Pagkuyog—Sarong Importanteng Leksion sa Pagkaniaki?

“AN GUSTO nin mga Magurang mga Indibiduwal, Bakong mga Aking Makinuyog.” Iyan an mababasa sa sarong titulo sa peryodiko. An halipot na pagbabaretang ini ibinasar sa mga resulta nin sarong surbey na ginibo sa Nueva Zelandia, na naghayag na “22 porsiento [sana] kan mga hinapot an naghohona na an mga aki maninigong tokdoan nin pagkuyog sa harong.” Naaraman man sa surbey na an mga magurang ngonyan nagtutubod na mas importanteng marhay na itokdo sa mga aki an mga bagay na arog kan marahay na ugale, pagkaindependiente, asin pagkaresponsable.

Sa panahon na ini nin indibiduwalismo asin sadiring interes, bakong makangangalas na an kadaklan sa mga tawo igwa nin marumarom na pagmansay sa pagkuyog asin sa pagtotokdo kaiyan sa mga aki. Alagad an pagkuyog daw nin mga aki dapat na palimanlimanan sana na garo sarong bagay na lihis na sa uso asin lipas na sa panahon? O iyan daw kabilang sa importanteng mga leksion na puedeng manodan asin pakinabangan nin mga aki? Mas importante, paano daw minamansay ni Jehova Dios, an Kagtugdas kan areglo sa pamilya, an pagkuyog sa mga magurang, asin ano an nagkapirang pakinabang na minaresulta sa siring na pagkuyog?​—Gibo 17:​28; Efeso 3:​14, 15.

“Ini Matanos”

Sa enot na siglong Kristianong kongregasyon sa Efeso, si apostol Pablo nagsurat: “Mga aki, magin makinuyog sa saindong mga magurang na nasa Kagurangnan, huli ta ini matanos.” (Efeso 6:1) Sa siring, an pangenot na rason sa siring na pagkuyog iyo na iyan kaoyon kan pamantayan nin Dios sa kun ano an tama. Siring kan pagkasabi ni Pablo, “ini matanos.”

Kaoyon kaini, maoobserbaran ta na an disiplina nin magurang na ginigibo sa pagkamoot ilinaladawan kan Tataramon nin Dios na sarong magayon na bagay, sarong “korona nin kagayonan sa saimong payo asin magayon na kuintas sa saimong liog,” asin sarong bagay na “nakapaoogmang marhay sa Kagurangnan.” (Talinhaga 1:​8, 9; Colosas 3:20) Kabaliktaran nanggad, an pakisuway sa mga magurang nagpupukaw nin pagdesaprobar nin Dios.​—Roma 1:​30, 32.

“Tanganing Iyan Ikarahay Mo”

Itinokdo ni Pablo an saro pang merito sa pagkuyog kan isurat nia: “‘Tawan mo nin onra an saimong ama asin an saimong ina’; na iyo an enot na pagboot na may panuga: ‘Tanganing iyan ikarahay mo asin ika magdanay nin haloy sa daga.’” (Efeso 6:​2, 3; Exodo 20:12) Sa anong mga paagi na an pagkuyog sa mga magurang maresulta sa ikakarahay nin saro?

Sa primero, bako daw totoo na an mga magurang may bentaha sa edad asin eksperyensia? Minsan ngani tibaad daing gayo sinda nin aram manongod sa komputer o nagkapirang iba pang itinotokdo sa eskuelahan, dakol nanggad sindang aram manongod sa pagbuhay asin pag-atubang sa mga problema sa buhay. Sa ibong na lado, an mga hoben kulang sa timbang na pag-iisip na bunga nin pagkamaygurang. Sa siring, may tendensia sindang magpabiglabigla sa pagdesisyon, na sa parate napadadara sa negatibong mga impluwensia nin kairiba, sa sainda mismong ikakaraot nanggad. Sa katotoohan, an Biblia nagsasabi: “An kakablasan nagagakot sa puso nin aki.” Ano an remedyo? “An pamakol sa pagdisiplina iyo an mapaharayo kaiyan sa saiya.”​—Talinhaga 22:15.

