An Saindong Deretso na Maniwala

Posibleng mahal nindo an saindong deretso na maniwala sa ano man na gusto nindong paniwalaan. Iyo man an haros gabos na iba pa. Paagi sa paggamit kan deretsong ini, an anom na bilyon na nag-eerok sa daga nakagibo nin makangangalas an pagkakalaenlaen na mga paniniwala. Arog kan mga pagkalaenlaen nin kolor, korte, pagkahaman, namit, parong, asin tanog na naheheling ta sa mga linalang, an magkakalaen na paniniwala sa parate nagtatao nin interes, kaogmahan, asin kagayagayahan sa buhay. An siring na mga pagkakalaenlaen puede nanggad na magin pampasiram sa buhay.​—Salmo 104:24.

ALAGAD kaipuhan na magmaan. May mga paniniwala na bako sanang napapalaen kundi peligroso man. Halimbawa, kan enot na mga taon kan ika-20 siglo may mga tawong naniwala na an mga Judio asin Mason igwa nin mga plano na “raoton an Kristianong sibilisasyon asin magpatindog nin sarong pankinaban na estado sa irarom kan saindang pinagsarong pamamahala.” An sarong ginikanan kan paniniwalang ini iyo an sarong anti-Semitikong pulyeto na may titulong Protocols of the Learned Elders of Zion. An pulyeto nag-alegar na kabale sa mga plano an pagsuportar sa labi-labing pagbuwis, pagpaoswag sa produksion nin armas, pag-enkaminar nin darakulaon na monopoliya tanganing ‘an kayamanan kan mga Hentil puedeng raoton nin sararoan.’ Kaiba man sa mga alegasyon an pagmanipular sa sistema nin edukasyon tanganing ‘gibohon an mga Hentil na magin dai nag-iisip na mga hayop,’ asin pagtogdok pa ngani nin mga riles sa irarom nin daga tanganing pagsugponon an kabiserang mga siudad tanganing an kamagurangan na Judio puedeng ‘mapogolan an siisay man na mga paratumang paagi sa paggadan sa sainda.’

Siempre, putik an mga ini​—na sinadya tanganing palaadon an sentimientong anti-Semitiko. ‘An kalokohan na eroestoryang ini,’ an sabi ni Mark Jones kan Museo Britano, ‘mahiwas na luminakop hale sa Rusya,’ kun saen enot iyan na nagluwas sa sarong artikulo sa peryodiko kan 1903. Nakaabot iyan sa The Times kan Londres kan Mayo 8, 1920. Pakalihis nin labing sangtaon, ibinuyagyag kan The Times na palsipikado an dokumento. Mientras tanto, nagibo na an danyos. ‘An mga putik na arog kaini,’ sabi ni Jones, ‘masakit nang pogolan.’ Oras na akoon iyan kan mga tawo, iyan nagbubunga nin masakit, marara, asin peligrosong marhay na mga paniniwala​—na sa parate igwa nin kapahapahamak na mga resulta, siring sa ipinaheling kan kasaysayan kan ika-20 siglo.​—Talinhaga 6:16-19.

Mga Paniniwala Kontra sa Katotoohan

Siempre, dai kaipuhan an tuyong mga putik tanganing mamukna an salang mga paniniwala. Kun minsan, sala sana an pag-interpretar niato. Pirang tawo na an nagadan na mayo sa panahon huli sa paggibo nin sarong bagay na sa paniniwala ninda tama? Siring man, sa parate naniniwala kita sa sarong bagay huli sana ta gusto tang paniwalaan iyan. An sarong propesor nagsasabi na minsan an mga sientista “sa  parate namomoot sa saindang sadiring mga ginibo.” Pinalilibog kan saindang mga paniniwala an saindang importanteng mga paghusgar. Dangan tibaad gamiton ninda an saindang bilog na buhay sa basang sanang paghihingoa na suportaran an salang mga paniniwala.​—Jeremias 17:9.

Iyo man an nangyayari sa mga paniniwalang relihioso​—na dian grabe an mga kontradiksion. (1 Timoteo 4:1; 2 Timoteo 4:​3, 4) An saro may makosog na pagtubod sa Dios. An saro pa nagsasabi na an tawo “naggigibo [sana] nin pagtubod na daing kamanungdanan.” An saro marigon na naniniwala na kamo igwa nin inmortal na kalag na nagdadanay na buhay pagkagadan. An saro pa naniniwala na pagnagadan kamo minapondo na kamo sa pag-eksister, biyo asin lubos. Siempre pa, an magkakontrang mga paniniwala na arog kaini dai puedeng gabos totoo. Kun siring, bako daw na madonong na seguradohon na an pinaniniwalaan nindo talagang totoo asin bako sanang iyo an gusto nindong paniwalaan? (Talinhaga 1:5) Paano nindo iyan magigibo? Sisiyasaton kan minasunod na artikulo an temang ini.

[Ritrato sa pahina 3]

An artikulo kan 1921 na nagbubuyagyag kan “Protocols of the Learned Elders of Zion”