Kalinigan—Ano Talaga an Kahulogan Kaiyan?

HULI sa grabe kaati na mga kamugtakan sa Europa asin Estados Unidos durante kan ika-18 asin ika-19 siglo, ihinulit kan mga misyonero kan peryodong idto an puedeng apodon na “sarong doktrina nin kalinigan.” Ipinareho kan doktrinang ini an ati sa kasalan, mantang an kalinigan sinabing orog na minapadayupot kan saro sa Dios. Tibaad ini an nagpagin popular kan kasabihan na “An pagigin malinig kasunod kan pagigin diosnon.”

Ini an nagin punto de vista kan Salvation Army, na pinundar ni William asin Catherine Booth. Segun sa librong Health and Medicine in the Evangelical Tradition, an saro sa kaenot-enote nindang sarabihon iyo an: “Sabon, Sopas, Asin Kaligtasan.” Dangan, kan patunayan nin daing duda ni Louis Pasteur asin kan iba pa an koneksion nin helang asin bakterya, iyan orog na nag-enganyar asin nagtao nin sarong sientipikong basehan para sa pagmukna nin mga paagi para sa mas marahay na salud kan publiko.

Kaiba sa nagkapirang aksion na ginibo tolos an dai na paghagad sa sarong testigo sa korte na maghadok sa Biblia asin paghale kan sasarong tasang iniinoman kan gabos sa mga eskuelahan asin estasyon nin tren. Ginibo pa ngani an mga paghihingoang salidahan nin indibiduwal na mga kopa an sasarong kopa na ginagamit kan gabos sa mga serbisyo relihioso. Iyo, an mga enot na nagsagibo kaini garo baga darudakula an kapangganahan sa pagbago sa aktitud nin mga tawo dapit sa kalinigan. Kaya ngani inapod nin sarong parasurat an resulta na “buhay na entusiasmo sa kalinigan.”

 Minsan siring, an “buhay na entusiasmo sa kalinigan” na ini minalataw na paimbabaw sana. Dai nahaloy an mahilig magdiskobre nin bagong mga bagay na mga negosyante ginibo an ordinaryong sabon na magin produktong pampagayon. An madonong an pagkagibo na mga anunsio napapatubod an mga parabakal na an paggamit nin sarong produkto para sa personal na kalinigan matao sa naggagamit nin prestihio sa sosyedad na kinaaaraan sana nin iba. Ipinagpapadagos kan telebisyon an pantasiang ini. An asensado asin romantiko an kagayonan na mga tawo na itinatampok sa mga anunsio asin telenobela bibihirang maheling na naglilinig nin harong, nagsisigid nin natad, nagpupurot nin basura, o naglilinig nin odo kan saindang ataman na mga ikos asin ayam.

Igwa man nin mga nangangatanosan na sa pagtrabaho sa luwas nakakakua nin mga panggastos, mantang an pagtrabaho sa harong o iba pang mga trabahong paglinig mayo nin pinansial na pakinabang. Asin huling mayo man makukuang kuarta, anong pakiaram ninda sa palibot? An sarong resulta kaini iyo na an nagkapirang tawo ngonyan nagsasaboot na an kalinigan pampersonal sana.

An Pagmansay nin Dios sa Kalinigan

Daing duda na an enot na mga paghihingoang idto na itokdo an kalinigan nakatabang nanggad na magrahay an kamugtakan kan pamumuhay nin mga tawo. Asin tama nanggad, huling an kalinigan sarong kualidad kan asin gikan sa banal asin malinig na Dios, si Jehova. Tinotokdoan nia kitang pakinabangon an satong sadiri paagi sa pagigin banal asin malinig sa gabos niatong dalan.​—Isaias 48:17; 1 Pedro 1:15.

Si Jehova Dios arogan sa bagay na ini. An kalinigan, siring man an iba pa niang mga kualidad na dai naheheling, malinaw nanggad na naheheling sa naheheling na mga linalang nin Dios. (Roma 1:20) Naheheling niato na an linalang mismo dai nagtatao nin nagdadanay na polusyon. An daga pati an kadakol na siklo kaiyan sa ekolohiya sarong naglilinig nin sadiri na ngangalasan, asin iyan dinisenyo para sa malinig, nakararahay na pamumuhay. An siring kalinig na gibo puedeng gumikan sana sa Kagdisenyo na mapag-isip sa kalinigan. Kun siring, makakokonklusyon kita base digdi na an mga parasamba sa Dios maninigong magin malinig sa gabos na aspekto kan saindang buhay.

