Paano Niato Magigibong May Halaga an Satong mga Aldaw sa Atubangan ni Jehova?

“Nawara, kasuodma, sa mga pag-oltanan kan pagsirang asin pagsolnop nin saldang, an duwang bulawan na oras, na balang saro may sisentang brilyanteng minuto. Daing premyong iinaalok, huli ta iyan nawara na sagkod lamang!”​​—Lydia H. Sigourney, Amerikanong autor (1791-​1865).

AN MGA aldaw kan satong buhay garo baga dikit asin madaling mawara. Pinensar ni salmista David an kahalipotan nin buhay asin napahirong mamibi: “Ipaaram mo sako, O Jehova, an sakong kasagkoran, asin an sokol nin sakong mga aldaw​—kun ano iyan, tanganing maaraman ko kun paanong ako naagi sana. Uya! Ginibo mong pipira sana an sakong mga aldaw; asin an lawig nin sakong buhay garo daing ano man sa atubangan mo.” An iniisip ni David iyo an mamuhay sa paagi na mapapaogma an Dios, paagi sa saiyang pagtaram sagkod paagi sa saiyang mga ginigibo. Ipinapahayag an saiyang pagsarig sa Dios, sia nagsabi: “An sakong paghalat nasa saimo.” (Salmo 39:​4, 5, 7) Naghinanyog si Jehova. Sinokol nanggad nia an mga ginigibo ni David asin binalosan sia segun dian.

Madaling magin sibot sa lambang minuto kan aldaw asin magapos sa buhay na marikas an dalagan asin pano nin mga gibohon. Puedeng ikahadit niato ini, nangorogna kun kadakol kan dapat na gibohon asin maeksperyensiahan saka kakadikit kan panahon tanganing gibohon iyan. Kapareho daw kan ki David an satong iniisip​—an mamuhay sa paagi na makamtan an pag-oyon nin Dios? Daing duwa-duwa, talagang minamasdan asin maingat na sinisiyasat ni Jehova an lambang saro sato. Rinekonoser ni Job, sarong tawong may takot sa Dios, kaidtong mga 3,600 na taon na an nakaagi na naheling ni Jehova an saiyang mga ginigibo asin binilang an gabos niang lakad. Naghapot si Job sa retorikong paagi: “Kun sia makipagkuenta na, ano an ikakasimbag ko sa saiya?” (Job 31:4-6, 14) Posibleng magibo niatong may halaga an satong mga aldaw sa atubangan nin Dios paagi sa pagbugtak nin espirituwal na mga prioridad, pagkuyog sa saiyang mga pagboot, asin paggamit kan satong panahon sa madonong na paagi. Estudyaran niato nin mas maingat an mga bagay na ini.

Gibohon na Pangenot sa Sato an Espirituwal na mga Bagay

An ipinasabong na Kasuratan tama sanang sinasadol kita na magbugtak nin espirituwal na mga prioridad kan iyan magsabi: ‘Siertohon an orog na mahalagang mga bagay.’ Ano an mahalagang mga bagay na ini? Kalabot sa simbag an “tamang kaaraman asin lubos na pakamansay.” (Filipos 1:​9, 10) An pagkaigwa nin kaaraman dapit sa mga katuyohan ni Jehova naghahagad nin madonong na paggamit kan satong panahon. Minsan siring, an paggibo na magin pangenot sa sato an espirituwal na mga bagay magarantiya sa sato nin buhay na kapakipakinabang asin nakakokontento.

Ipinagigirumdom sa sato ni apostol Pablo na “padagos na segurohon kun ano an inaako kan Kagurangnan.” Dapat na kalabot sa pagseguro niato an sadiring pagsiyasat sa satong mga motibo asin kamawotan kan puso. Nagpadagos an apostol: “Padagos na saboton kun ano an kabotan ni Jehova.” (Efeso 5:​10, 17) Kaya, ano an inaako ni Jehova? An sarong talinhaga sa Biblia minasimbag: “An kadonongan iyo an pangenot na bagay. Kamti an kadonongan; asin kaiba kan gabos mong nakamtan, kamti an pakasabot. Igalang mo iyan na marhay, asin papalangkawon ka kaiyan.” (Talinhaga 4:​7, 8) Naggagayagaya si Jehova sa sarong tawo na nagkukua nin  asin ginagamit an diosnon na kadonongan. (Talinhaga 23:15) An kagayonan kan siring na kadonongan iyo na dai iyan puedeng agawon o raoton. Sa katunayan, iyan nagigin bantay asin proteksion ‘sa maraot na dalan asin sa mga nagtataram nin marigsok na mga bagay.’​—Talinhaga 2:10-15.

