Sarong Pambilog na Kinaban na Kasararoan na May Pagmakolog sa Lambang Saro

SAGKOD sa pinakaharayo na natatanaw kan mata, igwa nin mga tawo. Dakol an may edad na, na an nagkapira sa sainda maluyahon nang marhay na dai na haros makalakaw. May mga babaeng bados-bados asin hoben pang mga mag-agom na may kabit-kabit na sadang na mga aki. Gabos sinda mga dulag​—mga lalaki, mga babae, asin mga aki​—na huli sa guerra sibil, natural na mga kalamidad, o iba pang mga sirkunstansia napiritan na humale sa saindang mga harong tanganing magpaili sa kataed na nasyon. An nagkapira paorootrong napiritan na bayaan an saindang mga istaran. Sa enot na senyal nin kariribokan sibil o nin sarong natural na kalamidad, naempake sinda nin pira sanang gamit sa harong, titiriponon an mga aki, asin mapasiring sa mas ligtas na lugar. Dangan, kun an kamugtakan bumalik na sa normal, dakol na dulag an minabuelta tanganing itogdok liwat an saindang mga harong asin pumoon giraray.

Sa nag-aging mga taon, tinabangan kan Republika nin Aprika Sentral an mga dulag hale sa dakol na nasyon. Kasuarin pa sana, rinibong tawo, kaiba an dakol na Saksi ni Jehova, an napiritan na dumulag hale sa Republika Demokratika nin Congo na nababanga huli sa guerra pasiring sa medyo ligtas na Republika nin Aprika Sentral.

Tuminabang an mga Tugang

Ibinilang kan mga Saksi sa Republika nin Aprika Sentral na sarong pribilehio an pag-organisar nin humanitaryong pag-ayuda. Inandam an mga dagosan para sa nag-aarabot na Kristianong mga tugang. Sa primero, nakakua nin mga kuarto sa pribadong mga harong, alagad kan nagdadakol na an mga dulag, narisa na kaipuhan an dugang pang pag-areglo. An nagkapirang Kingdom Hall ginamit na dormitoryo. Gikan sa boot na nagtrabaho an lokal na mga Saksi sa pag-instalar nin dagdag na ilaw, pagtarakod nin mga tubo sa tubig, asin pagsemento nin mga salog para sa kaginhawahan kan mga madagos dian. An mga dulag nagtrabaho kaiba kan lokal na mga tugang tanganing mahaman an temporaryong mga dormitoryong ini. Sarong bilog na programa nin Kristianong mga pagtiripon an iinareglo sa lenguaheng Lingala tanganing masustentohan nin nagsusustenir sa buhay na espirituwal na kakanon an mga naarabot. An dayupot na kooperasyon sa tahaw kan lokal na mga Saksi asin kan saindang mga bisita nagpaheling na an internasyonal na kasararoan nin magturugang sarong katunayan.

Dai pirmeng nag-aarabot na magkairiba an mga pamilyang dulag. Kun beses, an mga miembro nin pamilya na napasuway nakakaibanan giraray sa saindang padudumanan. Sarong listahan  nin mga nag-arabot na ligtas an iniingatan sa balang Kingdom Hall. Naggigibo nin mga areglo na hanapon an mga nawawara pa man giraray. Nagpadara an sangang opisina na nagdidirehir kan gibohon kan Mga Saksi ni Jehova sa nasyon nin tolong lunadan kada aldaw tanganing tabangan an mga Saksi na paduman pa sana asin hanapon an siisay man na tibaad nawara. An mga lunadan na ini namimidbid paagi sa dakulang karatula, na may nakasurat na “WATCH TOWER​—Jehovah’s Witnesses.”

Imahinara an kagayagayahan na namatean kan an sarong grupo nin pitong dulag na aki na napasuway sa saindang mga magurang natanaw an sarong van na sadiri kan Mga Saksi ni Jehova. Tolos-tolos sindang nagdaralagan pasiring sa lunadan asin nagpamidbid sinda na mga Saksi. Tinabangan sinda kan mga tugang na maglunad sa van asin dinara sinda sa sarong Kingdom Hall, kun saen sa kahurihurihi nakaibanan giraray ninda an saindang mga pamilya.

Ano an nagpangyari sa sinserong mga Kristianong ini na makaya an siring na mga kamugtakan, na bako sanang sarong beses, kundi paorootro? Kombensido nanggad sinda na kita nabubuhay na sa huring mga aldaw na ihinula sa Banal na Kasuratan.​—2 Timoteo 3:1-5; Kapahayagan 6:3-8.

Huli kaini, aram ninda na dai na mahahaloy tataposon ni Jehova Dios an mga guerra, pagkaongis, kadahasan, asin iriwal. An problema sa mga dulag magigin bagay na nakalihis na. Mientras tanto, kaoyon kan konseho ni apostol Pablo sa 1 Corinto 12:14-26, naghihingoa an Mga Saksi ni Jehova na asikasohon an lambang saro. Minsan ngani sinusuway nin mga salog, linderos, lenguahe, asin distansia, may pagmakolog sinda sa lambang saro, kaya marikas sindang minahiro kun may mangaipo nin tabang.​—Santiago 1:22-27.

[Mapa sa pahina 30]

(Para sa aktuwal na format, hilingon an publikasyon)

APRIKA

Republika nin Aprika Sentral

Republika Demokratika nin Congo

[Credit Line]

Mountain High Maps® Copyright © 1997 Digital Wisdom, Inc.

[Mga Ritrato sa pahina 30]

Tolong Kingdom Hall an ginamit na lugar nin resepsion

[Ritrato sa pahina 31]

Nag-instalar tolos-tolos nin mga pasilidad sa kusina

[Ritrato sa pahina 31]

Padakol nang padakol an nag-aarabot

[Mga Ritrato sa pahina 31]

Bago pa sanang mundag asin dulag na