Nangingibabaw an Tunay na Kristianismo!
Nangingibabaw an Tunay na Kristianismo!
“Sa makakamhan na paagi an tataramon ni Jehova padagos na nagtalubo asin nangibabaw.”—GIBO 19:20.
1. Iladawan an pagtalubo kan Kristianismo durante kan enot na siglo.
PINALAAD kan kapangyarihan kan banal na espiritu, ibinalangibog kan enot na mga Kristiano an tataramon nin Dios na may kaigotan na dai mapaluluya. An sarong historyador nagsurat: “An Kristianismo naglakop nin pambihira karikas sa Romanong kinaban. Pag-abot kan taon 100 posible na an gabos na probinsia sa linderos kan Mediterraneo igwa na nin Kristianong komunidad sa laog kaiyan.”
2. Paano prinobaran ni Satanas na kontrahon an maogmang bareta, asin paano ini ihinula?
2 Dai kayang patunongon ni Satanas na Diablo an enot na mga Kristiano. Imbes, kinontra nia an epekto kan maogmang bareta paagi sa ibang medyos—an apostasiya. Ihinula ni Jesus an pangyayaring ini paagi sa saiyang parabola kan trigo asin mga doot. (Mateo 13:24-30, 36-43) Nagpatanid man si apostol Pedro na malataw an falsong mga paratokdo sa laog kan kongregasyon, na magdadara nin mapanlaglag na mga sekta. (2 Pedro 2:1-3) Kaagid kaiyan, si apostol Pablo espesipikong nagpatanid na an apostasiya maeenot sa aldaw ni Jehova.—2 Tesalonica 2:1-3.
3. Ano an nangyari kasunod kan pagkagadan kan mga apostol?
3 Kasunod kan pagkagadan kan mga apostol, an maogmang bareta natahoban nin paganong mga katokdoan asin pilosopiya. Siring kan ihinula, piniripit asin inatian kan falsong mga paratokdo an dalisay na mensahe nin katotoohan. Luway-luway, an tunay na Kristianismo tinahoban nin palsipikasyon na inaapod Kakristianohan. Naglataw an grupong klero na nagprobar na haleon an Biblia sa kamot kan ordinaryong mga tawo. Minsan ngani nagdakol an kabilangan kan mga nagsasabing sinda Kristiano, an saindang pagsamba bakong dalisay. An Kakristianohan nagtalubo sa geograpikong paagi asin nagin makapangyarihan na institusyon patin sarong nangingibabaw na puersa sa kulturang Solnopan, alagad mayo iyan kan bendisyon nin Dios ni kan saiyang espiritu.
4. Taano ta dai nagin mapanggana an pakana ni Satanas na olangon an katuyohan nin Dios?
4 Minsan siring, an pakana ni Satanas na olangon an katuyohan ni Jehova seguradong masusudya. Dawa durante kan pinakamamondong mga aldaw nin apostasiya, an tunay na Kristianismo buhay pa man giraray sa tahaw nin nagkapira. An mga tawong nagkopya kan Biblia naggibo nin dakulang paghihingoa tanganing gibohon iyan nin daing kasalasala. Sa siring, an Biblia mismo nagdanay na kompleto, minsan ngani an mensahe kaiyan biniribid nin dakol na naghihingakong igwa kan autoridad na magtokdo kaiyan. Sa nag-aging mga siglo an mga intelektuwal na arog baga ki Jeronimo asin Tyndale pusoan na trinadusir asin iwinaras an Tataramon nin Dios. Minilyon na tawo an nakaheling kan Biblia asin nin sarong porma nin Kristianismo, minsan ngani iyan palsipikado.
