Biyong Nasangkapan Bilang mga Paratokdo kan Tataramon nin Dios
Biyong Nasangkapan Bilang mga Paratokdo kan Tataramon nin Dios
“[An] Dios . . . talagang nagpagin biyong kualipikado sa samo na magin mga ministro.”—2 CORINTO 3:5, 6.
1, 2. Anong mga paghihingoa sa paghuhulit an ginigibo kun beses, alagad taano ta sa parate nasusudya iyan?
ANO an mamamatean nindo kun tawan kamo nin sarong trabaho na bako kamong kualipikadong gibohon iyan? Imahinara nindo: An materyales na kaipuhan nindo nasa atubangan nindo, asin yaon an mga kasangkapan. Alagad mayo kamo nin ideya kun paano gigibohon an trabaho. Mas maraot pa, apretado an partikular na trabahong ini. An mga tawo nag-aasa sa saindo. Nakapanluluya nanggad iyan sa boot!
2 An problemang iyan bakong biyong imahinasyon. Estudyare an sarong halimbawa. Kun beses, an saro sa mga iglesia kan Kakristianohan nagpoprobar na mag-organisar asin gumibo nin ministeryo na pagharongharong. An siring na mga paghihingoa sa parate nasusudya, na nawawara sa laog nin mga semana o bulan. Taano? Dai tinabangan kan Kakristianohan an mga parasunod ninda na magin kualipikado sa trabahong iyan. Maski an klero bakong kualipikado sa paghuhulit na iyan, na sa parate apisar kan dakol na taon nin edukasyon sa sekular na mga eskuelahan asin seminaryo. Taano ta masasabi niato iyan?
3. Sa 2 Corinto 3:5, 6, anong pananaram an ginamit nin tolong beses, asin ano an kahulogan kaiyan?
3 Ipinaliliwanag kan Tataramon nin Dios kun ano an nagpapagin kualipikado sa sarong tunay na parahulit kan Kristianong maogmang bareta. Si apostol Pablo pinasabngan na sumurat: “Bako na kami biyong kualipikado na sa samo man sana tanganing ibilang an ano man na gikan sa samo man sana, kundi an samong pagigin biyong kualipikado naghahale sa Dios, na talagang nagpagin biyong kualipikado sa samo na magin mga ministro.” (2 Corinto 3:5, 6) Mangnoha an pananaram na ginamit nin tolong beses digdi—“biyong kualipikado.” Ano an kahulogan kaiyan? An Vine’s Expository Dictionary of Biblical Words nagsasabi: “Kun sinasabi manongod sa mga bagay [an orihinal na termino sa Griego] nangangahulogan nin ‘igo’ . . . ; kun sinasabi manongod sa mga tawo, iyan nangangahulogan nin ‘may kakayahan,’ ‘maninigo.’” Sa siring, an saro na “biyong kualipikado” may kakayahan asin maninigo sa paggibo nin sarong trabaho. Iyo, an tunay na mga ministro kan maogmang bareta kualipikado na gibohon ini. Sinda may kakayahan, angay, o maninigo na maghulit.
4. (a) Paano ipinaheheling kan halimbawa ni Pablo na an pagigin kualipikado sa Kristianong ministeryo bakong para sana sa pirang piling tawo? (b) Ano an tolong paagi na kita pinagigin kualipikado ni Jehova bilang saiyang mga ministro?
4 Pero, saen hale an kualipikasyon na iyan? Sa personal na mga talento? Sa nakalalabing katalian? Sa espesyalisadong edukasyon sa prestihiosong mga eskuelahan? Malinaw na yaon ki apostol Pablo an gabos na bagay na iyan. (Gibo 22:3; Filipos 3:4, 5) Pero, mapakumbaba niang minidbid na an saiyang mga kualipikasyon bilang sarong ministro naghahale, bakong sa mga eskuelahan nin mas halangkaw na inadalan, kundi ki Jehova Dios. An mga kualipikasyon daw na iyan para sana sa pirang piling tawo? Si Pablo nagsurat sa kongregasyon sa Corinto manongod sa “samong pagigin biyong kualipikado.” Iyan nagsusuherir nanggad na sinisierto ni Jehova na an gabos niang fiel na lingkod igwa nin kakayahan, na kayang gibohon an trabaho na iinasignar nia sa sainda. Paano pinagigin kualipikado ni Jehova an tunay na mga Kristiano ngonyan? Pag-olayan ta an tolong paagi na ginagamit nia: (1) an saiyang Tataramon, (2) an saiyang banal na espiritu, asin (3) an saiyang daganon na organisasyon.
