Hula ni Isaias—Liwanag Para sa Bilog na Katawohan II

Kapitulo Desinuebe: Ibinuyagyag an Pagsaginsagin!

Isaias 58:1-14

1. Paano minamansay ni Jesus asin ni Jehova an pagsaginsagin, asin paano iyan ipinaheling kan kaaldawan ni Isaias?

“SA LUWAS nanggad [kamo] garo matanos sa mga tawo,” an sabi ni Jesus sa mga namomoon sa relihion kan saiyang kaaldawan, “alagad sa laog kamo parano nin pagsaginsagin asin katampalasanan.” (Mateo 23:28) Ipinababanaag kan pagkondenar ni Jesus sa pagsaginsagin an punto de vista kan saiyang langitnon na Ama. An kapitulo 58 kan hula ni Isaias partikularmenteng nagkokonsentrar sa pagsaginsagin na lakop sa Juda. Ordinaryo na sana an iriwal, pan-aapi, asin kadahasan, asin nagin na sanang daing kahulogan na ritual an pag-otob nin Sabbath. Paramas na paglilingkod an itinatao kan banwaan ki Jehova asin ipinagpapasikat an kabanalan paagi sa bakong sinserong pag-aayuno. Bakong makangangalas na ibinuyagyag ni Jehova an tunay nindang pagkatawo!

‘Sabihon Mo sa Banwaan an Saindang mga Kasalan’

2. Anong espiritu an ipinaheling ni Isaias mantang ipinahahayag nia an mensahe ni Jehova, asin sairisay ngonyan an arog nia?

² Minsan ngani nababalde si Jehova sa gawe-gawe kan Juda, kaiba sa Saiyang mga tataramon an odok sa pusong pakiolay na magsolsol an nasyon. Pero, habo ni Jehova na magin malibog an saiyang pagsagwe. Huli kaini, pinagbotan nia si Isaias: “Kumurahaw ka nin todo; dai ka magpogol. Kosogan mo an saimong tingog na siring sa amodyong, asin sabihon mo sa sakong banwaan an saindang rebelyon, asin sa harong ni Jacob an saindang mga kasalan.” (Isaias 58:1) Puedeng maanggot ki Isaias an banwaan huli sa pusoan na pagbalangibog kaini kan mga tataramon ni Jehova, alagad dai sia suminibog. Dai nawawara an iyo man sanang espiritu nin pagkadusay na ipinaheling nia kan sabihon nia: “Uya ako! Sugoa ako.” (Isaias 6:8) Marahayon nanggad na halimbawa nin pakatagal si Isaias para sa mga Saksi ni Jehova sa presenteng aldaw, na sinugo man na ihulit an Tataramon nin Dios asin ibuyagyag an relihiosong pagsaginsagin!​—Salmo 118:6; 2 Timoteo 4:1-5.

3, 4. (a) Anong pagsaginsagin an ginibo kan mga tawo kan kaaldawan ni Isaias? (b) Ano an totoong situwasyon sa Juda?

³ Garo baga hinahanap si Jehova kan mga tawo kan kaaldawan ni Isaias asin nagpapahayag nin pagkaogmang marhay sa saiyang matanos na mga paghokom. Mababasa niato an mga tataramon ni Jehova: “Ako an padagos nindang hinahanap aroaldaw, asin an kaaraman manongod sa sakong mga dalan an sinasabi ninda na saindang ikinaoogmang marhay, siring sa sarong nasyon na naggigibo nin katanosan mismo asin dai nagbaya sa mismong hustisya kan saindang Dios, kaya padagos sindang naghahagad sa sako nin matanos na mga paghokom, na minadolok sa Dios na saindang ikinaoogmang marhay.” (Isaias 58:2) Tunay daw an paghingakong ini nin pagkaogmang marhay sa mga dalan ni Jehova? Bako. Sinda “siring sa sarong nasyon na naggigibo nin katanosan mismo,” alagad an pagkakaagid artipisyal sana. Sa totoo sana, an nasyon na ini “nagbaya sa mismong hustisya kan saindang Dios.”

