Tunay daw sa Saindo an Pagigin Poon ni Cristo?

“Dai man kamo magpaapod na ‘mga poon,’ huli ta an saindong Poon saro, an Cristo.”—MATEO 23:10.

1. Siisay an iyo sanang Poon kan tunay na mga Kristiano?

 MARTES, Nisan 11. Tolong aldaw pa, gagadanon na si Jesu-Cristo. Ini an ultimong pagsongko nia sa templo. Sa aldaw na ini, si Jesus nagtao nin sarong mahalagang katokdoan sa mga kadaklan na nagkatiripon duman asin sa saiyang mga disipulo. Sia nagsabi: “Dai kamo magpaapod nin Rabi, huling saro an saindong paratokdo, mantang kamo gabos magturugang. Siring man, dai kamo mag-apod nin ama sa kiisay man sa daga, nin huli ta saro an saindong Ama, an langitnon na Saro. Dai man kamo magpaapod na ‘mga poon,’ huli ta an saindong Poon saro, an Cristo.” (Mateo 23:8-10) Malinaw nanggad, si Jesu-Cristo an Poon kan tunay na mga Kristiano.

2, 3. An paghinanyog ki Jehova asin pag-ako sa Poon na ninombrahan nia igwa nin anong epekto sa satong buhay?

² May kapakipakinabang nanggad na mga epekto sa satong buhay an pagigin poon ni Jesus kun inaako niato iyan! Sa paghula kan pagdatong kan Poon na ini, nagpahayag si Jehova Dios paagi ki propeta Isaias: “Hoy, kamo gabos na napapaha! Dolok kamo sa tubig. Asin an mga mayong pirak! Madia kamo, bakal asin kakan. Iyo, madia kamo, bakal kamo nin arak asin gatas minsan mayo nin pirak asin mayo nin bayad. . . . Maghinanyog kamo nin odok sa sako, asin magkakan nin marahay, asin pabayaan an saindong kalag na makakua nin dakulang kaogmahan sa taba mismo. . . . Uya! Bilang saksi sa mga nasyon sia itinao ko, bilang poon asin komandante sa mga nasyon.”​—Isaias 55:1-4.

³ Si Isaias naggamit nin ordinaryong mga likido​—tubig, gatas, asin arak​—bilang metapora tanganing ipaheling kun paano naaapektaran an satong personal na buhay kun hinihinanyog niato si Jehova asin sinusunod an Poon asin Komandante na itinao nia sa sato. An resulta nakagiginhawa. Garo man sana iyan pag-inom nin sarong baso nin malipot na tubig sa sarong mainit na aldaw. An satong pagkapaha sa katotoohan asin katanosan napaninigoan. Kun paanong an gatas nagpapakosog sa mga omboy asin nagtatabang sa sainda na tumalubo, an “gatas kan tataramon” nagpapasarig sa sato asin pinaooswag an espirituwal na pagtalubo kan satong relasyon sa Dios. (1 Pedro 2:1-3) Asin siisay an makanenegar na an arak nakapagagayagaya sa maogmang mga okasyon? Sa nakakaagid na paagi, an pagsamba sa tunay na Dios asin pagsunod sa mga lakad kan ninombrahan niang Poon nagpapangyari sa buhay na magin “daing iba kundi magayagaya.” (Deuteronomio 16:15) Mahalagang marhay, kun siring, na ipaheling niato gabos​—hoben asin gurang, lalaki asin babae​—na an pagigin poon ni Cristo tunay sa sato. Pero, paano niato ikapaheheling sa satong pan-aroaldaw na buhay na an Mesiyas iyo an satong Poon?

Mga Hoben—Padagos na “Umoswag sa Kadonongan”

4. (a) Ano an nangyari kan an 12 anyos na si Jesus nagsongko sa Jerusalem sa panahon kan Paskua? (b) Gurano kadakol kan kabatidan ni Jesus kan 12 anyos pa sana?