5. Ano an ihinula ni propeta Daniel mapadapit sa “tunay na kaaraman”?
5 Sa kahurihurihi, siring kan ihinula sa libro ni Daniel, ‘an tunay na kaaraman nagin abunda.’ Nangyari ini sa “panahon kan katapusan”—an panahon na nabubuhayan niato ngonyan. (Daniel 12:4) An mga namomoot sa katotoohan sa bilog na kinaban giniyahan kan banal na espiritu pasiring sa tamang kaaraman dapit sa tunay na Dios asin sa saiyang katuyohan. Dawa pakalihis nin dakol na siglo nin apostatang katokdoan, nangibabaw an tataramon nin Dios! Ngonyan, an maogmang bareta ibinabalangibog sa gabos na lugar, na itinotokdo an mga tawo sa paglaom na sarong nakaoogmang marhay na bagong kinaban. (Salmo 37:11) Siyasaton niato ngonyan an pagtalubo na ini sa presenteng aldaw kan tataramon nin Dios.
Pagtalubo kan Tataramon Ngonyan
6. Anong mga katotoohan an nasabotan kan Mga Estudyante sa Biblia pag-abot kan taon 1914?
6 Sa huring kabtang kan ika-19 siglo, pinahiro kan katotoohan sa Biblia an sarong sadit na grupo nin Mga Estudyante sa Biblia, na midbid ngonyan na Mga Saksi ni Jehova. Pag-abot nin 1914 an Biblia nagin buhay sa sainda. Nasabotan ninda an makangangalas na mga katotoohan may labot sa katuyohan nin Dios. Odok sindang napahiro kan pagkamoot ni Jehova paagi sa pagsugo kan saiyang Aki digdi sa daga, sa siring binubuksan an dalan pasiring sa buhay na daing katapusan. Naaraman asin nasabotan man ninda an ngaran asin personalidad nin Dios. Dugang pa, narealisar ninda na an “mga panahon kan mga Hentil” natapos na, na nagin senyal na harani na an panahon na papangyarihon kan gobyerno kan Kahadean nin Dios an mga bendisyon para sa katawohan. (Lucas 21:24, King James Version) Abaa kamamuraway na maogmang bareta! An mapuersang mga katotoohan na ini kinaipuhan na ihiras sa gabos na tawo, sa gabos na lugar. Buhay an nakataya!
7. Paano nangibabaw an katotoohan sa Biblia sa presenteng mga panahon?
7 Binendisyonan ni Jehova an nagkapirang Kristianong idto na linahidan nin espiritu. Ngonyan, an kabilangan kan mga uminako sa tunay na Kristianismo labi na sa sais milyones. An tataramon nin Dios luminakop man sa geograpikong paagi, ta an Mga Saksi ni Jehova manonompongan sa 235 kadagaan. Apuera kaini, an katotoohan sa Biblia nagkaigwa nin puersa, na nangingibabaw sa gabos na balakid, relihioso asin iba pa. An lakop sa globong paghuhulit na ini saro pang dai mapahihimutikan na prueba na si Jesus presente na na may kapangyarihan sa Kahadean.—Mateo 24:3, 14.
8. Ano an sinasabi nin nagkapira manongod sa pagtalubo kan Mga Saksi ni Jehova?
8 Kun paanong an mga historyador nagkomento dapit sa makangangalas na pagtalubo kan Kristianismo kaidtong enot na siglo, dakol man na intelektuwal an nagkomento dapit sa pagtalubo kan banwaan ni Jehova sa presenteng mga panahon. Sa Estados Unidos, duwang intelektuwal an magkaibang nagsurat: “Durante kan nakaaging 75 taon ikinapadagos kan Mga Saksi ni Jehova an sarong ekstraordinaryong rikas nin pagtalubo . . . asin nagibo iyan nin lakop sa globo.” An sarong magasin sa Sirangan na Aprika inaapod an mga Saksi bilang “saro sa pinakamarikas dumakol asin iginagalang na marhay na mga relihion sa kinaban na midbid sa dakol na nasyon huli sa lubos na pagsusog kaiyan sa biblikong mga katokdoan.” Asin an sarong konserbatibong magasin na Katoliko, na ipinublikar sa Europa, nasasambitan an “marikason na pagtalubo kan Mga Saksi ni Jehova.” Ano an nakakontribwir sa pagtalubo na ini?
