saserdote nasa kamugtakan na giraray na tokdoan an mga tawo sa Ley. (Malaquias 2:7) Kaya pinaoswag ni Jehova an ibinalik na natatada​—sagkod na sinda nagdadanay na fiel.

7, 8. Kiisay uminaplikar an mga tataramon sa Sofonias 3:​14-17, asin taano ta iyan an simbag nindo?

⁷ Mapadapit sa mga nakaeeksperyensia kan pagbabalik na iyan, ihinula ni Sofonias: “Kumurahaw kang may kagayagayahan, O aking babae kan Sion! Magkurahaw ka sa kaogmahan, O Israel! Maggayagaya ka asin magrukyaw sa bilog na puso, O aking babae kan Jerusalem! Hinale ni Jehova an mga paghokom sa saimo. Irinayo nia an saimong kaiwal. An hade nin Israel, si Jehova, nasa tahaw mo. Dai ka na matatakot sa kalamidad sagkod pa man. Sa aldaw na iyan sasabihan an Jerusalem: ‘Dai ka matakot, O Sion. Dai logod manluya an saimong mga kamot. Si Jehova na saimong Dios nasa tahaw mo. Bilang makakamhan na Saro, sia magliligtas. Sia mag-oogma sa saimo na may paggayagaya. Sia magigin daing girong sa saiyang pagkamoot. Sia maggagayagaya sa saimo na may maogmang mga kurahaw.’”​—Sofonias 3:​14-17.

⁸ An makahulang mga tataramon na iyan nanonongod sa natatada na ilinuwas sa pagkabihag sa Babilonya asin ibinalik sa daga kan saindang mga apoon. Linilinaw ini sa Sofonias 3:​18-20, na dian mababasa niato: “‘An mga nagmomondo nin makuri sa pagpalta sa saimong kapanahonan nin piesta titiriponon ko [ni Jehova] nanggad; sinda nagpalta sa saimo, huli sa pagdara nin katuyawan dahel sa saiya. Uya ako minahiro tumang sa gabos na nagpapasakit nin makuri sa saimo, sa panahon na iyan; asin ililigtas ko sia na nagkikiangkiang, asin sia na nakawarak titiponon ko. Asin gigibohon ko sindang sarong kaomawan asin sarong kabantogan sa bilog na daga kan saindang kasosopgan. Sa panahon na iyan dadarahon ko kamo banwaan sa laog, minsan sa panahon kan sakuyang pagtipon sa saindo. Huli ta gigibohon ko kamong mani kabantogan asin kaomawan sa tahaw kan gabos na banwaan sa daga, kun tiponon ko  nang pabalik an mga bihag sa saindo sa atubangan kan saindong mga mata,’ an sabi ni Jehova.”

9. Paano si Jehova naggibo nin kabantogan para sa saiyang sadiri may koneksion sa Juda?

⁹ IImahinara an pagkabigla kan nakapalibot na mga nasyon na kaiwal kan banwaan nin Dios! An mga nag-eerok sa Juda binihag kan poderosong Babilonya, na mayo nin malinaw na paglaom na makatalingkas pa. Apuera dian, an saindang daga daing tawo. Minsan siring, paagi sa kapangyarihan nin Dios, sinda ibinalik sa saindang dagang tinuboan pakalihis nin 70 taon, mantang an kaiwal na mga nasyon nakatalagang laglagon. Kanigoan na kabantogan an ginibo ni Jehova para sa saiyang sadiri paagi sa pagbalik sa fiel na natatadang idto! Ginibo nia sindang “mani kabantogan asin kaomawan sa tahaw kan gabos na banwaan.” An pagbabalik na iyan nagtao nanggad nin kaomawan ki Jehova asin sa mga nagdadara kan saiyang ngaran!

Ilinangkaw an Pagsamba ki Jehova

10, 11. Noarin mangyayari an mayor na kaotoban kan hula ni Sofonias na pagbabalik, asin paano niato naaaraman ini?

¹⁰ Saro pang pagbabalik an nangyari kan enot na siglo kan Komun na Kapanahonan, kan an sarong natatada nin Israel tiponon ni Jesu-Cristo sa tunay na pagsamba. Saro idtong patanaw kan mangyayari pa sa ngapit, huli ta an mayor na kaotoban kan pagbabalik sa ngapit pa. An hula ni Miqueas nagsabi: “Mangyayari sa huring kabtang kan mga aldaw na an bukid kan harong ni Jehova marigon na mapatitindog sa ibabaw kan alitoktok kan kabukidan, asin iyan siertong ilalangkaw sa ibabaw kan mga bolod; asin pasiring dian madaralagan an mga banwaan.”​—Miqueas 4:1.

