Ikaogma an Personal na Pag-adal sa Tataramon nin Dios

“Hohorophoropon ko nanggad an gabos mong aktibidad, asin tatawan ko nin atension an saimong mga ginibo.”​—SALMO 77:12.

1, 2. (a) Taano ta dapat kitang magtagama nin panahon para sa paghorophorop? (b) Ano an boot sabihon kan “horophoropon” asin “pensaron”?

 BILANG mga disipulo ni Jesu-Cristo, maninigong pahalagahan niatong marhay an relasyon niato sa Dios asin an mga dahelan niato sa paglilingkod sa Saiya. Minsan siring, an kadaklan na tawo ngonyan sibot-sibot an buhay kaya dai na sinda nagtatagama nin panahon para sa paghorophorop. Biyo sindang bangkag sa kasibotan sa materyalismo, pamamakal, asin daing kamanungdanan na paghanap nin kasingawan. Paano niato malilikayan an pagkadaing saysay na iyan? Kun paanong kita nagtatagama nin espesipikong panahon kada aldaw para sa mahalagang marhay na mga aktibidad, arog kan pagkakan asin pagtorog, dapat man kitang magtagama nin panahon kada aldaw na horophoropon an mga aktibidad asin ginibo ni Jehova.​—Deuteronomio 8:3; Mateo 4:4.

² Minapondo daw kamo tanganing maghorophorop? Ano an boot sabihon kan horophoropon? An sarong diksionaryo tinatawan nin kahulogan an tataramon na iyan na “ikonsentrar an kaisipan nin saro: pakaisipon o pensaron.” Asin an tataramon na “pensaron” nangangahulogan na “isip-isipon: pakaisipon . . . tanganing atid-atidon o konsideraron nangorogna nin toninong, seryoso, asin hararom.” Ano an kahulogan kaini para sa sato?

3. Sa ano direktang konektado an espirituwal na pag-oswag?

³ Enot, maninigong ipagirumdom kaiyan sato an isinurat ni apostol Pablo sa saiyang kapwa lingkod na si Timoteo: “Mantang ako pasiring dian, padagos kang magmaigot sa pampublikong pagbasa, sa pagsadol, sa pagtotokdo. . . . Pensaron mo an mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos.” Iyo, linalaoman an pag-oswag, asin ipinaheling kan mga tataramon ni Pablo na an pagpensar sa espirituwal na mga bagay igwa nin direktang koneksion sa pag-oswag. Totoo man iyan ngonyan. Tanganing kamtan an pagkakontento sa espirituwal na pag-oswag, dapat pa man giraray niatong “pensaron” asin ‘ipanongod an bilog niatong buhay’ sa mga bagay na may koneksion sa Tataramon nin Dios.​—1 Timoteo 4:13-15.

4. Anong mga probisyon an puede nindong gamiton tanganing makatabang saindo na pensaron nin regular an Tataramon ni Jehova?

⁴ An pinakamarahay na panahon nin paghorophorop nindo nakadepende sa saindo asin sa rutina kan saindong pamilya. An dakol nagpepensar sa sarong teksto sa Biblia sa amay na aga kun sinda nagbabasa kan pulyetong Pagsiyasat sa Kasuratan Aroaldaw. Sa katunayan, an mga 20,000 na boluntaryo sa mga erokan na Bethel sa bilog na kinaban pinoponan an saindang aldaw paagi sa 15 minutos na pagtokar sa teksto sa Biblia kan aldaw. Minsan ngani pipira sana sa pamilyang Bethel an nagtatao nin berbal na komento kada aga, an iba nagpepensar sa sinasabi asin binabasa. An ibang mga Saksi pinepensar an Tataramon ni Jehova mantang sinda pasiring sa trabaho. Naghihinanyog sinda sa mga audiocassette kan Biblia asin kan magasin na Watchtower asin Awake! na makukua sa nagkapirang lenguahe. Dakol na misis an naggigibo kaini  mantang nagtatrabaho sa harong. Garo man sana inaarog ninda si salmista Asaf, na nagsurat: “Gigirumdomon ko an mga gibo ni Jah; ta gigirumdomon ko an makangangalas na ginibo mong aksion kan suanoy. Asin hohorophoropon ko nanggad an gabos mong aktibidad, asin tatawan ko nin atension an saimong mga ginibo.”​—Salmo 77:​11, 12.

