“Rumani Kamo sa Dios, Asin Sia Marani sa Saindo”

Bago Asin Pakatapos—Biyong Nabago an Saiyang Buhay

KANIGOAN kadai nakaoogma asin kadaing kahulogan an buhay para ki Matsepang! Sia sarong daragita na taga Lesoto, sarong nasyon sa pinakasentro kan Aprika del Sur. Si Matsepang pinadakula na Katoliko. Minsan siring, imbes na matabangan na rumani sa Dios, sia inabuso sa laog nin dakol na taon nin mga madre na nanuhol sa saiya tanganing akiton sia na gumibo nin inmoral na mga gibo.

Bilang resulta, nadesganar si Matsepang sa relihion asin dai makapaniwala sa sarong mamomoton na Kaglalang na tunay na nagmamakolog sa saiyang linalang na mga tawo. Huli sa pagpabaya asin pag-abuso na inagihan nia, si Matsepang nagkaigwa nin hararom na emosyonal na mga lugad asin mga pakamate nin biyong kadaihan nin halaga. Nagdakula sia na madahas asin agresibong marhay. Nagbunga ini nin sa kriminal na gawe-gawe.

Pag-abot nin panahon si Matsepang nagin miembro nin sarong gang na nanhahabon sa mga tawong nakasakay sa mga tren. Sia naarestar asin sinentensiahan na mabilanggo sa Aprika del Sur. Kan huri, idineportar sia sa saiyang dagang tinuboan, an Lesoto, na duman ipinadagos nia an pamumuhay nin kriminal, pagbuburat, kadahasan, asin inmoralidad.

Kan grabe na an saiyang kamondoan, si Matsepang desesperadong namibi sa Dios para sa tabang. Nanuga sia, “Dios ko, kun ako magdanay na buhay, gigibohon ko an sakong magigibo tanganing paglingkodan ka.”

Dai nahaloy, si Matsepang dinolok nin mga misyonerong Saksi ni Jehova. Inalokan sia ninda nin pag-adal sa Biblia. Sa saiyang pag-adal, nasabotan nia na an Dios bakong indiperente asin bakong daing pagmakolog. Sa katunayan, nasabotan nia na si Satanas, “an ama kan kaputikan,” naggagamit nin tuso asin mapandayang mga taktika tanganing pakosogon an saboot nin nagkapira na sinda daing halaga asin papaniwalaon sinda na nungka sindang kamomotan ni Jehova.​—Juan 8:44; Efeso 6:11.

Al kontraryo, nakaranga nanggad ki Matsepang kan manodan nia na puede kitang magkaigwa nin nakararahay na paggalang sa sadiri kun kita magsolsol sa satong nakaaging mga kasalan, humagad nin kapatawadan nin Dios, asin magmaigot na paogmahon sia! Natabangan sia na masabotan na “an Dios orog kadakula kisa satong puso” asin an paagi nin pagmansay nia sa sato tibaad laen na marhay kisa paagi nin pagmansay niato sa satong sadiri.​—1 Juan 3:​19, 20.

Napalukso an puso ni Matsepang na mabasa an mga tataramon na ini ni salmista David: “Si Jehova harani sa mga laglag an puso; asin an mga nasasakitan an espiritu saiyang iliniligtas.” (Salmo 34:18) Bilang saro sa mga “nasasakitan an espiritu,” narealisar nia na dai inaabandonar ni Jehova an saiyang mga lingkod, dawa pa kun an nagkapira sa sainda manluyang marhay an boot o magsaboot na bakong mahalaga. Nakapaogma sa saiyang puso  na manodan na pinagmamakolgan nin Dios an gabos niang karnero asin sinusuportaran sinda durante nin masakit na mga panahon. (Salmo 55:22; 1 Pedro 5:​6, 7) Sia espesyalmenteng napahiro kan mga tataramon na: “Rumani kamo sa Dios, asin sia marani sa saindo.”​—Santiago 4:8.

Dai nahaloy, an puersa kan Tataramon nin Dios, an Biblia, nagin risang-risa sa buhay ni Matsepang. Nagpoon siang umatender nin regular sa Kristianong mga pagtiripon asin binayaan an saiyang mga gibo na bakong sono sa Kasuratan. An resulta? Dai na sia nagsasaboot na dai sia angay sa pagkamoot asin pag-oyon nin Dios. Poon kan sia mabautismohan bilang saro sa Mga Saksi ni Jehova, rinibong oras na an nagamit nia sa Kristianong ministeryo bilang parabalangibog kan maogmang bareta kan Kahadean. Apisar kan emosyonal na mga lugad kan nakaagi, si Matsepang igwa nin maogma asin makahulogan na buhay ngonyan. Kanigoan na prueba kan puersa kan Biblia na gibohon na mas marahay an mga buhay!—Hebreo 4:12.

[Blurb sa pahina 9]

“Dios ko, kun ako magdanay na buhay, gigibohon ko an sakong magigibo tanganing paglingkodan ka”

[Kahon sa pahina 9]

Nakakapabakle an mga Prinsipyo sa Biblia

Kabilang sa mga prinsipyo sa Biblia na nakaranga sa mga biktima nin pagmaltrato an minasunod:

“Kan an sakuyang nakariribok na mga kaisipan duminakol sa sakong boot, an saimong [nin Dios] mga panranga nakaranga sa sakong kalag.” (Salmo 94:19) An “mga panranga” ni Jehova na manonompongan sa saiyang Tataramon gikanan nin dakulang karangahan. An pagpensar sa mga iyan durante nin paghorophorop asin pamibi makatatabang na haleon an nakariribok na mga kaisipan asin pataluboon an pagtitiwala sa Dios bilang sarong mapagsabot na Katood.

“Pinaoomayan [ni Jehova] an mga nasasakitan an puso, asin binobogkosan an saindang makolog na mga kabtang.” (Salmo 147:3) Kun inaapresyar niato an pagkaherak ni Jehova asin an saiyang probisyon na tahoban an satong mga kasalan paagi sa atang na pantubos ni Jesus, kompiado kitang makadodolok sa Dios na dai na nagsasaboot na kondenado sa puso. Puede ining magbunga nin daing kaagid na karangahan asin katoninongan nin isip.

“Dai nin makadodolok sa sako [ki Jesu-Cristo] kun dai sia dagkahon kan Ama na nagsugo sa sako; asin bubuhayon ko sia liwat sa huring aldaw.” (Juan 6:44) Paagi sa saiyang banal na espiritu asin paagi sa paghuhulit kan Kahadean, personalmenteng dinadagka kita ni Jehova sa saiyang Aki asin tinatawan kita kan paglaom na buhay na daing katapusan.