Taano ta Nalaglag an Suanoy na Kinaban na Idto?

AN LAKOP sa globong Delubyo bakong natural na kalamidad. Idto sarong paghokom hale sa Dios. Itinao an patanid, alagad dai iyan inintindi kan kadaklan. Taano? Si Jesus nagpaliwanag: “Kan mga aldaw na idto bago kan baha, [an mga tawo] nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na dumatong an baha asin iinanod sinda gabos.”—Mateo 24:38, 39.

Sarong Maoswag na Sibilisasyon

Sa nagkapirang bagay, an sibilisasyon bago kan Baha nagkaigwa nin mga bentaha na mayo sa sato ngonyan. Halimbawa, an bilog na katawohan nagtataram nin saro sanang lenguahe. (Genesis 11:1) Pinapasil kutana kaini an mga magigibo sa arte asin siensia na nangangaipo nin iribang paghihingoa nin dakol na tawo na may laen-laen na abilidad. Siring man, an halawig na buhay nin kadaklan na tawo kaidto nangangahulogan na puedeng padagos nindang dugangan an saindang nanodan sa nag-aging mga siglo.

May mga nagsasabi na an lawig nin buhay kan mga tawo bako man talagang halawigon kaidtong nakaagi asin na an sinasambit sa pagkasaysay sa Biblia na mga taon sa totoo mga bulan. Totoo daw iyan? Bueno, estudyare an kaso ni Mahalalel. An Biblia nagsasabi: “Si Mahalalel nabuhay nin anom na polo may limang taon. Dangan nagin aki nia si Jared. . . . An gabos na aldaw ni Mahalalel uminabot sa walong gatos may siyam na polo may limang taon asin sia nagadan.” (Genesis 5:15-17)  Kun an sarong taon katimbang nin sarong bulan, si Mahalalel limang taon pa sana kan magkaigwa nin aki! Sala iyan, an mga tawo kaidto mas harani pa sa sangkap na kabagsikan kan enot na tawo, si Adan. Sinda talagang nabuhay sa laog nin mga siglo. Ano an nagibo ninda?

Dakol na siglo bago kan Baha, an populasyon sa daga nagdakol na marhay sagkod na an aki ni Adan na si Cain nakatogdok nin sarong siudad, na inapod niang Enoc. (Genesis 4:17) Durante kan bilog na panahon bago kan Baha, nagprogreso an manlaenlaen na industriya. Igwa nin pandayan para sa “gabos na klaseng kasangkapan na gibo sa tanso asin batbat.” (Genesis 4:22) Daing duwa-duwa na an mga kasangkapan na ini ginamit para sa pagtogdok, pagkakarpintero, pagtatahi, asin agrikultura. Sinambit an gabos na negosyong ini sa kasaysayan kan kaenot-enoteng mga nag-istar na tawo sa daga.

An nagdudugang na kaaraman nagpagin posible kutana na an sunod-sunod na kapag-arakian makapatalubo nin mga espesyalisasyon na arog nin teknolohiya sa metal, agronomiya, pag-ataman nin mga karnero asin baka, pagsurat, asin belyas-artes. Halimbawa, si Jubal an “kagpundar sa gabos na nagtutugtog kan arpa asin plauta.” (Genesis 4:21) An sibilisasyon mahiwas na nagprogreso. Pero, an gabos biglang natapos. Anong nangyari?

Ano an Nagin Problema?

Apisar kan gabos na bentaha kaiyan, an sosyedad bago kan Baha mandata an kapinonan. An kagtugdas kaiyan, si Adan, sarong rebelde tumang sa Dios. Si Cain, an kagtogdok kan pinakaenot na siudad na irinekord, guminadan sa saiya mismong tugang. Bakong makangangalas na an karatan marikas na naglakop! An resulta kan may depektong pamana ni Adan sa saiyang mga gikan nagpaparadakol.​—Roma 5:12.

Malinaw nanggad na an situwasyon uminabot na sa kulminasyon kan nagdesisyon si Jehova na totogotan niang magpadagos an situwasyon sa laog nin 120 taon na sana. (Genesis 6:3) An Biblia nagsasabi: “An karatan nin tawo labi-labi na sa daga asin an gabos na tendensia kan mga kaisipan kan saiyang puso danay na sa karatan na sana. . . . An daga napano nin kadahasan.”​—Genesis 6:​5, 11.

Pag-abot nin panahon, espesipikong sinabihan si Noe na lalaglagon nin Dios an gabos na laman paagi sa sarong delubyo. (Genesis 6:​13, 17) Minsan ngani si Noe nagin “sarong parahulit nin katanosan,” malinaw na depisil tubodon kan mga tawo na an gabos na bagay sa palibot ninda matatapos. (2 Pedro 2:5) Walo katawo sana an naghimate sa patanid asin naligtas. (1 Pedro 3:20) Taano ta importante ini para sa sato ngonyan?

Ano an Kahulogan Para sa Sato?