An Banal na Espiritu Naghihiro Ngonyan
9. (a) Ano an sarong pangenot na dahelan kun taano ta nangingibabaw an tataramon nin Dios ngonyan? (b) Paano dinadagka ni Jehova an mga tawo pasiring sa saiya?
9 An sarong pangenot na dahelan na an tataramon nin Dios nangingibabaw ngonyan iyo na an espiritu ni Jehova naghihiro sa makapangyarihan na paagi, siring kaidtong enot na siglo. Sinabi ni Jesus: “Dai nin nakadodolok sa sako kun dai sia dagkahon kan Ama na nagsugo sa sako.” (Juan 6:44) Isinusuherir kan mga tataramon na ini na maboot na inaatraer nin Dios an mga may tamang tendensia, na nangangapodan sa saindang puso. Paagi sa paghuhulit kan saiyang mga Saksi, dinadagka ni Jehova na maglingkod sa saiya “an kawiliwiling mga bagay kan gabos na nasyon”—an mahoyo, arog-karnerong mga tawo sa daga.—Haggeo 2:6, 7.
10. Anong klaseng mga tawo an naghimate sa tataramon nin Dios?
10 Bako sanang tinatawan nin puersa kan banal na espiritu an banwaan nin Dios na darahon an tataramon nin Dios sa kaporoporohi kan daga; pinahiro kaiyan an gabos na klase nin tawo na maghimate sa maogmang bareta. Totoo nanggad, an mga uminako sa tataramon nin Dios naggikan sa “lambang tribo asin tataramon asin banwaan patin nasyon.” (Kapahayagan 5:9; 7:9, 10) Manonompongan sinda sa tahaw nin mga mayaman asin dukha, sa mga halangkaw an inadalan asin daing inadalan. An nagkapira inako an tataramon mantang may guerra asin maringis na paglamag, mantang an iba inako iyan durante nin mga panahon nin katoninongan asin kaginhawahan. Sa irarom nin lambang klase nin gobyerno, sa gabos na kultura, poon sa mga kampo de konsentrasyon sagkod sa mga palasyo, an mga lalaki asin babae naghihimate sa maogmang bareta.
11. Paano naghihiro an banal na espiritu sa buhay kan banwaan nin Dios, asin anong pagkakalaen an risang-risa?
11 Sa ibong kan makangangalas na pagkalaenlaen sa banwaan nin Dios, sinda nag-oontok na sararo. (Salmo 133:1-3) Saro pa ining ebidensia na an banal na espiritu naghihiro sa buhay kan mga naglilingkod sa Dios. An saiyang espiritu sarong makapangyarihan na puersa sa ikararahay na nagpapangyari sa saiyang mga lingkod na ipaheling an pagkamoot, kagayagayahan, katoninongan, kabootan, asin iba pang nakaaatraer na mga kualidad. (Galacia 5:22, 23) Ngonyan, malinaw niatong namamansayan an ihinula ni propeta Malaquias kaidtong haloy na an nakaagi: “Maheheling . . . nindo an kalaenan kan matanos asin maraot, kan naglilingkod sa Dios asin kan dai naglingkod sa saiya.”—Malaquias 3:18.
An Tataramon nin Dios Nangingibabaw sa Maigot na mga Trabahador
12. Ano an saboot kan Mga Saksi ni Jehova manongod sa pag-eebanghelyo, asin anong reaksion sa saindang paghuhulit an inaasahan ninda?
