Kiisay na mga Pamantayan an Puede Nindong Pagtiwalaan?

Napangalas an sarong bisita na enot pa sanang beses sa Aprika sa naheheling niang lalaki na nakatindog nin tanos sa gilid kan tinampo. Narisa nia na kada pirang minuto, sinisidsid kan lalaki an saiyang mga bitis asin naghihiro nin kadikit pasiring sa sarong direksion mantang nakatindog pa man giraray nin tanos. Kan huri na sana narealisar kan bisita kun taano ta an lalaki naghihiro nin arog kaiyan. An totoo, sia nagpapalindong sa sarong poste nin telegrapo. An anino luway-luway na naghihiro mantang an saldang sa hapon nagbabago nin posisyon.

SIRING kan aninong iyan na itinatao kan saldang, an mga aktibidad asin pamantayan nin tawo pirmeng pabarobago asin paliwatliwat. Sa kabaliktaran, si Jehova Dios, an “Ama kan langitnon na mga liwanag,” daing liwat-liwat. “Dian sa saiya,” an isinurat ni disipulo Santiago, “dai naliliwat an pagbago kan anino.” (Santiago 1:17) Irinekord kan Hebreong propetang si Malaquias an mismong deklarasyon nin Dios: “Ako si Jehova; dai ako nagliwat.” (Malaquias 3:6) Sa nasyon nin Israel kan kaaldawan ni Isaias, an Dios nagsabi: “Minsan sagkod sa kagurangan nin saro ako an Saro na iyo man sana; asin sagkod sa pagkaubanon nin saro ako mismo padagos na magtitios. Ako mismo mahiro nanggad.” (Isaias 46:4) Huli kaini, dai liniliwat kan pag-agi nin panahon an kompiansa niato sa mga panuga kan Makakamhan sa gabos.

Sarong Leksion Hale sa Ley

Kun paanong an mga panuga ni Jehova masasarigan asin daing liwat-liwat, iyo man an saiyang mga pamantayan kan tama asin sala. Pagtitiwalaan daw nindo an sarong negosyante na naggagamit nin duwang timbangan, na an saro sana kaiyan an eksakto? Seguradong dai. Siring man, “an madayang timbangan  bagay na makauuyam nin makuri ki Jehova, alagad an bilog na gapong pantimbang nawiwilihan nia.” (Talinhaga 11:1; 20:10) Sa Ley na itinao nia sa mga Israelita, iiniba ni Jehova an pagboot na ini: “Dai ka maggibo nin inhustisya sa paghokom, sa pagsokol, sa pagtimbang o sa pagtakad. Magkaigwa ka nin eksaktong timbangan, eksaktong pisaran, eksaktong efa asin eksaktong hin. Ako si Jehova na saindong Dios, na nagluwas sa saindo hale sa daga kan Egipto.”​—Levitico 19:​35, 36.

Nagbunga nin pabor nin Dios siring man nin dakol na materyal na pakinabang para sa mga Israelita an pagsunod sa pagboot na iyan. Kaagid kaiyan, an fiel na pagsuportar sa daing liwat-liwat na mga pamantayan ni Jehova, bako sanang sa timbang asin sokol kundi sa gabos na langtad nin buhay, nagbubunga nin mga bendisyon para sa parasamba na nagtitiwala sa saiya. An Dios nagsasabi: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.”​—Isaias 48:17.

Taano ta Nagrururo an mga Pamantayan Ngonyan?

Sinasabi kan Biblia an dahelan kan pagruro kan mga pamantayan ngonyan. Ilinaladawan kan huring libro kan Biblia, an Kapahayagan, an sarong guerra sa langit, na an resulta kaiyan nakaapektar sa gabos na tawo sagkod sa aldaw na ini. Isinurat ni apostol Juan: “Puminutok an ralaban sa langit: Si Miguel asin an saiyang mga anghel nakipaglaban sa dragon, asin an dragon asin an mga anghel kaiyan nakipaglaban alagad ta dai iyan nanggana, ni may nanompongan pa man na lugar para sa sainda sa langit. Kaya ihinolog an dakulang dragon, an enot na halas, an inaapod Diablo asin Satanas, na ilinalagalag an bilog na ineerokan na daga; ihinolog sia sa daga, asin an saiyang mga anghel ihinolog kaiba nia.”​—Kapahayagan 12:7-9.

Ano an tolos na nagin epekto kan guerrang iyan? Si Juan nagpadagos: “Huli kaini mag-ogma, kamo kalangitan asin kamo na nag-eerok dian! Herak man kan daga asin kan dagat, huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.”​—Kapahayagan 12:12.

Nag-abot an “herak man kan daga” kan pumutok an Guerra Mundial I kan 1914 asin tinapos an peryodo nin mga pamantayan na laen na marhay kan sa ngonyan. An “Dakulang Guerra kan 1914-18 garo sarong tanda nin pagigin binayaan na biyong laglag na nagseseparar kan panahon na iyan sa panahon niato,” an komento kan historyador na si Barbara Tuchman. “Sa pagpara kan kadakoldakol na buhay na kutana may pakinabang pa sa masurunod na mga taon, sa pagraot sa mga paniniwala, pagliwat nin mga ideya, asin pagwalat nin dai na mararahay na mga lugad nin pagkadesganar, iyan nagbunga nin pisikal siring man nin sikolohikong siwang sa tahaw nin duwang panahon.” An kapwa historyador na si Eric Hobsbawm minaoyon: “Poon kan 1914, nagkaigwa nin heling-heling na pagruro hale sa mga pamantayan na kaidto minimidbid na normal sa nagprogreso nang mga nasyon . . . Bakong pasil na saboton kun sagkod saen an, makamomondo na naggagrabe, pagbuelta sa panahon na inaapod kan satong mga apoon kaidtong ikadesinuebeng siglo na mga pamantayan nin barbarismo.”

