Si Jesus Nagliligtas—Paano?

“Si Jesus nagliligtas!” “Si Jesus an satong Paraligtas!” Sa dakol na nasyon sa bilog na kinaban, maheheling an siring na mga mensahe sa mga lanob nin mga edipisyo asin sa iba pang pampublikong mga lugar. Minilyon na tawo an sinserong nagtutubod na si Jesus an saindang Paraligtas. Kun ihahapot nindo sa sainda, “Paano kita iliniligtas ni Jesus?” masimbag gayod sinda, “Si Jesus nagadan para sa sato” o, “Si Jesus nagadan para sa satong mga kasalan.” Iyo, an kagadanan ni Jesus an nagpagin posible na kita maligtas. Alagad paanong an kagadanan nin sarong tawo makababayad sa mga kasalan nin kadakoldakol? Kun kamo hapoton, “Paano kita ikaliligtas kan kagadanan ni Jesus?” ano an sasabihon nindo?

AN SIMBAG na itinatao kan Biblia sa hapot na ini simpleng marhay alagad malinaw asin pano nin kahulogan. Pero, tanganing masabotan an importansia kaiyan, kaipuhan nguna niatong ibilang an buhay asin kagadanan ni Jesus na solusyon sa sarong depisil na marhay na problema. Dangan ta sana masasabotan nin tama an dakulaon na halaga kan kagadanan ni Jesus.

Sa pagsugo ki Jesus na itao an saiyang buhay, inaasikaso nin Dios an sarong situwasyon na luminataw kan magkasala si Adan. Kanigoan kamondong pangyayari an kasalan na iyan! An kaenot-enoteng lalaki asin an saiyang agom, si Eva, mga sangkap. An magayon na tatamnan sa Eden an saindang istaran. Itinao sa sainda nin Dios an may katuyohan na trabaho na atamanon an saindang istaran na tatamnan. Kaipuhan nindang mamomoton na pangatamanan an iba pang buhay na mga linalang sa daga. Asin mantang an mga tawo  nagdadakol patin pinapano an daga nin minilyon na kapareho ninda, pahihiwason ninda an paraiso sagkod sa mga sagkodan kan daga. (Genesis 1:28) Kanigoan kanakakokontento asin kanakaoogmang marhay na trabaho an itinao sa sainda! Dugang pa, igwa sinda nin mamomoton na pag-ibaiba. (Genesis 2:18) Dai sinda nagkukulang nin ano man. Maogmang buhay na daing sagkod an yaon sa atubangan ninda.

Depisil imahinaron kun paanong si Adan o Eva nagkasala. Alagad an enot na mag-agom nagrebelde tumang sa saro na iyo mismong naglalang sa sainda​—si Jehova Dios. Ginagamit an sarong halas, dinaya kan espiritung linalang na si Satanas na Diablo si Eva na makisuway ki Jehova, asin si Adan suminunod sa saiya.​—Genesis 3:1-6.

Daing duda manongod sa kun ano an gigibohon kan Kaglalang ki Adan asin Eva. Lininaw na nia an kaaabtan nin pakisuway, na nagsasabi: “Hale sa gabos na kahoy sa tatamnan puede kang magkakan sagkod na ika mabasog. Alagad kun dapit sa kahoy kan pakamidbid sa marahay asin maraot dai ka magkakan dian, huli ta sa aldaw na kumakan ka dian ika siertong magagadan.” (Genesis 2:​16, 17) Nangangaipo ngonyan nin simbag an sarong hapot na orog kadakula an importansia.