⁴ Estudyare an halimbawang itinao kan satong Poon para sa mga hoben. Minsan ngani dikit an aram dapit sa pagkaniaki ni Jesus, an sarong pangyayari may ihinahayag nanggad. Kan si Jesus 12 anyos, iiniba sia kan saiyang mga magurang sa saindang taonan na pagsongko sa Jerusalem para sa Paskua. Sa okasyon na ini, nawili sia sa sarong pag-orolay sa Kasuratan, asin an saiyang pamilya dai tinutuyong naghale na dai sia kaiba. Pakalihis nin tolong aldaw nakua sia sa templo kan saiyang hadit nang mga magurang, si Jose asin Maria, “na nagtutukaw sa tahaw kan mga paratokdo asin naghihinanyog sa sainda asin naghahapot sa sainda.” Dugang  pa, “an gabos na naghihinanyog sa saiya danay na nagngangalas sa saiyang pakasabot asin sa saiyang mga simbag.” Imahinara nindo, sa edad pa sanang 12, si Jesus bako sanang nagpapalataw nin mga hapot na nakapupukaw nin isip asin may pagkaespirituwal kundi nagtatao man nin madonong na mga simbag! Daing duwa-duwa, nakatabang sa saiya an pagsasanay nin magurang.​—Lucas 2:41-50.

5. Paano maeebalwar nin mga hoben an saindang saboot mapadapit sa pampamilyang pag-adal sa Biblia?

⁵ Tibaad saro kamong hoben. Kun an mga magurang nindo debotong mga lingkod nin Dios, posibleng marhay na igwa nin regular na programa nin pampamilyang pag-adal sa Biblia sa harong nindo. Ano an saindong saboot dapit sa pampamilyang pag-adal? Taano ta dai horophoropon an mga hapot na arog kan: ‘Bilog na puso ko daw na sinusuportaran an areglo nin pag-adal sa Biblia kan pamilya mi? Nakikikooperar daw ako dian, na dai naggigibo nin ano man na makararaot sa rutina?’ (Filipos 3:16) ‘Ako daw aktibong nakikikabtang sa pag-adal? Kun angay, ako daw naghahapot mapadapit sa materyal na pinag-aadalan asin nagkokomento dapit sa aplikasyon kaiyan? Mantang ako nag-ooswag sa espirituwal, pinagagana ko daw an sakong pangnamit para sa “matagas na kakanon [na] para sa mga maygurang”?’​—Hebreo 5:​13, 14.

6, 7. Puedeng magin gurano kahalaga para sa mga hoben an sarong programa nin aroaldaw na pagbasa sa Biblia?

⁶ Mahalaga man an sarong programa nin pan-aroaldaw na pagbasa sa Biblia. An salmista nag-awit: “Maogma an tawo na dai naglakaw sa hatol kan mga maraot, . . . kundi an saiyang pagkaogmang marhay yaon sa ley ni Jehova, asin sa saiyang ley sia nagbabasa nin pahinghing aldaw asin banggi.” (Salmo 1:​1, 2) An nagin kasalihid ni Moises, si Josue, ‘binasa nin pahinghing aldaw asin banggi an libro kan ley.’ Ini an nagpangyari sa saiya na humiro nin may kadonongan asin magin mapanggana sa paggibo kan tao nin Dios na asignasyon nia. (Josue 1:8) An satong Poon, si Jesu-Cristo, nagsabi: “Nasusurat, ‘An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.’” (Mateo 4:4) Kun nangangaipo kita nin pisikal na pagkakan aroaldaw, lalo na nanggad na kaipuhan man niato nin regular an espirituwal na kakanon!

⁷ Huling naaaraman an saiyang espirituwal na pangangaipo, pinonan kan 13 anyos na si Nicole na basahon an Biblia aroaldaw. a Ngonyan, sa edad na 16, nabasa na nia an bilog na Biblia nin sarong beses asin nangangabangaan na sia sa panduwang beses. Simple an saiyang paagi. “Sinesegurado kong makabasa nin kisuerra sarong kapitulo sa kada aldaw,” an sabi nia. Paano nakatabang sa saiya an saiyang aroaldaw na pagbasa sa Biblia? Nagsimbag sia: “Kadakol ngonyan nin maraot na impluwensia. Aroaldaw napapaatubang ako sa mga pangigipit sa eskuelahan asin sa iba pang lugar na nagigin angat sa sakong pagtubod. An pagbasa sa Biblia aroaldaw nakatatabang sa sako na matandaan tolos an mga pagboot asin prinsipyo sa Biblia na nagdadagka sa  sako na labanan an mga pangigipit na ini. Bilang resulta, orog akong nagigin dayupot ki Jehova asin ki Jesus.”