¹¹ Noarin ini mangyayari? Siring kan sabi kan hula, “sa huring kabtang kan mga aldaw”​—iyo, durante kan “huring mga aldaw” na ini. (2 Timoteo 3:1) Mangyayari ini bago kan katapusan kan presenteng maraot na sistema nin mga bagay mantang an mga nasyon nagsasamba pa man giraray sa falsong mga dios. An sabi kan Miqueas 4:​5: “An gabos na banwaan, kun para sa sainda, maglalakaw an balang saro sa ngaran kan saiyang dios.” Asin kumusta man an tunay na mga parasamba? An hula ni Miqueas minasimbag: “Alagad, kun para sa sato, kita maglalakaw sa ngaran ni Jehova na satong Dios sagkod sa panahon na daing talaan, sagkod lamang pa ngani.”

12. Paano ilinangkaw an tunay na pagsamba sa huring mga aldaw na ini?

 ¹² IKun siring, sa huring mga aldaw na ini “an bukid kan harong ni Jehova marigon [nang napatitindog] sa ibabaw kan alitoktok kan kabukidan.” An halangkaw na tunay na pagsamba ki Jehova ikinabalik na, marigon na napatindog, asin ilinangkaw sa ibabaw nin gabos na iba pang klase nin relihion. Siring kan sinabi man kan hula ni Miqueas, “dian madaralagan an mga banwaan.” Asin an mga naggigibo nin tunay na relihion “maglalakaw sa ngaran ni Jehova na [saindang] Dios sagkod sa panahon na daing talaan, sagkod lamang pa ngani.”

13, 14. Kasuarin luminaog “sa huring kabtang kan mga aldaw” an kinaban na ini, asin ano an nangyayari poon kaidto mapadapit sa tunay na pagsamba?

¹³ An mga pangyayari bilang kaotoban kan hula sa Biblia nagpapatunay na an kinaban na ini luminaog na “sa huring kabtang kan mga aldaw”​—sa huring mga aldaw kaiyan​—kan taon 1914. (Marcos 13:​4-10) An kasaysayan nagpapaheling na pinonan ni Jehova na tiponon sa tunay na pagsamba an sarong fiel na natatada nin mga linahidan na igwa kan langitnon na paglaom. Sinundan ini kan pagtipon sa “sarong dakulang kadaklan . . . hale sa gabos na nasyon asin tribo asin banwaan patin tataramon”​—an mga igwa kan paglaom na mabuhay sagkod lamang digdi sa daga.​—Kapahayagan 7:9.

¹⁴ Poon kan Guerra Mundial I asin sagkod ngonyan na aldaw, an pagsamba ki Jehova kan mga nagdadara kan saiyang ngaran makosog na nag-aabante sa irarom kan saiyang paggiya. Duminakol poon sa pirang ribo pakatapos kan Guerra Mundial I, an mga parasamba ki Jehova igwa na ngonyan nin kabilangan na mga anom na milyon, na tiniripon sa mga 91,000 na kongregasyon sa 235 kadagaan. Kada taon, an mga parabalangibog na ini kan Kahadean nagdudusay nin labi nanggad sa sarong bilyon na oras sa pag-omaw sa Dios sa publiko. Malinaw na an mga Saksing ini ni Jehova an nag-ootob sa makahulang mga tataramon ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”​—Mateo 24:14.

15. Paano naootob ngonyan an Sofonias 2:3?

¹⁵ An Sofonias 3:​17 nagsasabi: “Si Jehova na saimong Dios nasa tahaw mo. Bilang makakamhan na Saro, sia magliligtas.” An espirituwal na prosperidad na nakakamtan kan mga lingkod ni Jehova sa huring mga aldaw na ini direktang resulta kan pagigin yaon nia ‘sa tahaw ninda’ bilang saindang makapangyarihan sa gabos na Dios. Totoo ini ngonyan siring kaidto sa pagbabalik kan suanoy na Juda kaidtong 537 B.C.E. Sa siring maheheling niato kun paano nagkakaigwa nin mayor na kaotoban an Sofonias 2:​3 sa satong panahon kan iyan magsabi: “Hanapa nindo si Jehova, kamo gabos na mahoyo sa daga.” Kan 537 B.C.E., kabale sa “gabos” na iyan an natatada sa mga Judio na nagbalik hale sa pagkabihag sa Babilonya. Ngonyan nagrerepresentar iyan sa mga mahoyo sa gabos na nasyon sa enterong daga, idtong mga naghihimate sa lakop sa globong paghuhulit kan Kahadean asin nagdadaralagan pasiring sa “bukid kan harong ni Jehova.”