Sa saiyang librong Humanity​​—A Moral History  of the Twentieth Century, an autor na si Jonathan Glover nagsasabi: “An sarong aspekto kan satong panahon iyo an pagkawara kan ley sa moral.” Minsan ngani duda sia na magkakaigwa nin sarong ley sa moral hale sa panluwas na gikanan huli sa pagruro kan relihion sa kinaban sa Solnopan, sia nagpapatanid: “Kitang mga dai naniniwala sa sarong relihiosong ley sa moral maninigo pa man giraray na mahadit sa pagkawara kaiyan.”

An pagkaraot nin pagtitiwala sa presenteng panahon​—baga man sa komersio, politika, o relihion o dawa sa personal asin pampamilyang relasyon​—asin an makatatakot na mga resulta kabtang kan maraot na pakana kan Diablo tanganing magdara nin grabeng sakit sa mga nag-eerok sa daga. Si Satanas desidido sa saiyang pakikilaban sagkod sa katapusan asin na idamay nia sa kalaglagan an gabos na naghihingoang mamuhay oyon sa mga pamantayan nin Dios.​—Kapahayagan 12:17.

Igwa daw nin maluluwasan, sarong solusyon sa lakop na pagkaraot nin pagtitiwala? Si apostol Pedro nagsisimbag: “Igwa nin bagong kalangitan asin sarong bagong daga na satong hinahalat oyon sa . . . panuga [nin Dios], asin sa mga ini magdadanay an katanosan.” (2 Pedro 3:13) Matitiwalaan niato an panugang iyan huli ta bako sanang may kapangyarihan an Dios na gibohon an saiyang katuyohan kundi ginagarantiyahan man nia an kaotoban kaiyan. Mapadapit sa ano man na ‘tataramon na magluwas sa saiyang ngoso’ si Jehova nagpapahayag: “Dai iyan mabalik sa sako na daing laog, kundi gigibohon nanggad kaiyan an sakong boot, asin iyan siertong magigin mapanggana sa sakuyang sinobolan kaiyan.” Tunay nanggad na sarong mapagtitiwalaan na panuga!​—Isaias 55:11; Kapahayagan 21:​4, 5.

Pamumuhay Oyon sa mga Pamantayan nin Dios

Sa kinaban na pabarobago asin nagrururo an mga pamantayan, an Mga Saksi ni Jehova naghihingoang mamuhay oyon sa mga pamantayan nin gawe-gawe na iinaalok kan Biblia. Bilang resulta, sinda laen sa mayoriya, asin sa parate ini nakaaatraer sa atension​—asin pagtuya​—kan iba.

Sa sarong kombension kan Mga Saksi ni Jehova sa Londres, sarong representante sa pagtaram an hinapot kan sarong reporter sa TV kun baga an Mga Saksi ni Jehova totoong mga Kristiano. Sia nagsimbag: “Iyo, totoong marhay huli ta si Jesus an samong arogan. Lakop na marhay an kaimotan sa kinaban, asin kami minaturuhok ki Jesu-Cristo bilang an dalan, an katotoohan, asin an buhay. Nagtutubod kami na sia an Aki nin Dios, bakong kabtang nin sarong Trinidad, kaya an samong pakasabot sa Biblia laen kan sa establisadong relihion.”

Kan an interbio ipaheling sa telebisyon nin BBC, tinapos kan reporter an programa paagi sa pagsabi: “Dakol na marhay akong nanodan manongod sa kun taano an Mga Saksi ni Jehova ta nagtotoktok sa mga pinto niato. Asin ngonyan lang ako nakaheling nin 25,000 na tawo na marahayon an bulos asin marahayon an ugale na magkairiba sa sarong lugar sa parehong oras.” Marahayon nanggad na patotoo hale sa nagmamasid sa luwas sa kadonongan kan pagsunod sa daing liwat-liwat na mga pamantayan nin Dios!

Mantang an iba dai nasosonoan an ideya na mamuhay sono sa mga pamantayan na bako man sinda an nagbugtak, ineenkaminar niamo kamo na siyasaton an saindong Biblia asin adalan kun ano an mga pamantayan nin Dios. Alagad dai kamo manigoan sa hababaw sanang pagsiyasat. Sunodon an konseho ni apostol Pablo: “Dai na kamo magpamolde sa sistemang ini nin mga bagay, kundi maliwat kamo paagi sa pagbago kan saindong pag-isip, tanganing mapatunayan nindo sa saindong sadiri kun ano an marahay asin inaako patin sangkap na kabotan nin Dios.” (Roma 12:2) Bisitahon an Kingdom Hall sa saindong komunidad, asin midbidon an mga Saksi dian. Manonompongan nindo na sinda ordinaryong mga tawo na nagtitiwala sa mga panuga kan Biblia asin nagpapaheling kan saindang kompiansa sa Dios paagi sa pagmamaigot na mamuhay oyon sa saiyang mga pamantayan.

An pagsusog sa dai naliliwat asin mapagtitiwalaan na mga pamantayan nin Dios sa saindong personal na buhay seguradong matao sa saindo nin mga bendisyon. Himateon an pangagda mismo nin Dios: “O kun ika sana kutana totoong matao nin atension sa sakong mga togon! Dangan an saimong katoninongan magigin siring sa salog, asin an saimong katanosan siring sa mga alon kan dagat.”​—Isaias 48:18.

[Mga Ritrato sa pahina 5]

Ngonyan, igwa nin pagkaraot nin pagtitiwala sa komersio, politika, relihion, asin relasyon sa pamilya