⁴ An situwasyon kaagid na marhay kan ihinayag ki propeta Ezequiel kan huri. Sinabi ni Jehova ki Ezequiel na nag-oorolay-olay an mga Judio: “Madia, tabi, asin dangoga kun ano an tataramon na maluwas ki Jehova.” Alagad nagpatanid an Dios ki Ezequiel manongod sa saindang pagkabakong sinsero: “Sinda madorolok sa saimo, . . . asin tunay nanggad na dadangogon ninda an saimong mga tataramon alagad an mga ini dai ninda gigibohon, huli ta paagi sa saindang ngoso sinda nagpapahayag nin malaswang mga mawot asin an saindang puso naglalapag sa saindang bakong makatanosan na pakinabang. Asin, uya! para sa sainda ika garo awit nin nakapagpapanigong mga pagkamoot, garo sarong magayon an boses asin matibay tumugtog nin instrumentong de kuerdas. Asin dadangogon nanggad ninda an saimong mga tataramon, alagad mayo nin magibo kaiyan.” (Ezequiel 33:30-32) Naghihingako man an mga katemporanyo ni Isaias na daing ontok nindang hinahanap si Jehova, alagad dai ninda kinukuyog an saiyang mga tataramon.

Sagin-sagin na Pag-ayuno

5. Paano naghingoa an mga Judio na kamtan an pabor nin Dios, asin ano an reaksion ni Jehova?

⁵ Sa paghingoang kamtan an pag-oyon nin Dios, ginibo kan mga Judio an pormalidad na pag-ayuno, alagad irinayo sana sinda ki Jehova kan saindang pagbanalbanalan. Huli sa garo baga pagkaribaraw sinda naghapot: “Sa anong dahelan kami nag-ayuno asin dai mo naheling, asin pinasakitan niamo an samong kalag asin dai mo minangno?” Prankang nagsimbag si Jehova, na nagsasabi: “Tunay nanggad na nakanonompong kamo nin dakulang kaogmahan sa mismong aldaw kan saindong pag-aayuno, kan yaon an gabos nindong trabahador na puersahan nindong pinagtatrabaho. Tunay nanggad na  nag-aayuno kamo para sa pakikiiwal asin pakikipagtusayan, asin para sa pangongolog paagi sa kamaoo nin karatan. Dai daw kamo padagos na nag-ayuno siring kan aldaw kan pagpadangog kan saindong tingog sa kaitaasan? Maninigo daw na an pag-ayuno na pipilion ko magin arog kaini, bilang aldaw para sa daganon na tawo na pasakitan an saiyang kalag? Para sa pagduko kan saiyang payo siring sa tangbo, asin na bikladon nia an telang sako asin an mga abo bilang saiyang higdaan? Ini daw an inaapod mong pag-ayuno asin aldaw na maaako ni Jehova?”​—Isaias 58:3-5.

6. Anong mga hiro-hiro kan mga Judio an nagbuyagyag na pagsaginsagin an saindang pag-ayuno?

⁶ Mantang nag-aayuno, nagsasagin matanos, asin naghahagad pa ngani nin matanos na mga paghokom ni Jehova, pinag-aaabot kan banwaan an paslong mga kasingawan asin kapakanan nin negosyo. Dai sindang pakundangan sa iriwal, pan-aapi, asin kadahasan. Sa pagprobar na tahoban an saindang gawe-gawe, ipinagpapasikat ninda an saindang pagmondo​—na idinuduko an saindang payo na siring sa tangbo asin nakatukaw sa telang sako asin abo​—tangani na garo baga sinda nagsosolsol sa saindang mga kasalan. Anong halaga kaini gabos kun sinda nagpapadagos sa pagrebelde? Mayo sindang ipinaheheling na diosnon na pagmondo asin pagsolsol na maninigong kaiba kan sinserong mga pag-ayuno. An saindang pagtangis​—minsan ngani maribok​—dai nadadangog sa langit.

7. Paano mapagsaginsagin na guminawe an mga Judio kan kapanahonan ni Jesus, asin paano iyan ginigibo kan dakol ngonyan?

⁷ An mga Judio kan kaaldawan ni Jesus nagpaheling man nin siring na seremonyal na pag-ayuno, na ini duwang beses pa ngani sa sarong semana na ginigibo nin nagkapira! (Mateo 6:16-18; Lucas 18:​11, 12) Inarog man kan dakol sa namomoon sa relihion an kapag-arakian ni Isaias paagi sa pagigin maringis asin dominante. Huli kaini, makosog an boot na ibinuyagyag ni Jesus an relihiosong mga parasaginsagin na idto, na sinasabi sainda na daing kamanungdanan an saindang klase nin pagsamba. (Mateo 15:7-9) Ngonyan man minilyon an “nagpapahayag sa publiko na midbid ninda an Dios, alagad ta sinda nagpapainda sa saiya paagi sa saindang mga gibo, huli ta sinda makauuyam nin makuri asin masumbikal patin bakong aprobado para sa ano man na klase nin marahay na gibo.” (Tito 1:16) An mga siring tibaad nag-aasa sa pagkaherak nin Dios, alagad ihinahayag kan saindang gawe-gawe an saindang pagkabakong sinsero. Sa kabaliktaran, ipinaheheling kan Mga Saksi ni Jehova an tunay na diosnon na debosyon asin tunay na sa magturugang na pagkamoot.​—Juan 13:35.

