An Gabos na Tunay na Kristiano Paraebanghelyo

“Mag-awit kamo ki Jehova, pag-omawon nindo an saiyang ngaran. Sa aroaldaw ibalangibog nindo an maogmang bareta kan saiyang pagliligtas.”​—SALMO 96:2.

1. Anong maogmang bareta an kaipuhan na madangog kan mga tawo, asin paano an Mga Saksi ni Jehova nagin arogan sa pagpalakop kan siring na bareta?

 SA SARONG kinaban na an mga kalamidad nangyayari aroaldaw, totoong nakararangang maaraman na oyon sa ipinapahayag kan Biblia, an guerra, krimen, gutom, asin pan-aapi matatapos na sa dai mahahaloy. (Salmo 46:9; 72:​3, 7, 8, 12, 16) Tunay nanggad, bako daw na maogmang bareta ini na kaipuhan na madangog kan gabos? Siring kaiyan an paniniwala kan Mga Saksi ni Jehova. Midbid sinda sa gabos na lugar bilang mga naghuhulit nin “maogmang bareta dapit sa orog karahay.” (Isaias 52:7) Totoo, dakol na Saksi an nag-agi nin paglamag dahelan sa saindang determinasyon na ibalangibog an maogmang bareta. Alagad an pinakaikararahay kan mga tawo an nasa puso ninda. Asin kanigoan na rekord nin kaigotan asin pagmamaigot an nagibo kan mga Saksi!

2. Ano an sarong dahelan kan kaigotan kan Mga Saksi ni Jehova?

² An kaigotan kan Mga Saksi ni Jehova ngonyan kaagid kan sa mga Kristiano kan enot na siglo. Dapit sa sainda, an peryodiko kan Katoliko Romano na L’Osservatore Romano tamang nagsasabi: “An enot na mga Kristiano, pakabautismohi tolos sa sainda, nakamate na obligasyon nindang palakopon an Ebanghelyo. Sa berbal na paagi, ipinaabot nin mga oripon an Ebanghelyo.” Taano an Mga Saksi ni Jehova, arog kan enot na mga Kristianong idto, ta maigot na marhay? Enot, huli ta an maogmang bareta na ipinapahayag ninda gikan ki Jehova Dios mismo. May maorog pa daw dian na dahelan na magin maigot? An saindang paghuhulit reaksion sa mga tataramon kan salmista: “Mag-awit kamo ki Jehova, pag-omawon nindo an saiyang ngaran. Sa aroaldaw ibalangibog nindo an maogmang bareta kan saiyang pagliligtas.”​—Salmo 96:2.

3. (a) Ano an ikaduwang dahelan kan kaigotan kan Mga Saksi ni Jehova? (b) Ano an kalabot sa “pagliligtas [nin Dios]”?

³ Ipinagigirumdom sa sato kan mga tataramon kan salmista an ikaduwang dahelan kan kaigotan kan Mga Saksi ni Jehova. An mensahe ninda mensahe nin kaligtasan. May mga indibiduwal na nagtatrabaho sa medikal, sosyal, pinansial, o iba pang langtad tanganing pakarhayon an kamugtakan sa buhay nin mga kapwa tawo, asin kaomaw-omaw an siring na mga paghihingoa. Alagad an ano man na magigibo nin sarong tawo para sa iba limitadong marhay kun ikokomparar sa “pagliligtas [nin Dios].” Paagi ki Jesu-Cristo, an mga mahoyo ililigtas ni Jehova sa kasalan, helang, asin kagadanan. An mga makikinabang mabubuhay sagkod lamang! (Juan 3:​16, 36; Kapahayagan 21:​3, 4) Sa ngonyan, an pagliligtas kabale sa “makangangalas na mga gibo” na isinasaysay kan mga Kristiano kun hinihimate ninda an mga tataramon na: “Ipahayag nindo sa mga nasyon an . . . kamurawayan [nin Dios], sa gabos na banwaan an saiyang makangangalas na mga gibo. Huli ta si Jehova dakula asin maninigo nanggad na omawon. Sia makangingirhat sa ibabaw nin gabos na iba pang dios.”​—Salmo 96:​3, 4.

