Nanggana daw an Karatan?

AN IDEYA nin unibersal na pagdinaogan sa pag-oltanan kan mga puersa nin karahayan asin karatan nagin dahelan nin daing katapusan na pagbanabana nin mga parasurat asin pilosopo sa bilog na kasaysayan. Minsan siring, may sarong libro na igwa kan eksaktong kasaysayan kan paglalaban nin Dios asin kan Diablo. An librong iyan iyo an Biblia. Tinatawan kaiyan nin liwanag an kalabot na mga isyu sa ralaban na ini asin itinatao an paagi na maaraman kun siisay talaga an nanggana.

Dai nahaloy pakalalanga kan enot na lalaki asin babae, inangat nin sarong dai naheheling na espiritung linalang, si Satanas na Diablo, an pamamahala nin Dios. Paano? Paagi sa tusong pagsuherir na ipinangunguri nin Dios an marahay na mga bagay sa saiyang mga linalang asin na an mga tawo mas mapaparahay kun independiente sa saiya.—Genesis 3:1-5; Kapahayagan 12:9.

Kan huri, sa kaaldawan kan patriarkang si Job, si Satanas nagpalataw nin saro pang isyu. Naghihingoang raoton an integridad ni Job sa Dios, si Satanas nagsabi: “Kublit para sa kublit, asin an gabos na sadiri nin tawo itatao nia para sa saiyang kalag.” (Job 2:4) Daing ipinupuera nanggad an paghihingakong iyan! Paagi sa paggamit kan pankagabsan na terminong “tawo” imbes na kan ngaran ni Job, ibinugtak ni Satanas sa pagduda an integridad nin lambang tawo. Garo man sana sinabi nia: ‘Gigibohon nin tawo an ano man tanganing iligtas an saiyang buhay. Tawan mo ako nin oportunidad, asin kaya kong italikod sa Dios an siisay man.’

An kapangganahan sa labanan kan Dios asin Diablo maaaraman paagi sa pagsimbag sa duwang hapot: Mapanggana daw na napamamahalaan nin tawo an saiyang sadiri? Nahimo daw kan Diablo na italikod an gabos sa tunay na Dios?

Kaya daw nin mga Tawo na Mapangganang Pamahalaan an Saiyang Sadiri?

Sa laog nin rinibong taon, an mga tawo nag-eksperimento nin manlaenlaen na klase nin pamamahala. Laen-laen na klaseng gobyerno, arog kan monarkiya, aristokrasiya, demokrasya, autokrasya, Fascismo, asin Komunismo, an prinobaran sa nakaaging mga panahon. Bako daw na an mismong bagay na igwa pirme nin pangangaipo na mag-eksperimento nagpaparisa na an laen-laen na paaging ini nin paggobyerno kulang?

“An mga Romano haros dai tinutuyo na pirmeng nagpapartisipar sa mahiwason na pag-eksperimento sa pag-administrar,” an isinurat ni H. G. Wells sa A History of the World, na ipinublikar kan 1922. Sia nagpapadagos: “Iyan pirmeng nagbabago, nungka iyan na nagin marigon. Sa sarong sentido an pag-eksperimento naprakaso. Sa saro pang sentido an pag-eksperimento dai pa tapos, asin an Europa asin Amerika ngonyan nagmamaigot pa man giraray na tawan nin solusyon an komplikadong mga problema manongod sa pamamahala sa bilog na kinaban na naenot nang inatubang kan mga Romano.”

An pag-eksperimento sa gobyerno nagpadagos sa bilog na ika-20 siglo. Natapos an siglong iyan na an demokratikong pamamahala inako nin orog kisa kasuarin man. Sa demokrasya daa an gabos may kabtang sa gobyerno. Alagad ikinapaheling daw kan demokrasya na an tawo mapangganang makakapamahala na mayo an Dios? Si Jawaharlal Nehru, an dating primer ministro kan India, inapod an demokrasya na marahay alagad idinugang: “Sinasabi ko ini ta an iba pang sistema mas maraot.” An dating presidenteng Pranses na si Valéry Giscard d’Estaing nagsabi: “Naheheling niato an krisis sa demokrasyang paagi sa mga representante.”

Dawa kan ikalimang siglo B.C.E., an Griegong pilosopo na si Plato may narisa nang kaluyahan sa demokratikong paagi nin pamamahala. Segun sa librong A History of Political Theory, inatake nia “an pagigin ignorante asin daing kakayahan kan mga politiko, na iyo an espesyal na sumpa sa mga demokrasya.” Dakol sa mga politiko ngonyan an nagmomondo huling depisil na makakua nin may talentong mga indibiduwal na kualipikadong  magserbisyo sa gobyerno. An mga tawo “nauuyam sa mga lider na garo baga sadit sa panahon na an mga problema na inaatubang ninda darakulaon na marhay,” an sabi kan The Wall Street Journal. Idinugang pa kaiyan: “Nasusuya na sinda sa pakaheling nin dai pakadesisyon asin karatan mantang an hinahanap ninda paggiya.”

