Sertipiko nin Pagigin Ekselente

IYAN an itinatao kan Association of Congolese and African Journalists for the Development (AJOCAD) sa Republika Demokratika nin Congo tanganing “rekonoseron an mga indibiduwal o organisasyon sosyal na nagin kaomaw-omaw paagi sa saindang kontribusyon sa pagprogreso sa [Congo].”

Kan Nobyembre 17, 2000, an Sertipiko nin Pagigin Ekselente itinao sa Mga Saksi ni Jehova para sa “saindang kontribusyon sa pag-oswag kan indibiduwal na taga Congo [paagi] sa edukasyon asin sa pagtotokdo na yaon sa saindang mga babasahon.”

Nagkokomento manongod sa premyo, an peryodiko sa Kinshasa na Le Phare nagsabi: “Depisil na makanompong nin sarong taga Congo na dai pa nakabasa kan mga magasin na Torrengbantayan asin Awake! o iba pang mga babasahon na ipinublikar kan Mga Saksi ni Jehova. [Tinotokar] kan mga magasin na ini an gabos na aspekto nin buhay.” Sinambit man kan artikulo na itinotokdo kan mga babasahon “kun paano maaatubang an mga problema ngonyan” asin sinasabi an “tunay na kahulogan sa likod kan presenteng mga pangyayari.” An kada isyu nin Awake! “nagdadanay na neutral sa politika asin dai ipinaoorog an sarong rasa sa iba.” Saro pa, pinatatalubo kan mga babasahon an “kompiansa sa panuga kan Kaglalang na sarong matoninong asin tiwasay na kinaban na madali nang sumalida sa maraot, maribok na presenteng sistema nin mga bagay.”

Siring sa sinabi kan AJOCAD, an mga babasahon kan Mga Saksi ni Jehova nagin kapakipakinabang sa dakulang kabtang kan populasyon nin Congo. Makukua sa ginatos na lenguahe, an saindang nakapupukaw nin paglaom na mensahe puedeng magin kapakipakinabang man saindo.

Basahon tabi an impormasyon sa ibaba kun paano kamo makikinabang dian.