An Halimbawa kan Kagurangnan

4-6. (a) Huli sa anong ikatolong dahelan maigot an Mga Saksi ni Jehova? (b) Paano si Jesus nagpaheling nin kaigotan sa paghuhulit kan maogmang bareta?

⁴ An Mga Saksi ni Jehova maigot huli sa ikatolong dahelan. Sinusunod ninda an halimbawa ni Jesu-Cristo. (1 Pedro 2:21) Bilog na pusong inako kan sangkap na tawong iyan an asignasyon  “na magsabi kan maogmang bareta sa mga mahoyo.” (Isaias 61:1; Lucas 4:17-21) Sa siring, sia nagin paraebanghelyo, sarong parabalangibog kan maogmang bareta. Linibot nia an bilog na Galilea asin Judea, na “naghuhulit kan maogmang bareta kan kahadean.” (Mateo 4:23) Asin huling aram nia na dakol an mahimate sa maogmang bareta, sinabi nia sa saiyang mga disipulo: “An anihon mahiwas, alagad an mga paraani kakadikit. Kun siring, makimaherak kamo sa Kagurangnan kan anihon na magsobol nin mga paraani sa saiyang anihon.”​—Mateo 9:​37, 38.

⁵ Kaoyon kan saiya mismong pamibi, nagsanay si Jesus nin iba pa na magin mga paraebanghelyo. Pag-abot nin panahon, sinugo nia an saiyang mga apostol na sinda sana asin sinabihan sinda: “Sa pagduman nindo, maghulit kamo, na nagsasabi, ‘An kahadean kan kalangitan harani na.’” Mas praktikal daw kutana na sinda gumibo na sana nin mga programa na makaiina sa mga problema kan sosyedad kan panahon na idto? O maninigo daw kutana sindang nakikabtang sa politika tanganing labanan an lakop na karatan kan panahon na idto? Dai. Imbes, itinao ni Jesus an pamantayan para sa gabos na Kristianong paraebanghelyo kan sabihan nia an saiyang mga parasunod: “Sa pagduman nindo, maghulit kamo.”​—Mateo 10:5-7.

⁶ Kan huri, nagsugo si Jesus nin saro pang grupo nin mga disipulo tanganing ipaisi: “An kahadean nin Dios harani na.” Kan bumalik sinda tanganing ibareta an kapangganahan kan saindang biahe sa pag-ebanghelyo, naggayagaya nin labi-labi si Jesus. Sia namibi: “Hayag takang inoomaw, Ama, Kagurangnan kan langit asin daga, huli ta maingat mong itinago an mga bagay na ini sa mga madonong asin intelektuwal, asin ihinayag iyan sa mga omboy.” (Lucas 10:​1, 8, 9, 21) An mga disipulo ni Jesus, na dating mahihigos na parasira, paraoma, asin iba pa, siring sa mga omboy kun ikokomparar sa halangkaw an inadalan na mga namomoon sa relihion kan nasyon. Alagad sinanay an mga disipulo na ibalangibog an pinakamarahay sa gabos na maogmang bareta.

7. Pagkasakat ni Jesus sa langit, kiisay enot na ihinulit kan saiyang mga parasunod an maogmang bareta?

⁷ agkasakat ni Jesus sa langit, an saiyang mga parasunod nagpadagos sa pagpalakop kan maogmang bareta nin pagliligtas. (Gibo 2:​21, 38-40) Kiisay sinda enot na naghulit? Nagduman daw sinda sa mga nasyon na dai nakamimidbid sa Dios? Dai, an enot na langtad ninda iyo an Israel, sarong banwaan na nakamimidbid ki Jehova sa laog nin labi nang 1,500 na taon. Igwa daw sinda kaidto nin deretso na maghulit sa sarong nasyon kun saen sinasamba na si Jehova? Igwa. Sinabihan sinda ni Jesus: “Kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi kan daga.” (Gibo 1:8) An Israel kaipuhan  na makadangog kan maogmang bareta kapareho kan ano man na iba pang nasyon.