Madonong nanggad, kun siring, na labanan an ano man na tendensiang magin pabaya sa espirituwal na mga bagay! Kaipuhan niatong kultibaron an mapag-apresyar na aktitud sa mga sinasabi ni Jehova asin an tamang pagkatakot sa saiya. (Talinhaga 23:​17, 18) Minsan ngani puedeng magkaigwa kan siring na kaisipan sa ano man na panahon sa buhay, pinakamarahay na pataluboon an tamang ugale na ini asin itadom sa satong personalidad an mga prinsipyo sa Biblia sa panahon nin pagkahoben. “Girumdoma, ngonyan, an saimong Kaharohalangkaweng Kaglalang sa mga aldaw kan saimong pagkahoben na lalaki,” an sabi kan madonong na si Hadeng Salomon.​—Eclesiastes 12:1.

An pinakapersonal na paagi nin pagpatalubo nin apresasyon ki Jehova iyo an personal na pamimibi sa saiya kada aldaw. Rinekonoser ni David an kahalagahan nin pagkompiar ki Jehova, huli ta sia nakimaherak: “Dangoga an sakong pamibi, O Jehova, asin hinanyoga an paghagad ko nin tabang. Sa sakong mga luha dai ka magdanay na daing girong.” (Salmo 39:12) An rarom daw kan satong kadayupotan sa Dios kun beses nakakatudok sa satong emosyon na kita napapahibi na? Iyo nanggad, mientras na orog niatong sinasabi ki Jehova an personal na mga bagay na nasa puso asin hinohorophorop an saiyang Tataramon, orog man siang minarani sa sato.​—Santiago 4:8.

Makanood na Kumuyog

Si Moises saro man na tawong may pagtubod na rinekonoser an saiyang pagsarig sa Dios. Arog ki David, naheling ni Moises na an buhay pano nin problema. Kun siring nakimaherak sia sa Dios na itokdo sa saiya ‘kun paano bibilangon an saiyang mga aldaw sa paagi na magkamit nin puso na may kadonongan.’ (Salmo 90:10-12) An pusong may kadonongan makakamtan sana paagi sa pakanood kan asin pamumuhay sono sa mga ley asin prinsipyo ni Jehova. Naaraman ini ni Moises asin pagkatapos kaiyan hiningoa nia na itudok sa isip kan nasyon nin Israel an mahalagang marhay na katotoohan na iyan paagi sa pag-otro sa sainda kan mga ley asin regulasyon nin Dios bago ninda sinadiri an Dagang Panuga. An siisay man na tawong hade na sa huri pipilion ni Jehova tanganing mamahala sa Israel masurat nin sadiring kopya kan Ley asin babasahon iyan sa gabos na aldaw kan saiyang buhay. Taano? Tanganing makanood siang matakot sa Dios. Magigin pagbalo ini sa pagkuyog kan hade. Poprotehiran sia kaiyan na dai magpalangkaw an saiyang puso sa saiyang mga tugang asin papalawigon man an mga aldaw nia sa saiyang kahadean. (Deuteronomio 17:18-20) Inotro an panugang ini kan sabihon ni Jehova sa aki ni David na si Salomon: “Kun ika maglakaw sa sakong mga dalan paagi sa pag-otob sa sakong mga ipinagpapakuyog asin sa sakong mga togon, siring sa paglakaw ni David na saimong ama, papalawigon ko man an saimong mga aldaw.”​—1 Hade 3:10-14.