Estudyare ngonyan an pamamahala ni Hadeng Salomon kan suanoy na Israel. Si Salomon tinawan ni Jehova Dios nin pambihirang kadonongan. (1 Hade 4:29-34) Kumusta an nagin kamugtakan kan nasyon nin Israel durante kan 40 taon na paghade ni Salomon? “Kadakoldakol kan Juda asin Israel,” an simbag kan Biblia, “siring kadakol kan mga baybay na yaon sa gilid nin dagat, na nagkakarakan asin nag-iirinom patin naggagayagaya.” An pagkasaysay nagsasabi pa: “An Juda asin Israel padagos na nag-erok na may seguridad, an lambang saro sa sirong kan saiyang ubasan asin sa sirong kan saiyang higuerra, poon sa Dan sagkod sa Beer-seba, sa gabos na aldaw ni Salomon.” (1 Hade 4:​20, 25) Mantang pinamamahalaan sinda nin sarong madonong na hade bilang naheheling na representante kan dai naheheling na Supremong Namamahala, si Jehova Dios, nakamtan kan nasyon an dai mapapantayan na karigonan, prosperidad, asin kagayagayahan.

Dakulaon nanggad an kalaenan kan pamamahala nin tawo asin nin Dios! Masasabi daw talaga nin siisay man na si Satanas an nanggana sa isyu nin pamamahala? Dai, huling an propetang si Jeremias tamang-tamang nagsabi: “Aram kong marhay, O Jehova, na bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.”—Jeremias 10:23.

Kaya daw ni Satanas na Italikod an Gabos sa Dios?

Nagin mapanggana daw si Satanas sa saiyang paghingako na kaya niang italikod an gabos sa Dios? Sa kapitulo 11 kan libro sa Biblia na Mga Hebreo, sinambit ni apostol Pablo an ngaran kan dakol na fiel na lalaki asin babae kan mga panahon bago kan mga Kristiano. Dangan sinabi nia: “Magkukulang ako nin panahon kun padagos kong isasaysay an manongod ki Gedeon, Barac, Samson, Jefte, David siring man ki Samuel asin an iba pang mga propeta.” (Hebreo 11:32) Inapod sana ni Pablo an maimbod na mga lingkod na ini nin Dios bilang sarong “dakulaon na panganoron nin mga saksi.” (Hebreo 12:1) An termino sa Griego na ginamit digdi para sa “panganoron” nangangahulogan nin, bakong nakasuway, malinaw an pagkapormang panganoron na may depinidong sokol asin korte, kundi sarong dakulaon, daing korteng panganoron. Angay sana ini huling an fiel na mga lingkod nin Dios kan nakaagi dakolon na marhay kaya sinda garo sarong dakulaon na panganoron. Iyo, sa nag-aging mga siglo, ginamit kan dai mabilang na kaburunyogan nin mga tawo an saindang libreng kabotan asin pinili na itao an saindang kaimbodan ki Jehova Dios.—Josue 24:15.

Ano an maheheling niato sa satong kapanahonan? An kabilangan kan Mga Saksi ni Jehova sa bilog na kinaban nag-aumento sa labing anom na milyones sa ibong kan grabeng paglamag asin  pagtumang na naeksperyensiahan ninda durante kan ika-20 siglo. An dagdag na mga siyam na milyones nakikiasosyar sa sainda, asin dakol sa mga ini an naggigibo nin desididong mga lakdang tanganing magkaigwa nin dayupot na personal na relasyon sa Dios.

An nangongorog na simbag sa paghihingako ni Satanas na kaya niang italikod an mga tawo ki Jehova iyo an hale sa Aki mismo nin Dios, si Jesu-Cristo. Dawa an makuring kolog sa hariging pasakitan dai nakaraot kan saiyang integridad. Kan si Jesus naghihingagdan na, sia kuminurahaw: “Ama, sa saimong mga kamot ipinagkakatiwala ko an sakong espiritu.”—Lucas 23:46.

Ginigibo ni Satanas an gabos na makakaya nia—magpoon sa mga pagsugot sagkod sa direktang paglamag—sa pagmamaigot na mapagdanay sa saiyang kontrol an mga tawo. Ginagamit an “mawot kan laman asin an mawot kan mga mata asin an pagpaabaw-abaw kan kaya sa buhay” tanganing sugotan an mga tawo, hinihingoa niang papagdanayon sindang harayo o akiton sinda parayo ki Jehova. (1 Juan 2:16) ‘Binuta man ni Satanas an isip kan mga dai nagtutubod tanganing an liwanag kan mamuraway na maogmang bareta manongod ki Cristo dai sumirang.’ (2 Corinto 4:4) Asin si Satanas dai nag-aalangan na gumamit nin mga patakot asin aprobetsaran an pagkatakot sa mga tawo tanganing maotob an saiyang katuyohan.—Gibo 5:40.

Minsan siring, an mga yaon sa lado nin Dios dai nadadaog kan Diablo. Namidbid na ninda si Jehova Dios asin ‘namotan sia sa bilog nindang puso asin sa bilog nindang kalag patin sa bilog nindang isip.’ (Mateo 22:37) Iyo, an marigon na kaimbodan ni Jesu-Cristo asin kan dai mabilang na tawo nagigin grabeng kadaogan para ki Satanas na Diablo.