An Tataramon ni Jehova Nagpapagin Kualipikado sa Sato
5, 6. An Banal na Kasuratan igwa nin anong epekto sa tunay na mga Kristiano?
5 Enot, paano kita tinatabangan kan Tataramon nin Dios na magin kualipikado bilang ministro? Si Pablo nagsurat: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, biyong nasangkapan para sa lambang marahay na gibo.” (2 Timoteo 3:16, 17) Kaya an Banal na Kasuratan nagtatabang na gibohon kitang “lubos na may kakayahan, biyong nasangkapan” na gibohon an “marahay na gibo” na pagtotokdo sa mga tawo manongod sa Tataramon nin Dios. Pero kumusta man an gabos na parasunod kan mga iglesia nin Kakristianohan? May Biblia sinda. Paanong an sarong libro natatabangan an nagkapirang tawo na magin may kakayahan na ministro alagad an iba dai kaiyan natatabangan? An simbag nasa satong aktitud sa Biblia.
6 Makamomondo, an dakol na nagsisimba dai inaako an mensahe kan Biblia “siring sa iyo man nanggad, siring sa tataramon nin Dios.” (1 Tesalonica 2:13) An Kakristianohan nakatipon nin makasusupog na rekord mapadapit digdi. Pakatapos nin dakol na taon na pag-adal sa mga institusyon nin teolohiya, nasangkapan daw an klero bilang mga paratokdo kan Tataramon nin Dios? Talagang dai. Tara, an nagkapirang estudyante minapoon na mag-adal sa mga seminaryo na nagtutubod sa Biblia alagad minagradwar na mga mapagduda! Pakatapos kaiyan, imbes na maghulit kan Tataramon nin Dios—na dai na pinaniniwalaan kan dakol sa sainda—sa iba ninda ginagamit an saindang ministeryo, na nagkakampi sa politikal na mga debate, sinusuportaran an sarong ebanghelyo para sa reporma sosyal, o itinatampok an mga pilosopiya nin tawo sa saindang mga sermon. (2 Timoteo 4:3) Sa kabaliktaran, an tunay na mga Kristiano sinusunod an halimbawa ni Jesu-Cristo.
7, 8. Paano napapalaen an aktitud ni Jesus dapit sa Tataramon nin Dios kisa kan sa mga namomoon sa relihion kan saiyang kaaldawan?
7 Dai tinogotan ni Jesus an mga namomoon sa relihion kan saiyang kaaldawan na makaimpluwensia sa saiyang kaisipan. Baga man nagtotokdo sa sadit na grupo, arog kan saiyang mga apostol, o sa dakulang kaburunyogan, pirmeng ginagamit ni Jesus an banal na kasuratan. (Mateo 13:10-17; 15:1-11) An ginigibo niang ini an nagpagin laen sa saiya sa mga namomoon sa relihion kan panahon na idto. Makosog na dinesganar ninda an ordinaryong mga tawo sa pagsiyasat sa hararom na mga bagay nin Dios. Sa katunayan, kinatodan nin sarong paratokdo kan kaaldawan na idto na maniwala na an nagkapirang teksto sa Biblia hararomon kaya puede sanang ipakipag-olay sa saiyang pinakapaboritong estudyante—asin dawa pa siring, iyan gigibohon sana sa maluyang boses asin na nakakolbong. An mga namomoon na idto sa relihion haros superstisyoso pareho sa pakikipag-olay sa nagkapirang kabtang kan Biblia asin sa pagpronunsiar kan ngaran nin Dios!
