An “Maigot na mga Parabalangibog kan Kahadean” Magayagayang Nagtiripon

PINUPURISAW kan krisis sa moral, ekonomiya, asin politika an kinaban. Minsan siring, sa tahaw kan gabos na kariribokan na ini an Mga Saksi ni Jehova nagtiripon para sa matoninong na tolong aldaw na “Maigot na mga Parabalangibog kan Kahadean” na Pandistritong mga Kombension. Poon kan Mayo 2002, an mga pagtiripon na ini ginibo sa bilog na globo.

An mga kombension tunay na nagin magayagayang mga okasyon. Repasohon niato sa halipot an nakapakokosog na programa na basado sa Biblia.

Idinoon sa Enot na Aldaw an Kaigotan ni Jesus

An pinakatema sa enot na aldaw kan kombension iyo an “Arogon an Kaigotan kan Satong Kagurangnan, si Jesus.” (Juan 2:17) An pahayag na “Maggayagaya sa Pagkatiripon Bilang mga Parabalangibog kan Kahadean” may init na inagda an mga nag-atender na makikabtang sa kagayagayahan na pirmeng naheheling sa mga kombension kan banwaan nin Dios. (Deuteronomio 16:15) An pahayag na ini sinundan nin mga interbio sa maigot na mga parahulit kan maogmang bareta.

An pahayag na “Magkaigwa nin Labi-labi Nanggad na Kaogmahan Dian ki Jehova” tinokar nin bersikulo por bersikulo an Salmo 37:1-11. Sinadol kita na dai “mag-init” huli sa garo baga kapangganahan kan mga maraot. Maski an mga maraot tibaad imisrepresentar kita, maabot an panahon na lilinawon ni Jehova kun siisay talaga an saiyang fiel na banwaan. Tinokar kan pahayag na “Ipaheling Nindo na Kamo Mapagpasalamat” kun paano niato ikapaheheling an pagpasalamat sa Dios. An gabos na Kristiano kaipuhan na magdolot nin “atang nin pag-omaw” ki Jehova. (Hebreo 13:15) Siempre, an kadakolan nin oras na idinudusay niato sa paglilingkod ki Jehova nakadepende sa satong pag-apresyar asin sirkunstansia.

An pahayag sa pinakatema may titulong “Naglalaad an Kaigotan kan mga Parabalangibog kan Kahadean.” Itinotokdo kaiyan si Jesu-Cristo bilang an pinakamarahay na halimbawa niato sa kaigotan. Pakapatindoga kan langitnon na Kahadean kan 1914, kaipuhan kan tunay na mga Kristiano an kaigotan tanganing ianunsiar an maogmang bareta na iyan. Sinambit kan ispiker an kombension sa Cedar Point, Ohio, E.U.A., kan 1922 asin ipinagirumdom sato an makasaysayan na pangapodan: “Ipaisi an Hade asin an saiyang Kahadean”! Pag-abot nin panahon, an kaigotan kan fiel na mga lingkod nin Dios pinahiro sinda na ipahayag an marahayon na mga katotoohan manongod sa Kahadean sa gabos na nasyon.

An pahayag na “Magin Daing Takot sa Pakaaram na si Jehova Nasa Sato,” na itinao sa hapon kan enot na aldaw, nagpaheling na an banwaan nin Dios an nangorognang target ni Satanas. Minsan siring, sa ibong kan pagtumang na inaatubang niato, an pagpensar niato sa dakol na halimbawa nin pagtubod sa Biblia asin sa presenteng panahon nagtatao sato nin kosog nin boot na atubangon nin daing takot an mga pagbalo asin sugot.—Isaias 41:10.

An nagsunod sa programa iyo an tolo an kabtang na simposium sa temang “An Hula ni Miqueas Nagpapakosog sa Sato na Maglakaw sa Ngaran ni Jehova.” Ikinomparar kan enot na ispiker an pagruro sa moral, relihiosong apostasiya, asin materyalismo  kan kaaldawan ni Miqueas sa sato mismong kapanahonan. Sia nagsabi: “An satong paglaom para sa ngapit magigin segurado kun kukultibaron niato an makinuyog na puso asin seseguradohon niato na an satong gawe-gawe banal asin an satong buhay pano nin mga gibo nin diosnon na debosyon—asin kun nungka niatong lilingawan na an aldaw ni Jehova talagang maabot.”—2 Pedro 3:11, 12.

