Makikinabang Kamo sa Diosnon na mga Prinsipyo

DAING duda na aram nindo na an mga hayop ginigiyahan nin naturalesa. An dakol na makina dinisenyo na sumunod sa mga instruksion. Alagad an mga tawo talagang linalang tanganing giyahan nin mga prinsipyo. Paano kamo makaseseguro kaiyan? Bueno, si Jehova, an Kagtugdas kan gabos na matanos na prinsipyo, nagpaisi kan lalangon nia an enot na mga tawo: “Gibohon niato an tawo sa satong ladawan, kasugad niato.” An Kaglalang sarong espiritu; mayo sia nin pisikal na hawak na arog niato, kaya kita ‘kaladawan’ nia huli ta puede niatong ipabanaag an saiyang personalidad, na nagpapaheling nin sarong sokol kan saiyang marahayon na mga kualidad. An mga tawo may kakayahan na giyahan an saindang buhay segun sa mga prinsipyo, sa ibang pagtaram, segun sa tinutubod ninda na mga susundon nin tamang gawe-gawe. Ipinasurat ni Jehova an dakol sa mga prinsipyong ini sa saiyang Tataramon.​—Genesis 1:26; Juan 4:24; 17:17.

‘Alagad an Biblia may ginatos na prinsipyo,’ an tibaad sabihon nin saro. ‘Imposibleng maaraman ko gabos iyan.’ Totoo. Pero estudyare an katotoohan na ini: Minsan ngani an gabos na diosnon  na prinsipyo kapakipakinabang, an nagkapira mas mahalaga kisa iba. Maheheling nindo iyan sa Mateo 22:37-39, kun saen ipinaheling ni Jesus na sa mga togon asin kaparehong mga prinsipyo sa Ley ni Moises, an nagkapira mas mahalaga kisa iba.

Arin an mas mahalagang mga prinsipyo? An importanteng marhay na mga prinsipyo sa Biblia iyo an may direktang epekto sa satong relasyon ki Jehova. Kun isasapuso niato an mga ini, an Kaglalang an nagigin pangenot na impluwensia sa satong moral na kompas. Saro pa, may mga prinsipyo na nakakaapektar sa satong relasyon sa ibang tawo. An pag-aplikar sa mga ini an matabang sa sato na mapaglabanan an me-ism, ano man an tibaad apod kaiyan.

Magpoon kita sa saro kan pinakaimportanteng mga katotoohan sa Biblia. Ano an katotoohan na iyan, asin paano kita naaapektaran kaiyan?

“An Kaharohalangkawe sa Bilog na Daga”

Linilinaw kan Banal na Kasuratan na si Jehova an satong Kaharohalangkaweng Kaglalang, Makakamhan sa gabos na Dios. Nungka siang mapapantayan o masasalidahan. Ini an importanteng marhay na katotoohan na irinekord sa Biblia.​—Genesis 17:1; Eclesiastes 12:1.

Nagsabi an saro sa mga kagsurat kan libro nin Salmo manongod ki Jehova: “Ika sana an Kaharohalangkawe sa bilog na daga.” Si Hadeng David kan suanoy nagsurat: “Saimo an kahadean, O Jehova, an Saro na naglalangkaw man kan saimong sadiri bilang payo sa gabos.” Asin an bantog na propetang si Jeremias napahirong sumurat: “Talagang mayo nin siisay man na nakababaing sa saimo, O Jehova. Dakula ka, asin dakula an saimong ngaran sa pagkamakakamhan.”​—Salmo 83:18; 1 Cronica 29:11; Jeremias 10:6.

Paano niato maninigong iaplikar an mga katotoohan na iyan manongod sa Dios sa pangaroaldaw na buhay?

Malinaw kun siisay talaga an maninigong magin pangenot sa satong buhay​​—an satong Kaglalang asin Paratao nin Buhay. Kun siring, bako daw na angay sanang labanan an ano man na tendensiang darahon an atension sa satong sadiri​​—sarong tendensia na tibaad mas makosog sa nagkapira kisa iba? An sarong madonong na naggigiyang prinsipyo iyo na “gibohon an gabos na bagay sa ikamumuraway nin Dios.” (1 Corinto 10:31) Mapadapit digdi si propeta Daniel nagpaheling nin marahay na halimbawa.