8 Si Cristo bakong arog kaiyan. Nagtubod sia na bako sanang pirang piling tawo kundi an mga tawo sa pankagabsan an kaipuhan na mag-estudyar kan “lambang tataramon na minaluwas sa ngoso ni Jehova.” Bakong interesado si Jesus sa pagtao nin ano man na liabe nin kaaraman sa sarong piling grupo nin mga intelektuwal. Sinabihan nia an saiyang mga disipulo: “An sinasabi ko sa saindo sa kadikloman, isabi nindo sa liwanag; asin an ihinihinghing saindo, ihulit nindo hale sa mga atop.” (Mateo 4:4; 10:27) Galagang pinagmawot ni Jesus na ihiras an kaaraman dapit sa Dios sa pinakadakol na tawong posible.
9. Paano ginagamit kan tunay na mga Kristiano an Biblia?
9 An Tataramon nin Dios an maninigo na pinakatampok kan satong pagtotokdo. Halimbawa, kun kita nagpapahayag sa sarong Kingdom Hall kan Mga Saksi ni Jehova, sa parate bakong igo na basahon sana an piniling mga bersikulo sa Biblia. Tibaad kaipuhan tang ipaliwanag, iilustrar, asin iaplikar an sarong teksto sa konteksto kaiyan. An pasohan niato gibohon na buhay an mensahe kan Biblia asin itadom iyan sa puso kan mga naghihinanyog sa sato. (Nehemias 8:8, 12) An Biblia maninigo man na gamiton kun kinakaipuhan na magtao nin hatol o nagtatanos na disiplina. Minsan ngani an banwaan ni Jehova magkakalaen an lenguahe asin laen-laen an pinaghalean, iginagalang ninda gabos an Libro nin mga libro—an Biblia.
10. Ano an puedeng magin epekto sa sato kan ipinasabong na mensahe kan Biblia?
10 Kun ginagamit na igwa kan siring na paggalang, an mensahe kan Biblia igwa nin puersa. (Hebreo 4:12) Pinahihiro kaiyan an mga tawo na gumibo nin mga pagbabago sa saindang buhay, siring kan pagtalikod sa bakong sono sa Kasuratan na mga gibo na pakikisaro, pagsambay, idolatriya, pagbuburat, asin paghabon. Kadakol na an natabangan kaiyan na hubaon an daan na personalidad asin isolog an bago. (Efeso 4:20-24) Iyo, kun iginagalang ta iyan nin labi kisa ano man na opinyon o tradisyon nin tawo asin fiel na ginagamit iyan, matatabangan kita kan Biblia na magin may kakayahan, biyong nasangkapan bilang mga paratokdo kan Tataramon nin Dios.
An Espiritu ni Jehova Nagpapagin Kualipikado sa Sato
11. Taano an banal na espiritu ni Jehova ta angay na apodon na “an paratabang”?
11 Ikaduwa, pag-olayan ta an kabtang kan banal na espiritu, o puersa aktiba, ni Jehova sa paggibo sa sato na magin biyong nasangkapan. Dapat na nungka niatong paglingawan na an espiritu ni Jehova iyo na an pinakamakosog na puersa. Tinawan ni Jehova nin kapangyarihan an saiyang namomotan na Aki na gamiton an makangingirhat na puersang iyan sa kapakanan kan gabos na tunay na Kristiano. Angay nanggad, an banal na espiritu inapod ni Jesus na “an paratabang.” (Juan 16:7) Sinadol nia an saiyang mga parasunod na hagadon ki Jehova an espiritung iyan, na sinisierto sa sainda na itatao iyan ni Jehova nin bulaos.—Lucas 11:10-13; Santiago 1:17.
12, 13. (a) Taano ta mahalaga na arangon niato an banal na espiritu na tabangan kita sa satong ministeryo? (b) Paano ipinaheling kan mga Fariseo na an banal na espiritu dai naghihiro sa sainda?