Sinambit kan ikaduwang ispiker sa simposium an pagkondenar ni Miqueas sa mga namomoon sa Juda. Dinadaogdaog ninda an mga dukha, daing kalabanlaban na mga tawo. Alagad ihinula man ni Miqueas an kapangganahan kan tunay na pagsamba. (Miqueas 4:1-5) Tinawan nin puersa kan banal na espiritu ni Jehova, desidido kitang ibalangibog an nakarerepreskong mensaheng ini nin paglaom. Alagad paano kun namamatean niato na naoolang kita nin kamatean o nakakamateng nalilimitaran sa ibang paagi? An ikatolong ispiker nagsabi: “An mga kahagadan ni Jehova rasonable saka puedeng otobon.” Ipinadagos nia an pagtokar sa manlaenlaen na aspekto kan Miqueas 6:8, kun saen mababasa niato: “Anong balos an hinahagad sa saimo ni Jehova kundi na gumibo ka nin hustisya asin mamoot sa kabootan asin na magin hababa an boot sa paglakaw sa kaibahan kan saimong Dios?”

Huling puedeng maapektaran kan kalapaan sa moral kan kinaban an mga Kristiano, gabos kita nakinabang sa pahayag na may titulong “Papagdanayon an Kabinian Paagi sa Pag-iingat kan Saindong Puso.” Halimbawa, an satong pagdanay na mabini matabang sato na magkaigwa nin maogmang pag-agom. Bilang mga Kristiano, nungka niatong isip-isipon dawa an ideya na gumibo nin seksuwal na inmoralidad.​—1 Corinto 6:18.

Ipinaheling kan pahayag na “Magmaan sa Pandadaya” na madonong na ibilang niato na hilo an pagbiribid, mga tataramon na bakong gabos totoo, asin biyong kaputikan na pinalalakop kan mga apostata. (Colosas 2:8) Siring man, kaipuhan na dai niato pagdayaon an satong sadiri sa pagsaboot na puede kitang magpadara sa satong makasalan na kamawotan na dai masapo nin maraot na mga resulta.

An titulo kan pantapos na pahayag sa enot na aldaw iyo an “Sambahon an Iyo Sanang Tunay na Dios.” Mantang an mga kamugtakan sa kinaban nagigin mas kritikal kisa kasuarin man, nakapakokosog sa  boot nanggad na maaraman na sa dai na mahahaloy ipapaabot ni Jehova an saiyang matanos na bagong kinaban! Sairisay an maistar dian? An mga nagsasamba sana ki Jehova. Tanganing matabangan kita, an satong mga aki, asin an satong mga inaadalan sa Biblia na maabot an pasohan na ini, ilinuwas kan ispiker an bagong librong pag-aadalan na Worship the Only True God. Kanigoan an kaogmahan niato na akoon iyan!

Itinampok sa Ikaduwang Aldaw an Kaigotan Para sa Marahay

An ikaduwang aldaw kan kombension igwa nin pinakatemang “Magin Maigot Para sa Marahay.” (1 Pedro 3:13) Tinokar kan enot na ispiker an teksto sa Biblia kan aldaw. Idinoon nia na pinakokosog kan regular, makahulogan na pagkonsiderar kan pan-aroaldaw na teksto an satong kaigotan.

Dangan suminunod an simposium na “Mga Parabalangibog kan Kahadean na Pinamumuraway an Saindang Ministeryo.” Idinoon sa enot na kabtang an pangangaipong gamiton an Tataramon nin Dios sa tamang paagi. (2 Timoteo 2:15) An epektibong paggamit niato kan Biblia nagbubukas nin dalan na iyan magin “mapuersa” sa buhay nin mga tawo. (Hebreo 4:12) Maninigong darahon niato an atension sa Biblia asin magrason basado dian sa nakakokombensir na paagi. Sinadol kita kan ikaduwang kabtang kan simposium na paorootrong dumalaw liwat sa mga interesado. (1 Corinto 3:6) Kaipuhan an pag-andam asin pagkapusoan sa tolos-tolos na pagdalaw liwat sa gabos na interesado. Irinekomendar kan ikatolong kabtang na mansayon an lambang tawo na natatagboan niato bilang potensial na disipulo asin ipinaheling na an pag-alok nin pag-adal sa Biblia sa enot na pagdalaw puedeng magresulta sa kagayagayahan nin pagtabang sa mga indibiduwal na magin mga disipulo.