Ano an Nakatagama sa Ngapit?

An pag-eksperimento daw nin tawo sa manlaenlaen na gobyerno magpapadagos na sana? Ihinula ni propeta Daniel: “Sa mga aldaw kan mga hadeng idto an Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan.” (Daniel 2:44) An Kahadean na ipapatindog kan Dios nin kalangitan sarong langitnon na gobyerno na pamamahalaan ni Jesu-Cristo. Iyan man sana an Kahadean na itinokdo ni Jesus sa saiyang mga parasunod na ipamibi. (Mateo 6:9, 10) Lalaglagon kan Kahadean na iyan an gabos na gobyerno nin tawo “sa [nagdadangadang na] guerra kan dakulang aldaw nin Dios na Makakamhan sa gabos” asin makaaapektar iyan sa bilog na daga.—Kapahayagan 16:14, 16.

Ano an nakatagama ki Satanas? Ilinaladawan kan Biblia an pangyayaring ini sa ngapit: “Dinakop [nin sarong anghel ni Jehova] an dragon, an enot na halas, na iyo an Diablo asin Satanas, asin ginapos nia sia sa laog nin sangribong taon. Asin ihinolog nia sia sa bungaw asin pinintoan nia idto patin sinelyohan idto sa ibabaw nia, tanganing dai na nia ikalagalag an mga nasyon sagkod na matapos an sangribong taon.” (Kapahayagan 20:1-3) Pagkatapos sanang iholog si Satanas sa bungaw nin daing maginibo na mapoon an Sangribong Taon nin Paghade ni Jesu-Cristo.

Magigin nanggad nakaoogmang marhay na lugar an dagang ini sa panahon na iyan! Mawawara na an karatan asin an mga nagpapangyari kaiyan. An Biblia nanunuga: “An mga paragibo nin maraot mismo popohoon . . . Alagad an mga mahoyo mismo makasasadiri kan daga, asin manonompongan nanggad ninda an saindang labi-labi nanggad na kaogmahan sa nagsosopay na katoninongan.” (Salmo 37:9-11) An saindang katoninongan dai na mamemeligro sa ano man—tawo man o hayop. (Isaias 11:6-9) Dawa an minilyon na, huli sa ignoransia asin kadaihan nin oportunidad na mamidbid si Jehova, kuminampi sa Diablo kan nakaagi bubuhayon liwat asin totokdoan nin Dios.—Gibo 24:15.

Sa katapusan kan Sangribong Taon na Paghade, an daga paraiso na, asin an katawohan na nag-iistar dian sangkap na bilang tawo. Dangan si Satanas bubutasan “sa halipot na panahon,” na pagkatapos kaiyan lalaglagon sia sagkod lamang kaiba kan gabos na nagkontra sa pamamahala nin Dios.—Kapahayagan 20:3, 7-10.

Kiisay Kamo Makampi?

An ika-20 siglo an panahon na nandanyar nin grabe sa daga si Satanas. Minsan siring, imbes na  mag-indikar na sia nanggana, an mga kamugtakan sa daga sarong tanda na yaon na kita sa huring mga aldaw kan maraot na kinaban na ini. (Mateo 24:3-14; Kapahayagan 6:1-8) Ni an pagigin grabe kan karatan sa daga ni an punto de vista kan mayoriya dai nagdedeterminar kun siisay an nanggana. An nagdedeterminar iyo an kun kiisay na paagi nin pamamahala an pinakamarahay asin kun baga igwa nin siisay man na naglingkod sa Dios huli sa pagkamoot. Sa duwang bagay na ini, an nanggana iyo si Jehova.

Kun sa itinogot na panahon napatunayan nang sala si Satanas, taano ta itinotogot pa man giraray nin Dios na magdanay an karatan? Si Jehova nagpapaheling nin pasensia “huli ta dai nia mawot na an siisay man malaglag kundi mawot nia na an gabos makapagsolsol.” (2 Pedro 3:9) An kabotan nin Dios “iyo na an gabos na klase nin tawo makaligtas asin makaabot sa tamang kaaraman sa katotoohan.” (1 Timoteo 2:4) Gamiton logod nindo an natatadang panahon na mag-adal sa Biblia asin ‘ilaog sa isip an kaaraman dapit sa iyo sanang tunay na Dios, asin dapit sa saro na saiyang sinugo, si Jesu-Cristo.’ (Juan 17:3) An Mga Saksi ni Jehova maoogmang tabangan kamo na makamtan an kaaraman na iyan tanganing makaiba man kamo sa minilyon na naninindogan nin marigon sa kampi kan mga nanggana.

[Mga Ritrato sa pahina 5]

Paagi sa pagdanay na may integridad, an Mga Saksi ni Jehova nakadugang pa sa kadaogan ni Satanas

[Ritrato sa pahina 7]

Dakol na maimbod sa kampi ni Jehova