8. Ano an kinatodan ni Jesus mapadapit sa sinagoga, asin paano sia maaarog nin mga hoben?

⁸ Kinatodan ni Jesus na maghinanyog asin makikabtang sa pagbasa sa Kasuratan sa sinagoga. (Lucas 4:16; Gibo 15:21) Kanigoan karahay na arogon nin mga hoben an halimbawang iyan paagi sa regular na pag-atender sa Kristianong mga pagtiripon, kun saen binabasa asin pinag-aadalan an Biblia! Sa pagpahayag nin pag-apresyar sa siring na mga pagtiripon, an 14 anyos na si Richard nagsasabi: “Mahalaga sa sako an mga pagtiripon. Dayaday na napapagirumdoman ako duman kun ano an marahay asin maraot, kun ano an moral asin inmoral, kun ano an arog-Cristo asin kun ano an bako. Dai ko kaipuhan na maaraman iyan sa mapait na paagi​—paagi sa eksperyensia.” Iyo, “an pagirumdom ni Jehova mapagtitiwalaan, na nagpapadonong sa daing eksperyensia.” (Salmo 19:7) Sinesegurado man ni Nicole na atenderan an gabos na limang pagtiripon kan kongregasyon kada semana. Duwa sagkod tolong oras man niang pinag-aandaman iyan.​—Efeso 5:​15, 16.

9. Paano makakapadagos ‘na umoswag sa kadonongan’ an mga hoben?

⁹ An pagkahoben sarong marahay na panahon na magkua nin ‘kaaraman dapit sa iyo sanang tunay na Dios, asin dapit sa saro na saiyang sinugo, si Jesu-Cristo.’ (Juan 17:3) Tibaad may midbid kamong mga hoben na dakol na panahon an inuubos sa pagbasa nin mga komiks, pagdalan nin telebisyon, pagkawat nin video, o pagsiyasat sa Internet. Taano ta aarogon nindo sinda mantang puede nindong arogon an sangkap na halimbawa kan satong Poon? Bilang solterito, ikinaogma niang marhay an pag-adal manongod ki Jehova. Asin ano an resulta? Huli sa pagkamoot nia sa espirituwal na mga bagay, “si Jesus nagpadagos na umoswag sa kadonongan.” (Lucas 2:52) Iyo man kamo.

“Magpasarakopsakop Kamo”

10. Ano an makatatabang sa buhay pampamilya na magin gikanan nin katoninongan asin kaogmahan?

¹⁰ An harong puedeng magin lugar nin katoninongan asin pagkakontento o lugar nin iriwal asin pasuruhay. (Talinhaga 21:19; 26:21) An pag-ako niato sa pagigin poon ni Cristo nakakokontribwir sa katoninongan asin kaogmahan sa pamilya. Sa katunayan, an halimbawa ni Jesus iyo an modelo para sa relasyon sa pamilya. An Kasuratan nagsasabi: “Magpasarakopsakop kamo huli sa pagkatakot ki Cristo. Magpasakop an mga agom na babae sa saindang agom na lalaki nin siring sa Kagurangnan, huli ta an agom na lalaki iyo an payo kan saiyang agom na babae kun paanong si Cristo iyo man an payo kan kongregasyon, mantang sia an paraligtas kan hawak na ini. . . . Mga agom na lalaki, padagos nindong mamotan an saindong agom na babae, kun paanong an Cristo namoot man sa kongregasyon asin iinatang an saiya man sana dahel kaiyan.” (Efeso 5:21-25) Sa kongregasyon sa Colosas, si apostol Pablo nagsurat: “Kamong mga aki, magin makinuyog sa saindong mga magurang sa gabos na bagay, huli ta ini nakapaoogmang marhay sa Kagurangnan.”​—Colosas 3:18-20.