An Tamang Aktitud May Positibong mga Resulta

5. Taano ta maninigong magin mahalaga sato an personal na pag-adal?

⁵ Sa satong presenteng kapanahonan nin TV, video, asin komputer, grabe, kun bako man nakadadanyar, an nagin epekto sa pagbasa. Dai nanggad iyan maninigong mangyari sa Mga Saksi ni Jehova. Total, an pagbasa sa Biblia garo man sana nagsasalbar na koneksion niato ki Jehova. Kaidtong rinibong taon na an nakaagi, si Josue an suminalihid ki Moises bilang namamayo sa Israel. Tanganing kamtan an bendisyon ni Jehova, kinaipuhan na basahon ni Josue mismo an Tataramon nin Dios. (Josue 1:8; Salmo 1:​1, 2) Kahagadan pa man giraray iyan ngonyan. Minsan siring, huli sa limitadong inadalan, an nagkapira tibaad nadedepisilan na basahon iyan o napapagal sa paggibo kaiyan. Kaya ano an makatatabang sato na booton na basahon asin pag-adalan an Tataramon nin Dios? An simbag manonompongan sa mga tataramon ni Hadeng Salomon na nakasurat sa Talinhaga 2:1-6. Buksi tabi nindo an saindong Biblia asin basahon an mga bersikulong ini. Dangan iriba niatong pag-oolayan iyan.

6. Anong aktitud an maninigo niatong ipaheling dapit sa kaaraman nin Dios?

⁶ Primero, maheheling niato an sadol na ini: “Aki ko, kun ika mag-aako kan sakong mga tataramon asin magpapahalaga kan sakong mga togon, tanganing magtao nin atension sa kadonongan paagi sa saimong talinga, na ikakiling mo an saimong puso sa pakamansay; . . .” (Talinhaga 2:​1, 2) Ano an manonodan niato sa mga tataramon na ini? Na kita gabos igwa nin paninimbagan. Mangnoha an kondisyon na “kun ika mag-aako kan sakong mga tataramon.” Idinodoon nanggad iyan kan tataramon na “kun” huli ta an kadaklan sa katawohan dai nagtatao nin atension sa Tataramon nin Dios. Tanganing makanompong kita nin kagayagayahan sa pag-adal sa Tataramon nin Dios, dapat kitang magin andam na akoon an mga sinasabi ni Jehova asin ibilang iyan na sarong kayamanan na habo niatong mawara. Dai niato noarin man maninigong togotan an aroaldaw na rutina niato na magin dahelan na kita magin sibot na marhay o maparayo an atension kaya nagpopoon na kitang mawaran nin interes sa Tataramon nin Dios, na nagdududa pa ngani.​—Roma 3:​3, 4.

7. Sagkod na posible, taano ta maninigo kitang magin presente asin magtao nin atension sa Kristianong mga pagtiripon?

⁷ Talaga daw na kita ‘nagtatao nin atension’ asin maingat na naghihinanyog kun an Tataramon nin Dios maingat na ipinaliliwanag sa satong Kristianong mga pagtiripon? (Efeso 4:​20, 21) ‘Ikinikiling daw niato an puso’ tanganing magkaigwa nin pakamansay? An ispiker tibaad bakong iyo an pinakaeksperyensiado, alagad mantang ginagamit nia an Tataramon nin Dios, sia maninigo sa satong maingat na atension. Siempre, tanganing makatao nin atension sa kadonongan ni Jehova, dapat na kita, sagkod na posible, magin presente sa Kristianong mga pagtiripon. (Talinhaga 18:1) Imahinara an pagkadesganar nin siisay man na tibaad mayo kaidto sa pagtiripon sa kuarto sa itaas sa Jerusalem kan Pentecostes 33 C.E.! Minsan ngani an satong mga pagtiripon bakong pambihira na arog kaidto, an Biblia, an pundamental na librong pinag-aadalan niato, an tinotokar. Sa siring, an lambang pagtiripon puedeng magin bendisyon sa sato kun kita matao nin atension asin masubaybay sa satong Biblia.​—Gibo 2:1-4; Hebreo 10:​24, 25.