Kun Ano an Kalabot sa Tunay na Pagsolsol

8, 9. Anong positibong mga gibo an dapat na kaiba kan sinserong pagsolsol?

⁸ Labi pa kisa pag-ayuno sana sa saindang mga kasalan an gusto ni Jehova na gibohon kan saiyang banwaan; gusto nia na magsolsol sinda. Dangan kakamtan ninda an saiyang pag-oyon. (Ezequiel 18:​23, 32) Ipinaliliwanag nia na tanganing magin makahulogan, an pag-ayuno dapat na ibanan nin pagtatanos sa nakaaging mga kasalan. Estudyare an nagsisiyasat sa pusong mga hapot ni Jehova: “Bako daw na ini an pag-ayuno na pinili ko? An paghubad kan mga ramal nin karatan, an paghale kan mga panggakod kan sakal, asin an pagpatalingkas sa mga inaapi, asin barion nindo an lambang sakal?”​—Isaias 58:6.

⁹ An mga ramal asin sakal angay na simbolo nin maringis na kaoripnan. Kaya imbes na mag-ayuno asin kadungan kaiyan apihon an mga kapagtubod, dapat na kuyogon kan mga tawo an pagboot: “Kamotan mo an saimong kapwa nin siring sa saimo man sana.” (Levitico 19:18) Dapat nindang butasan an mga inapi asin bakong makatanosan na inoripon ninda. * An mapagpasikat na relihiosong mga gibo, na siring kan pag-ayuno, dai puedeng isalida sa tunay na diosnon na debosyon asin mga gibo-gibo na nagpapaheling nin pagkamoot na sa magturugang. Isinurat nin sarong katemporanyo ni Isaias, si propeta Miqueas: “Anong balos an hinahagad sa saimo ni Jehova kundi na gumibo ka nin hustisya asin mamoot sa kabootan asin na magin hababa an boot sa paglakaw sa kaibahan kan saimong Dios?”​—Miqueas 6:8.

10, 11. (a) Para sa mga Judio, ano an mas marahay na gibohon kisa mag-ayuno? (b) Paano ikaaaplikar kan mga Kristiano ngonyan an konseho ni Jehova sa mga Judio?

¹⁰ An hustisya, kabootan, asin kababaan nin boot naghahagad nin paggibo nin marahay sa iba, na iyong pinakaubod kan Ley ni Jehova. (Mateo 7:12) Mas marahay nanggad kisa pag-ayuno an paghiras kan saindang kayamanan sa mga nangangaipo. Si Jehova naghahapot: “Bako daw na [an pag-ayuno na pinili ko] an paghiras kan saimong tinapay sa nagugutom, asin palaogon mo sa saimong harong an mga tawong dukha, daing harong? Na, kun makaheling ka nin huba, tahoban mo sia, asin dai ka magtago sa sadiri mong laman?” (Isaias 58:7) Iyo, imbes na ipagpasikat an pag-ayuno, an mga may kakayahan na gumibo kaiyan maninigo na magtao nin kakanon, gubing, o maiistaran sa nangangaipo nindang mga kapwa nag-eerok sa Juda​—an sadiri nindang laman.

¹¹ An magayon na mga prinsipyong ini nin sa magturugang na pagkamoot asin pagkaludok na ipinahayag ni Jehova minaaplikar bako sana sa mga Judio kan kaaldawan ni Isaias. Ginigiyahan man kaiyan an mga Kristiano. Huli kaini, si apostol Pablo nagsurat: “Tunay nanggad, kun siring, mantang igwa kita nin marahayrahay na panahon para kaiyan, gumibo kita kan marahay sa gabos, alagad orog na sa mga may relasyon sa sato sa pagtubod.” (Galacia 6:10) An Kristianong kongregasyon dapat na magin lugar nin pagkamoot asin sa magturugang na kapadangatan, nangorogna huli sa paorog nang paorog na kritikal na mga panahon na kinabubuhayan niato.​—2 Timoteo 3:1; Santiago 1:27.