11. Paano ikapaheheling nin agom na lalaki na an pagigin poon ni Cristo tunay sa saiya?

¹¹ An pagsunod sa hatol na ini nangangahulogan na an agom na lalaki nangengenot sa pamilya, an saiyang agom na babae maimbod na nagsusuportar sa saiya, asin an mga aki nagkukuyog sa saindang mga magurang. Pero, an pagkapayo nin lalaki nagbubunga sana nin kaogmahan kun iyan ginagamit nin tama. An sarong madonong na agom na lalaki dapat na makanood kun paano gagamiton an pagkapayo paagi sa pag-arog sa saiya mismong Payo asin Poon, si Cristo Jesus. (1 Corinto 11:3) Minsan ngani kan huri si Jesus nagin “payo kan gabos na bagay sa kongregasyon,” sia nagdigdi  sa daga, “bakong tanganing paglingkodan, kundi tanganing maglingkod.” (Efeso 1:22; Mateo 20:28) Sa kaagid na paagi, ginagamit nin Kristianong agom na lalaki an saiyang pagkapayo, bakong para sa paslong bentaha, kundi sa pag-asikaso kan kapakanan kan saiyang agom na babae asin mga aki​—iyo, kan bilog na pamilya. (1 Corinto 13:​4, 5) Hinihingoa nia na arogon an diosnon na mga kualidad kan saiyang payo, si Jesu-Cristo. Arog ki Jesus, sia mahoyo asin may kababaan an puso. (Mateo 11:28-30) An mga tataramon na arog nin “pasensia ka na” o “tama ka” bakong masakit para sa saiya na sabihon kun sia nasasala. An saiyang marahayon na halimbawa nagpapagin mas pasil para sa sarong agom na babae na magin “katabang,” sarong “komplemento,” asin “kapadis” kan lalaking iyan, na nakakanood sa saiya asin nakikipagtabangan sa saiya.​—Genesis 2:20; Malaquias 2:14.

12. Ano an makatatabang sa agom na babae na kuyogon an prinsipyo nin pagkapayo?

¹² An agom na babae man dapat na magpasakop sa saiyang agom na lalaki. Minsan siring, kun sia apektado kan espiritu kan kinaban, ini tibaad magpaluya kan saiyang pagmansay sa prinsipyo nin pagkapayo, asin an ideya nin pagigin sakop nin lalaki dai nia magugustohan. Dai isinusuherir kan Kasuratan na an lalaki maninigo na magin dominante, alagad hinahagad nanggad kaiyan na an mga agom na babae dapat na magpasakop sa saindang agom na lalaki. (Efeso 5:24) Sinasabi man kan Biblia na an agom na lalaki o ama an magpapasan nin paninimbagan, asin kun iinaaplikar an hatol kaiyan, ini nakakokontribwir sa katoninongan asin areglo sa pamilya.​—Filipos 2:5.

13. Anong halimbawa nin pagpasakop an itinao ni Jesus sa mga aki?

¹³ An mga aki dapat na magin makinuyog sa mga magurang ninda. Mapadapit digdi, si Jesus nagtao nin marahayon na halimbawa. Kasunod kan nangyari sa templo kan an 12 anyos na si Jesus nawalat sa laog nin tolong aldaw, “sia naglugsad kaiba [kan saiyang mga magurang] asin nagdatong sa Nazaret, asin sia padagos na nagpasakop sa sainda.” (Lucas 2:51) An pagpasakop nin mga aki sa mga magurang ninda nakakokontribwir sa katoninongan asin pagkaoroyon sa pamilya. Kun an gabos sa pamilya nagpapasakop sa pagigin poon ni Cristo, an resulta sarong maogmang pamilya.

14, 15. Ano an matabang sa sato na magin mapanggana kun napapaatubang sa sarong masakit na situwasyon sa harong? Tumao nin halimbawa.