8. Paano inaarog kan Mga Saksi ni Jehova ngonyan an mga parasunod ni Jesus kan enot na siglo?

⁸ Sa kaagid na paagi, an Mga Saksi ni Jehova ngonyan naghuhulit sa bilog na daga. Nakikikooperar sinda sa anghel na naheling ni Juan na “igwa . . . nin daing katapusan na maogmang bareta na ipahahayag bilang nakaoogmang notisya sa mga nag-eerok sa daga, asin sa lambang nasyon asin tribo asin tataramon patin banwaan.” (Kapahayagan 14:6) Kan taon 2001, sinda aktibo sa 235 kadagaan asin teritoryo, kabale an nagkapira na sa pankagabsan ibinibilang na Kristiano. Sala daw para sa Mga Saksi ni Jehova na maghulit sa mga lugar kun saen naestablisar na kan Kakristianohan an mga iglesia kaiyan? May mga nagsasabing iyo asin tibaad ibinibilang pa ngani an siring na pag-ebanghelyo na “paghabon nin mga karnero.” Minsan siring, ginigirumdom kan Mga Saksi ni Jehova an namatean ni Jesus para sa mapakumbabang mga Judio kan saiyang kaaldawan. Minsan ngani igwa na sinda nin mga saserdote, si Jesus dai nag-alangan na sabihon sa sainda an maogmang bareta. “Naherak sia sa sainda, huli ta sinda naanitan asin nagkakaralagalag siring sa mga karnero na mayong pastor.” (Mateo 9:36) Kun an Mga Saksi ni Jehova nakanonompong nin mapakumbabang mga tawo na mayo nin aram manongod ki Jehova asin sa saiyang Kahadean, maninigo daw nindang isayuma an maogmang bareta sa siring na mga indibiduwal huli ta may sarong relihion na naghihingako na may autoridad sa sainda? Sa pagsunod sa halimbawa kan mga apostol ni Jesus, an simbag niato dai. An maogmang bareta dapat na ihulit “sa gabos na nasyon,” na mayo nin ipinupuera.​—Marcos 13:10.

An Gabos na Enot na Kristiano Nag-ebanghelyo

9. Kan enot na siglo, sairisay sa Kristianong kongregasyon an nakikabtang sa paghuhulit?

⁹ Sairisay kan enot na siglo an nakikabtang sa paghuhulit? An katunayan nagpapaheling na an gabos na Kristiano paraebanghelyo. An autor na si W. S. Williams nagsasabi: “An pankagabsan na patotoo iyo na an gabos na Kristiano sa kagurangguranging Iglesia . . . naghulit kan ebanghelyo.” Mapadapit sa mga pangyayari kan aldaw nin Pentecostes 33 C.E., an Biblia nagsasabi: “Sinda gabos [mga lalaki asin babae] nagkaparano nin banal na espiritu asin nagpoon na magtaram nin manlaenlaen na tataramon, siring sa ipinataram sa sainda kan espiritu.” Nagin kabale sa mga paraebanghelyo an mga lalaki asin babae, hoben asin gurang, oripon asin talingkas. (Gibo 1:14; 2:​1, 4, 17, 18; Joel 2:​28, 29; Galacia 3:28) Kan an dakol na Kristiano mapiritan na dumulag hale sa Jerusalem huli sa paglamag, “idtong nagkawararak naglibot sa daga na nagpapahayag kan maogmang bareta kan tataramon.” (Gibo 8:4) An gabos na “idtong nagkawararak,” bako sanang pirang ninombrahan, nag-ebanghelyo.