 Nagbubunga nin Mayaman na mga Bendisyon an Pagkuyog

12. Ano an gigibohon ni Jehova kun kukuyogon sia kan saiyang banwaan?

¹² Kun magkakaigwa sana kutana nin pakarorop an banwaan ni Jehova na himateon an saiyang mamomoton na pagsagwe! Si Jehova nagsasabi: “Sa siring an saimong liwanag masirang na siring sa kaagahon; asin an kaomayan marikas na maabot para sa saimo. Asin sa enotan mo malakaw nanggad an saimong katanosan; an mismong kamurawayan ni Jehova magigin saimong bantay sa likodan. Sa siring maapod ka, asin si Jehova mismo masimbag; maagrangay ka para sa tabang, asin sasabihon nia, ‘Uya ako!’ ” (Isaias 58:​8, 9a) Kanigoan kanakaoogma, kanakaaakit na mga tataramon! Binebendisyonan asin pinoprotehiran ni Jehova an mga naoogmang marhay sa mamomoton na kabootan asin katanosan. Kun an banwaan ni Jehova magsolsol sa saindang karingisan asin pagsaginsagin patin kukuyogon sia, magigin mas marahay nanggad an saindang kamugtakan. Tatawan ni Jehova nin “kaomayan,” pagkaomay sa espirituwal asin pisikal an nasyon. Babantayan man nia sinda, siring kan ginibo nia sa saindang mga apoon kan pahale sinda kaidto sa Egipto. Asin sisimbagon nia tolos an saindang mga agrangay para sa tabang.​—Exodo 14:​19, 20, 31.

13. Anong mga bendisyon an nakatagama sa mga Judio kun mahimate sinda sa sadol ni Jehova?

¹³ Dinagdagan pa ngonyan ni Jehova an saiyang naenot na sadol, na nagsasabi: “Kun hahaleon mo sa tanga mo an sakal [nin maringis, bakong makatanosan na pan-ooripon], an panduduro [tibaad bilang pagtuya o falsong akusasyon] asin an pagtaram nin nakakokolog; asin itatao mo sa nagugutom an mawot kan saimong kalag, asin babasogon mo an kalag na nasasakitan, an saimo man na liwanag tunay nanggad na masilyab pati sa kadikloman, asin an saimong kaduloman magigin siring sa odto.” (Isaias 58:9b, 10) An kaimotan asin karingisan minasudya sa sadiring katuyohan asin nagbubunga kan grabeng kaanggotan ni Jehova. Minsan siring, an kabootan asin pagigin buka an palad, nangorogna kun ginigibo sa mga gutom asin nagsasakit nin makuri, nagbubunga kan mayaman na bendisyon nin Dios. Kun isasapuso sana kan mga Judio an mga katotoohan na ini! Kun siring an saindang espirituwal na kinang asin prosperidad pasisirangon sinda na siring sa saldang sa kaudtohan, na hinahale an ano man na kaduloman. Orog sa gabos, magdadara sinda nin onra asin kaomawan ki Jehova, an Gikanan kan saindang kamurawayan asin mga bendisyon.​—1 Hade 8:41-43.

Sarong Ibinalik na Nasyon

14. (a) Ano an reaksion kan mga katemporanyo ni Isaias sa saiyang mga tataramon? (b) Ano an padagos na iinaalok ni Jehova?

¹⁴ Makamomondo, dai inintindi kan nasyon an pakiolay ni Jehova asin orog pang nagpakaraot. Sa kahurihurihi, mayo nang maginibo si Jehova kundi ipadestiero sinda, siring kan patanid nia. (Deuteronomio 28:​15, 36, 37, 64, 65) Pero, an suminunod na mga tataramon ni Jehova paagi ki Isaias padagos na nagtatao nin paglaom. Patienot na isinabi nin Dios na magayagayang mabalik an sarong nadisiplina, nagbabasol na natatada sa daga nin Juda, minsan ngani iyan gaba.