¹⁴ Dawa kun minalataw an masakit na mga situwasyon sa harong, an liabe sa kapangganahan iyo an pag-arog ki Jesus asin pag-ako sa saiyang paggiya. Halimbawa, an pakaagom kan 35 anyos na si Jerry ki Lana, na ina nin sarong daragita, nagbunga nin sarong problema na dai naimahinar kan minsan saro sa sainda. Nagpapaliwanag si Jerry: “Aram ko na tanganing magin marahay na payo, kaipuhan kong iaplikar an iyo man sanang mga prinsipyo sa Biblia na nagin mapanggana sa ibang mga pamilya. Alagad dai nahaloy nadiskobre ko na kaipuhan kong iaplikar iyan na may orog na kadonongan asin pakamansay.” Sa pagheling kan daragitang aki kan saiyang agom sa enot pinagsuway nia sindang mag-ina asin grabe an kaanggotan kaini sa saiya. Kinaipuhan ni Jerry an pakamansay tanganing masabotan na an aktitud na ini nakakaapektar sa sinasabi asin ginigibo kan daragita. Paano nia rinesolberan an situwasyon? Nagsimbag si Jerry: “Nagkaoyon kami ni Lana na kisuerra sa ngonyan, si Lana nguna an maasikaso kan pagdisiplina bilang magurang mantang ako nagkokonsentrar sa pagpatalubo nin marahay na relasyon sa daragitang aki kan sakong agom sa enot. Pag-abot nin panahon, talagang marahay an ibinunga kaini.”

¹⁵ Kun napapaatubang sa masakit na mga situwasyon sa harong, kaipuhan niato an pakamansay tanganing maaraman kun taano ta siring kaiyan magtaram asin maghiro an mga miembro nin pamilya. Kaipuhan man niato an kadonongan tanganing ikaaplikar nin tama an diosnon na mga prinsipyo. Halimbawa, malinaw na namansayan ni Jesus kun taano ta dinutaan sia kan babaeng pinag-aawasan nin dugo, asin trinatar nia ini sa madonong asin madinamayon na paagi. (Levitico 15:25-27; Marcos 5:30-34) An kadonongan asin pakamansay karakteristiko kan satong Poon. (Talinhaga 8:12) Maogma kita kun mahiro kita nin arog sa saiya.

“Padagos na Hanapon Nguna an Kahadean”

16. Ano an maninigo na magin pangenot sa satong buhay, asin paano ini ipinaheling ni Jesus paagi kan saiyang halimbawa?

¹⁶ Lininaw ni Jesus kun ano an maninigo na magin pangenot sa buhay kan mga inaako an saiyang pagigin poon. Sia nagsabi: “Kun siring, padagos na  hanapon nguna an kahadean asin an . . . katanosan [nin Dios].” (Mateo 6:33) Asin paagi sa saiyang halimbawa, ipinaheling nia sa sato kun paano ini gigibohon. Sa katapusan kan 40 aldaw na pag-ayuno, paghorophorop, asin pamimibi pagkatapos kan saiyang bautismo, napaatubang si Jesus sa sarong sugot. Inalok sia ni Satanas na Diablo nin kapamahalaan sa “gabos na kahadean kan kinaban.” Imahinara an puedeng magin buhay ni Jesus kun inako nia an alok kan Diablo! Minsan siring, nakakonsentrar si Cristo sa paggibo kan kabotan kan saiyang Ama. Aram man nia na halipot sana an siring na buhay sa kinaban ni Satanas. Ensegida niang sinayumahan an alok kan Diablo, na sinasabi: “Nasusurat, ‘Si Jehova na saimong Dios an dapat mong sambahon, asin sa saiya ka sana dapat na magtao nin sagradong paglilingkod.’” Dai nahaloy pakatapos kaiyan, si Jesus “nagpoon na maghulit asin magsabi: ‘Magsorolsol kamo, banwaan, huli ta an kahadean kan kalangitan harani na.’” (Mateo 4:​2, 8-10, 17) Sa natatada pa niang buhay sa daga, si Cristo sarong bilog na panahon na parabalangibog kan Kahadean nin Dios.