 An tema kan sunod na pahayag iyo an “Kun Taano ta ‘Mamibi nin Daing Ontok.’” Sinasadol kan Biblia an mga Kristiano na maglaom sa Dios para sa paggiya sa gabos na aspekto nin buhay. Kaipuhan na magtao kita nin panahon para sa pribadong pamibi. Dugang pa, kaipuhan na magmaigot kita sa pamimibi, huli ta puedeng itogot ni Jehova na danay kitang mamibi sa laog nin kadikit na panahon bago maheling an simbag nia.—Santiago 4:8.

An pahayag na “An Pakikipag-olay sa Espirituwal Nakapakokosog” sinadol kita na gamiton an satong abilidad sa pagtaram tanganing makinabang kita asin an iba pa. (Filipos 4:8) Kaipuhan kan mga agom asin aki an espirituwal na pakikipag-olay aroaldaw. Sa katuyohan na iyan, maninigong pagmaigotan kan mga pamilya na magkakan nin sarabay kisuerra sarong beses kada aldaw, sa siring nagtataong lugar para sa nakapakokosog na pag-orolay.

An pan-agang programa natapos paagi sa nakaoogmang pahayag na “Kun Paano an Pagdusay Asin Bautismo Minagiya sa Kaligtasan.” An mga kandidato sa bautismo nagkaigwa na nin kaaraman, guminibo nin pagtubod, nagsolsol, tinalikdan an paggibo nin sala, asin idinusay an sadiri sa Dios. Pakabautismo, an sabi kan ispiker, kaipuhan na padagos sindang tumalubo sa espirituwal asin papagdanayon an saindang kaigotan asin marahay na gawe-gawe.—Filipos 2:15, 16.

Kan hapon na iyan, duwang prinsipal na punto an idinoon sa pahayag na “Magin Hababa an Boot, Asin Papagdanayon na Simple an Saindong Mata.” An pagigin hababa an boot nangangahulogan nin pagkaigwa nin realistikong pagmansay sa satong mga limitasyon asin sa satong kamugtakan sa atubangan nin Dios. An kababaan nin boot nagtatabang sato na mapagdanay an satong mata na “simple”—nakapokus sa Kahadean nin Dios, bakong sa materyal na mga bagay. Kun gigibohon niato ini, dai kita kaipuhan na mahadit, huli ta itatao ni Jehova an satong mga pangangaipo.—Mateo 6:22-24, 33, 34.

Ipinaheling kan sunod na ispiker kun taano ta maninigo kitang “Magtiwala nin Lubos ki Jehova sa mga Panahon nin Kapurisawan.” Paano niato makakaya an mga bagay na arog kan personal na mga kaluyahan asin problema sa pagbuhay o salud? Humagad kita ki Jehova nin praktikal na kadonongan asin humagad nin tabang sa iba. Imbes na mataranta o madesesperar, maninigong pasarigon niato an satong pagtitiwala sa Dios paagi sa pagbasa kan saiyang Tataramon.—Roma 8:35-39.

An pangultimong simposium kan kombension may temang “An Kualidad kan Satong Pagtubod Nababalo Paagi sa Manlaenlaen na Pagbalo.” An enot na kabtang nagpagirumdom sato na an gabos na tunay na Kristiano napapaatubang sa paglamag. Nagseserbi iyan na patotoo, nagpapakosog sa satong pagtubod, asin nagtatao sato nin oportunidad na ipaheling an satong kaimbodan sa Dios. Minsan ngani dai man kaipuhan na isapeligro an satong  buhay, nungka niatong gagamiton an mga paagi na bakong sono sa Kasuratan tanganing malikayan an paglamag.—1 Pedro 3:16.