12 Kaipuhan niatong arangon an banal na espiritu aroaldaw, nangorogna sa pagtabang sa sato sa satong ministeryo. Ano an puedeng magin epekto sa sato kan puersa aktibang iyan? Puede iyan na maghiro sa satong isip asin puso, na tinatabangan kitang magbago, umoswag, asin sanglian kan bago an daan na personalidad. (Colosas 3:9, 10) Matatabangan kita kaiyan na kultibaron an mahalagang marhay, arog-Cristong mga kualidad. An dakol sa sato tuom an Galacia 5:22, 23. Nakalista sa mga bersikulong iyan an mga bunga kan espiritu nin Dios. An enot pagkamoot. An kualidad na iyan mahalagang marhay sa satong ministeryo. Taano?
13 An pagkamoot iyo an dakulang paramotibar. An pagkamoot ki Jehova asin sa kapwa an nagpapahiro sa tunay na mga Kristiano na ihiras an maogmang bareta. (Marcos 12:28-31) Kun mayo an siring na pagkamoot, dai talaga kita magigin kualipikado bilang mga paratokdo kan Tataramon nin Dios. Mangnoha an pagkakalaen ni Jesus asin kan mga Fariseo. An Mateo 9:36 nagsasabi dapit ki Jesus: “Kan maheling nia an mga kadaklan naherak sia sa sainda, huli ta sinda naanitan asin nagkakaralagalag siring sa mga karnero na mayong pastor.” Ano an nagin saboot kan mga Fariseo manongod sa ordinaryong mga tawo? Sinasabi ninda: “An kadaklan na ini na dai tatao kan Ley mga tawong isinumpa.” (Juan 7:49) An mga Fariseong idto mayong pagkamoot sa mga tawo kundi pirmeng paghamak. Malinaw nanggad, an espiritu ni Jehova dai naghihiro sa sainda.
14. Paano maninigong magpahiro sa sato an halimbawa ni Jesus nin pagpaheling nin pagkamoot sa saiyang ministeryo?
14 Si Jesus may simpatiya sa mga tawo. Aram nia an saindang kakologan. Aram nia na sinda minaltrato, naanitan, asin nagkaralagalag siring sa mga karnero na mayong pastor. An Juan 2:25 nagsasabi sa sato na “aram [ni Jesus] kun ano an nasa tawo.” Huling nagin Pangenot na Trabahador ni Jehova durante kan paglalang, si Jesus igwa nin hararom na pakasabot sa naturalesa nin tawo. (Talinhaga 8:30, 31) Pinararom kan pakasabot na iyan an saiyang pagkamoot. Logod na an siring na pagkamoot an pirmeng magin nagmomotibar na puersa sa satong paghuhulit! Kun naheheling ta na puede pa kitang umoswag sa bagay na ini, arangon ta an banal na espiritu ni Jehova dangan humiro kaoyon kan satong mga pamibi. Sisimbagon kita ni Jehova. Susugoon nia an dai malalabanan na puersang ini tanganing tabangan kita na magin orog na arog ki Cristo, na iyo an pinakakualipikadong maghulit kan maogmang bareta.
15. Paano minaaplikar ki Jesus an mga tataramon sa Isaias 61:1-3 asin kadungan kaiyan ibinubuyagyag an mga eskriba asin Fariseo?
15 Saen hale an kualipikasyon ni Jesus? “An espiritu ni Jehova yaon sa sako,” an sabi nia. (Lucas 4:17-21) Iyo, ninombrahan mismo ni Jehova si Jesus paagi sa banal na espiritu. Dai na kaipuhan pa ni Jesus an mga kredensial. Ninombrahan daw kan banal na espiritu an mga namomoon sa relihion kan saiyang kaaldawan? Dai. Ni sinangkapan sinda na otobon an Isaias 61:1-3, na binasa ni Jesus nin makosog asin iinaplikar sa saiyang sadiri. Basahon tabi nindo an mga bersikulong iyan, asin helingon nindo mismo na an mapagsaginsagin na mga eskriba asin Fariseo dai nakaabot sa pamantayan na iyan. Mayo sinda nin maogmang bareta na ipahahayag sa mga dukha. Asin paano sinda makapaghuhulit nin pakabutas kan mga bihag asin nin pakaheling liwat kan mga buta? Sa espirituwal na sentido, sinda mismo buta asin nasa pagkaoripon sa mga tradisyon na gibo nin tawo! Bakong arog kan mga tawong idto, kita daw kualipikado na magtokdo sa mga tawo?
