“Madia Kamo sa Sako, . . . Asin Pagiginhawahon Ko Kamo”

Mga Hoben na Siring sa Nakarerepreskong Tagdo kan Ambon

DAING duda na iiniba ni Jesu-Cristo an saiyang hoben na mga parasunod kan sia magsabi: “Madia kamo sa sako, . . . asin pagiginhawahon ko kamo.” (Mateo 11:28) Kan ponan nin mga tawo na darahon sa saiya an saindang saraday na aki, pinagmaigotan kan saiyang mga disipulo na pogolan sinda. Alagad si Jesus nagsabi: “Pabayae nindo na dumolok sa sako an saraday na aki; dai nindo sinda pagpogolan.” “Kinugos [pa ngani ni Jesus] an mga aki asin pinonan na bendisyonan sinda.” (Marcos 10:14-16) Daing duda na minansay ni Jesus na mahalagang marhay an saraday na aki.

An Biblia nagsasabi manongod sa fiel na hoben na mga lalaki asin babae, saka sa mga tinedyer asin saradang na aki, na nagtatao nin marahayon na mga halimbawa sa paglilingkod sa Dios. An “grupo nin hoben na mga lalaki” na nakarerepresko siring sa tagdo kan ambon ihinula sa libro nin Salmo. Iyan nagtataram man manongod sa “hoben na mga lalaki” asin “mga daraga” na nag-oomaw kan ngaran ni Jehova.​​—Salmo 110:3; 148:​12, 13.

Sarong Lugar Para sa mga Hoben Tangani na Umoswag

Angay an simili na tagdo kan ambon, huli ta an ambon may koneksion sa abundansia asin bendisyon. (Genesis 27:28) An tagdo kan ambon suabe asin nakarerepresko. Sa panahon na ini kan presensia ni Cristo, dakolon an hoben na Kristiano na gikan sa boot asin galagang ipinepresentar an saindang sadiri. Siring nanggad sa nakarerepreskong tagdo kan ambon, dakol na hoben na lalaki asin babae an masinggayang naglilingkod sa Dios asin nagtatabang sa saindang mga kapwa parasamba.​​—Salmo 71:17.

An Kristianong mga hoben bakong nakarerepresko para sa iba sana; sinda mismo nakakukua nin karepreskohan sa saindang paglilingkod. An organisasyon nin Dios nagtatao nin kamugtakan na dian sinda puedeng umoswag. Paagi sa pagpapadanay nin halangkaw na moral, an hoben na mga lalaki asin babae igwa nin haraning marhay na relasyon sa Dios. (Salmo 119:9) Sa laog kan kongregasyon, sinda nakikikabtang man sa kapakipakinabang na mga aktibidad asin nakanonompong nin marahay na mga katood​​—mga bagay na nakakokontribwir sa nakakokontento asin makahulogan na buhay.

‘Bolong Asin Kaginhawahan’

An Kristianong mga hoben daw nakakamate na sinda siring sa “tagdo kan ambon”? Helinga si Tania, sarong hoben na babae na aktibong nakikikabtang sa mga aktibidad kan kongregasyon asin maogmang nagdudusay nin labing 70 oras kada bulan sa ministeryo. Ano daw an pagmate nia? “Nagiginhawahan asin naoogma ako,” an sabi nia. “An pagigin yaon ni Jehova asin kan saiyang daganon na organisasyon sa sakong buhay nagin ‘bolong asin kaginhawahan’ para sa sako.”​​—Talinhaga 3:8.

Si Ariel, saro pang hoben na bilog na panahon na ministro, inaapresyar an espirituwal na kakanon na inaako nia sa laog kan kongregasyon. “Kun ako nag-aatender sa  Kristianong mga pagtiripon, kombension, asin asamblea saka nakakakakan sa espirituwal na lamesa ni Jehova, ini talagang nakarerepresko sa sako sa espirituwal na paagi,” an komento nia. “Asin naoogma ako sa pakaaram na sa bilog na kinaban, igwa ako nin mga kapwa trabahador.” Sa pagladawan kan pinakagikanan nin kaginhawahan, sia nagsabi: “Nakagiginhawang marhay na magin katood si Jehova, nangorogna kun nadadangog o naheheling ko an grabeng mga epekto kan kinaban na ini sa mga tawo.”​​—Santiago 2:23.