Tinokar kan ikaduwang ispiker sa simposium na ini an mga hapot may koneksion sa neutralidad. An enot na mga Kristiano bakong mga kontra sa guerra, alagad minimidbid ninda na sa Dios an saindang pangenot na kaimbodan. Siring man ngonyan, an Mga Saksi ni Jehova marigon na naninindogan sa prinsipyong: “Kamo bakong kabtang kan kinaban.” (Juan 15:19) Mantang an mga pagbalo sa satong neutralidad puedeng lumataw nin bigla, an mga pamilya kaipuhan na magtao nin panahon na repasohon an mga giya sa Biblia dapit sa temang ini. Arog kan sabi kan ikatolong pahayag sa simposium na ini, an obheto ni Satanas, bako man talagang gadanon kita, kundi gipiton kita na magin bakong fiel. Paagi sa fiel na pagtagal sa pag-olog-olog, inmoral na pangigipit, emosyonal na kolog, asin mga kamatean, nagtatao kita nin kaomawan ki Jehova.

An may init na pangagda na “Rumani ki Jehova” iyo an titulo kan pangultimong pahayag kan aldaw na iyan. An pakasabot sa pangenot na mga kualidad ni Jehova an nakaaakit sato sa saiya. Ginagamit nia an saiyang daing limiteng kapangyarihan tanganing protehiran an saiyang banwaan, nangorogna sa espirituwal. An saiyang hustisya bakong daing herak kundi pinahihiro siang itao an buhay na daing katapusan sa gabos na naggigibo nin katanosan. Risang-risa an kadonongan nin Dios sa paggamit nia sa bakong sangkap na mga tawo tanganing isurat an Biblia. An pinakakawiliwili iyo an saiyang pagkamoot, na nagpahiro saiya na gumibo nin probisyon para sa kaligtasan nin katawohan paagi ki Jesu-Cristo. (Juan 3:16) An ispiker nagkonklusyon paagi sa pagluwas kan nakaoogmang bagong libro na Rumani ki Jehova.

An Ikatolong Aldaw Nagkonsentrar sa Kaigotan sa Marahay na mga Gibo

An pinakatema sa ikatolong aldaw kan kombension iyo an “Sarong Banwaan na Maigot sa Marahay na mga Gibo.” (Tito 2:14) An aga nagpoon  paagi sa pag-orolay nin sarong pamilya sa teksto kan aldaw. Suminunod an pahayag na “An Saindo daw na Kompiansa Yaon ki Jehova?” An mga nasyon napasala sa saindang tinawan nin kompiansa paagi sa pagsarig sa sadiri nindang kadonongan asin kosog. Minsan siring, sa kabaliktaran an mga lingkod ni Jehova may kosog nin boot asin magayagayang nagsasarig sa saiya sa ibong nin mga kalamidad.—Salmo 46:1-3, 7-11.

An kabtang na may titulong “Mga Hoben—Magplano Para sa Ngapit sa Kaibanan kan Organisasyon ni Jehova” tinokar an hapot na ini: Paano talaga makakamtan nin sarong hoben an pinakamarahay sa buhay? Dai ini makukua paagi sa paghanap nin kuarta, mga rogaring, asin prestihio. An satong Kaglalang mamomoton na sinasadol an mga hoben na girumdomon sia mantang sinda hoben pa. Ininterbio kan ispiker an nagkapira na naghingoa sa Kristianong paglilingkod kan sinda hoben pa, asin naheling niato an saindang kagayagayahan. Asin kapakipakinabang nanggad na akoon an bagong pulyetong, Mga Hoben—Ano an Gigibohon Nindo sa Saindong Buhay?, na dinisenyo tanganing tabangan an hoben na mga Saksi na magbugtak nin pundasyon para sa daing katapusan na ngapit kaiba kan organisasyon ni Jehova!

Suminunod an kawiliwiling drama sa Biblia na “Tumindog nin Marigon sa mga Panahon nin Kasakitan.” Sinusog kaiyan an halawig na karera ni Jeremias poon kan saiyang pagkaniaki sagkod sa pagkalaglag kan Jerusalem, na may kaigotan niang ihinula. Nagsaboot si Jeremias na bako siang kualipikado sa saiyang asignasyon, alagad inotob nia iyan sa ibong kan pagtumang, asin ilinigtas sia ni Jehova.—Jeremias 1:8, 18, 19.

An drama sinundan kan pahayag na “Magin Arog ni Jeremias—Daing Takot na Ibalangibog an Tataramon nin Dios.” An mga parabalangibog kan Kahadean sa presenteng panahon parateng iyo an punteriya nin salang impormasyon asin maraot an intension na mga propaganda. (Salmo 109:1-3) Pero arog ni Jeremias, puede niatong atubangon an pagkadesganar paagi sa pagkaigwa nin dakulang kaogmahan sa Tataramon ni Jehova. Asin kompiado kita na an mga nakikilaban sa sato dai manggagana.