An pakinabang sa pagkuyog minalampas pa sa relasyon  kan magurang sa aki. Tanganing magpunsionar nin areglado asin epektibo an sosyedad nin tawo, kaipuhan na igwa nin kooperasyon, na naghahagad man nin sarong sokol nin pagkuyog. Halimbawa, sa sarong pag-agoman, an pagigin andam na magpahunod, imbes na kadakol kan hinahagad asin daing labot sa deretso asin saboot kan iba, an minaresulta sa katoninongan, armoniya, asin kaogmahan. Sa pinagtatrabawohan, kaipuhan na magpasakop an mga empleyado tanganing magin mapanggana an ano man na negosyo o paghihingoa. May koneksion sa mga ley asin reglamento kan gobyerno, an pagkuyog bako sanang pinalilibre an saro sa padusa kundi nagbubunga man minsan paano nin sarong sokol nin pagigin ligtas sa peligro asin proteksion.​—Roma 13:​1-7; Efeso 5:​21-25; 6:​5-8.

Sa parate an mga hoben na nakikisuway sa autoridad nagigin mga tawong bakong bagay sa sosyedad. Sa kabaliktaran, an leksion sa pagkuyog na nanodan sa pagkaniaki puedeng mapakinabangan nin saro sa bilog na buhay. Kanigoan na bentaha an manodan ini sa pagkaniaki!

An Dakulang Balos sa Pagkuyog

An pagkuyog bako sanang nagbubunga nin maogmang mga relasyon sa pamilya asin iba pang panhaloyan na mga pakinabang kundi nagbubugtak man nin pundasyon na puedeng togdokan kan pinakamahalagang relasyon sa gabos​—an relasyon sa pag-oltanan nin tawo asin kan saiyang Kaglalang. Bilang “Kaharohalangkaweng Kaglalang” na iyo an “gikanan nin buhay,” tama sanang itao ki Jehova Dios an satong lubos na pagkuyog.​—Eclesiastes 12:1; Salmo 36:9.

An terminong “kumuyog” sa manlaenlaen na porma kaiyan minalataw nin labi sa 160 beses sa Biblia. Saro pa, may ginatos na pagkasambit sa mga ley, pagboot, togon, hudisyal na mga desisyon, asin reglamento nin Dios, na an gabos na iyan naghahagad nin pagpapasakop. Risang-risa na niato na an pagkuyog minamansay nin Dios bilang sarong kahagadan tanganing makamit an saiyang pag-oyon. Iyo, an pagkuyog kaipuhan nanggad para sa pagpatalubo nin relasyon ki Jehova. (1 Samuel 15:22) Makamomondo, an natural na tendensia nin tawo bakong an pagkuyog kundi an pakisuway. “An tendensia kan puso nin tawo maraot poon sa saiyang pagkaniaki,” an sabi kan Biblia. (Genesis 8:21) Kun siring, an leksion nin pagkuyog dapat na manodan bako sanang sa pagkaniaki kundi sa bilog na buhay. An paggibo kaiyan nagbubunga nin dakulang balos.

Girumdomon na, siring kan pagkasabi dian ni apostol Pablo, an pagboot na magin makinuyog sa mga magurang may kaibang duwang panuga, arin na baga, na “iyan ikarahay mo asin ika magdanay nin haloy sa daga.” An sarong patunay kan panugang ini manonompongan sa Talinhaga 3:​1, 2: “Aki ko, dai mo paglingawan an sakong ley, asin kuyogon logod kan saimong puso an sakong mga togon, huli ta idadagdag sa saimo an lawig nin mga aldaw asin mga taon nin buhay patin katoninongan.” An dakulang balos para sa mga makinuyog iyo an personal na relasyon ki Jehova ngonyan asin buhay na daing katapusan sa sarong matoninong na bagong kinaban.​—Kapahayagan 21:​3, 4.

[Mga Ritrato sa pahina 30, 31]

An pagkuyog nagbubunga nin maogmang mga relasyon sa pamilya, sa pinagtatrabawohan, asin ki Jehova