15. Anong magayagayang pagbabalik an ihinula ni Jehova?

¹⁵ Itinotokdo an pagbabalik kan saiyang banwaan kan 537 B.C.E., si Jehova nagsasabi paagi ki Isaias: “Si Jehova magiya sa saimo nin danay asin babasogon an saimong kalag sa alang na daga, asin pakokosogon nia an saimo mismong mga tolang; asin ika magigin siring sa sarong tatamnan na matubig, asin siring sa gikanan nin tubig [“burabod,” The New English Bible], na may tubig na dai nagpuputik [“nagsasalto,” NE].” (Isaias 58:11) Ibabalik ni Jehova an alang na dagang tinuboan kan Israel sa pagigin mabungahon. An makangangalas pa kaini, bebendisyonan nia an saiyang nagsosolsol na banwaan, na pinakokosog an sainda “mismong mga tolang” hale sa daing buhay na kamugtakan sa espirituwal pasiring sa kamugtakan na pano nin kabagsikan. (Ezequiel 37:1-14) An mga tawo mismo magigin siring sa “sarong tatamnan na matubig” na pano nin espirituwal na bunga.

16. Paano ibabalik sa dati an daga?

¹⁶ Kaiba sa pagbabalik an pagtogdok liwat kan mga siudad na linaglag kan mga nananakyadang Babilonyo kan 607 B.C.E. “Huli sa pagboot mo itotogdok nanggad nin mga tawo an mga lugar na haloy nang gaba; ititindog mo an mga pundasyon nin sunod-sunod na mga kapag-arakian. Asin aapodon ka nanggad na parahirahay kan siwang, an parasulit nin mga tinampo na sa kataed kaini maeerokan.” (Isaias 58:12) An magkaagid na mga pananaram na “mga lugar na haloy nang gaba” asin “an mga pundasyon nin sunod-sunod na mga kapag-arakian” (o, an mga pundasyon na gaba sa laog nin dakol na kapag-arakian) nagpapaheling na itotogdok liwat kan pinapuli sa sadiring daga na natatada an gabang mga siudad kan Juda, nangorogna an Jerusalem. (Nehemias 2:5; 12:27; Isaias 44:28) Hihirahayon ninda an “siwang”​—sarong pankagabsan na termino na nanonongod sa mga guang sa mga lanob kan Jerusalem asin daing duwa-duwa na magin kan sa ibang mga siudad.​—Jeremias 31:38-40; Amos 9:14.

Mga Bendisyon na Resulta kan Fiel na Pag-otob kan Sabbath

17. Paano nakiolay si Jehova sa saiyang banwaan na kuyogon an saiyang mga ley sa Sabbath?

¹⁷ An Sabbath kapahayagan kan hararom na pagmalasakit nin Dios para sa pisikal asin espirituwal na ikararahay kan saiyang banwaan. Si Jesus nagsabi: “An sabbath ginibo para sa tawo.” (Marcos 2:27) An aldaw na ini na sinantipikar ni Jehova nagtao sa mga Israelita nin sarong espesyal na oportunidad na ipaheling an saindang pagkamoot sa Dios. Makamomondo, kan kaaldawan ni Isaias iyan nagin na sanang aldaw para sa pag-otob nin daing saysay na mga ri­tuwal asin para sa pagpadara sa maimot na mga mawot. Kaya sa giraray, may dahelan si Jehova na sagweon an saiyang banwaan. Asin naghingoa giraray sia na aboton  an saindang puso. Sabi nia: “Kun huli sa sabbath ibibirik mo an saimong bitis sa paggibo kan saimong sadiring dakulang mga kaogmahan sa sakong banal na aldaw, asin aapodon nanggad an sabbath na labi-labi nanggad na kaogmahan, sarong banal na aldaw ni Jehova, sarong pinamuraway, asin talagang pamurawayon mo iyan imbes na gibohon mo an sadiri mong mga kagustohan, imbes na hanapon mo an nakakapaogmang marhay sa saimo asin magtaram ka nin tataramon; sa siring makukua mo an labi-labi mong kaogmahan ki Jehova, asin pasasakayon taka sa haralangkaw na lugar kan daga; asin pakakakanon taka hale sa minanang rogaring ni Jacob na saimong apoon, huli ta an ngoso ni Jehova an nagtaram kaini.”​—Isaias 58:​13, 14.