12 An Mga Saksi ni Jehova ngonyan bakong daing ganang mga parasimba. Sinda aktibong nakikikabtang sa pag-eebanghelyo. Arog kan enot na mga Kristiano, gikan sa boot sindang nagpepresentar na gibohon an kabotan nin Dios, na naghihingoang tabangan an iba na manodan an manongod sa mga panuga sa Kahadean ni Jehova. Sinda mga kapwa trabahador nin Dios na, kaoyon kan saiyang banal na espiritu, tinitipon an iba pa para sa paglilingkod ki Jehova. Sa paggibo kaiyan, ipinababanaag ninda an pagkaherak asin pagkamoot ni Jehova sa daing pagtubod na katawohan. Asin ginigibo ninda iyan maski na napapaatubang sa pagkaindiperente, pag-olog-olog, asin paglamag. Inandam ni Jesus an saiyang mga parasunod para sa laen-laen na reaksion sa maogmang bareta. Sinabi nia: “An oripon bakong orog sa saiyang kagurangnan. Kun ako pinaglamag ninda, kamo man paglalamagon ninda; kun inotob ninda an sakong tataramon, ootobon man ninda an saindo.”—Juan 15:20.
13. Anong mga aspekto na mayo sa Kakristianohan an abunda sa tahaw kan Mga Saksi ni Jehova?
13 Dai puedeng dai kita mapahanga sa pagkakaagid kan Mga Saksi ni Jehova ngonyan asin kan mga uminako sa tunay na Kristianismo kaidtong enot na siglo. Risang marhay man an pagkakalaen kan Mga Saksi ni Jehova asin kan Kakristianohan ngonyan. Pakatapos na magsurat manongod sa kaigotan sa pag-ebanghelyo kan enot na mga Kristiano, an sarong intelektuwal nag-agrangay: “Kun dai babagohon an presenteng palakaw sa iglesia tanganing sa giraray an gibohon na pag-eebanghelyo magin sarong bagay na ibinibilang na obligasyon nin lambang bautisadong Kristiano, asin pinatutunayan nin sarong kualidad nin pamumuhay na nakalalabi sa naheheling sa mga mayo nin pagtubod, harayo an posibilidad na kita maoswag nanggad.” An mismong mga aspekto na mayo sa Kakristianohan abunda sa tahaw kan Mga Saksi ni Jehova! An nasa sainda buhay na pagtubod, tunay na pagtubod, asin pagtubod na basado sa katotoohan sa Biblia na nagtutulod sa sainda na ihiras sa gabos na maghihinanyog.—1 Timoteo 2:3, 4.
14. Paano minansay ni Jesus an saiyang ministeryo, asin anong aktitud an ipinaheheling kan saiyang mga disipulo ngonyan?
14 Isinaboot na gayo ni Jesus an saiyang ministeryo, na ginibo iyan na pangenot sa saiya. Sinabi nia ki Pilato: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan.” (Juan 18:37) Kapareho ki Jesus an saboot kan banwaan nin Dios. Huling nasa puso ninda an katotoohan sa Biblia, hinihingoa nindang humanap nin mga paagi na ikahiras iyan sa pinakadakol na mapupuede. An nagkapira sa mga paaging ini nagpapaheling nin pambihirang pagkamapag-imbento.
