Pagtabang sa mga Babaeng Balo sa Saindang mga Kasakitan

AN SARO sa pinakamidbid na mga estorya manongod sa mga babaeng balo iyo an pagkasaysay sa Biblia manongod ki Rut asin sa saiyang panugangan, si Noemi. An duwang babae parehong balo. Minsan siring, si Noemi nagadanan bako sana nin agom kundi siring man nin duwang aking lalaki, na an saro sa sainda nagin agom ni Rut. Huling sinda nag-eerok sa sarong sosyedad na agrikultural na nakadependeng marhay sa kalalakihan kaiyan, an kamugtakan ninda makaturotriste nanggad.​—Rut 1:​1-5, 20, 21.

Minsan siring, si Noemi nagkaigwa nin marahayon na katood asin pararanga na iyo an saiyang manugang na si Rut, na nagsayumang bayaan sia. Pag-abot nin panahon, si Rut nagin “mas marahay para [ki Noemi] kisa sa pitong aking lalaki”​—bako sanang huli sa saiyang hararom na pagkamoot ki Noemi kundi siring man huli sa saiyang pagkamoot sa Dios. (Rut 4:15) Kan irekomendar ni Noemi na bumalik si Rut sa saiyang pamilya asin mga katood na Moabita, si Rut nagsimbag paagi sa saro sa pinakanakapupukaw sa boot na kapahayagan nin kaimbodan na isinurat kasuarin man: “Kun saen ka magduman ako maduman man, asin kun saen ka magtorog duman man ako matorog. An saimong banwaan magigin sakong banwaan, asin an saimong  Dios sakong Dios. Kun saen ka magadan duman man ako magagadan, asin duman ako ilolobong. Gibohon logod ni Jehova an siring sa sako asin dugangan pa iyan kun may ibang bagay puera sa kagadanan na magpasuhay sa sakuya asin sa saimo.”​—Rut 1:​16, 17.

An aktitud ni Rut naheling ni Jehova Dios. Binendisyonan nia an sadit na pamilya ni Noemi asin Rut, asin pag-abot nin panahon si Rut nagin agom kan Israelitang si Booz. An saindang aki, na nagin apoon ni Jesu-Cristo, inataman ni Noemi na garo baga iyan sadiri niang aki. An kasaysayan na ini sarong halimbawa kun paano minamahal ni Jehova an mga babaeng balo na nagrarani sa saiya asin nagtitiwala sa saiya. Dugang pa, sinasabi sa sato kan Biblia na pinahahalagahan nia an mga mamomoton na tinatabangan an mga babaeng balo sa saindang mga kasakitan. Kaya paano ta susuportaran ngonyan an mga babaeng balo sa tahaw niato?​—Rut 4:​13, 16-22; Salmo 68:5.

Espesipiko Alagad Bakong Dominante

Kun nag-aalok nin tabang sa sarong babaeng balo, pinakamarahay na magin klaro asin espesipiko alagad bakong dominante. Likayan an malibog na mga komento siring kan, “Ipaaram mo sa sako kun may kaipuhan kang ano man.” Garo man sana iyan pagsabi nin, “Magpakahimbong kamo asin magpakabasog kamo” sa saro na nalilipot asin nagugutom dangan mayo man ginigibo tanganing tumabang. (Santiago 2:16) An dakol na tawo dai mahagad nin tabang kun may kaipuhan sinda; imbes, tinitios ninda iyan na daing girong. Tanganing tabangan an mga siring kaiyan kaipuhan an pakamansay, na rinirisa kun ano an mga pangangaipo ninda. Sa ibong na lado, an paggibo nin sobrang inisyatiba​—sa pundamental pagkontrol sa buhay kan babaeng balo​—puedeng magbunga nin kolog nin boot o iriwal. Huli kaini, idinodoon kan Biblia an pangangaipo na magin timbang sa satong relasyon sa iba. Minsan ngani ineenkaminar kita na magkaigwa nin bakong maimot na personal na interes sa mga tawo, pinagigirumdom man kita kaiyan na dai magin parapakilabot.​—Filipos 2:4; 1 Pedro 4:15.

Si Rut nagpaheling nin siring na timbang na aktitud ki Noemi. Minsan ngani maimbod na nagdanay sa kaibahan kan saiyang panugangan, si Rut dai namirit o nandominar sa saiya. Naggibo sia nin madonong na mga inisyatiba, siring kan pagkua nin kakanon para ki Noemi asin sa saiya, alagad sinunod man nia an mga instruksion ni Noemi.​—Rut 2:​2, 22, 23; 3:​1-6.