16. Anong kompiansa an puedeng mamatean kan banwaan ni Jehova ngonyan kun dapit sa saindang kualipikasyon bilang mga ministro?
16 Totoo, dai kita nag-adal sa mga eskuelahan kan Kakristianohan para sa mas halangkaw na inadalan. Mayo kita nin nombramiento bilang mga paratokdo hale sa sarong seminaryo nin teolohiya. Kun siring, mayo daw kita nin kualipikasyon? Dai nanggad! An satong nombramiento bilang saiyang mga Saksi naghahale ki Jehova. (Isaias 43:10-12) Kun aarangon niato an saiyang espiritu asin kita mahiro kaoyon kan satong pamibi, kita an may pinakahalangkaw na kualipikasyon. Siempre, kita bakong sangkap asin nagkukulang sa halimbawa na itinao kan Dakulang Paratokdo, si Jesus. Minsan siring, bako daw na nagpapasalamat kita na ginagamit ni Jehova an saiyang espiritu tanganing magpagin kualipikado sa sato asin sangkapan kita bilang mga paratokdo kan saiyang Tataramon?
An Organisasyon ni Jehova Nagpapagin Kualipikado sa Sato
17-19. Paano kita tinatabangan kan limang semanal na pagtiripon na itinatao kan organisasyon ni Jehova na magin kualipikado bilang mga ministro?
17 Pag-olayan ta ngonyan an ikatolong paagi na sinasangkapan kita ni Jehova bilang mga paratokdo kan saiyang Tataramon—an saiyang daganon na kongregasyon, o organisasyon, na nagsasanay sa sato na magin mga ministro. Paano? Isip-isipa na sana an programa nin pagtotokdo sa sato! Sa sarong normal na semana, kita nag-aatender sa limang Kristianong pagtiripon. (Hebreo 10:24, 25) Nagtitiripon kita sa sadit na mga grupo sa Pag-adal sa Libro kan Kongregasyon para sa lubos na pag-adal sa Biblia paagi sa sarong librong pinag-aadalan na makukua paagi sa organisasyon ni Jehova. Paagi sa paghinanyog asin pagkomento, kita nakakanood sa asin nagpaparigon sa boot kan lambang saro. Nag-aako man kita nin personal na pagtotokdo asin pag-asikaso hale sa paraataman sa pag-adal sa libro. Sa Pampublikong Pagtiripon asin Pag-adal sa Torrengbantayan, kita nagkukua nin dugang pang masustansiang espirituwal na pagkakan.
18 An satong Teokratikong Paadalan sa Pagmiministro dinisenyo tanganing tokdoan kita kun paano magtotokdo. Paagi sa pag-andam sa mga pahayag nin estudyante, nakakanood kita kun paano gagamiton an Tataramon nin Dios sa pagtotokdo nin laen-laen na tema. (1 Pedro 3:15) Naasignaran na daw kamong tumao nin sarong pahayag dapit sa sarong tema na garo pamilyar na marhay, asin nadiskobre nindo na may nanonodan kamong bago manongod dian? Naeeksperyensiahan iyan kan gabos. Mayo nang orog na nagpapatarom sa satong kaaraman dapit sa sarong tema kundi an pagtotokdo kaiyan sa iba. Dawa kun dai kita naasignaran na magtao nin presentasyon, makakanood pa man giraray kitang magin mas marahay na mga paratokdo. Sa lambang estudyante, may naoobserbaran kitang marahay na mga kualidad, asin puede niatong pag-isipan kun paano aarogon an mga kualidad na iyan.
19 An Pagtiripon sa Paglilingkod dinisenyo man tanganing sangkapan kita bilang mga paratokdo kan Tataramon nin Dios. Kada semana, nakakadangog kita nin buhay na mga pahayag, pag-orolay, asin demonstrasyon na ibinagay sa satong ministeryo. Anong pag-atubang an gagamiton niato? Paano niato aatubangon an partikular na mga angat sa satong pampublikong ministeryo? Anong mga paagi nin paghuhulit an bukas sa sato na tibaad kaipuhan pa niatong probaran? Ano an matabang sa sato na magin mas epektibong mga paratokdo kun kita nagdadalaw liwat asin namamayo nin mga pag-adal sa Biblia? (1 Corinto 9:19-22) An siring na mga hapot tinatratar asin tinotokar nin detalyado sa Pagtiripon sa Paglilingkod. An dakol na kabtang sa pagtiripon basado sa mga artikulo sa An Satong Ministeryo sa Kahadean, na saro pang instrumento na itinao tanganing sangkapan kita sa satong mahalagang marhay na trabaho.