 Nag-ooswag an Tunay na Pagsamba

16. Ano an posibleng reaksion kan satong mga kaiwal dapit sa prosperidad kan mga lingkod ni Jehova sa presenteng mga panahon?

¹⁶ Pakalihis kan 537 B.C.E., dakol sa nakapalibot na nasyon an nasorpresa sa pagkabalik kan mga lingkod nin Dios sa tunay na pagsamba sa saindang dagang tinuboan. Pero, an pagbabalik na iyan nangyari sa medyo sadit na sokol. Maiimahinar daw nindo an sinasabi kan nagkapira​—maski kan mga kaiwal kan banwaan nin Dios​—ngonyan na naheheling ninda an makangangalas na pag-oswag, prosperidad, asin pag-abante kan mga lingkod ni Jehova sa presenteng mga panahon? Posibleng marhay na an nagkapira sa mga kaiwal na ini kapareho kan mga Fariseo an saboot kan maheling ninda an mga tawo na nagbuburunyog ki Jesus. Sinda nagkagsing: “Helinga! An kinaban nagsusunod na sa saiya.”​—Juan 12:19.

17. Ano an sinabi nin sarong parasurat manongod sa Mga Saksi ni Jehova, asin anong pag-oswag an naeksperyensiahan ninda?

¹⁷ Sa saiyang librong These Also Believe, si Propesor Charles S. Braden nagsabi: ‘An Mga Saksi ni Jehova literal na kinobrehan an daga paagi kan saindang paghuhulit. Totoong masasabi na mayo ni sarong grupong relihioso sa kinaban na nagpaheling nin kaigotan asin pagkadesidido sa pagprobar na palakopon an maogmang bareta kan Kahadean na orog pa sa Mga Saksi ni Jehova. An mobimientong ini posibleng marhay na padagos na maoswag.’ Tama nanggad sia! Kan isurat nia an mga tataramon na ini kaidtong 50 taon na an nakaagi, mga 300,000 sanang Saksi an naghuhulit sa bilog na kinaban. Ano daw an sasabihon nia ngonyan, na mga 20 doble kan kabilangan na iyan​—mga anom na milyon​—an naghuhulit kan maogmang bareta?

18. Ano an dalisay na tataramon, asin kiisay iyan itinao nin Dios?

¹⁸ Paagi sa saiyang propeta, an Dios nanuga: “Itatao ko sa mga banwaan an pagbago sa dalisay na tataramon, tanganing sinda gabos mag-apod sa ngaran ni Jehova, tanganing daramay na maglingkod sa saiya.” (Sofonias 3:9) Sa huring mga aldaw na ini, an Mga Saksi ni Jehova an nag-aapod sa ngaran ni Jehova, na naglilingkod sa saiya nin sararo na may dai mapapatod na bogkos nin pagkamoot​—iyo, “daramay.” Sinda an tinawan ni Jehova kan dalisay na tataramon. Kabale sa dalisay na tataramon na ini an tamang pakasabot sa katotoohan manongod sa Dios asin sa saiyang mga katuyohan. Si Jehova sana an nagtatao kan pakasabot na ini paagi sa saiyang banal na espiritu. (1 Corinto 2:10) Kiisay nia itinao an saiyang espiritu? Solamente “sa mga nagkukuyog sa saiya bilang namamahala.” (Gibo 5:32) An Mga Saksi ni Jehova sana an andam na magkuyog sa Dios bilang Namamahala sa gabos na bagay. Iyan an dahelan na sinda an tinatawan kan espiritu nin Dios asin nagtataram kan dalisay na tataramon, an katotoohan manongod ki Jehova asin sa saiyang makangangalas na mga katuyohan. Ginagamit ninda an dalisay na tataramon tanganing omawon si Jehova sa bilog na daga sa mahiwas asin nag-ooswag na paagi.

19. Ano an kalabot sa pagtaram kan dalisay na tataramon?

¹⁹ An kalabot sa pagtaram kan dalisay na tataramon bako sanang pagtubod sa katotoohan asin pagtotokdo kaiyan sa iba kundi pag-oyon man kan gawe-gawe nin saro sa mga ley asin prinsipyo nin Dios. An linahidan na mga Kristiano an nangengenot sa paghanap ki Jehova asin pagtaram kan dalisay na tataramon. Isip-isipa nindo an nahaman! Minsan ngani an mga linahidan nainaan na an kabilangan sa mayo nang 8,700, mga anom na milyon na iba pa an nag-aarog sa saindang pagtubod paagi sa paghanap ki Jehova asin pagtaram kan dalisay na tataramon. An mga ini an nagdadakol na dakulang kadaklan hale sa gabos na nasyon na naggigibo nin pagtubod sa pantubos na atang ni Jesus, naggigibo nin sagradong paglilingkod sa daganon na patyo kan espirituwal na templo nin Dios, asin makaliligtas sa “dakulang kahorasaan”  na madali nang dumatong sa maraot na kinaban na ini.​—Kapahayagan 7:​9, 14, 15.

