Mga Hapot Hale sa mga Parabasa

Pirme daw na obligatoryo an mga promesa sa Dios?

Sa Kasuratan, an promesa sarong solemneng panuga sa Dios na gibohon an sarong akto, magtao nin dolot, lumaog sa sarong paglilingkod o katongdan, o lumikay sa nagkapirang bagay na bako man talagang sala. Sa Biblia igwa nin mga pagkasaysay dapit sa mga promesa na kondisyonal sa dahelan na may kalabot iyan na sarong panunumpa na gigibohon an sarong sinabing bagay kun gigibohon nguna nin Dios an sarong bagay. Halimbawa, si Ana, an ina ni propeta Samuel, “naggibo nin promesa asin nagsabi: ‘O Jehova nin mga hukbo, kun . . . dai mo lilingawan an saimong oripon na babae asin tawan nanggad an saimong oripon na babae nin sarong aking lalaki, itatao ko sia ki Jehova sa gabos na aldaw kan saiyang buhay, asin mayo nin labaha na maagi sa saiyang payo.’” (1 Samuel 1:11) May sinasabi man an Biblia na boluntad na mga promesa. Gurano kaobligatoryo an mga promesang sono sa Kasuratan?

“Kun ika nagpopromesa sa Dios,” an sabi ni Hadeng Salomon kan suanoy na Israel, “dai ka mag-atraso na otobon iyan.” Idinagdag nia: “Kun ano an saimong promesa, otobon. Mas marahay pang dai ka magpromesa kisa sa ika magpromesa asin dai mag-otob.” (Eclesiastes 5:​4, 5) An Ley na itinao sa Israel paagi ki Moises nagsasabi: “Kun ika gumibo nin promesa ki Jehova na saimong Dios, dai ka magluyaluya sa pag-otob kaiyan, huli ta siertong hahagadon iyan sa saimo ni Jehova na saimong Dios, asin iyan magigin nanggad kasalan mo.” (Deuteronomio 23:21) Malinaw nanggad, an pagpromesa sa Dios sarong seryosong bagay. Iyan maninigo na gibohon na may marahay na dahelan, asin an naggigibo kaiyan maninigo na daing pagduda kun dapit sa kakayahan nia na otobon an ano man na ipanuga nia sa promesa. Ta kun dai, mas marahay pang dai sia magpromesa. Pero oras na magibo iyan, obligatoryo daw an gabos na promesa?

Paano kun an sarong promesa naghagad sa saro na gibohon an sarong bagay na sa huri naaraman na bakong kaoyon kan kabotan nin Dios? Paano kun iyan sarong promesa na minsan paano maiimbuelto an inmoralidad sa tunay na pagsamba? (Deuteronomio 23:18) Malinaw nanggad, an siring na promesa bakong obligatoryo. Dugang pa, sa Ley ni Moises, an promesa na ginibo nin sarong babae puedeng kanselaron kan saiyang ama o kan saiyang agom.​—Bilang 30:3-15.

Isip-isipa man an kaso nin sarong indibiduwal na nagpromesa sa Dios na magdanay na daing agom alagad ngonyan namugtak sia sa alanganon. Huli sa saiyang promesa namugtak sia sa situwasyon na sa pagmate nia dikit na niang mabalga an mga pamantayan nin Dios mapadapit sa moralidad dahelan sa pag-otob nia kaiyan. Maninigo daw na pagmaigotan pa man giraray niang otobon an saiyang promesa? Bako daw na mas marahay pang protehiran nia an saiyang sadiri sa pagkakasala nin inmoralidad paagi sa dai pag-otob sa saiyang promesa asin imbes makimaherak sia sa Dios asin humagad nin tawad? Solamente sia mismo an makapagdedesisyon dian. Daing ibang tawo an puedeng magdesisyon para sa saiya.

Paano kun an saro nagpromesa na sa huri narealisar nia na nagin pabiglabigla sia? Maninigo daw na pagmaigotan pa man giraray niang otobon an promesa? Bakong madali para ki Jefte na otobon an iprinomesa nia sa Dios, alagad makinuyog sa konsensia na ginibo nia iyan. (Hokom 11:30-40) An dai pakaotob nin saro sa promesa nia puedeng magbunga kan ‘paggurobgutob’ nin Dios asin pagkaraot kan nahaman nin saro. (Eclesiastes 5:6) An dai pagseryoso kun dapit sa pag-otob sa sarong promesa puedeng magresulta sa pagkawara kan pabor nin Dios.

Si Jesu-Cristo nagsabi: “Pabayaan sana na an saindong tataramon na Iyo mangahulogan nin Iyo, an saindong Dai, Dai; huli ta an labi digdi gikan sa maraot na saro.” (Mateo 5:37) Dapat na isipon nin sarong Kristiano bako sana an pag-otob sa mga promesa sa Dios kundi pati an pagigin mapagtitiwalaan sa gabos niang sinasabi​—sa Dios asin sa mga tawo. Paano kun mamugtak sia sa masakit na situwasyon kun saen nakipaghaman sia nin sarong kasundoan sa ibang tawo na garo baga sa primero marahay alagad pakatapos na siyasaton nin maingat nagluwas na sarong kamangmangan? Dai nia maninigong basta baliwalaon iyan. Alagad paagi sa torotoohan na orolay, an ibong na lado tibaad magdesisyon na palibrehon na sia sa obligasyon.​—Salmo 15:4; Talinhaga 6:​2, 3.

Mapadapit sa mga promesa asin gabos na iba pang bagay, ano an maninigong magin pangenot sa sato? Pirme niatong pagmaigotan na papagdanayon an marahay na relasyon ki Jehova Dios.