Sarong Siudad na Nasa Itaas nin Bukid

“KAMO iyo an liwanag kan kinaban. An siudad dai matatago kun namumugtak sa itaas nin bukid,” an sinabi ni Jesus sa saiyang mga disipulo sa saiyang bantog na Sermon sa Bukid.​—Mateo 5:14.

An dakol na banwaan sa Judea asin Galilea nasa kabukidan imbes na nasa kababan. An pinakadahelan sa pagpili kan mga lugar sa alitoktok nin bulod iyo an pagigin harayo sa peligro. Apuera sa nananakyadang mga hukbo, parateng nandedestrosar an mga grupo nin tulisan sa sadit na mga baryo nin mga Israelita. (2 Hade 5:2; 24:2) Mas pasil na ikadedepensa nin determinadong mga siudadano an sarong grupo nin durokotan na marhay na harong sa alitoktok nin bukid kisa sa sarong banwaan na nasa ibaba, na nangangaipo nin mas dakulang lanob para sa proteksion.

Mantang an mga lanob kan mga harong nin mga Judio sa parate napapalitadahan nin apog, an enterong grupo nin kahaharongan na ini na pinintahan nin puti na durokotan sa alitoktok nin bulod heling-heling sa palibot minsan dakol na kilometro an rayo. (Gibo 23:3) Sa maliwanag na sirang nin saldang sa Palestina, an mga banwaan na ini na nasa itaas nin bulod nagkikinang na garo tingraw, kapareho pa man giraray kan mga banwaan sa Mediterraneo sa ngonyan.

Ginamit ni Jesus an risang marhay na aspektong ini kan mga probinsia sa Galilea asin Judea tanganing itokdo sa saiyang mga parasunod an katongdan nin sarong tunay na Kristiano. “Kaagid kaiyan pasiranga an saindong liwanag sa atubangan nin mga tawo,” an sinabi nia sa sainda, “tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mateo 5:16) Minsan ngani an marahay na mga gibo dai ginigibo kan mga Kristiano tanganing omawon nin mga tawo, may nakakarisa kan saindang marahay na paggawe.​—Mateo 6:1.

Risang-risa an siring na marahay na paggawe partikularmente durante kan pandistritong mga kombension kan Mga Saksi ni Jehova. An sarong peryodiko sa España, na nagtataram manongod sa sarong dai pa sana nahahaloy na kombension, nagbareta: “Minsan ngani nagluluya an interes sa relihiosong mga tema sa ibang mga denominasyon, bakong arog kaini sa Mga Saksi ni Jehova. Mantang habo ninda na mawaran nin halaga an Biblia, iinaaplikar ninda an Tataramon nin Dios.”

Si Thomas, an tumatawo sa sarong istadyum sa amihanan-solnopan nin España na regular na ginagamit kan mga Saksi, naoogmang makaibanan an mga tawo na nag-aaplikar kan Tataramon nin Dios. Iinoktaba nia an saiyang pagretiro nin nagkapirang semana tangani na sia magin presente sa sarong pandistritong kombension kan Mga Saksi ni Jehova. Kan dinolok sia nin dakol na delegado, kaiba an mga hoben, pakatapos kan kombension tanganing pasalamatan sia sa saiyang kooperasyon sa nag-aging mga taon asin tanganing magpahayag nin pagmawot na maparahay sia sa saiyang pagretiro, sia biglang napaluha. “An pakamidbid ko sa saindo saro sa pinakamarahay na eksperyensia sa sakong buhay,” an sinabi nia.

An sarong siudad na nasa itaas nin sarong bukid nakakukua kan atension nin sarong nagmamasid huli ta iyan lataw na marhay sa poro kan daga asin huli ta an arin man na puting harong dian nagkikilyab sa saldang. Kaagid kaiyan, an tunay na mga Kristiano lataw man na marhay an kalaenan huli ta hinihingoa nindang sunodon an halangkaw na mga pamantayan sa Kasuratan dapit sa pagkaonesto, moralidad, asin pakikidamay.

Dugang pa, ipinababanaag kan mga Kristiano an liwanag nin katotoohan paagi sa saindang paghuhulit. Si apostol Pablo nagsabi dapit sa mga Kristiano kan enot na siglo: “Mantang igwa kami kan ministeryong ini sono sa pagkaherak na ipinaheling  sa samo, dai kami minasuko . . . kundi paagi sa paghayag kan katotoohan nagrerekomendar kan samong sadiri sa lambang konsensia nin tawo sa pagheling nin Dios.” (2 Corinto 4:​1, 2) Minsan ngani sinda napapaatubang sa pagtumang sa gabos na lugar na hinuhulitan ninda, binendisyonan ni Jehova an saindang ministeryo, kaya kan mga taon 60 C.E., ikinasurat ni Pablo na an maogmang bareta ihinuhulit na “sa gabos na linalang sa sirong nin langit.”​—Colosas 1:23.

Ngonyan, sineseryoso man kan Mga Saksi ni Jehova an saindang paninimbagan na ‘pasirangon an saindang liwanag sa atubangan nin mga tawo,’ siring kan ipinagboot ni Jesus. Sa berbal na paagi asin paagi sa ipinublikar na babasahon, pinalalakop kan Mga Saksi ni Jehova an maogmang bareta kan Kahadean sa 235 kadagaan sa bilog na kinaban. Tangani na makaabot an liwanag kan katotoohan sa Biblia sa pinakadakol na tawo sagkod sa mapupuede, ilinuwas ninda an saindang mga publikasyon sa Biblia sa mga 370 lenguahe.​—Mateo 24:14; Kapahayagan 14:​6, 7.

Sa dakol na lugar, ginibo kan mga Saksi an depisil na pag-adal kan mga lenguahe nin mga tawo na nagbalyo hale sa mga nasyon na ibinabawal o ipinagbawal an paghuhulit. Halimbawa, sa dakol na mas dakulang siudad sa Amerika del Norte, nagkaigwa nin lagdoan na pag-abot nin mga tawo hale sa Tsina asin Rusya. An lokal na mga Saksi naghingoang mag-adal nin Intsik, Ruso, asin iba pang mga lenguahe tanganing ihulit an maogmang bareta sa mga bagong abot. Sa katunayan, may pinamamayohan na marikas an pagtotokdo na mga kurso sa dakol na lenguahe tangani na ikahulit an maogmang bareta sa iba pa mantang an langtad “maputi na para sa pag-ani.”​—Juan 4:35.

Ihinula ni propeta Isaias: “Mangyayari sa huring kabtang kan mga aldaw na an bukid kan harong ni Jehova marigon na mapatitindog na halangkaw pa sa alitoktok kan mga bukid, asin iyan ilalangkaw nanggad nin mas halangkaw pa sa mga bulod; asin dian maburunyog an gabos na nasyon.” Paagi sa saindang paggawe sagkod ministeryo, tinatabangan kan Mga Saksi ni Jehova an mga tawo sa gabos na lugar na magduman sa “bukid kan harong ni Jehova” tanganing matokdoan manongod sa mga dalan nin Dios asin tanganing makanood na lumakaw sa mga dana nin Dios. (Isaias 2:​2, 3) An maogmang resulta iyo na, siring kan sinabi ni Jesus, sinda iribang ‘nagpapamuraway sa saindang langitnon na Ama,’ si Jehova Dios.​—Mateo 5:16; 1 Pedro 2:12.