Magtiwala ki Jehova—An Dios na Tunay

Nagtingkalag na daw kamo sa langit sa sarong banggi na daing panganoron asin naheling an ginatos na bitoon? Paano nindo ipaliliwanag an saindang pag-eksister?

SA MATONINONG na banggi, an mga bitoon nagtaram ki Hadeng David kan suanoy na Israel, na nagpahiro sa saiya na magsurat: “An kalangitan nagpapahayag kan kamurawayan nin Dios; asin an gibo kan saiyang mga kamot ipinagsasaysay kan kahiwasan.” (Salmo 19:1) Iyo, an Kaglalang imbes na an linalang an maninigo “na mag-ako kan kamurawayan asin kan onra patin kan kapangyarihan.”​—Kapahayagan 4:11; Roma 1:25.

“An naggibo kan gabos na bagay iyo an Dios,” sabi kan Biblia. (Hebreo 3:4) Tunay nanggad, an tunay na Dios, ‘na an ngaran Jehova, an Kaharohalangkawe sa bilog na daga.’ (Salmo 83:18) Asin sia bakong ilusyon​​—sarong imahinasyon. Si Jesu-Cristo nagsabi may labot sa saiyang langitnon na Ama, si Jehova: “Sia na nagsugo sa sako tunay.”—Juan 7:28.

Si Jehova—An Paraotob kan Saiyang mga Katuyohan

An daing kaparehong ngaran nin Dios, an Jehova, minalataw nin haros 7,000 na beses sa Hebreong Kasuratan sana. An mismong ngaran na iyan nag-aapod nin atension sa katunayan na sia tunay. An ngaran nin Dios literal na nangangahulogan “Saiyang Pinapangyayaring Magin.” Paagi kaiyan ipinamimidbid ni Jehova Dios an saiyang sadiri bilang Paraotob kan saiyang mga katuyohan. Kan ihapot ni Moises sa Dios an saiyang ngaran, idinetalye ni Jehova an kahulogan kaiyan sa paaging ini: “Magigin ako kun ano an magigin ako.” (Exodo 3:14) An traduksion ni Rotherham may pagdodoon na nagsasabi: “Ako Magigin siring sa ano man na boot ko.” Si Jehova nagigin, o boot na magin, an ano man na kaipuhan tanganing otobon an saiyang matanos na mga katuyohan asin panuga. Huli kaini, igwa sia nin manlaenlaen na kahangahangang titulo, arog baga kan Kaglalang, Ama, Soberanong Kagurangnan, Pastor, Jehova nin mga hukbo, Paradangog nin pamibi, Hokom, Kadarudakulaing Paratokdo, Parabalukat.—Hokom 11:27; Salmo 23:1; 65:2; 73:28; 89:26; Isaias 8:13; 30:20; 40:28; 41:14.

Solamenteng an tunay na Dios an angay na magkaigwa kan ngaran na Jehova, huli ta an mga tawo nungkang makasisierto na an saindang mga plano magigin mapanggana. (Santiago 4:​13, 14) Si Jehova sana an makakasabi: “Kun paanong an oran minaibaba, asin an niebe, hale sa kalangitan asin dai na minabalik dian, sagkod na dai kaiyan masagom an daga asin papagbungahon saka patuboon iyan, asin tawan nin banhi an parasabwag asin nin tinapay an makakan, magigin siring man an sakong tataramon na magluwas sa sakong ngoso. Dai iyan mabalik sa sako na daing laog, kundi gigibohon nanggad kaiyan an sakong boot, asin iyan siertong magigin mapanggana sa sakuyang sinobolan kaiyan.”​—Isaias 55:​10, 11.

Isinasagibo ni Jehova an saiyang katuyohan na may siring na kasiertohan na dawa an garo baga bakong tunay para sa mga tawo tunay sa saiyang punto de vista. Haloy na panahon pagkagadan ni Abraham, Isaac, asin Jacob, sinambit sinda ni Jesus asin  nagsabi: “Sia [si Jehova] Dios, bakong kan mga gadan, kundi kan mga buhay, huli ta sinda gabos buhay para sa saiya.” (Lucas 20:​37, 38) Gadan na an tolong fiel na patriarka, alagad an katuyohan nin Dios na buhayon liwat sinda seguradong marhay na maootob kaya para sa saiya sinda garo man sana buhay. An pagbuhay liwat sa fiel na mga lingkod na ini kan suanoy bakong depisil para ki Jehova siring kan paglalang sa enot na tawo hale sa kabokabo kan daga.​—Genesis 2:7.

Itinatao ni apostol Pablo an saro pang halimbawa kan katunayan na pinapangyayari nin Dios an katuyohan niang gibohon. Sa Kasuratan, si Abraham inapod na “ama nin dakol na nasyon.” (Roma 4:​16, 17) Kan si Abram mayo pa giraray nin aki, sinalidahan ni Jehova an saiyang ngaran nin Abraham, na nangangahulogan “Ama nin Sarong Kadaklan (Kaburunyogan).” Pinangyari ni Jehova na an kahulogan kan ngaran na iyan magkatotoo paagi sa milagrosong pagbalik kan kakayahan na mangaki kan may edad nang si Abraham asin kan saiyang gurang nang agom, si Sara.​—Hebreo 11:​11, 12.