18. Ano an magigin resulta kan dai paggalang kan Juda sa Sabbath?

¹⁸ An Sabbath aldaw para sa espirituwal na paghorophorop, pamibi, asin pagsamba kan pamilya. Maninigo iyan na makatabang sa mga Judio na horophoropon an makangangalas na mga gibo ni Jehova sa kapakanan ninda asin an hustisya asin pagkamoot na nahahayag sa saiyang Ley. Sa siring, an fiel na pag-otob kan banal na aldaw na ini maninigo na makatabang sa banwaan na orog pang maparani sa saindang Dios. Imbes, binibiribid ninda an Sabbath asin kun siring namemeligrong dai magkamit kan bendisyon ni Jehova.​—Levitico 26:34; 2 Cronica 36:21.

19. Anong mayaman na mga bendisyon an nakatagama para sa banwaan nin Dios kun ootobon ninda an Sabbath?

¹⁹ Pero, kun makakanood an mga Judio sa disiplina asin igagalang an areglo nin Sabbath, mayaman na bendisyon an natatagama sa sainda. An marahay na mga epekto kan tunay na pagsamba asin paggalang sa Sabbath masulwak sa gabos na aspekto kan saindang buhay. (Deuteronomio 28:1-13; Salmo 19:7-11) Halimbawa, “pasasakayon [ni Jehova] sa haralangkaw na lugar kan daga” an saiyang banwaan. An pananaram na ini nangangahulogan nin katiwasayan asin pakakongkistar sa mga kaiwal. An siisay man na nagkokontrol sa haralangkaw na lugar​—an mga bulod asin bukid​—iyong nagkokontrol kan daga. (Deuteronomio 32:13; 33:29) Dati kinukuyog kan Israel si Jehova, asin an nasyon nagkamit kan saiyang proteksion asin iginalang, kinatakotan pa ngani, kan ibang mga nasyon. (Josue 2:9-11; 1 Hade 4:​20, 21) Kun sinda maasa giraray ki Jehova bilang pagkuyog, ibabalik an nagkapira sa dating kamurawayan na iyan. Itatao ni Jehova sa saiyang banwaan an lubos na kahirasan sa “minanang rogaring ni Jacob”​—an mga bendisyon na ipinanuga paagi sa Saiyang tipan sa saindang mga apoon, nangorogna an bendisyon nin matiwasay na pagsadiri kan Dagang Panuga.​—Salmo 105:8-11.

20. Anong “pagpahingalo sa sabbath” an para sa mga Kristiano?

²⁰ May leksion daw digdi para sa mga Kristiano? Pagkagadan ni Jesu-Cristo, hinale na an Ley ni Moises, kaiba an mga kahagadan kaiyan sa Sabbath. (Colosas 2:​16, 17) Minsan siring, an espiritu na maninigo kutanang naenkaminar sa Juda dahel sa pag-otob kan Sabbath​—an pag-enot sa espirituwal na intereses asin pagrani ki Jehova​—mahalagang marhay pa man giraray para sa mga nagsasamba ki Jehova. (Mateo 6:33; Santiago 4:8) Dugang pa, sinasabi ni Pablo sa saiyang surat sa mga Hebreo: “Igwa pang natatada na pagpahingalo sa sabbath para sa banwaan nin Dios.” Minalaog an mga Kristiano sa “pagpahingalo sa sabbath” na ini paagi sa pagigin makinuyog ki Jehova asin pagsunod sa katanosan basado sa pagtubod sa pinabolos na dugo ni Jesu-Cristo. (Hebreo 3:​12, 18, 19; 4:​6, 9-11, 14-16) Para sa mga Kristiano, an klaseng ini nin pag-otob kan Sabbath ginigibo, bako sanang sarong aldaw kada semana, kundi aroaldaw.​—Colosas 3:​23, 24.

An Espirituwal na Israel ‘Pinasasakay sa Haralangkaw na Lugar kan Daga’

21, 22. Sa anong paagi na ‘pinasakay [ni Jehova] sa haralangkaw na lugar kan daga’ an Israel nin Dios?

²¹ Poon kan sinda butasan sa pagkabihag sa Babilonya kan 1919, fiel na inotob kan linahidan na mga Kristiano an ipinanganganino kan Sabbath. Bilang resulta, sinda ‘pinasakay [ni Jehova] sa haralangkaw na lugar kan daga.’ Sa anong sentido? Kaidtong 1513 B.C.E., nakipagtipan si Jehova sa mga gikan ni Abraham na kun sinda magigin makinuyog, sinda magigin sarong kahadean nin mga saserdote asin sarong banal na nasyon. (Exodo 19:​5, 6) Sa laog nin 40 taon sa kaawagan, dinara sinda ni Jehova nin ligtas, kun paanong dinadara nin sarong agila an mga siwo kaiyan, asin binendisyonan sinda nin abundang mga probisyon. (Deuteronomio 32:10-12) Minsan siring, an nasyon daing pagtubod, asin sa kahurihurihi iwinara an gabos na pribilehio na puede kutanang napasainda. Sa ibong kaiyan, si Jehova may kahadean nin mga saserdote ngonyan. Iyan an espirituwal na Israel nin Dios.​—Galacia 6:16; 1 Pedro 2:9.