An rekord sa kasaysayan nagsasabi sa sato na si Hadeng Nabucodonosor kan Babilonya napurisaw kaidto huli sa sarong pangatorogan asin hinagad na maaraman an kahulogan kaiyan. Mantang an gabos nariribong, daing kasalasalang sinabi ni Daniel sa hade an gusto niang maaraman. Kinua daw ni Daniel an kredito kaini? Dai, itinao nia an kamurawayan sa “Dios sa kalangitan na Parahayag nin mga hilom.” Nagpadagos si Daniel: “Bakong huli sa ano man na kadonongan na yaon sa sako nin labi kisa yaon sa iba pang nabubuhay na an hilom na ini ihinayag sa sako.” Si Daniel sarong tawo na may prinsipyo. Bakong makangangalas na sa libro nin Daniel, tolong beses siang inapod na “kawiliwiling gayo” sa pagheling nin Dios.​—Daniel 2:​28, 30; 9:23; 10:​11, 19.

Makikinabang kamo kun aarogon nindo si Daniel. Sa pagsunod sa halimbawa ni Daniel, an dai mapagdududahan na nakakokontribwir na bagay iyo an motibo. Siisay an maninigong umako nin onra sa ginigibo nindo? Ano man an saindong situwasyon, may kakayahan kamong humiro kaoyon kan mahalagang marhay na prinsipyong ini sa Biblia​​—si Jehova an Soberanong Kagurangnan. Sa paggibo nindo kaiyan magigin kamong “kawiliwiling gayo” sa saiyang pagheling.

 Estudyaran niato ngonyan an duwang pundamental na prinsipyo na puedeng gumiya sa sato pag-abot sa relasyon sa tawo. Sa atubangan nin lakop na pagtao nin importansia sa sadiri, an parteng ini nin buhay an nangorognang masakit.

“Sa Kababaan nin Pag-isip”

An mga ineenot an saindang sadiri bibihirang naninigoan. An kadaklan gusto nin pirmeng mas marahay na buhay, asin gusto nindang makua tolos iyan. Para sa sainda, an kababaan nin boot sarong klase nin kaluyahan. Iniisip ninda na an pasensia sarong bagay na an iba sana an maninigo na magpaheling. Pag-abot sa pagigin gusto nindang maenot, maski ano puede. Sa paghona daw nindo may iba pa kamong magigibo imbes na gumawe na kapareho ninda?

An mga lingkod nin Dios napapaatubang sa aktitud na iyan aroaldaw, alagad maninigo na dai sinda maolakitan kaiyan. Tinutubod kan maygurang na mga Kristiano an prinsipyong “bako an nagrerekomendar sa saiyang sadiri an inooyonan, kundi an tawong irinerekomendar ni Jehova.”​—2 Corinto 10:18.

Makatatabang an pag-aplikar kan prinsipyo sa Filipos 2:​3, 4. Ineenkaminar kamo kan tekstong iyan na “dai [maggibo] nin ano man huli sa iriwal o huli sa egotismo, kundi sa kababaan nin pag-isip [ibilang] an iba na mas halangkaw kisa saindo.” Sa siring kamo “[magririsa], bakong sa personal na interes sa sadiri sana nindong mga bagay-bagay, kundi siring man sa personal na interes sa mga bagay-bagay kan iba.”

An saro na nagkaigwa nin tamang aktitud manongod sa saiyang sadiri asin naggibo nin tamang pagtantsar sa saiyang sadiring halaga, iyo si Gedeon, sarong hokom sa tahaw kan suanoy na mga Hebreo.  Dai sia naghingoang magin namomoon sa Israel. Minsan siring, kan sia nombrahan sa katongdan na iyan, inapod ni Gedeon an atension sa saiyang pagkadaing halaga. “An sangribo ko iyo an pinakahababa sa Manases, asin ako an kasaditsaditi sa kamag-anakan kan sakong ama,” an paliwanag nia.​—Hokom 6:12-16.

Dugang pa, pakatapos na itao ni Jehova an kapangganahan ki Gedeon, gustong makipag-iwal sa saiya an mga taga Efraim. Ano an reaksion ni Gedeon? Duminakula daw an saiyang sadiring importansia huli sa kapangganahan? Dai. Nalikayan nia an grabeng kapahamakan paagi sa mahoyo niang simbag. “Ano na an nagibo ko kun ikokomparar saindo?” Si Gedeon may kababaan an pag-isip.​—Hokom 8:1-3.

Totoo, an mga pangyayari ki Gedeon nangyari kaidtong haloy na panahon na. Pero, mahalaga kun eestudyaran an kasaysayan na iyan. Maheheling nindo na laen na marhay an aktitud ni Gedeon sa aktitud na lakop na marhay sa ngonyan, asin namuhay sia kaoyon kaiyan, sa kapakinabangan nia.