10. Anong duwang sugo an inotob bago linaglag an Judiong sistema?

¹⁰ Nagin totoo ini durante kan enot na mga taon na idto. Si Jesus naghula: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Sa kaotoban kan mga tataramon na iyan kan enot na siglo, an maogmang bareta lakop na ihinulit bago linaglag kan mga hukbong Romano an Judiong sistema nin relihion asin politika. (Colosas 1:23) Dugang pa, kinuyog kan gabos na parasunod  ni Jesus an saiyang pagboot: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” (Mateo 28:​19, 20) Dai sinadol kan enot na mga Kristiano an mga mahoyo na tumubod ki Jesus dangan binayaan sinda na gibohon an gusto ninda, siring sa ginigibo nin nagkapirang parahulit sa presenteng panahon. Imbes, tinokdoan ninda sinda na magin mga disipulo ni Jesus, inorganisar sinda na magin mga kongregasyon, asin sinanay sinda tanganing sinda man makapaghulit kan maogmang bareta asin makagibo nin mga disipulo. (Gibo 14:21-23) Sinusunod kan Mga Saksi ni Jehova ngonyan an arogan na iyan.

11. Sairisay ngonyan an nakikikabtang sa pagpaisi kan pinakamarahay na maogmang bareta sa katawohan?

¹¹ Dakol na Saksi ni Jehova, bilang pagsunod sa halimbawa ni Pablo, Bernabe, asin iba pa kaidtong enot na siglo, an nagduman sa ibang kadagaan bilang misyonero. Totoong nagin kapakipakinabang an saindang gibohon, huling dai sinda nakilabot sa politika o sa ibang mga paagi ruminayo sa sugo na ihulit an maogmang bareta. Kinuyog sana ninda an pagboot ni Jesus: “Sa pagduman nindo, maghulit kamo.” Minsan siring, an kadaklan sa Mga Saksi ni Jehova bakong misyonero sa ibang kadagaan. An dakol sa sainda naghahanap-buhay paagi sa sekular na trabaho, asin an iba nag-eeskuela pa. An iba may pinapadakulang mga aki. Alagad an gabos na Saksi ipinaaabot sa iba an maogmang bareta na nanodan ninda. Hoben asin gurang, lalaki asin babae, sinda magayagayang naghihimate sa sadol kan Biblia: “Ihulit mo an tataramon, gibohon iyan na may pagkasibot sa marahay na panahon, sa masakit na panahon.” (2 Timoteo 4:2) Arog kan mga naenot sa sainda kan enot na siglo, sinda nagpapadagos na “dai nin ontok sa pagtokdo asin pagpahayag kan maogmang bareta dapit ki Cristo, si Jesus.” (Gibo 5:42) Ipinapaisi ninda an pinakamarahay na maogmang bareta para sa katawohan.

Gumibo nin mga Proselito o Mag-ebanghelyo?

12. Ano an proselitismo, asin ano an nagin pagmansay dian?

¹² An lenguaheng Griego igwa nin terminong pro·se’ly·tos, na nangangahulogan sarong “kombertido.” Digdi hale an termino sa Ingles na “proselytism” (sa Bicol, “proselitismo”), na sa pundamental nangangahulogan nin “akto nin pangongombertir.” Ngonyan na mga aldaw, may mga nagsasabi na an proselitismo nakararaot. An sarong dokumento na ipinublikar kan Pankinaban na Konsilyo nin mga Iglesia nasasambitan ngani an “kasalan na proselitismo.” Taano? An Catholic World Report nagsasabi: “Huli sa dagos-dagos na mga reklamo kan Ortodokso, an ‘proselitismo’ nagkaigwa nin konotasyon na puersahan na pangongombertir.”