Napapaatubang an Katawohan sa Sarong Depisil na Problema

An orihinal na kasalan nagbunga nin sarong magabat na marhay na problema para sa katawohan. Nagpoon an buhay ni Adan bilang sarong sangkap na tawo. Kun siring, an saiyang mga aki puede kutanang nakamit an sangkap na buhay na daing katapusan. Minsan siring, si Adan nagkasala bago pa sia nagkaaki. An enterong rasa nin tawo yaon pa sa saiyang habayan kan akoon nia an sentensia: “Sa ganot kan saimong lalauogon makakan ka nin tinapay sagkod na ika bumalik sa daga, huli ta dian ka kinua. Huli ta ika kabokabo asin sa kabokabo ka man mabalik.” (Genesis 3:19) Kaya kan nagkasala si Adan asin nagpoon na magadan siring kan sabi nin Dios na mangyayari sa saiya, an bilog na katawohan nasentensiahan nin kagadanan kaiba nia.

Angay nanggad, si apostol Pablo nagsurat sa huri: “Paagi sa sarong tawo [si Adan] an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” (Roma 5:12) Iyo, huli sa orihinal na kasalan, an mga aki na dapat kutanang mamundag na sangkap na may daing katapusan na buhay sa ngapit ninda namundag na an helang, pagkagurang, asin kagadanan an saindang tinatanaw.

“Bakong rasonable iyan,” an tibaad sabihon nin saro. “Dai ta ginustong makisuway sa Dios​​—si Adan an nakisuway. Taano ta mawawara sa sato an oportunidad niato para sa buhay na daing katapusan asin kaogmahan?” Aram niato na kun an sarong husgado ibibilanggo an aki huli ta an saiyang ama naghabon nin kotse, an aki tama sanang magreklamo: “Bakong makatanosan iyan! Mayo akong ginibong sala.”​—Deuteronomio 24:16.

Paagi sa pagsutsut sa enot na lalaki asin babae na magkasala, tibaad naisip ni Satanas na ilalaag nia an Dios sa sarong alanganon na situwasyon. An Diablo nagsalakay sa enotan pang marhay kan kasaysayan kan rasa nin tawo​​—bago mamundag an siisay man na mga aki. Kan oras na magkasala si Adan, an importanteng hapot iyo an, Ano an gigibohon ni Jehova sa magigin mga aki ni Adan asin Eva?

Ginibo ni Jehova Dios kun ano an makatanosan asin rasonable. “Harayo sa tunay na Dios na gumibo nin maraot, asin sa Makakamhan sa gabos na gumibo nin bakong makatanosan!” an sabi kan matanos na tawong si Eliu. (Job 34:10) Asin may labot ki Jehova, an propetang si Moises nagsurat: “An Gapo, sangkap an saiyang gibo, huli ta an gabos niang dalan hustisya. Dios nin pagigin fiel, na dian sa saiya mayo nin inhustisya; matanos asin tanos sia.” (Deuteronomio 32:4) An solusyon na itinao nin tunay na Dios sa problemang ibinunga kan kasalan ni Adan dai hinahale an satong oportunidad para sa buhay na daing katapusan sa sarong paraisong daga.

 An Dios Nagtatao nin Sarong Sangkap na Solusyon

Pensara an solusyon na inareglo nin Dios sa sentensia na idineklarar nia ki Satanas na Diablo. Sinabi ni Jehova ki Satanas: “Bubugtakan ko nin pakikienemigo sa pag-oltanan mo asin kan babae [an langitnon na organisasyon nin Dios] saka sa pag-oltanan kan saimong banhi [an kinaban na kontrolado ni Satanas] asin kan saiyang banhi [si Jesu-Cristo]. Lulugadon ka [si Satanas] nia sa payo asin lulugadon mo sia sa bool [kagadanan ni Jesus].” (Genesis 3:15) Sa enot na hulang ini sa Biblia, nanabihan ni Jehova an saiyang katuyohan na padigdihon sa daga an saiyang langitnon na espiritung Aki tanganing mabuhay bilang an sangkap na tawong si Jesus dangan magadan​​—lugadon sa bool​​—sa kamugtakan na iyan na daing kasalan.