An nangingibabaw na aktitud na nakapokus sa sadiri puedeng raoton an pagmansay niato sa pagpahalaga sa sadiri. Ikinokorehir kan mga prinsipyo sa Biblia an pagkaraot nin pagmansay na iyan, na itinotokdo sa sato an totoong halaga niato may koneksion sa Kaglalang asin sa iba.

Paagi sa paghimate sa mga prinsipyo sa Biblia, nadadaog niato an nangingibabaw na uso. Dai na kita nadadara kan mga opinyon o sikat na mga tawo. Mientras na orog kitang nakakanood manongod sa matanos na mga prinsipyo, mas namimidbid niato an Kagtugdas kaiyan. Iyo, an pagtao nin espesyal na atension sa diosnon na mga prinsipyo kun binabasa an Biblia kapakipakinabang na marhay.​—Helingon an kahon.

Ginibo ni Jehova na mas halangkaw an mga tawo kisa mga hayop, na sa pangenot pinahihiro kan naturalesa. Kalabot sa pagsunod sa kabotan nin Dios an pag-aplikar sa mga prinsipyo nin Dios. Sa siring mapagdadanay niato sa marahay na kamugtakan an satong moral na kompas, sarong kompas na magiya sa sato pasiring sa bagong sistema na gigibohon nin Dios. An Biblia nagtatao sa sato nin dahelan na antisiparon sa dai na nanggad mahahaloy an pambilog na dagang bagong sistema kun saen “magdadanay an katanosan.”​—2 Pedro 3:13.

[Kahon/Ritrato sa pahina 6]

Nagkapirang Nakatatabang na Prinsipyo sa Biblia

Sa laog nin pamilya:

“An lambang saro maghanap, bakong kan saiyang karahayan, kundi kan sa iba.”​—1 Corinto 10:24.

“An pagkamoot . . . dai naghahanap kan saiyang sadiring kapakanan.”​—1 Corinto 13:​4, 5.

“An lambang saro sa saindo mamoot sa saiyang agom na babae arog kan pagkamoot nia sa saiyang sadiri.”​—Efeso 5:33.

“Kamong mga agom na babae, magpasakop kamo sa saindong agom na lalaki.”​—Colosas 3:18.

“Maghinanyog ka sa saimong ama na nagpangyari kan saimong pagkamundag, asin dai mo pagbasangbasangon an saimong ina huli sana ta sia gurang na.”​—Talinhaga 23:22.

Sa eskuelahan, sa trabaho, o sa negosyo:

“An madayang timbangan bagay na makauuyam nin makuri . . . An maraot nakakakua nin sueldong bakong tunay.”​—Talinhaga 11:​1, 18.

“An parahabon dai na maghabon, kundi marahay pa na sia magpagal.”​—Efeso 4:28.

“Kun an siisay man habong magtrabaho, dai man sia pagpakakanon.”​—2 Tesalonica 3:10.

“Ano man an saindong ginigibo, gibohon iyan nin bilog na kalag na siring baga kun para ki Jehova.”​—Colosas 3:23.

“Minamawot niamo na gumawe nin sadiosan sa gabos na bagay.”​—Hebreo 13:18.

Aktitud dapit sa kayamanan:

“An naghuhumaring yumaman dai magdadanay na inosente.”​—Talinhaga 28:20.

“An mamomoton sa pirak dai makokontento sa pirak.”​—Eclesiastes 5:10.

Pagtantsar sa sadiring halaga nin saro:

“An paghanap nin mga tawo sa sadiri nindang kamurawayan, kamurawayan daw iyan?”​—Talinhaga 25:27.

“An estranyo logod, asin bakong an sadiri mong ngoso, an mag-omaw sa saimo.”​—Talinhaga 27:2.

“Sinasabihan ko an lambang saro dian sa saindo na dai mag-isip dapit sa saiyang sadiri nin orog kisa maninigong isipon.”​—Roma 12:3.

“Kun an siisay man nag-iisip na sia may halaga mantang sia daing halaga, dinadaya nia an saiyang sadiring isip.”​—Galacia 6:3.

[Ritrato sa pahina 5]

Itinao ni Daniel an maninigong kredito sa Dios

[Ritrato sa pahina 7]

An pagtratar sa iba kaoyon kan diosnon na mga prinsipyo nakakokontribwir sa nakagagayagayang relasyon asin kaogmahan

[Picture Credit Line sa pahina 7]

U.S. Fish & Wildlife Service, Washington, D.C./Robert Bridges