15. Paano an nagkapira nagpaheling nin pagkamapag-imbento sa paghuhulit kan maogmang bareta?
15 Sa sarong nasyon sa Amerika del Sur, an mga Saksi nagbiahe sa sarong sanga kan Salog nin Amazon tanganing mapaabotan kan katotoohan an mga tawo. Minsan siring, kan an iriwal sibil biglang pumutok kan 1995, ibinawal sa mga sibilyan an pag-agi sa salog. Desididong ipadagos an pagtao nin mga publikasyon sa Biblia sa mga interesado, an mga Saksi nagdesisyon na ipaanod na nakalataw sa tubig an mensahe. Naggibo sinda nin mga surat asin ilinaog iyan na may kaibang mga kopya kan magasin na An Torrengbantayan asin Awake! sa plastik na mga basiyo. Dangan iinapon ninda sa salog an mga basiyo. Nagpadagos ini sa laog nin apat may kabangang taon sagkod na binuksan giraray an salog para sa mga sibilyan. Sa gabos na tampi kan salog, an mga tawo nagpasalamat sa mga Saksi huli sa mga babasahon. An sarong babae na inaadalan kaidto sa Biblia kinugos sinda na may mga luha sa saiyang mga mata asin nagsabi: “Paghona ko nungka ko na kamong maheheling giraray. Minsan siring, kan magpoon na maresibi ko an mga babasahon sa basiyo, aram kong dai nindo ako nalingawan!” An iba pang nag-eerok sa tampi kan salog nagsabi na paorootro nindang binasa an mga magasin. An dakol na sadit na baryo igwa nin “opisina nin koreo”—sarong nagbabarubalisusong parte kan salog kun saen temporaryong natitipon an naglalatawlataw na mga bagay. Duman parateng nagheheling an mga interesado kun igwa nin ano man na “surat” hale sa salog.
16. Paano an pagpresentar niato kan satong sadiri kun beses nagbubukas kan dalan sa paggibo nin mga disipulo?
16 An paghuhulit kan maogmang bareta dinidirehiran asin sinusuportaran ni Jehova Dios asin kan saiyang makapangyarihan na mga anghel. (Kapahayagan 14:6) Paagi sana sa pagpresentar kan satong sadiri, kun beses minalataw an dai linalaoman na mga oportunidad sa paggibo nin mga disipulo. Sa Nairobi, Kenya, an duwang Kristiana na naglilingkod sa langtad nakatapos nang hulitan an mga harong na iinasignar sa sainda. Sarong hoben na babae an biglang nagrani sa sainda asin ogmahon na nagsabi: “Kaidto pa ako namimibi na makanompong nin saro na arog nindo.” Nakimaherak sia sa mga Saksi na magduman tolos sa saiyang harong tanganing mag-orolay, asin naponan siang adalan sa Biblia kan mismong aldaw na idto. Taano ta siring kaapretado an pagrani kan babae sa duwang Kristiana? Mga duwang semana bago kaini, nagadan an saiyang omboy. Kaya kan makaheling sia nin sarong aking lalaki na may daradarang pulyeto na “What Hope for Dead Loved Ones?” gustohon niang magkaigwa kaiyan asin hinagad nia iyan sa aki. Habo kan aki, alagad itinokdo an mga Saksi na nagtao sa saiya kan pulyeto. Dai nahaloy nagin marahay an pag-oswag sa espirituwal kan babae asin mas nakaya nang atubangon an makolog sa boot na pagkagadan kan saiyang aki.
An Pagkamoot nin Dios Dapat na Mangibabaw
17-19. Anong pagkamoot an ipinaheling ni Jehova sa katawohan paagi sa pantubos?
17 An pagtalubo kan tataramon nin Dios sa bilog na daga konektadong marhay sa atang na pantubos ni Cristo Jesus. Arog kan pantubos, an gibohon na paghuhulit sarong kapahayagan kan pagkamoot ni Jehova sa mga tawo sa gabos na lugar. Si apostol Juan pinasabngan na sumurat: “An Dios namoot na gayo sa kinaban [nin katawohan] na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.”—Juan 3:16.
18 Isip-isipa an pagkamoot na ipinaheling ni Jehova paagi sa pagtao kan pantubos. Sa haloyon na panahon, an Dios may dayupot na relasyon sa saiyang mahal, bugtong na Aki, “an kapinonan kan paglalang nin Dios.” (Kapahayagan 3:14) Namomotan na marhay ni Jesus an saiyang Ama, asin namotan ni Jehova an saiyang Aki “bago pa kan pagtugdas kan kinaban.” (Juan 14:31; 17:24) Tinogotan ni Jehova an namomotan na Aking ini na umagi nin kagadanan tanganing an mga tawo mag-ako nin buhay na daing katapusan. Kanigoan kanakapupukaw nin may pagkangirhat na paggalang na kapahayagan nin pagkamoot para sa katawohan!