Huling tinawan nin dakulang kapangyarihan asin autoridad, si Jesu-Cristo nagtaram manongod sa mga bagay na totoo sa mas halangkaw na punto de vista kisa kan sa mga tawo. Minsan an saiyang dayupot na katood na si Lazaro nagadan, sinabihan ni Jesus an saiyang mga disipulo: “Si Lazaro na katood niato nagpahingalo, alagad ako maduman tanganing pukawon sia sa pagkatorog.” (Juan 11:11) Taano ta sinabi ni Jesus na nagtotorog sana an sarong tawo na gadan na?

Kan nakaabot na si Jesus sa mismong banwaan ni Lazaro sa Betania, sia nagduman sa lolobngan asin nagsabi na haleon an gapong nakatakop sa entrada kaiyan. Pakapamibi nin makosog, sia nagboot: “Lazaro, lumuwas ka!” Asin mantang an mga mata kan mga nagmamasid nakaturuhok sa lolobngan, “idtong nagadan luminuwas na an saiyang mga bitis asin kamot nagagapos nin mga henerong sa gadan, asin napapatos nin sarong podong an saiyang lalauogon.” Dangan si Jesus nagsabi: “Hubadi sia nindo asin palakawa.” (Juan 11:​43, 44) Binuhay liwat ni Jesus si Lazaro​​—na ibinalik an buhay sa sarong tawo na apat na aldaw nang gadan! Dai minisrepresentar ni Cristo an katotoohan kan sabihon nia na an saiyang katood nagtotorog. Sa punto de vista ni Jehova asin ni Jesus, an gadan na si Lazaro garo sana nagtotorog. Iyo, si Jesus asin an saiyang langitnon na Ama nagpaheling nin interes sa mga bagay na totoo.

Puedeng Pangyarihon ni Jehova na Magkatotoo an Satong mga Linalaoman

Kanigoan an kalaenan kan mapandayang mga idolo asin kan tunay na Dios! An mga nagsasamba sa mga idolo salang nag-aatribwir nin nakalalabi sa tawong kapangyarihan sa mga bagay na sinasamba ninda. Pero mayo nin pagreberensiar na makatatao nin milagrosong mga abilidad sa mga idolong ini. Sa ibong na lado, tamang sabihon ni Jehova Dios na an saiyang haloy nang gadan na mga lingkod na garo baga sinda nabubuhay, huli ta kaya nia liwat sindang tawan nin buhay. “Si Jehova sa katotoohan iyo an Dios,” asin nungka niang dinadaya an saiyang banwaan.​—Jeremias 10:10.

Abaa kanakararangang maaraman na sa itinalaan na panahon ni Jehova, an mga gadan na yaon sa saiyang girumdoman bubuhayon liwat​​—ibabalik sa buhay! (Gibo 24:15) Iyo, kalabot sa pagbuhay liwat an pagbabalik kan ugale sa buhay kan indibiduwal. An paggirumdom kan ugale sa buhay kan mga nagadan asin pagbuhay liwat sa sainda bakong problema sa Kaglalang, na daing katapusan an kadonongan asin kapangyarihan. (Job 12:13; Isaias 40:26) Mantang si Jehova nagsosopay sa pagkamoot, gagamiton nia an saiyang sangkap na memorya  tanganing buhayon liwat an mga gadan sa sarong paraisong daga na igwa kan personalidad na yaon sa sainda bago sinda nagadan.​—1 Juan 4:8.

Mantang nagrarani na an katapusan kan kinaban ni Satanas, an ngapit tunay nanggad na maogma para sa mga nagtitiwala sa tunay na Dios. (Talinhaga 2:​21, 22; Daniel 2:44; 1 Juan 5:19) Inaasegurar kita kan salmista: “Dai na mahahaloy, asin ta an maraot mawawara na; . . . alagad an mga mahoyo mismo makasasadiri kan daga, asin manonompongan nanggad ninda an saindang labi-labi nanggad na kaogmahan sa nagsosopay na katoninongan.” (Salmo 37:​10, 11) An krimen asin kadahasan malihis na. Mangingibabaw an hustisya, asin an kasakitan sa pagbuhay mahahale na. (Salmo 37:6; 72:​12, 13; Isaias 65:21-23) An gabos na gira nin sosyal, rasyal, pantribo, asin etnikong diskriminasyon paparaon na. (Gibo 10:​34, 35) An mga guerra asin armas sa pakikilaban mawawara na. (Salmo 46:9) Sa panahon na iyan “mayo nin nag-eerok na masabi: ‘Naghehelang ako.’” (Isaias 33:24) Gabos magkakamit nin sangkap asin mabagsik na salud. (Kapahayagan 21:​3, 4) An paraiso sa daga madali nang magin sarong katunayan. Iyan an katuyohan ni Jehova!

Iyo, madali nang maotob an gabos na paglaom na basado sa Biblia. Taano ta totogotan niato an satong sadiri na dayaon kan iniidolo sa kinaban na ini mantang puede man niatong itao an satong lubos na pagsarig ki Jehova? Kabotan nia na “gabos na klase nin tawo makaligtas asin makaabot sa tamang kaaraman sa katotoohan.” (1 Timoteo 2:​3, 4) Imbes na itao niato an satong panahon asin kayamanan sa mga ilusyon, o imahinasyon, kan sistemang ini nin mga bagay asin sa mga dios kaiyan, tumalubo kita sa kaaraman manongod sa Dios na tunay asin magtiwala sa saiya sa bilog niatong puso.​—Talinhaga 3:1-6; Juan 17:3.

[Ritrato sa pahina 6]

Sa punto de vista ni Jehova asin ni Jesus, si Lazaro nagtotorog sana

[Mga ritrato sa pahina 7]

An paraiso sa daga madali nang magin sarong katunayan