May Sadiri Man Sindang Kadonongan

“AN MGA nasa edad na igwa nin kadonongan, alagad an mga aki may sadiri man na kadonongan,” an sabi nin sarong kasabihan sa Nigeria. Napatunayan ini ni Edwin, sarong Kristianong magurang sa kongregasyon sa Nigeria.

Sarong aldaw, si Edwin may nakuang kahon na yero sa irarom kan saiyang lamesa sa harong.

“Kiisay ini?” an hapot ni Edwin sa tolo niang aki.

“Sakuya po iyan,” an simbag kan otso anyos na si Emmanuel. Idinugang nia tolos na an tinatakla, singko pulgadang kuadradong kahon na yerong ini na may baak sa ibabaw para sa mga kontribusyon sa pambilog na kinaban na gibohon kan Mga Saksi ni Jehova. “Huling dai ako nagduduman sa Kingdom Hall aroaldaw,” an paliwanag nia, “nagdesisyon ako na gumibo nin sarong kahon tangani na kada dai ko magastos an sakong kuarta na panmeryenda, ikaholog ko iyan sa kahon.”

An ama ni Emmanuel igwa kaidto nin sarong kahon sa harong para sa pagtipon nin kuarta na gagamiton sa pag-atender sa taonan na pandistritong kombension. Alagad huli sa pampamilyang emerhensia, nagamit ninda an laog na kuarta kaiyan. Tanganing seguradohon na an saiyang kontribusyon na kuarta dai gagamiton sa ano man na ibang katuyohan, dinara ni Emmanuel an sarong daan nang lata sa sarong parawelding tanganing serahan iyan. Kan maaraman kan parawelding an paggagamitan kan lata, iginibo nia si Emmanuel nin kahon hale sa mga tinabasan na yero. Si Michael, an singko anyos na tugang ni Emmanuel, nagpagibo man nin kahon.

Napangalas sa ginibo kan mga aki, hinapot sinda ni Edwin kun taano sinda ta nagpagibo nin mga kahon. Si Michael nagsimbag: “Gusto ko pong mag-ambag!”

Dai aram kan saindang mga magurang, si Emmanuel, Michael, asin Uchei, an saindang nuebe anyos na tugang na babae, dinadamot an kabtang kan saindang kuartang panmeryenda asin ihinoholog iyan sa mga kahon. Saen ninda nakua an ideyang iyan? Kan oras na nasa igo nang edad an mga aki na kumapot nin kuarta, tinotokdoan sinda kan saindang mga magurang na magholog nin kuarta sa kahon sa kontribusyon sa Kingdom Hall. Malinaw na iinaplikar nanggad kan mga aki an saindang nanodan.

Kan mapano an mga kahon, binuksan iyan. An nadamot may total na $3.13 (E.U.)​—bakong sadit na kantidad sa sarong nasyon na an promedyong taonan na entrada pipirang gatos na dolyar sana. An siring na boluntaryong mga donasyon nagsusuportar sa paghuhulit kan Mga Saksi ni Jehova na ginigibo ngonyan sa 235 kadagaan sa bilog na kinaban.