Siempre, an pangangaipo puedeng magkalaenlaen na marhay sa lambang tawo. Si Sandra, na nasambitan kasubago, nagsasabi: “Igwa ako kan kaipuhan ko kun ako napupurisaw​—mahal na marhay asin mamomoton na mga katood na nagtiripon sa palibot ko.” Si Elaine, na nasambitan kasubago, sa ibong na lado, nangaipo nin panahon na makapagsolosolo. Kun siring, an pagigin matinabang nangangahulogan nin pagigin mapagmansay asin pagigin timbang sa paggalang sa pribadong buhay nin iba asin pagigin andam na tumabang kun kaipuhan.

Suporta Hale sa Pamilya

An mainit, mamomoton na pamilya, kun igwa, dakula an magigibo tanganing aseguraron giraray an sarong babaeng balo na makakaya niang atubangon an problema. Minsan ngani an nagkapirang kapamilya tibaad mas dakol na ikataong tabang kisa iba, gabos puedeng makakontribwir. “Kun an siisay man na balo igwa nin mga aki o makoapo, pabayaan nguna an mga ini na makanood na maggibo nin diosnon na debosyon sa saindang kairiba sa harong asin padagos na magtao nin nanonongod na balos sa saindang mga magurang asin apoon, huli ta ini makawiwili sa pagheling nin Dios.”​—1 Timoteo 5:4.

Sa dakol na situwasyon, tibaad dai kaipuhan an pinansial na suporta o “balos.” An nagkapirang balo igwa nin supisyenteng pondo para sa saindang mga pangangaipo, asin an iba kualipikado para sa mga benepisyo kan gobyerno, na igwa sa nagkapirang nasyon. Alagad kun nangangaipo an balo, an mga miembro kan pamilya kaipuhan na  tumabang. Kun an balo mayo nin haraning mga paryente na makatatao nin suporta o an siring na mga paryente dai kayang tumabang, ineenkaminar kan Kasuratan an mga kapagtubod na tabangan sia: “An klase nin pagsamba na malinig asin daing digta sa pagheling kan satong Dios asin Ama iyo ini: an pag-ataman sa mga ilo asin babaeng balo sa saindang kasakitan.”​—Santiago 1:27.

An mga iinaaplikar an mga prinsipyong ini sa Biblia tunay nanggad na ‘tinatawan nin onra an mga babaeng balo.’ (1 Timoteo 5:3) Sa katunayan, an pagtaong onra sa sarong tawo nangangahulogan nin pagpaheling nin paggalang sa tawong iyan. An mga tawo na pinahehelingan nin onra nakamamateng pinahahalagahan, minamahal, tinatawan nin dignidad. Dai ninda namamatean na an iba nagtatabang huli sana sa pakamate nin obligasyon. Si Rut, minsan ngani saro man na balo sa halipot na panahon, talagang nagtao nin onra ki Noemi paagi sa odok sa boot asin mamomoton na pagsierto na naaasikaso an pisikal asin emosyonal na mga pangangaipo ni Noemi. Sa katunayan, an aktitud ni Rut madaling nagtao sa saiya nin marahay na reputasyon, kaya an saiyang magigin agom nagsabi sa saiya: “An gabos sa tata kan sakong banwaan nakaiisi na ika ekselenteng babae.” (Rut 3:​11, nota sa ibaba) Kadungan kaiyan, an pagkamoot ni Noemi sa Dios, an saiyang pagigin bakong parahanap, asin an saiyang hararom na apresasyon sa mga paghihingoa ni Rut para sa kapakanan nia an dahelan kaya daing duwa-duwa na ikinaogma ni Rut na tabangan sia. Kanigoan karahay na halimbawa si Noemi para sa mga babaeng balo ngonyan!

Rumani Kamo sa Dios

Siempre, dai mapaninigoan kan mga miembro kan pamilya asin katood an kakulangan na bunga kan pagkagadan nin agom. Sa dahelan na ini mahalaga para sa nagadanan na nangorognang rumani sa “Ama nin maboot na mga pagkaherak asin an Dios nin gabos na karangahan, na minaranga sa sato sa gabos niatong kahorasaan.” (2 Corinto 1:​3, 4) Estudyare an halimbawa ni Ana, sarong deboto na babaeng balo na 84 anyos kan panahon na mamundag si Jesus.

Kan magadan an agom ni Ana pakalihis nin pitong taon sanang pag-agoman ninda, sia nagdolok ki Jehova para sa karangahan. “[Sia] dai noarin man nagpapalta sa templo, na nagtatao nin sagradong paglilingkod banggi-aldaw na may mga pag-ayuno asin pagngayongayo.” (Lucas 2:​36, 37) Binalosan daw ni Jehova an diosnon na debosyon ni Ana? Iyo! Ipinaheling nia an saiyang pagkamoot sa saiya sa espesyal na marhay na paagi kan togotan nia ini na maheling an omboy na madakula bilang an Paraligtas kan kinaban. Ikinaogma asin ikinarangang marhay ini ni Ana! Malinaw nanggad, naeksperyensiahan nia an katotoohan kan Salmo 37:4: “Magkaigwa nin labi-labi nanggad na pagkakontento dian ki Jehova, asin itatao nia sa saimo an mga kahagadan kan saimong puso.”