Kita nabubuhay sa panahon na kapareho kan ki Noe. Regular kitang nakakadangog nin makatatakot na marhay na mga gibo nin terorismo, kampanya sa paglaglag sa sarong rasa, lagdoan na paggadan kan propesyonal na mga paragadan na mayo nin malinaw na dahelan, asin kadahasan sa laog kan pamilya sa labi-labi kanakakukubhan na sokol. An daga napano na naman nin kadahasan, asin arog kaidto, pinaisi an kinaban dapit sa sarong maabot na paghokom. Sinabi mismo ni Jesus na sia maabot bilang ninombrahan nin Dios na Hokom asin pagbubulagbulagon nia an mga tawo siring sa sarong pastor na ibinubulag an mga karnero sa mga kanding. An mga nanompongan na bakong maninigo, sabi ni Jesus, “maduman sa pagkaparang daing katapusan.” (Mateo 25:31-33, 46) Minsan siring, sinasabi kan Biblia na sa panahon na ini magkakaigwa nin minilyon na makaliligtas​​—sarong dakulang kadaklan na nagsasamba sa iyo sanang tunay na Dios. Sa maabot na kinaban, an mga ini mabubuhay na may permanenteng katoninongan asin katiwasayan na orog kasuarin man kaidto.​—Miqueas 4:​3, 4; Kapahayagan 7:9-17.

Tinutuya nin dakol an siring na mga tataramon asin an mga patanid sa Biblia manongod sa paghokom na mapaheling na an siring na mga tataramon totoo. Alagad ipinaliwanag ni apostol Pedro na dai iniintindi kan siring na mga tatsador an mga katunayan. Sia nagsurat: “Sa huring mga aldaw an mga paraolog-olog madatong na . . . nagsasarabi: ‘Haen man ining ipinanugang presensia nia?’ . . . Huli ta, oyon sa saindang kabotan, an katotoohan na ini dai ninda namamangno, na igwa nin kalangitan poon kan suanoy asin sarong daga na dusok na nagtitindog hale sa tubig asin sa tahaw nin tubig paagi sa tataramon nin Dios; asin sa mga paaging iyan an kinaban kan panahon na idto nalaglag kan iyan malantopan nin tubig. Alagad sa iyo man sanang tataramon an kalangitan asin an daga na yaon ngonyan itinatagama sa kalayo asin irinereserba  sa aldaw nin paghokom asin kalaglagan kan maraot na mga tawo.”​—2 Pedro 3:3-7.

Sarong pambilog na kinaban na patanid manongod sa nagdadangadang na aldaw nin paghokom asin mensahe nin maogmang bareta manongod sa katoninongan na kasunod kaiyan an may kaigotan na ihinuhulit ngonyan bilang pagkuyog sa makahulang pagboot ni Jesus. (Mateo 24:14) Dai dapat basangbasangon an patanid na ini. Inootob kan Makakamhan sa gabos na Dios an saiyang tataramon.

An Maabot na Kinaban

Ano an kaaabtan kan katawohan, kun iisipon an maabot na importanteng pagbabago? Sa introduksion kan saiyang bantog na Sermon sa Bukid, si Jesus nanuga: “Maogma an mga mahoyo, mantang mamanahon ninda an daga.” Dangan tinokdoan nia an saiyang mga disipulo na mamibi sa Dios: “Gibohon logod an boot mo, kun paano sa langit, siring man sa daga.” (Mateo 5:5; 6:10) Iyo, itinokdo mismo ni Jesus na sarong marahayon na ngapit an nakatagama para sa fiel na katawohan digdi mismo sa daga. Inapod nia iyan na “paglalang liwat.”​—Mateo 19:28.

Kaya mantang hinohorophorop nindo an ngapit, dai nindo pagtogotan an mga paraolog-olog na papagdudahon kamo sa patanid nin Dios. Totoo, an mga kamugtakan niato sa palibot garo baga marigon, asin an presenteng kinaban haloy nang nag-eeksister. Pero, dai kita maninigong magsarig dian. An kinaban nin katawohan hinokoman na. Kun siring, magkaigwa nin kapusoan basado sa pagtatapos kan surat ni apostol Pedro:

“Mantang an gabos na bagay na ini tutunawon nin siring, kamo maninigong magin anong klaseng mga tawo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova . . . Mantang naghahalat kamo kan mga bagay na ini, giboha an bilog nindong makakaya na sa katapustapusi makua niang daing digta asin dai nin kanawayan patin nasa katoninongan. . . . Padagos na magtalubo sa dai na kutana maninigong kabootan asin kaaraman kan satong Kagurangnan asin Paraligtas na si Jesu-Cristo.” (2 Pedro 3:​11, 12, 14, 18) Huli kaini, makanood sa nangyari kaidto kan kaaldawan ni Noe. Rumani sa Dios. Tumalubo sa kaaraman manongod ki Jesu-Cristo. Kultibaron an diosnon na debosyon, asin mapabilang sa minilyon na pinili na maligtas sa katapusan kan kinaban na ini pasiring sa matoninong na kinaban na maabot.

[Ritrato sa pahina 5]

An pagpapanday aram na bago kan Baha

[Ritrato sa pahina 7]

Nakatagama an sarong makangangalas na ngapit