Mga Lobo Kami Kaidto—Ngonyan Kami mga Karnero!

Kaidtong kami ni Sakina aki pa, magkanatad kami. Si Sakina dakula asin masarig, mantang ako sadit asin maniwang. Parate kami kaidtong nag-iiwal, alagad sarong aldaw nagkaigwa kami nin grabeng enkuentro. Poon kaidto, dai na kami nag-olay ni nagtinohan. Sa kahurihurihi, pareho kami nagbalyo sa ibang lugar asin dai nang bareta sa lambang saro.

Kan 1994, nagpoon akong mag-adal sa Biblia kaiba kan Mga Saksi ni Jehova, asin luway-luway na nabago an sakong personalidad. Pakalihis nin apat na taon mantang nag-aatender sa samong espesyal na aldaw nin asamblea sa Bujumbura, Burundi, nasorpresa akong manuparan si Sakina. Naogma ako na yaon sia, alagad medyo malipot an samong pagtinohan. Pagtaodtaod kan aldaw na idto, haros dai ako makapaniwala kan marisa ko sia na kabilang sa mga kandidato sa bautismo! Sia man nagkaigwa nin ekstraordinaryong pagbabago. Bako na sia an tawong makiiwalon na parateng marhay na nakakaiwal ko kaidto. Kanigoan karahay na maheling sia na magtao nin pampublikong ebidensia kan saiyang pagdusay sa Dios paagi sa pagpabautismo sa tubig!

Pakahawas nia sa tubig, nagdalidali ako tanganing kugoson sia asin hininghingan ko sia: “Nagigirumdoman mo kun paano kita nag-iiwal kaidto?” “Iyo,” an sabi nia, “nagigirumdoman ko, alagad nakaagi na iyan. Ako bagong tawo na ngonyan.”

Pareho kaming naoogma na nanompongan mi an katotoohan sa Biblia na nagpapasaro asin na nabago an samong arog-lobong personalidad na magin sa karnero na sadiri kan Dakulang Pastor, si Jehova Dios. Talagang binabago kan katotoohan sa Biblia an mga buhay.