13. Ano an pirang halimbawa nin nakararaot na proselitismo?

¹³ Nakararaot daw an proselitismo? Puede. Si Jesus nagsabi na an proselitismo kan mga eskriba asin Fariseo nakararaot sa mga nakombertir ninda. (Mateo 23:15) Iyo nanggad, an “puersahan na pangongombertir” sala. Halimbawa, segun sa historyador na si Josefo kan madaog kan Macabeong si Juan Hircano an mga Idumeo, “tinogotan [nia] sinda na magdanay sa saindang nasyon basta sinda magpaturi asin gikan sa boot na kuyogon an mga ley kan mga Judio.” Kun gusto kan mga Idumeo na mamuhay sa irarom kan pamamahalang Judio, kaipuhan nindang otobon an Judiong relihion. An mga historyador nagsasabi sa sato na kan ikawalong siglo C.E., sinakop ni Carlomagno an  paganong Saxon sa amihanan na Europa asin maringis na pinuersa sindang makombertir. a Pero, gurano kasinsero an pagkakombertir kan mga Saxon o kan mga Idumeo? Halimbawa, gurano katunay an pagsusog kan Idumeong si Hadeng Herodes​—na nagprobar na ipagadan an omboy na si Jesus​—sa ipinasabong nin Dios na Ley ni Moises?​—Mateo 2:1-18.

14. Paano pinipirit nin nagkapirang misyonero nin Kakristianohan an mga tawo tanganing makombertir?

¹⁴ Puersahan daw an pangongombertir ngonyan? Sa sarong parte, an nagkapira iyo. May nagkapirang misyonero nin Kakristianohan na nag-aalok daa nin libreng pag-eskuela sa ibang nasyon sa potensial na mga makokombertir. O tibaad pinapaatender ninda nin sermon an sarong nagugutom na dulag tanganing makakua nin rasyon na pagkakan. Segun sa sarong deklarasyon na ilinuwas kan 1992 nin sarong kombension kan mga Primadong Ortodokso, “an proselitismo kun beses nangyayari paagi sa materyal na pan-eenganyar asin kun beses paagi sa laen-laen na porma nin kadahasan.”

15. Naggigibo daw nin mga proselito an Mga Saksi ni Jehova segun sa modernong kahulogan kan terminong iyan? Ipaliwanag.

¹⁵ Sala an piriton an mga tawo na bagohon an saindang relihion. Tunay nanggad, an Mga Saksi ni Jehova dai naggigibo nin siring kaiyan. b Huli kaini, dai sinda naggigibo nin mga proselito segun sa modernong kahulogan kan terminong iyan. Imbes, arog kan mga Kristiano kan enot na siglo, ihinuhulit ninda an maogmang bareta sa gabos. An siisay man na gikan sa boot na naghihimate inaagda na kumua nin dagdag na kaaraman paagi sa pag-adal sa Biblia. An siring na mga interesado nakakanood na tumubod, na marigon na basado sa tamang kaaraman sa Biblia, sa Dios asin sa saiyang mga katuyohan. Bilang resulta, sinda nag-aapod sa ngaran nin Dios, si Jehova, para sa kaligtasan. (Roma 10:​13, 14, 17) Personal na desisyon kun baga aakoon ninda an maogmang bareta o dai. Mayo nin pamimirit. Kun igwa, an pagkakombertir magigin daing saysay. Tanganing akoon nin Dios, an pagsamba dapat na maggikan sa puso.​—Deuteronomio 6:​4, 5; 10:12.