An pagkuyog sarong seryosong bagay sa Dios. Kun babastabastahon niato na garo baga bakong mahalaga an nagkapirang aspekto kan mga kahagadan asin pagboot ni Jehova, siertong maririparo nia an siring na aktitud. (Talinhaga 15:3) An pakaaram kaini maninigong magpahiro sa sato na papagdanayon an halangkaw na pagpahalaga sa gabos na paggiya ni Jehova, minsan ngani an paggibo kaiyan tibaad bakong pirmeng pasil. Ginigibo ni Satanas an gabos niang makakaya tanganing ‘olangon kita’ mantang hinihingoa niato na kuyogon an mga ley asin pagboot nin Dios.​—1 Tesalonica 2:18.

Partikularmenteng mahalaga na sunodon an hatol kan Kasuratan na magtiripon para sa pagsamba asin asosasyon. (Deuteronomio 31:​12, 13; Hebreo 10:​24, 25) Kaya marahay na ihapot niato sa satong sadiri: ‘Igwa daw ako kan determinasyon asin pagprosegir na kaipuhan tanganing gibohon an talagang may halaga?’ An pagpabaya sa asosasyon asin pagtotokdo sa Kristianong mga pagtiripon huli sa paghihingoang seguradohon an pinansial na  seguridad mapaluya sa satong relasyon ki Jehova. Si apostol Pablo nagsurat: “An saindo logod na pamumuhay dai apektado nin pagkamoot sa kuarta, mantang kamo naninigoan na sa presenteng mga bagay. Huli ta [si Jehova] nagsabi: ‘Sa ano man na paagi dai taka babayaan ni sa ano man na paagi pababayaan taka.’” (Hebreo 13:5) An andam na pagkuyog sa mga pagboot ni Jehova nagpapaheling nin lubos na pagtitiwala na aatamanon nia kita.

Si Jesus nakanood na kumuyog asin nakinabang. Kaya iyo man kita. (Hebreo 5:8) Mientras na kinukultibar niato an pagkuyog, iyan nagigin mas pasil, dawa sa saradit na bagay. Totoo, huli sa satong integridad, tibaad kaipuhan niatong tagalan an bakong marahay asin maringis pa nganing pagtrato kan iba. Tibaad espesyalmenteng totoo ini sa trabaho, sa eskuelahan, o sa pamilyang nababanga huli sa relihion. Pero, nararanga kita kan sinabi sa mga Israelita na kun ‘mamotan ninda si Jehova paagi sa paghinanyog sa saiyang tingog asin paagi sa pagdadanay sa saiya, sia an magigin saindang buhay asin an kahalawigan kan saindang mga aldaw.’ (Deuteronomio 30:20) Iinoopresir man sato an iyo man sanang panuga na ini.

Gamiton an Panahon sa Madonong na Paagi

An madonong na paggamit kan satong panahon matabang man sa sato na magibong may halaga an satong mga aldaw sa atubangan ni Jehova. Bakong arog nin kuarta na puedeng sarayon, an panahon dapat na gastoson ta kun dai mawawara iyan. An kada oras na minaagi nawawara na sagkod lamang. Huling pirmeng kadakol kan gigibohon kisa kaya niatong hamanon, ginagamit daw niato an satong panahon kaoyon kan satong mga obheto sa buhay? An sarong mayor na obheto kan gabos na Kristiano maninigo na an regular na pakikikabtang sa paghuhulit kan Kahadean asin paggibo nin mga disipulo.​—Mateo 24:14; 28:​19, 20.

Gagamiton niato sa madonong na paagi an satong panahon pakatapos sanang marealisar niato nin malinaw an halaga kaiyan. Tama nanggad, an Efeso 5:16 sinasadol kita na ‘tuboson an angay na panahon para sa sato man sana,’ asin nangangahulogan  ini nin “pagbakal” kaiyan, na linilingawan nguna an bakong gayong mahalagang mga bagay. Nangangahulogan iyan nin pagbawas sa mga aktibidad na nakauubos nin panahon. An sobrang pagdalan nin telebisyon o pagsiyasat sa Internet, pagbasa nin daing kamanungdanan na sekular na babasahon, o labi-labing paglibang asin pag-aling-aling puedeng makapagal sa sato. Dugang pa, an labi-labing pagkua nin materyal na mga rogaring puedeng umubos kan panahon na kaipuhan tanganing magkaigwa nin pusong may kadonongan.

