“Bolong sa Mata na Ilalahid sa Saimong mga Mata”

AN RESETANG iyan itinao ni Jesu-Cristo sa Kristianong kongregasyon sa Laodicea, Asia Minor, kan enot na siglo.

Sinabi ni Jesus: “Bumakal [ka] . . . nin bolong sa mata na ilalahid sa saimong mga mata tangani na ika makaheling.” Idto, bakong literal na helang sa mata, kundi espirituwal na pagkabuta na kaipuhan bolongon. An mga Kristiano sa Laodicea naimpluwensiahan kan espiritu kan asensado sa materyal na siudad na iniistaran ninda asin nagin indiperente manongod sa saindang tunay na espirituwal na mga pangangaipo.

Nagkokomento manongod digdi bilang dahelan kan saindang naraot na pakaheling, sinabi ni Jesus: “Ika nagsasabi: ‘Ako mayaman asin nakatipon nin kayamanan patin dai nagkakaipo nin ano man,’ alagad dai mo naaaraman na ika nasasakitan asin kaherakherak asin dukha asin buta patin huba.” Minsan ngani dai ninda iyan aram, an mga miembro kan kongregasyon nangangaipo nin nakakapaomay na “bolong sa mata” na makukua sana paagi sa pagsunod sa katokdoan asin disiplina ni Jesu-Cristo. “Bumakal [ka] sa sako,” an sabi ni Jesus.​—Kapahayagan 3:​17, 18.

Arog kan mga taga Laodicea, an tunay na mga Kristiano ngonyan nangangaipo man na magmaan na dai maimpluwensiahan nin labi-labi, na tibaad daing pag-aram, kan materyalistiko asin mahilig sa kasingawan na mga kamugtakan sa lugar na iniistaran ninda. An reseta sa pagpadanay nin marahay na espirituwal na punto de vista ipinaririsa kan konseho na: “Bumakal [ka ki Jesus] . . . nin bolong sa mata na ilalahid sa saimong mga mata tangani na ika makaheling.”

Mahalagang mangnohon an bagay na kaipuhan na bakalon an “bolong [na ini] sa mata.” May kalabot na gastos. Kaipuhan na gumastos nin panahon sa pag-adal asin paghorophorop kan Tataramon nin Dios. An Tataramon na ini, sinisierto sa sato kan salmista, “malinig, nagpapaliwanag kan [espirituwal na] mga mata.”​—Salmo 19:8.