8, 9. (a) An personal na pag-adal naghahagad sa sato nin ano? (b) Paano nindo ikokomparar an halaga nin bulawan sa pakasabot sa kaaraman nin Dios?

⁸ An sunod na mga tataramon kan madonong na hade iyo ini: “Dugang pa, kun ika mag-apod sa pakasabot mismo asin ika magkurahaw sa pakamansay, . . .” (Talinhaga 2:3) Anong aktitud o saboot an ipinapasabot sa sato kan mga tataramon na ini? Tara, an odok na pagmawot na masabotan an Tataramon ni Jehova! Nagpaparisa iyan nin pagigin andam na mag-adal sa katuyohan na magkaigwa nin pakamansay, na mamansayan kun ano an kabotan ni Jehova. Siempre, nagkakaipo ini nin paghihingoa, asin dinadara kita kaiyan sa sunod na mga tataramon asin ilustrasyon ni Salomon.​—Efeso 5:15-17.

⁹ Nagpadagos sia: “Kun ika padagos na maghahanap kaiyan [pakasabot] siring baga sa pirak, asin siring baga sa natatagong kayamanan ika padagos na magsusungkat kaiyan, . . .” (Talinhaga 2:4) Dahel  kaini naiisip niato an pambihirang mga nagibo nin mga tawo sa pagmina na sa nag-aging mga siglo naghahanap kan soboot mahalagang marhay na mga metal na pirak asin bulawan. An mga tawo guminadan para sa bulawan. An iba inubos an bilog na buhay sa paghihingoang hanapon iyan. Pero ano an tunay na halaga nin bulawan? Kun ika nalagalag sa sarong desierto asin magagadan na sa paha, arin an mas pipilion mo: sarong bara nin bulawan o sarong baso nin tubig? Pero, kanigoan an kaigotan nin mga tawo sa paghanap nin bulawan, na may artipisyal asin arbitraryong halaga! a Lalo nang may orog na kaigotan na maninigo niatong hanapon an kadonongan, pakamansay, asin pakasabot sa Dios asin sa saiyang kabotan! Alagad ano an mga pakinabang sa siring na paghanap?​—Salmo 19:7-10; Talinhaga 3:13-18.

10. Ano an makukua niato kun pag-aadalan niato an Tataramon nin Dios?

¹⁰ Nagpapadagos an pagpaliwanag ni Salomon: “Sa siring masasabotan mo an pagkatakot ki Jehova, asin makukua mo an mismong kaaraman nin Dios.” (Talinhaga 2:5) Kanigoan kamakangangalas na isipon​—na baga man kita makasalan na mga tawo puede niatong makua “an mismong kaaraman nin Dios,” si Jehova, an Soberanong Kagurangnan kan uniberso! (Salmo 73:28; Gibo 4:24) An mga pilosopo asin madodonong daang tawo sa kinaban dakol nang siglong naghingoa na masabotan an mga misteryo nin buhay asin kan uniberso. Minsan siring, dai ninda nakua “an mismong kaaraman nin Dios.” Taano? Maski ngani rinibong taon nang yaon iyan sa Tataramon nin Dios, an Biblia, sinasabi ninda na iyan simplehon asin sa siring dai ninda iyan tinutubod asin dai nasasabotan.​—1 Corinto 1:18-21.