An mga pabor sa maingat na pagbadyet nin panahon nagsasabi: “Imposible na magamit nin tama an saindong panahon na mayo nin klarong mga pasohan.” Nagsuherir sinda nin limang pamantayan sa pagbugtak nin mga pasohan: espesipiko, nasosokol, maaabot, realistiko, asin nakaiskedyul.

An sarong kapakipakinabang na pasohan iyo na paoswagon an satong pagbasa sa Biblia. An enot na lakdang iyo na gibohon na espesipiko an satong pasohan​—na basahon an bilog na Biblia. An sunod na lakdang iyo na gibohon na nasosokol an satong pasohan. Sa paggibo kaini, masusubaybayan niato an satong pag-oswag. An mga pasohan maninigong magpahiro sa sato na maghingoa asin tumalubo. Iyan dapat man na naaabot asin realistiko. An personal na mga kakayahan asin abilidad, asin an yaon na panahon dapat na konsideraron. Para sa nagkapira, tibaad mas dakol na panahon an kaipuhan tanganing mahaman an pasohan. Ultimo, an satong pasohan kaipuhan na iiskedyul. An pagbugtak nin petsa kun noarin hahamanon an sarong bagay puede nanggad na magpakosog kan motibasyon na gibohon iyan.

An gabos na miembro kan pambilog na globong pamilyang Bethel, na naglilingkod sa pankinaban na opisina prinsipal kan Mga Saksi ni Jehova o sa saro kan mga sangang opisina kaiyan sa bilog na kinaban, igwa nin espesipikong pasohan na basahon an bilog na Biblia durante kan saindang enot na taon sa Bethel. Aram ninda na an kapakipakinabang na pagbasa sa Biblia nakatatabang sa saindang espirituwal na pag-oswag asin sa mas dayupot na relasyon ki Jehova, na nagtotokdo sa sainda na pakinabangon an saindang sadiri. (Isaias 48:17) Puede man daw niatong gibohon na pasohan niato an regular na pagbasa sa Biblia?

Mga Pakinabang Kun Gigibohon Niatong May Halaga an Satong mga Aldaw

An pagtao nin pangenot na atension sa espirituwal na mga bagay magbubunga nin dakol na bendisyon. Enot, nakatatabang iyan sa sato na orog na makamateng igwa kita nin nahahaman asin katuyohan sa buhay. An regular na pagkomunikar ki Jehova paagi sa odok sa pusong pamibi orog kitang irinarani sa saiya. An pamimibi mismo nagpapaheling kan satong pagtitiwala sa saiya. An aroaldaw na pagbasa sa Biblia asin mga publikasyon na basado sa Biblia na itinatao kan “fiel asin may diskresion na oripon” nagpapaheling kan pagigin andam niato na maghinanyog sa Dios kun sia nagtataram sa sato. (Mateo 24:45-47) Nagtatabang ini sa sato na magkaigwa nin pusong may kadonongan tanganing makagibo nin tamang mga desisyon asin pagpili sa buhay.​—Salmo 1:1-3.

Naoogma kitang marhay sa pagkuyog sa mga togon ni Jehova, ta an paggibo kaiyan bakong pagabat. (1 Juan 5:3) Mantang ginigibo niatong may halaga an kada aldaw sa atubangan ni Jehova, pinakokosog niato an satong relasyon sa saiya. Kita man nagigin tunay na espirituwal na suporta sa satong mga kapwa Kristiano. An siring na mga gibo nagpapaogma man ki Jehova Dios. (Talinhaga 27:11) Asin mayo nang maorog pang balos kisa pagkamit kan pag-oyon ni Jehova ngonyan asin sagkod lamang!

[Ritrato sa pahina 21]

Seryoso an mga Kristiano sa espirituwal na mga bagay

[Mga ritrato sa pahina 22]

Ginagamit daw nindo an saindong panahon sa madonong na paagi?

[Ritrato sa pahina 23]

Pinakokosog niato an satong relasyon ki Jehova mantang ginigibo niatong may halaga an kada aldaw sa atubangan nia