²² Durante kan “panahon kan katapusan,” ginibo kan espirituwal na nasyon na ini an dai nagibo kan suanoy na Israel. Padagos sindang nagtubod ki Jehova. (Daniel 8:17) Mantang estriktong sinusunod kan mga miembro kaiyan an halangkaw na mga pamantayan asin halangkawon na mga dalan ni Jehova, sa espirituwal na sentido ilinalangkaw sinda ni Jehova. (Talinhaga 4:​4, 5, 8; Kapahayagan 11:12) Napoprotehiran sa kaatian na nakapalibot sa sainda, sinda nagkakamit nin halangkaw na estilo nin pamumuhay, asin imbes na iinsistir an sadiri nindang mga kagustohan, sinda  nakanonompong nin “labi-labi nanggad na kaogmahan dian ki Jehova” asin sa saiyang Tataramon. (Salmo 37:4) Pinagdanay sinda ni Jehova na tiwasay sa espirituwal sa atubangan nin determinadong pagtumang sa bilog na kinaban. Poon kan 1919, dai pa nagkaigwang guang an saindang espirituwal na “daga.” (Isaias 66:8) Sinda padagos na nagin sarong banwaan para sa saiyang halangkawon na ngaran, na magayagaya nindang ipinahahayag sa bilog na kinaban. (Deuteronomio 32:3; Gibo 15:14) Dugang pa, an nagdadakol na kabilangan nin mga mahoyo hale sa gabos na nasyon nakikikabtang ngonyan kaiba ninda sa dakulang pribilehio na matokdoan kan mga dalan ni Jehova asin matabangan na lumakaw sa saiyang mga dana.

23. Paano ‘pinakakan [ni Jehova] hale sa minanang rogaring ni Jacob’ an linahidan na mga lingkod nia?

²³ ‘Pinakakan [ni Jehova] hale sa minanang rogaring ni Jacob’ an saiyang linahidan na mga lingkod. Kan bendisyonan ni Isaac si Jacob imbes na si Esau, ihinula kan mga tataramon kan patriarka an mga bendisyon para sa gabos na matubod sa ipinanugang Banhi ni Abraham. (Genesis 27:27-29; Galacia 3:​16, 17) Arog ni Jacob​—asin bakong arog ni Esau​—an linahidan na mga Kristiano asin an saindang kairiba “nagpapahalaga sa sagradong mga bagay,” nangorogna sa espirituwal na kakanon na abundang itinatao nin Dios. (Hebreo 12:​16, 17; Mateo 4:4) An espirituwal na kakanon na ini​—na kaiba an kaaraman manongod sa ginigibo ni Jehova paagi sa ipinanugang Banhi asin sa kairiba kan Banhing iyan​—nakapakokosog, nakapababagsik, asin mahalagang marhay para sa saindang espirituwal na buhay. Huli kaini, importante na dayaday sindang kumakan kan espirituwal na kakanon paagi sa pagbasa asin paghorophorop sa Tataramon nin Dios. (Salmo 1:1-3) Kaipuhan sindang makiasosyar sa saindang mga kapagtubod sa Kristianong mga pagtiripon. Asin mahalagang marhay na suportaran ninda an halangkaw na mga pamantayan nin dalisay na pagsamba mantang magayagaya nindang ihinihiras sa iba an pagkakan na iyan.

24. Paano minagawe an tunay na mga Kristiano ngonyan?

²⁴ Mantang galagang hinahalat an kaotoban kan mga panuga ni Jehova, padagos logod na isikwal kan tunay na mga Kristiano an gabos na klase nin pagsaginsagin. Mantang nagkakakan “hale sa minanang rogaring ni Jacob,” sinda logod padagos na magkamit nin espirituwal na katiwasayan sa “haralangkaw na lugar kan daga.”

[Nota sa Ibaba]

[Mga Hapot Para sa Pag-adal]