11. Ano an nagkapirang pakinabang sa personal na pag-adal?

¹¹ Uya an saro pang dahelan na itinatampok ni Salomon: “Si Jehova mismo nagtatao nin kadonongan; gikan sa saiyang ngoso may kaaraman asin pakamansay.” (Talinhaga 2:6) Si Jehova suelto asin bulaos na nagtatao nin kadonongan, kaaraman, asin pakamansay sa siisay man na andam na hanapon iyan. Sierto nanggad na igwa kita nin dahelan na pahalagahan an personal na pag-adal sa Tataramon nin Dios, dawa kun iyan nagkakaipo nin paghihingoa, disiplina, asin sakripisyo. Minsan paano igwa kita nin imprentadong mga kopya kan Biblia asin dai na kaipuhan magsurat nin kopya na arog kan ginibo nin nagkapira kan suanoy na mga panahon!​—Deuteronomio 17:​18, 19.

 Tanganing Lumakaw na Angay ki Jehova

12. Ano an maninigo na magin motibo niato sa satong paghanap sa kaaraman nin Dios?

¹² Ano an maninigo na magin motibo niato sa personal na pag-adal? Tanganing lumuwas na mas matibay kisa iba? Tanganing ipaheling an nakalalabing kaaraman? Tanganing magin garo naglalakaw na ensiklopedya sa Biblia? Dai. An katuyohan niato iyo na magin naglalakaw, nagtataram, aktibong mga Kristiano, na pirmeng andam na tabangan an iba, sa nakagiginhawang espiritu ni Cristo. (Mateo 11:28-30) Si apostol Pablo nagpatanid: “An kaaraman nakakapaabhaw, alagad an pagkamoot nagpaparigon.” (1 Corinto 8:1) Kun siring, maninigo kitang magkaigwa kan mapakumbabang espiritu na ipinaheling ni Moises kan sabihon nia ki Jehova: “Paaraman sa sako, tabi, an saimong mga dalan, tanganing mamidbid taka, tanganing ako makakua nin pabor sa saimong mga mata.” (Exodo 33:13) Iyo, maninigo niatong mawoton na magkaigwa nin kaaraman tanganing paogmahon an Dios, bakong pahangaon an mga tawo. Boot niatong magin angay, mapakumbabang mga lingkod nin Dios. Paano niato maaabot an pasohan na iyan?

13. Ano an kaipuhan tanganing an saro magin angay na lingkod nin Dios?

¹³ Naghatol si Pablo ki Timoteo manongod sa kun paano paoogmahon an Dios, na sinasabi: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasupog, na ginagamit an tataramon kan katotoohan sa tamang paagi.” (2 Timoteo 2:15) An pananaram na “ginagamit . . . sa tamang paagi” hale sa pinagkombinar na berbo sa Griego na an orihinal na kahulogan “deretsong pagputol,” o ‘putolon nin deretso.’ (Kingdom Interlinear) Segun sa nagkapira, nagsusuherir ini kan ideya nin sarong paratahi na nagtatabas nin tela sono sa disenyo, nin sarong paraoma na nag-aarado nin mga iras sa oma, asin iba pa. Sa paano man, an pangultimong resulta dapat na tama, o deretso. An punto iyo na tanganing magin angay asin inooyonan na lingkod nin Dios, dapat na ‘gibohon ni Timoteo an bilog niang makakaya’ tanganing maseguro na an saiyang itinotokdo asin iginagawe kaoyon kan tataramon nin katotoohan.​—1 Timoteo 4:16.

14. Paano maninigong makaapektar sa satong ginigibo asin sinasabi an satong personal na pag-adal?

¹⁴ Iyan man an idinoon ni Pablo kan sadolon nia an mga kapwa Kristiano sa Colosas na “maglakaw na angay ki Jehova sa katuyohan na lubos na makapaogma sa saiya” paagi sa ‘pamumunga sa lambang marahay na gibo asin pag-oswag sa tamang kaaraman dapit sa Dios.’ (Colosas 1:10) An pagigin angay ki Jehova ikinokonektar digdi ni Pablo sa ‘pamumunga sa lambang marahay na gibo’ saka sa ‘pag-oswag sa tamang kaaraman dapit sa Dios.’ Sa ibang pagtaram, an mahalaga ki Jehova bako sanang kun gurano an pagpahalaga niato sa kaaraman kundi kun gurano man niato kaingat na sinususog an Tataramon nin Dios sa satong ginigibo asin sinasabi. (Roma 2:​21, 22) Nangangahulogan ini na an satong personal na pag-adal dapat na makaapektar sa satong kaisipan asin satong gawe-gawe tanganing mapaogma niato an Dios.