20. Ano an natatagama para sa fiel na mga linahidan asin sa mga minakompuesto sa dakulang kadaklan?

²⁰ An dakulang kadaklan gigiyahan pasiring sa matanos na bagong kinaban nin Dios. (2 Pedro 3:13) Si Jesu-Cristo asin an 144,000 na linahidan na binuhay liwat sa langitnon na buhay tanganing maglingkod bilang mga hade asin saserdote sa kaibanan nia an makompuesto sa bagong grupo na mamamahala sa daga. (Roma 8:​16, 17; Kapahayagan 7:​4; 20:6) An mga makaliligtas sa dakulang kahorasaan matrabaho tanganing gibohon na paraiso an daga asin padagos na magtataram kan itinao nin Dios na dalisay na tataramon. Bilang dagdag na aplikasyon, minaaplikar man sa sainda an mga tataramon na: “An gabos mong aki magigin mga tawong tinokdoan ni Jehova, asin an katoninongan kan saimong mga aki magigin abunda. Ika marigon na mapatitindog sa katanosan mismo.”​—Isaias 54:​13, 14.

Pinakadakulang Pagtotokdo sa Kasaysayan

21, 22. (a) Siring kan sinasabi sa Gibo 24:​15, sairisay an kaipuhan na tokdoan kan dalisay na tataramon? (b) Anong daing kaagid na pagtotokdo an gigibohon sa daga sa irarom kan pamamahala kan Kahadean?

²¹ An sarong dakulaon na grupo na tatawan nin oportunidad na manodan an dalisay na tataramon sa bagong kinaban iyo an mga nasasambitan sa Gibo 24:​15, na nagsasabi: “Magkakaigwa nin pagkabuhay liwat an mga matanos sagkod an mga bakong matanos.” Kan nakaagi, binilyon na tawo an nabuhay asin nagadan na mayo nin tamang kaaraman dapit ki Jehova. Sa aregladong paagi, bubuhayon nia sinda liwat. Asin an mga binuhay liwat na iyan kaipuhan na tokdoan kan dalisay na tataramon.

²² Kanigoan na pribilehio an makikabtang sa dakulang pagtotokdo na iyan! Iyan an magigin pinakadakulang gibong pagtotokdo sa kasaysayan nin katawohan. Iyan gabos gigibohon sa irarom kan maboot na pamamahala ni Cristo Jesus na may kapangyarihan sa Kahadean. Bilang resulta, sa katapustapusi maheheling kan katawohan an kaotoban kan Isaias 11:​9, na nagsasabi: “An daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.”

23. Taano ta sasabihon nindo na kita igwa nin dakulang pribilehio bilang banwaan ni Jehova?

²³ Kanigoan an pribilehio niato sa huring mga aldaw na ini na mag-andam para sa makangangalas na panahon na iyan na an kaaraman dapit ki Jehova tunay nanggad na makapapano sa daga! Asin kanigoan an pribilehio niato ngonyan mismo na magin banwaan nin Dios, na mga nakaeeksperyensia kan dakulang kaotoban kan makahulang mga tataramon na nakasurat sa Sofonias 3:20! Maheheling niato dian an asegurasyon ni Jehova: “Gigibohon ko kamong mani kabantogan asin kaomawan sa tahaw kan gabos na banwaan sa daga.”

Ano an Isisimbag Nindo?

• An hula ni Sofonias na pagbabalik nagkaigwa nin anong mga kaotoban?

• Paano nag-ooswag an tunay na pagsamba sa huring mga aldaw na ini?

• Anong dakulang pagtotokdo an mangyayari sa bagong kinaban?

[Mga Hapot Para sa Pag-adal]

[Ritrato sa pahina 25]

An banwaan ni Jehova nagbalik sa saindang dagang tinuboan tanganing establisaron liwat an dalisay na pagsamba. Aram daw nindo an kahulogan kaini ngonyan?

[Mga Ritrato sa pahina 26]

Paagi sa pagtaram kan “dalisay na tataramon,” iinaalok kan Mga Saksi ni Jehova sa mga tawo an nakararangang mensahe kan Biblia