Apat na Aspekto nin Kalinigan

Sinasabi kan Biblia an apat na aspekto nin kalinigan na maninigong pagmaigotan kan mga parasamba sa Dios. Estudyaran niato an kada saro kaini.

Espirituwal. Ini an puedeng konsideraron na pinakaimportante sa gabos na kalinigan huli ta iyan may koneksion sa oportunidad nin sarong tawo para sa buhay na daing katapusan. Minsan siring, sa parate ini an pinakanapapabayaan na aspekto nin kalinigan. Sa simpleng pagtaram, an pagigin malinig sa espirituwal nangangahulogan nin nungkang paglampas sa linya na ilinaag nin Dios sa tahaw nin tunay na pagsamba asin falso, huli ta an pagheling nin Dios sa ano man na klase nin falsong pagsamba maati. Si apostol Pablo nagsurat: “‘Humale kamo sa tanga ninda, asin sumuhay kamo,’ an sabi ni Jehova, ‘asin dai na kamo dumotdot sa maating bagay’; ‘asin aakoon ko kamo.’” (2 Corinto 6:17) An disipulong si Santiago espesipiko man na marhay sa bagay na ini: “An klase nin pagsamba na malinig asin daing digta sa pagheling kan satong Dios asin Ama iyo ini: . . . an pagpadanay sa sadiri na daing digta kan kinaban.”​—Santiago 1:27.

Malinaw na ipinaheling nin Dios an saiyang pagdesaprobar sa pagsalak kan falsong pagsamba sa tunay na pagsamba sa saiya. Parateng kaiba sa falsong pagsamba an maating mga gibo asin makauuyam nin makuri na mga idolo asin dios. (Jeremias 32:35) Sa siring, sinasadol an tunay na mga Kristiano na rumayo sa ano man na pagkasangkot sa maating pagsamba.​—1 Corinto 10:​20, 21; Kapahayagan 18:4.

Moral. An Dios nagbubugtak man digdi nin malinaw na pagkakalaen sa kun ano an malinig asin kun ano an maati. Sa kabilogan, an kinaban nagin arog kan ilinadawan sa Efeso 4:17-19: “Sinda nasa kadikloman sa isip, asin siblag sa buhay na gikan sa Dios . . . Mantang nawaran na kan gabos na pagmate sa moral, sinda nagpangana na kan saindang sadiri sa malaswang gawe sa paggibo nin gabos na klaseng kaatian na may kahanaban.” An siring na inmoral na kaisipan nahahayag sa dakol na paagi, hayag asin tago, huli kaini an mga Kristiano kaipuhan na magin mapagmaan.

Aram kan mga namomoot sa Dios na an prostitusyon, homoseksuwalidad, pagdodorog bago an kasal, asin pornograpiya mga pagbalga sa pamantayan  ni Jehova sa kalinigan sa moral. Minsan siring, an mga kapahayagan kan mga gibong ini ordinaryo na sana sa kinaban nin aling-alingan asin moda. An mga Kristiano kaipuhan kun siring na magmaan tumang sa siring na mga tendensia. An pagsulot nin gubing na garo kinulang nin tela asin gubing na naheheling na an parte kan hawak na dapat na natatahoban kun nag-aatender sa Kristianong mga pagtiripon o sosyal na mga katiriponan nakaaapod nin dai kaipuhan na atension sa hawak asin nagpapaheling nin kawaran nin kabinian. Apuera sa pagdara nin maating kinabanon na kaisipan sa Kristianong asosasyon, an paggubing sa paaging iyan may potensial na pumukaw nin maating kaisipan sa iba. Ini sarong kabtang na kaipuhan na pagmaigotan na marhay kan mga Kristiano na ipaheling an “kadonongan hale sa itaas.”​—Santiago 3:17.

Mental. An tagong mga parte kan isip nin saro maninigo na dai magin tambakan nin maating mga kaisipan. Nagpatanid si Jesus tumang sa maating kaisipan kan sia nagsabi: “An lambang saro na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.” (Mateo 5:28; Marcos 7:20-23) An mga tataramon na ini minaaplikar man sa pagheling nin pornograpikong mga retrato asin pelikula, pagbasa nin mga estorya nin malaswang seksuwal na mga aktibidad, asin pagdangog sa nagsusuherir nin bakong disente na mga liriko sa mga kanta. Sa siring, kaipuhan na likayan kan mga Kristiano na atian an saindang sadiri paagi sa pag-ako nin maating mga kaisipan na puedeng magbunga nin maati, bakong banal na pagtaram asin gawe-gawe.​—Mateo 12:34; 15:18.

