Bareta kan mga Parabalangibog kan Kahadean

Nahale an Katuyawan sa Ngaran nin Dios

AN Tataramon nin Dios, an Biblia, nagsasabi: “Papagdanayon na marahay an saindong gawe-gawe sa tahaw nin mga nasyon, tanganing, sa mga bagay na ipinagtataram ninda kontra sa saindo na garo baga kamo naggibo nin maraot, tibaad huli sa saindong marahay na mga gibo na saindang naheheling pamurawayon ninda an Dios sa aldaw kan saiyang pagsiyasat.” (1 Pedro 2:12) Kun siring, an tunay na mga Kristiano naghihingoang papagdanayon an marahay na gawe-gawe tanganing malikayan an pagtao nin katuyawan sa ngaran ni Jehova.

Sa sarong harayong lugar sa Zambia na an apod Senanga, hinabonan nin radyo sa saiyang harong an sarong maestro. Miling naghuhulit an mga Saksi ni Jehova sa lugar na iyan, sinahotan sinda nin paghabon kan lalaki. Isinumbong nia an bagay na ini sa pulis, na naghihingakong an mga Saksi an naghabon kan saiyang radyo. Bilang ebidensia na nagduman sa harong nia an mga Saksi, ipinaheling nia an sarong pulyeto na nakua nia sa salog. Minsan siring, nagsayumang tumubod sa saiya an pulis. Sinadol sia ninda na pumuli asin mas lubos na mag-imbestigar.

An mga Saksi na naghulit sa lugar kan maestro kan aldaw na iyan inenkaminar kan grupo nin kamagurangan na magduman asin kaolayon an maestro manongod sa bagay na iyan. An nagkapirang tugang nagduman asin kinaolay sia, na nagpapaliwanag na gusto nindang haleon an katuyawan sa ngaran ni Jehova. Durante kan pag-orolay ninda, sinabi ninda sa maestro na nanuparan ninda sa harong kaini an sarong hoben na lalaki asin na tinawan ninda iyan nin pulyeto. Basado sa deskripsion ninda, namidbid kan maestro an lalaki. Sa katunayan, magkasirelihion sinda. Kinaolay kan maestro an hoben na lalaki, alagad ninegaran kaini an sahot. Dangan ipinakipag-olay iyan kan maestro sa mga magurang kan hoben na lalaki asin puminuli sa harong. Mayo pang sarong oras, iinuli kan ina kan hoben na lalaki an hinabon na radyo.

Napahiro nin pagbasol, dinolok kan maestro an grupo nin kamagurangan asin naghagad nin tawad sa paggibo nia nin putik na sahot. Inako kan kamagurangan an saiyang paghagad nin dispensasyon alagad hinagad ninda na an resulta kan imbestigasyon ipaaram sa publiko tanganing an gabos makaaram na an mga Saksi daing kasalan. Sarong paisi an ginibo sa eskuelahan, sa siring hinahale an katuyawan sa ngaran ni Jehova. An Mga Saksi ni Jehova puedeng padagos na maghulit nin daing olang sa lugar na iyan.

[Mga Mapa/Ritrato sa pahina 19]

(Para sa aktuwal na format, hilingon an publikasyon)

APRIKA

Zambia

[Credit Line]

Mountain High Maps® Copyright © 1997 Digital Wisdom, Inc.