15. Paano niato mapoprotehiran asin makokontrol an satong isip asin mga kaisipan?

¹⁵ Ngonyan, desidido si Satanas na raoton an satong espirituwalidad paagi sa paggibo nin dahelan na magkontrahan an isip. (Roma 7:14-25) Kun siring, dapat niatong protehiran asin kontrolon an satong isip asin kaisipan tanganing magin angay sa satong Dios, si Jehova. An armas niato iyo an “kaaraman nin Dios,” na may kakayahan na ‘darahon an lambang kaisipan sa pagkabihag tanganing iyan magin makinuyog ki Cristo.’ Huli kaini lalo na kitang dapat na magtao nin atension sa aroaldaw na pagbasa sa Biblia, ta gusto niatong haleon sa satong  isip an paslo, makalaman na mga kaisipan.​—2 Corinto 10:5.

Mga Pantabang sa Pagsabot

16. Paano kita makikinabang mantang tinotokdoan kita ni Jehova?

¹⁶ An katokdoan ni Jehova nagtatao nin espirituwal asin pisikal na mga pakinabang. Bako iyan na nakasusumo, mayong praktikal na halagang teolohiya. Sa siring, mababasa niato: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.” (Isaias 48:17) Paano kita pinalalakaw ni Jehova sa saiyang kapakipakinabang na dalan? Enot, yaon sato an saiyang ipinasabong na Tataramon, an Banal na Biblia. Ini an pundamental na librong pinag-aadalan niato, na dayaday niatong kinokonsulta. Kaya marahay na magsubaybay sa Kristianong mga pagtiripon na nakabukas an Biblia. An kapakipakinabang na resulta nin paggibo kaiyan maheheling sa estorya kan kapon na Etiope, na nakasurat sa Gibo kapitulo 8.

17. Ano an nangyari sa kaso kan kapon na Etiope, asin ano an ipinaheheling kaini?

¹⁷ An kapon na Etiope kombertido sa Judaismo. Sinsero siang nagtutubod sa Dios, asin pinag-aadalan nia an Kasuratan. Kan nagbibiahe sakay sa saiyang karuwahe, binabasa nia an teksto sa Isaias kan si Felipe magdalagan sa kataed nia asin naghapot: “Ano talagang aram mo an binabasa mo?” Ano an simbag kan kapon? “‘An totoo, paano ko magigibo iyan, kun daing gumiya sa sako?’ Asin sia nakimaherak ki Felipe na lumunad asin tumukaw sa kataed nia.” Dangan tinabangan ni Felipe, na ginigiyahan kan banal na espiritu, an kapon na masabotan an hula ni Isaias. (Gibo 8:27-35) Ano an ipinaheheling kaini? Na bakong igo an satong pribadong pagbasa sa Biblia. Ginagamit ni Jehova, paagi sa saiyang espiritu, an grupong fiel asin may diskresion na oripon tanganing tabangan kitang masabotan an saiyang Tataramon sa tamang panahon. Paano ini ginigibo?​—Mateo 24:45-47; Lucas 12:42.