An Dios Naghihiro Paagi sa mga Kapwa Kristiano

Si Elaine nagsasabi: “Sa halawig na panahon pagkagadan ni David, namatean ko an pisikal na kolog, na garo kutsilyo na nag-iitok sa sakong mga gusok. Sa boot ko idto pagkaempatso. Sarong aldaw nagin grabe an kolog kaya naisip ko na kumonsulta sa doktor. An sarong mapagmansay na tugang na babae sa espirituwal asin katood nagsuherir na an sakong kamondoan tibaad sarong dahelan asin inenkaminar ako na arangon an tabang asin pagranga ni Jehova. Sinunod ko tolos an saiyang sadol asin namibi ako nin silensio alagad odok sa puso, na hinahagad na susteniran ako ni Jehova sa sakong kamondoan. Asin ginibo nia iyan!” Nagpoon na magrahay an pagmate ni Elaine, asin dai nahaloy pakatapos kaiyan maski an saiyang namamatean na pisikal na kolog nawara.

An kamagurangan sa kongregasyon nangorognang puedeng makikatood sa maboot na paagi sa nagmomondong mga babaeng balo. Paagi sa regular na pagtao nin espirituwal na suporta asin karangahan sa mataktika asin mapagmansay na paagi, an kamagurangan makatatabang sa sainda na magdanay na dayupot ki Jehova sa ibong kan saindang mga kasakitan. Kun kaipuhan, an kamagurangan makatatabang man sa paggibo nin areglo para sa materyal na suporta. An siring na maheherakon, mapagmansay na kamagurangan tunay na nagigin “pailihan sa doros.”​—Isaias 32:2; Gibo 6:​1-3.

Permanenteng Karangahan Hale sa Bagong Hade sa Daga

An saro na ipinaggayagayang maheling kan gurang nang si Ana kaidtong mga duwang ribong taon na an nakaagi nagin na ngonyan an Mesiyanikong Hade kan langitnon na Kahadean nin Dios. An gobyerno na ini sa dai na mahahaloy mahale kan gabos na dahelan nin kapungawan, kaiba an kagadanan. Mapadapit digdi, an Kapahayagan 21:​ 3, 4 nagsasabi: “Uya! An tolda nin Dios nasa mga tawo . . . Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” Narisa daw nindo na an tekstong ini nagtataram manongod sa “mga tawo”? Iyo, an mga tawo patatalingkason sa kagadanan asin gabos na pagmondo asin pagtangis na bunga kaiyan.

Alagad igwa pa nin mas maogma pa nganing bareta! An Biblia nanunuga man nin pagkabuhay liwat nin mga gadan. “An oras maabot na an gabos na nasa mga lolobngan na girumdoman makadadangog kan saiyang [ni Jesus] tingog asin maruluwas.” (Juan 5:​28, 29) Arog ki Lazaro, na binuhay ni Jesus hale sa mga gadan, sinda maruluwas bilang mga tawo, bakong espiritung mga linalang. (Juan 11:​43, 44) An mga pakatapos kaiyan “naggigiribo nin marahay” dadarahon sa pagkasangkap nin tawo asin makaeeksperyensia mismo kan sa amang pag-ataman ni Jehova mantang ‘binibiklad nia an saiyang kamot asin pinaninigoan an mawot nin lambang bagay na may buhay.’​—Salmo 145:16.

An mga nagadanan nin namomotan asin nagtutubod sa siertong paglaom na ini nadidiskobre na iyan sarong gikanan nin dakulang karangahan. (1 Tesalonica 4:13) Kaya kun kamo babaeng balo, siertohon na “mamibi nin daing ontok” para sa karangahan asin tabang na kaipuhan nindo sa aroaldaw tanganing makaya nindo an saindong manlaenlaen na pagabat. (1 Tesalonica 5:17; 1 Pedro 5:7) Asin magtao nin panahon aroaldaw na basahon an Tataramon nin Dios tangani na an mga kaisipan nin Dios makaranga sa saindo. Kun gigibohon nindo an mga bagay na ini, maheheling mismo nindo kun paano, sa ibong kan gabos na kasakitan asin kadepisilan na inaatubang nindo bilang babaeng balo, si Jehova makatatabang nanggad sa saindo na makanompong nin katoninongan.

[Blurb sa pahina 5]

An pagigin matinabang nangangahulogan nin pagigin timbang sa paggalang sa pribadong buhay nin iba asin pagigin andam kun kaipuhan

[Ritrato sa pahina 7]

An may edad nang balong si Ana binendisyonan nin Dios