19 An Juan 3:17 nagsasabi: “An Dios nagsugo kan saiyang Aki sa kinaban, bakong tanganing sia maghokom sa kinaban, kundi tanganing ikaligtas an kinaban paagi sa saiya.” Sa siring, sinugo ni Jehova an saiyang Aki sa sarong mamomoton na misyon na pagliligtas, bakong misyon na paghokom o pagkondenar. Kaoyon ini kan mga tataramon ni Pedro: “Dai . . . mawot [ni Jehova] na an siisay man malaglag kundi mawot nia na an gabos makapagsolsol.”—2 Pedro 3:9.
20. Sa anong paagi konektado sa paghuhulit kan maogmang bareta an kaligtasan?
20 Huling itinao na an legal na basehan para sa kaligtasan na may kaibang dakulang pagsasakripisyo sa sadiri nia, boot ni Jehova na aprobetsaran iyan kan pinakadakol na mapupuede. Si apostol Pablo nagsurat: “‘An gabos na nag-aapod sa ngaran ni Jehova maliligtas.’ Minsan siring, paano sinda mag-aapod sa saiya na dai ninda tinutubod? Paano man sinda matubod sa saiya na dai ninda nadangog? Paano man sinda makadadangog kun mayo nin parahulit?”—Roma 10:13, 14.
21. Ano an maninigo na magin saboot niato manongod sa oportunidad na makikabtang sa paghuhulit?
21 Kanigoan kamakangangalas na pribilehio an makikabtang sa lakop sa globong paghuhulit asin pagtotokdo na ini! Bako iyan na pasil, alagad ta kanigoan an paggayagaya ni Jehova kun minamasdan nia an saiyang banwaan na fiel na inootob an katotoohan asin ihinihiras sa iba an maogmang bareta! Kaya ano man an kamugtakan nindo, togoti nindo an espiritu nin Dios asin an pagkamoot sa puso nindo na motibaron kamong makikabtang sa gibohon na ini. Asin girumdomon nindo na an naheheling niatong nahahaman sa bilog na kinaban nagtatao nin nakakokombensir na ebidensia na madali nang otobon ni Jehova Dios an saiyang panuga na ponan an mamuraway na “bagong kalangitan asin sarong bagong daga” na dian “magdadanay an katanosan.”—2 Pedro 3:13.
Natatandaan daw Nindo?
• Taano ta dai kayang patunongon nin apostasiya an mga naghuhulit kan maogmang bareta?
• Paano nangingibabaw an tataramon nin Dios sa satong kaaldawan?
• Sa anong mga paagi naghihiro ngonyan an espiritu nin Dios?
• Paano konektado sa paghuhulit kan maogmang bareta an pantubos?
[Mga Hapot Para sa Pag-adal]
[Graph/Ritrato sa pahina 16]
(Para sa aktuwal na format, hilingon an publikasyon)
Pagtalubo sa kabilangan nin mga parabalangibog kan Kahadean kan ika-20 siglo
Promedyong mga Parahayag (sa milyones)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Mga Ritrato sa pahina 15]
JERONIMO
TYNDALE
GUTENBERG
HUS
[Credit Line]
Si Gutenberg asin Hus: Hale sa librong The Story of Liberty, 1878
[Ritrato sa pahina 15]
Mga Estudyante sa Biblia na nagbabalangibog kan maogmang bareta kan mga taon nin 1920
[Mga Ritrato sa pahina 16, 17]
Sa bilog na kinaban an mga tawo naghihimate sa maogmang bareta
[Ritrato sa pahina 18]
Arog kan atang na pantubos ni Jesu-Cristo, irinurukyaw kan paghuhulit an pagkamoot nin Dios