Pisikal. An kabanalan asin pisikal na kalinigan magkakonektar na marhay sa Biblia. Halimbawa, si Pablo nagsurat: “Mga namomotan, magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Dios.” (2 Corinto 7:1) Kun siring, an tunay na mga Kristiano maninigong magmaigot na papagdanayon an saindang hawak, harong, asin palibot na malinig asin areglado, sagkod na itinotogot kan mga kamugtakan. Dawa sa lugar na kulang an suplay nin tubig para sa paglaba o pagkarigos, an mga Kristiano maninigong maghingoa na gibohon an pinakamakakaya ninda na magdanay na malinig asin presentable.

Dai man puede sa pisikal na kalinigan an paggamit nin tabako sa ano man na porma kaiyan, pagpalabilabi sa inomon na de alkohol, asin ano man na porma nin pag-abuso sa droga, na nag-aati asin nagraraot sa hawak. An pastor na sinambit sa Awit ni Salomon naogmang marhay sa mahamot na parong kan gubing kan daragitang Sulamita. (Awit ni Salomon 4:11) Mamomoton na gibo an pag-asikaso sa satong personal na kalinigan, huli ta gusto niatong likayan na mabataan an mga nakapalibot sa sato. An mga olor asin kolonya mahamot, pero dai masasalidahan kaiyan an regular na pagkarigos asin malinig na mga gubing.

Pagpapadanay nin Timbang na Pagmansay

Kun mapadapit sa pisikal na kalinigan, an mga tawo puedeng masobrahan. Sa sarong lado, an pagigin panatiko sa kalinigan puedeng maghale sa sato kan kagayagayahan sa buhay. Puede man  na uboson kaiyan an dakol na mahalagang marhay na panahon. Sa ibong na lado, an maati asin daing kahusayan na harong puedeng magin magastos na hirahayon. Sa pag-oltanan kan mga pagpasobrang ini iyo an praktikal, timbang na paagi sa pagpapadanay kan satong harong na malinig asin presentable.

Pagdanayon iyan na simple. An disaregladong mga harong o kuarto depisil na linigon, asin an ati tibaad dai tolos maririsa sa siring kapiot na palibot. An simple sana, aregladong mga harong madali sanang linigon. An simpleng estilo nin pamumuhay an irinerekomendar nanggad sa Biblia: “Mantang igwa na nin kakanon asin gubing, maninigoan na kita sa mga bagay na ini.”​—1 Timoteo 6:8.

Pagdanayon iyan na areglado. An malinig na harong responsibilidad kan gabos na nakaistar dian. An disaregladong harong parateng minapoon sa disaregladong mga kuarto. An pagigin areglado nangangahulogan na an gabos na bagay yaon sa tamang kinamumugtakan kaiyan. Halimbawa, an lugar para sa maating mga gubing maninigong bako sa salog kan kuarto. Asin mas seryoso, an mga kawatan asin kasangkapan na iwinalat minsan saen puedeng magin peligroso. An dakol na aksidente sa harong huli sa ugale nin pagigin disareglado.

Malinaw nanggad, an kalinigan asin an Kristianong pamumuhay dai puedeng pagsuwayon. May labot sa diosnon na pamumuhay, an propetang si Isaias nagtataram manongod sa “Dalan nin Kabanalan.” Asin idinugang nia an nakapapepensar na ideya na “dai maagi dian an marigsok.” (Isaias 35:8) Iyo, an pagkultibar nin marahay na mga ugale sa kalinigan ngonyan nagtatao nin makosog na ebidensia kan satong pagtubod sa panuga nin Dios na sa dai na mahahaloy eestablisaron nia an sarong malinig na paraisong daga. Dangan, sa gabos na parte kan magayon na planetang ini, an gabos na tawo mapamuraway ki Jehova Dios paagi sa lubos na pagsunod sa saiyang sangkap na mga pamantayan sa kalinigan.​—Kapahayagan 7:9.

[Ritrato sa pahina 6]

An sarong malinig na harong responsibilidad kan gabos na nakaistar dian

[Ritrato sa pahina 7]

An daga sarong naglilinig nin sadiri na ngangalasan