Tunay nanggad na napapanahon an pampublikong diskurso na may titulong “An Kamugtakan kan Kinaban na Ini Nagbabago.” An satong aldaw tinatandaan nin pambihirang pagbabago. Ihinula kan Biblia na an siring na mga kamugtakan, kaiba an pagkurahaw nin “katoninongan asin katiwasayan,” masagkod sa makangingirhat na aldaw nin paghokom nin Dios. (1 Tesalonica 5:3) Papangyayarihon kaiyan an marahayon na mga pagbabago—an katapusan nin gabos na guerra, krimen, kadahasan, asin helang pa ngani. Imbes na magtiwala sa sistemang ini nin mga bagay, kun siring, ini na an panahon na pagmaigotan na magibo an diosnon na debosyon asin papagdanayon an mabining gawe-gawe.

An sumaryo kan leksion sa semanang iyan sa Torrengbantayan sinundan kan pantapos na pahayag sa kombension, na may titulong “Magsopay sa Marahay na mga Gibo Bilang Maigot na mga Parabalangibog kan Kahadean.” Idinoon kan ispiker kun paano an programa nagpahiro sato sa espirituwal asin nag-enkaminar sato na magsarig ki Jehova. Sa pantapos, sinadol kita na magin malinig, mamomoton, asin maigot na mga parabalangibog kan Kahadean nin Dios.—1 Pedro 2:12.

Kun an satong saboot arog kan sa mga lingkod ni Jehova kan kaaldawan ni Nehemias, seguradong nag-uli kitang naggagayagaya huli sa espirituwal na mga bendisyon na naako sa “Maigot na mga Parabalangibog kan Kahadean” na Pandistritong mga Kombension. (Nehemias 8:12) Bako daw na napano kamo nin kagayagayahan asin determinasyon na magmaigot bilang maigot na parabalangibog kan Kahadean sa nakapahihirong kombension na ini?

 [Kahon/Ritrato sa pahina 23]

Bagong Pantabang sa Pag-adal!

Sa pagtatapos kan enot na aldaw kan kombension, an mga nag-atender naogmang marhay sa pagluwas kan bagong libro na Worship the Only True God. Dinisenyo iyan tanganing gamiton sa pag-adal kan mga natapos na sa pag-adal sa librong Kaaraman na Minagiya Pasiring sa Buhay na Daing Katapusan asin daing duda na mapakosog sa pagtubod kan mga “may tamang tendensia sa buhay na daing katapusan.”​—Gibo 13:48.

[Credit Line]

Retrato sa tutob kan libro: Kua kan U.S. Navy

 [Kahon/Mga Ritrato sa pahina 24]

Tabang Tanganing Mas Maparani sa Dios

Iinanunsiar kan ultimong ispiker sa ikaduwang aldaw kan kombension an pagluwas kan bagong libro na Rumani ki Jehova. Igwa iyan nin apat na prinsipal na kabtang, an kada saro para sa pangenot na mga kualidad ni Jehova—kapangyarihan, hustisya, kadonongan, asin pagkamoot. An lambang kabtang kan libro igwa nin kapitulo na nagpapaheling kun paanong si Jesu-Cristo nagtao nin buhay na marhay na mga halimbawa kan mga kualidad nin Dios. An pangenot na katuyohan kan bagong librong ini iyo na tabangan kita asin an satong mga inaadalan sa Biblia na mapatalubo an mas dayupot asin mas makosog na relasyon ki Jehova Dios.

[Kahon/Mga Ritrato sa pahina 26]

Espirituwal na Giya Para sa mga Hoben

An ikatolong aldaw kan kombension tinandaan kan pagluwas kan espesyal na pulyeto na may titulong Mga Hoben​—Ano an Gigibohon Nindo sa Saindong Buhay? Dinisenyo tanganing tabangan an hoben na mga Saksi na gumibo nin tamang mga desisyon mapadapit sa saindang ngapit, an bagong pulyetong ini nagtatao nin sadol na sono sa Kasuratan sa pagtogdok nin daing katapusan na karera sa paglilingkod ki Jehova.