18. Paano kita tinatabangan kan grupong fiel asin may diskresion na oripon?

¹⁸ Minsan ngani sinasabi na an grupong oripon “fiel asin may diskresion,” dai sinabi ni Jesus na iyan dai nasasala. An grupong ini nin fiel na linahidan na mga tugang kompuesto pa man giraray nin bakong sangkap na mga Kristiano. Dawa may pinakamarahay na mga intension, sinda puedeng masala, arog kan nangyayari kun beses sa mga lalaking arog ninda kan enot na siglo. (Gibo 10:9-15; Galacia 2:​8, 11-14) Minsan siring, dalisay an saindang motibo, asin ginagamit sinda ni Jehova sa pagtao sato nin mga pantabang sa pag-adal sa Biblia tanganing pakosogon an satong pagtubod sa Tataramon asin mga panuga nin Dios. An pundamental na probisyon para sa personal na pag-adal na itinao sato kan oripon iyo an New World Translation of the Holy Scriptures. Makukua iyan ngonyan, nin bilog o kabtang sana, sa 42 na lenguahe, asin 114 milyones na kopya na sa nagkapirang edisyon an inimprenta. Paano niato iyan magagamit nin epektibo sa satong personal na pag-adal?​—2 Timoteo 3:14-17.

19. Ano an nagkapirang kabtang kan New World Translation​​—With References na puedeng makatabang sa personal na pag-adal?

¹⁹ Halimbawa, an New World Translation of the Holy Scriptures​​—With References. Igwa iyan nin mga kolumna nin cross-reference, nota sa ibaba, sarong  pinahalipot na konkordansia sa porma nin “Bible Words Indexed” asin “Footnote Words Indexed,” asin sarong mahiwas na Appendix dapit sa 43 na tema, kabale an mga mapa asin tsart. Yaon man an “Introduction,” na may paliwanag dapit sa dakol na reperensiang ginamit para sa daing kaagid na traduksion na ini kan Biblia. Kun iyan makukua sa lenguahe na masasabotan nindo, magin pamilyar nanggad kamo sa mga kabtang na ini asin gamiton iyan. Sa paano man, an Biblia an kapinonan kan satong programa nin pag-adal, asin paagi sa New World Translation, igwa kita nin bersion na tama an pagdodoon sa ngaran nin Dios mantang itinatampok kaiyan an pamamahala kan Kahadean nin Dios.​—Salmo 149:1-9; Daniel 2:44; Mateo 6:​9, 10.

20. Anong mga hapot manongod sa personal na pag-adal an nangangaipo ngonyan nin simbag?

²⁰ Ngonyan, tibaad ihapot niato: ‘Ano pang tabang an kaipuhan niato tanganing masabotan an Biblia? Paano niato matatawan nin panahon an personal na pag-adal? Paano niato magigibong mas epektibo an satong pag-adal? Ano an maninigong magin epekto sa iba kan satong pag-adal?’ Totokaron kan sunod na artikulo an mahalagang marhay na mga aspektong ini kan satong Kristianong pag-oswag.

[Nota sa Ibaba]

Nagigirumdoman daw Nindo?

• Ano an boot sabihon kan “horophoropon” asin “pensaron”?

• Ano an maninigo na magin aktitud niato dapit sa pag-adal sa Tataramon nin Dios?

• Ano an maninigo na magin motibo niato sa satong personal na pag-adal?

• Igwa kita nin anong mga pantabang tanganing masabotan an Biblia?

[Mga Hapot Para sa Pag-adal]

[Ritrato sa pahina 15]

Nanonompongan kan mga miembro kan pamilyang Bethel na nakapakokosog sa espirituwal na ponan an kada aldaw paagi sa pagtokar sa sarong teksto sa Biblia

[Mga ritrato sa pahina 15]

An mahalagang marhay na mga panahon puedeng tuboson paagi sa paghinanyog sa mga “tape” sa Biblia mantang kita nagbibiahe

[Ritrato sa pahina 16]

An mga tawo naglapigot asin nagtrabaho nin halawig tanganing makakua nin bulawan. Guranong paghihingoa an ginigibo nindo sa pag-adal kan Tataramon nin Dios?

[Credit Line]

Sa karahayan nin boot kan California State Parks, 2002

[Mga ritrato sa pahina 17]

An Biblia sarong kayamanan na puedeng gumiya sa buhay na daing katapusan