Taano ta hinagad nin Dios an kagadanan nin sarong sangkap na tawo? Bueno, ano an penalidad ni Jehova Dios ki Adan kun sia magkasala? Bako daw na kagadanan? (Genesis 2:​16, 17) “An ibinabayad nin kasalan kagadanan,” an isinurat ni apostol Pablo. (Roma 6:23) Binayadan ni Adan an saiyang kasalan paagi sa saiya mismong kagadanan. Itinao sa saiya an buhay, pinili niang magkasala, asin sia nagadan bilang penalidad sa saiyang kasalan. (Genesis 3:19) Kumusta an pagkakondenar sa bilog na rasa nin tawo huli sa kasalan na iyan? Kagadanan an kaipuhan tanganing matubos an saindang kasalan. Alagad kiisay na kagadanan an may katanosan na makatatahob sa mga paglapas kan bilog na katawohan?

An Ley nin Dios sa suanoy na nasyon kan Israel naghagad nin ‘kalag sa kalag [o, buhay sa buhay].’ (Exodo 21:23) Oyon sa legal na prinsipyong ini, an kagadanan na nagtatahob nin mga paglapas kan katawohan kaipuhan na kaparehong halaga kan iwinara ni Adan. An kagadanan sana nin saro pang sangkap na tawo an puedeng ibayad sa kasalan. Si Jesus an siring na tawo. Sa katunayan, si Jesus an “katimbang na pantubos” para sa pagkaligtas nin gabos na mababalukat na katawohan na gikan ki Adan.​—1 Timoteo 2:6; Roma 5:​16, 17.

An Kagadanan ni Jesus May Dakulaon na Halaga

An kagadanan ni Adan daing halaga; maninigo siang magadan huli sa saiyang kasalan. Minsan siring, an kagadanan ni Jesus may dakulaon na halaga huli ta nagadan sia na daing kasalan. Puedeng akoon ni Jehova Dios an halaga kan sangkap na buhay ni Jesus bilang pantubos para sa makinuyog na mga gikan kan makasalan na si Adan. Asin an halaga kan atang ni Jesus bakong may epekto sana sa nakaagi niatong mga kasalan. Kun arog kaiyan, mayo kitang paglaom. Huling ipinangidam sa kasalan, seguradong masasala giraray kita. (Salmo 51:5) Makapagpapasalamat nanggad kita na an kagadanan ni Jesus nagtatao sa sato nin oportunidad na makamtan an pagkasangkap na katuyohan ni Jehova sa kapoonpooni para sa mga gikan ni Adan asin Eva!

Si Adan puedeng iagid sa sarong ama na nagadan asin binayaan kita sa grabeng pinansial na pagkakautang (kasalan) kaya mayong posibleng paagi na kita makabayad sa utang. Sa ibong na lado, si Jesus siring sa sarong marahay na ama na nagadan asin winalatan kita nin bulaos na pamana na bako sanang pinalilibre kita sa dakulaon na utang na ipinagabat sa sato ni Adan kundi nagtatao man nin igong pansustenir tanganing kita mabuhay nin daing sagkod. An kagadanan ni Jesus bako sanang pagkanselar kan nakaaging mga kasalan; iyan saro man na marahayon na probisyon para sa satong ngapit.

Si Jesus nagliligtas huli ta nagadan sia para sa sato. Asin kanigoan kahalagang probisyon an saiyang kagadanan! Kun minamansay niato iyan bilang kabtang kan solusyon nin Dios sa komplikadong problema kan kasalan ni Adan, napakokosog an satong pagtubod ki Jehova asin sa saiyang pamamaagi. Iyo, an kagadanan ni Jesus sarong paagi nin pagsalbar sa “lambang naggigibo nin pagtubod” sa saiya gikan sa kasalan, helang, pagkagurang, asin kagadanan mismo. (Juan 3:16) Nagpapasalamat daw kamo sa Dios huli sa paggibo kan mamomoton na areglong ini para sa satong kaligtasan?

[Ritrato sa pahina 5]

Si Adan nagtao nin kasalan asin kagadanan sa katawohan

[Ritrato sa pahina 6]

Si Jehova nagtao nin sangkap na solusyon