20. Paano kita makikinabang nin lubos sa mga pagtiripon asin asamblea?
20 Paagi sa pag-andam para sa asin pag-atender sa satong mga pagtiripon dangan pag-aplikar kan satong nanodan sa satong gibohon bilang mga paratokdo, kita nag-aako nin mahiwas na pagsasanay. Alagad bako sana iyan. Igwa man kita nin mas darakulang pagtiripon—mga asamblea asin kombension—na dinisenyo tanganing sangkapan kita bilang mga paratokdo kan Tataramon nin Dios. Asin galaga nanggad kita na maghinanyog nin atento asin iaplikar an siring na konseho!—Lucas 8:18.
21. Anong ebidensia an nagpapaheling na nagin epektibo an satong pagsasanay, asin kiisay napapaduman an kredito?
21 Nagin epektibo daw an pagsasanay na itinatao ni Jehova? Pabayaeng an katunayan mismo an magsabi. Kada taon, ginatos na ribong tawo an natatabangan na manodan an pundamental na mga doktrina sa Biblia asin mamuhay kaoyon kan hinahagad sa sainda nin Dios. Nagdadakol kita, alagad mayo sa sato an puedeng personal na kumua kan kredito para dian. Dapat na mansayon niato iyan nin realistiko, siring kan ginibo ni Jesus. Sia nagsabi: “Dai nin nakadodolok sa sako kun dai sia dagkahon kan Ama na nagsugo sa sako.” Siring kan mga apostol kan suanoy, an kadaklan sa sato daing inadalan asin ordinaryo. (Juan 6:44; Gibo 4:13) An satong kapangganahan nakadepende ki Jehova, na nagdadagka sa sadiosan an pusong mga tawo pasiring sa katotoohan. Magayon an pagkasabi kaiyan ni Pablo: “Ako an nagtanom, si Apolos an nagbaribi, alagad an Dios iyo an nagpapatubo kaiyan.”—1 Corinto 3:6.
22. Taano ta maninigo na nungka kitang madesganar nin labi-labi manongod sa pakikikabtang nin lubos sa Kristianong ministeryo?
22 Iyo, si Jehova Dios aktibong imbuelto sa satong gibohon bilang mga paratokdo kan saiyang Tataramon. Tibaad dai kita pirmeng makamate na kualipikado bilang mga paratokdo. Alagad girumdomon, si Jehova an nagdadagka sa mga tawo pasiring sa saiya asin sa saiyang Aki. Si Jehova an nagpapagin kualipikado sa sato na maglingkod sa mga bagohan na iyan paagi sa saiyang Tataramon, saiyang banal na espiritu, asin saiyang daganon na organisasyon. Sunodon ta an pagsasanay ni Jehova paagi sa pag-aplikar kan marahay na mga bagay na itinatao nia ngonyan tanganing gibohon kitang biyong nasangkapan bilang mga paratokdo kan Tataramon nin Dios!
Ano an Isisimbag Nindo?
• Paano kita sinasangkapan kan Biblia para sa paghuhulit?
• Ano an kabtang kan banal na espiritu sa pagpagin kualipikado sa sato bilang mga ministro?
• Sa anong mga paagi kamo tinabangan kan daganon na organisasyon ni Jehova na magin kualipikado bilang parahulit kan maogmang bareta?
• Taano ta puede kitang magin kompiado kun nakikikabtang sa ministeryo?
[Mga Hapot Para sa Pag-adal]
[Ritrato sa pahina 25]
Bilang paratokdo kan Tataramon nin Dios, si Jesus nagpaheling nin pagkamoot sa mga tawo