Pag-ebanghelyo sa Presenteng mga Panahon

16. Paano nag-oswag an pag-ebanghelyo kan Mga Saksi ni Jehova sa presenteng mga panahon?

¹⁶ Durante kan presenteng mga panahon, an Mga Saksi ni Jehova naghulit kan maogmang bareta kan Kahadean bilang mas dakulang kaotoban kan Mateo 24:14. An sarong lataw na instrumento sa saindang pag-ebanghelyo iyo an magasin na Torrengbantayan. c Kaidtong 1879, kan ipublikar an enot na mga luwas kan An Torrengbantayan, an magasin igwa nin sirkulasyon na mga 6,000 sa sarong lenguahe. Kan taon 2001, pakalihis nin labing 122 na taon, an sirkulasyon uminabot sa 23,042,000 na kopya sa 141 lenguahe. Nakakadungan sa pagdakol na iyan an pag-oswag sa aktibidad na pag-ebanghelyo kan Mga Saksi ni Jehova. Ikomparar nindo an pirang ribong oras na ginamit kada taon sa pag-ebanghelyo kaidtong ika-19 siglo sa 1,169,082,225 oras na idinusay sa paghuhulit  kan taon 2001. Isipon nindo an 4,921,702 na daing bayad na pag-adal sa Biblia na pinamayohan sa promedyo kada bulan. Kanigoan kadakol na marahayon na gibo an nahaman! Asin ginibo iyan kan 6,117,666 na aktibong parahulit kan Kahadean.

17. (a) Anong klaseng falsong mga dios an sinasamba ngonyan? (b) Ano man an saindang lenguahe, nasyonalidad, o kamugtakan sa sosyedad, ano an kaipuhan na maaraman kan gabos?

¹⁷ An salmista nagsasabi: “An gabos na dios kan mga banwaan daing kamanungdanan na mga dios; alagad kun dapit ki Jehova, sia an naggibo kan mismong kalangitan.” (Salmo 96:5) Sa sekularisadong kinaban sa ngonyan, sinasamba an nasyonalismo, nasyonal na mga simbolo, prominenteng mga indibiduwal, materyal na mga bagay, asin mismong kayamanan pa ngani. (Mateo 6:24; Efeso 5:5; Colosas 3:5) Si Mohandas K. Gandhi sarong beses nagsabi: “Marigon an opinyon ko na . . . an Europa sa ngonyan Kristiano sa ngaran sana. Iyan talagang nagsasamba sa Mammon [kayamanan].” An totoo, an maogmang bareta kaipuhan na madangog sa gabos na lugar. An gabos, ano man an saindang lenguahe, nasyonalidad, o kamugtakan sa sosyedad, kaipuhan na makaaram manongod ki Jehova asin sa saiyang mga katuyohan. Mawot niato na an gabos mahimate sa mga tataramon kan salmista: “Iatribwir nindo ki Jehova an kamurawayan asin kakosogan. Iatribwir nindo ki Jehova an kamurawayan na manonongod sa saiyang ngaran”! (Salmo 96:​7, 8) Tinatabangan kan Mga Saksi ni Jehova an iba na makanood manongod ki Jehova tanganing ikaatribwir ninda sa saiya nin tama an kamurawayan. Asin an mga naghihimate nakikinabang nin dakula. Anong mga pakinabang an nakakamtan ninda? Totokaron ini sa masunod na artikulo.

[Mga Nota sa Ibaba]

Ikapaliliwanag daw Nindo?

• Taano an Mga Saksi ni Jehova ta maigot na mga paraebanghelyo?

• Taano ta naghuhulit an Mga Saksi ni Jehova dawa sa mga lugar na an Kakristianohan igwa na nin establisadong mga iglesia?

• Taano an Mga Saksi ni Jehova ta bakong mga paragibo nin mga proselito segun sa modernong kahulogan kan terminong iyan?

• Paano nag-oswag an pag-ebanghelyo kan Mga Saksi ni Jehova sa presenteng mga panahon?

[Mga Hapot Para sa Pag-adal]

[Ritrato sa pahina 9]

Si Jesus maigot na paraebanghelyo asin nagsanay nin iba na gibohon man iyan

[Ritrato sa pahina 10]

An gabos na kabilang sa kongregasyon kan enot na siglo nakikabtang sa pag-ebanghelyo

[Ritrato sa pahina 11]

Sala an puersahon an mga tawo na bagohon an saindang relihion