17. Paano niato ikapaheheling na an intereses kan Kahadean an pangenot sa satong buhay?

¹⁷ Marahay na arogon niato an satong Poon asin dai pagtogotan an kinaban ni Satanas na akiton kitang gibohon na magin pangenot na pasohan niato sa buhay an halangkaw an sueldong trabaho asin karera. (Marcos 1:17-21) Abaang kamangmangan na kita magapos na marhay sa kinabanon na mga pinag-aaabot kaya an intereses kan Kahadean nagigin na sanang segunda! Ipinagkatiwala sa sato ni Jesus an paghuhulit kan Kahadean asin paggibo nin mga disipulo. (Mateo 24:14; 28:​19, 20) Iyo, tibaad igwa kita nin pamilya o iba pang mga responsibilidad na dapat asikasohon, alagad dai daw kita naoogma na gamiton an mga banggi asin katapusan kan semana sa pagsagibo kan satong Kristianong responsibilidad na maghulit asin magtokdo? Asin kanigoan kanakaparirigon sa boot na durante kan 2001 taon nin paglilingkod, mga 780,000 an nakapaglingkod bilang bilog na panahon na mga ministro, o payunir!

18. Ano an nagtatabang sa sato na makaeksperyensia nin kagayagayahan sa ministeryo?

¹⁸ Si Jesus ilinaladawan kan pagkasaysay sa Ebanghelyo bilang sarong tawong aktibo saka saro na mapagpadangat. Kan maheling an espirituwal na pangangaipo kan mga nasa palibot nia, naherak sia sa sainda asin galagang tinabangan sinda. (Marcos 6:31-34) Nagigin magayagaya an satong ministeryo kun kita nakikikabtang dian nin huli sa pagkamoot sa iba asin sa sinserong pagmawot na tabangan sinda. Alagad paano kita magkakaigwa kan siring na pagmawot? “Kan ako solterito pa sana,” sabi nin sarong hoben na lalaki na an ngaran Jayson, “dai akong gayo naoogma sa ministeryo.” Ano an nakatabang sa saiya na makultibar an pagkamoot sa gibohon na ini? Nagsimbag si Jayson: “Sa pamilya mi, an mga Sabadong  aga pirmeng idinudusay sa paglilingkod sa langtad. Marahay ini sa sako huli ta mientras na ako mas parateng nagluluwas sa ministeryo, orog ko man na naheheling an karahayan na nagigibo kaiyan asin orog kong ikinaoogma iyan.” Kita maninigo man na regular asin mahigos na makikabtang sa ministeryo.

19. Ano an maninigo na magin determinasyon niato mapadapit sa pagigin poon ni Cristo?

¹⁹ Tunay nanggad na nakagiginhawa asin nakakokontento na akoon an pagigin poon ni Cristo. Kun ginigibo niato iyan, an pagkahoben nagigin panahon para sa pag-oswag sa kaaraman asin kadonongan. An buhay pampamilya nagigin gikanan nin katoninongan asin kaogmahan, asin an ministeryo nagigin aktibidad na nagtatao nin kagayagayahan asin satispaksion. Tunay nanggad, kun siring, magin determinado kita na ipaheling sa satong pan-aroaldaw na buhay asin sa mga desisyon na ginigibo niato na an pagigin poon ni Cristo tunay sa sato. (Colosas 3:​23, 24) Pero, may saro pang paagi na si Jesus nagin poon niato​—paagi sa Kristianong kongregasyon. Ipaliliwanag kan sunod na artikulo kun paano kita makikinabang sa probisyon na ini.

[Nota sa Ibaba]

Nagigirumdoman daw Nindo?

• Paano kita nakikinabang sa pagsunod sa satong Poon na ninombrahan nin Dios?

• Paano ikapaheheling nin mga hoben na boot nindang arogon an pagigin poon ni Jesus?

• Ano an epekto kan pagigin poon ni Cristo sa buhay pampamilya kan mga nagpapasakop dian?

• Paano ikapaheheling kan satong ministeryo na an pagigin poon ni Cristo tunay sa sato?

[Mga Hapot Para sa Pag-adal]

[Mga ritrato sa pahina 9]

An pagkahoben sarong marahay na panahon na kumua nin kaaraman dapit sa Dios asin sa satong nombradong Poon

[Ritrato sa pahina 10]

An pagpasakop sa pagigin poon ni Cristo nagpapaoswag sa kaogmahan nin pamilya

[Mga ritrato sa pahina 12]

Hinanap nguna ni Jesus an Kahadean. Iyo man kamo?