Mga Hapot Hale sa mga Parabasa

Tama daw na sabihon na tinitimbangan kan pagkaherak ni Jehova an saiyang hustisya?

Minsan ngani ginagamit an fraseng ini, pinakamarahay na likayan iyan huling garo baga iyan nagpapasentido na pinapaluya o pinopogolan kan pagkaherak ni Jehova an saiyang hustisya, na garo an saiyang pagkaherak mas nakalalabi sa mas daing herak na kualidad nin hustisya. Bakong tama ini.

An termino sa Hebreo para sa “hustisya” nangangahulogan man nin “paghokom.” An hustisya konektadong marhay sa katanosan. Minsan siring, an hustisya parateng may legal na mga implikasyon. An katanosan sa parate mayo. Totoo na puedeng kalabot sa hustisya ni Jehova an pagtao nin maninigong padusa, alagad puedeng kalabot man dian an pagtao nin kaligtasan para sa mga maninigo. (Genesis 18:20-32; Isaias 56:1; Malaquias 4:2) Huli kaini, an hustisya ni Jehova dai maninigong mansayon na daing herak o nangangaipong paluyahon an puersa.

An termino sa Hebreo para sa “pagkaherak” puedeng nanonongod sa pagpogol sa pagtao nin paghokom. Puedeng nanonongod man iyan sa aktibong kapahayagan nin pakikidamay, na nagtatao nin pakaginhawa sa mga daing sukat.​—Deuteronomio 10:18; Lucas 10:29-37.

Si Jehova Dios nin hustisya sagkod pagkaherak. (Exodo 34:​6, 7; Deuteronomio 32:4; Salmo 145:9) An saiyang hustisya asin an saiyang pagkaherak parehong sangkap, asin magkaoyon iyan. (Salmo 116:5; Oseas 2:19) An duwang kualidad na iyan eksaktong magkabalanse o magkakomplemento. Huli kaini, kun sasabihon niato na tinimbangan kan pagkaherak ni Jehova an saiyang hustisya, masasabi man niato na tinimbangan kan saiyang hustisya an saiyang pagkaherak.

Si Isaias naghula: “Si Jehova magdadanay na nag-aantisipar na pahelingan kamo nin pabor, asin kun siring sia matindog sa pagpaheling sa saindo nin pagkaherak. Huli ta si Jehova Dios nin paghokom [“hustisya,” The New English Bible].” (Isaias 30:18) Ipinaheheling digdi ni Isaias na an hustisya ni Jehova nagmomotibar nin mga gibo nin pagkaherak imbes na pinaluluya an puersa o pinopogolan an saiyang hustisya. Si Jehova nagpapaheling nin pagkaherak huli ta sia makatanosan asin huli ta sia mamomoton man.

Totoo, an kagsurat sa Biblia na si Santiago nagsurat: “An pagkaherak mapangganang nag-oogma tumang sa paghokom.” (Santiago 2:13b) Minsan siring, sa konteksto si Santiago nagtataram bakong manongod ki Jehova kundi manongod sa mga Kristiano na nagpaheling nin pagkaherak​​—halimbawa, sa mga nagsasakit nin makuri asin sa mga dukha. (Santiago 1:27; 2:1-9) Kan an siring na mga tawong maheherakon iinaatubang sa paghokom, kinokonsiderar ni Jehova an saindang gawe-gawe asin maheherakon na pinatatawad sinda basado sa atang kan saiyang Aki. Sa siring, an saindang maheherakon na gawe-gawe nanggagana sa ano man na bakong paborableng paghokom na tibaad dapat na panimbagan ninda.​​—Talinhaga 14:21; Mateo 5:7; 6:12; 7:2.

Kun siring, bakong tama na sabihon na an paghokom ni Jehova tinitimbangan kan saiyang pagkaherak sa sentido na an saiyang hustisya nangangaipong paluyahon an puersa paagi sa saiyang pagkaherak. Ki Jehova an duwang kualidad na iyan may sangkap na pagkatimbang. Binabalanse kaiyan an kada saro kun paanong binabalanse kaiyan an​​—asin iyan binabalanse man kan​​—iba pang mga kualidad ni Jehova, siring kan pagkamoot asin kadonongan.