Sa edad na 20 anyos, si Abishai naglilingkod bilang bilog na panahon na ebanghelisador asin ministeryal na lingkod sa kongregasyon. Ilinaladawan nia an saiyang eksperyensia sa mga tataramon na ini: “Nagiginhawahan ako huli ta aram ko kun paano aatubangon an dakol na problema na inaatubang nin mga hoben ngonyan. An katotoohan hale sa Biblia nakatabang sa sako na magdanay na nakakonsentrar sa kaipuhan kong gibohon tanganing mapaglingkodan si Jehova nin bilog na kalag.”

Kan bago pa sana siang magtinedyer, si Antoine madaling maanggot. Sarong beses binangkolan nia nin tukawan an sarong kapwa estudyante, asin naggamit sia nin lapis tangani na saksakon an saro pa. Si Antoine dai nanggad nakarerepreskong tawo! Alagad an instruksion hale sa Biblia an nakapabago sa saiyang gawe-gawe. Ngonyan na 19 anyos na asin naglilingkod bilang ministeryal na lingkod asin bilog na panahon na ministro sa kongregasyon, an sabi nia: “Nagpapasalamat ako ki Jehova sa pagtogot sako na magkaigwa nin kaaraman manongod sa saiya asin sa pagtabang sa sako na masabotan an pangangaipo na magpogol sa sadiri saka bagohon an sakong paggawe. Huli kaini, nalikayan ko an dakol na problema.”

Naririparo nin iba an nakarerepreskong aktitud nin hoben na mga Kristiano. Si Matteo sarong hoben na Saksi na taga Italia. Nagdesisyon an maestra nia na an siisay man sa klase na naggagamit nin bastos na tataramon kaipuhan na magbayad nin sadit na multa. Paghaloyhaloy, hinagad kan mga aki na haleon an regulasyon huli ta, an sabi ninda, “imposible na dai gumamit nin maraot na tataramon.” “Alagad,” an paliwanag ni Matteo, “sinabi kan maestra na bako ining totoo, asin ginamit nia ako, saro sa Mga Saksi ni Jehova, bilang halimbawa, na inoomaw ako sa atubangan kan bilog na klase huli sa sakong malinig na pananaram.”

Sa sarong daing disiplinang kuarto kan klase sa Tailandia, inapod kan maestra an 11 anyos na si Racha tangani na tumindog sa atubangan kan klase asin kinomendaran sia huli sa saiyang gawe-gawe, na nagsasabi: “Taano ta dai nindo gabos arogon an saiyang halimbawa? Sia mahigos mag-adal asin toltol.” Dangan sinabihan nia an mga estudyante: “Sa heling ko kaipuhan nindong magin saro sa Mga Saksi ni Jehova, siring ki Racha, tangani na mapakarhay an saindong gawe-gawe.”

Nakaoogmang marhay na maheling an rinibong Kristianong hoben na namimidbid si Jehova nin orog pa asin ginigibo an saiyang kabotan. An siring na marahayon na mga hoben nagpapaheling nin kadonongan na lampas pa sa edad ninda. Matatabangan sinda nin Dios na magin mapanggana sa saindang buhay sa presente saka tatawan sinda nin mamuraway na ngapit sa maabot na bagong kinaban. (1 Timoteo 4:8) Sa garo desiertong kamugtakan sa espirituwal kan presenteng sistemang ini nin mga bagay, na pano nin deskontento asin desganadong mga hoben, sinda nagpapaheling nin nakarerepreskong kalaenan!