Saen Puedeng Manompongan an Tunay na Karangahan?

“An Dios asin Ama kan satong Kagurangnan na si Jesu-Cristo . . . minaranga sa sato sa gabos niatong kahorasaan.”—2 CORINTO 1:3, 4.

1. Anong mga kamugtakan an puedeng magin dahelan na an mga tawo makamate nin dakulang pangangaipo nin karangahan?

DAHEL sa nakakapagpaluyang helang tibaad magsaboot an saro na an saiyang buhay dai nang serbi. Dahel sa mga linog, bagyo, asin tiggutom grabe an pagtios nin mga tawo. An guerra puedeng magresulta sa pagkagadan kan mga miembro nin pamilya, puedeng makadestroso nin mga harong, o makapuersa sa mga kagsadiri nin harong na bayaan an mga rogaring. Dahel sa inhustisya an mga tawo puedeng magsaboot na mayo na sindang madadalaganan. An mga apektado kan siring na grabeng mga sakit nangangaipong marhay nin karangahan. Saen daw iyan puedeng manompongan?

2. Taano ta daing kapareho an karangahan na itinatao ni Jehova?

² An nagkapirang indibiduwal asin organisasyon naghihingoang magtao nin karangahan. Inaapresyar an mga tataramon nin kabootan. An pisikal na mga ayuda nakatatabang na mapanigoan an panmadalian na mga pangangaipo. Alagad solamente si Jehova, an tunay na Dios, an makahahale kan gabos na danyos asin makatatao kan klase nin tabang na kaipuhan tangani na nungka nang mangyari an siring na mga kalamidad. Mapadapit sa saiya, an Biblia nagsasabi: “Omawon logod an Dios asin Ama kan satong Kagurangnan na si Jesu-Cristo, an Ama nin maboot na mga pagkaherak asin an Dios nin gabos na karangahan, na minaranga sa sato sa gabos niatong kahorasaan, tanganing maranga niato an mga nasa ano man na klase nin kahorasaan paagi sa karangahan na irinaranga mismo sa sato nin Dios.” (2 Corinto 1:3, 4) Paano kita rinaranga ni Jehova?

Pagresolber sa Pinakadahelan kan mga Problema

3. Paano rineresolberan kan karangahan na itinatao nin Dios an pinakadahelan kan mga problema nin katawohan?

³ An bilog na pamilya nin tawo nagmana nin pagkabakong sangkap bilang resulta kan kasalan ni Adan, asin nagbubunga iyan nin dai mabilang na mga problema na sa kahurihurihi minasagkod sa kagadanan. (Roma 5:12) An situwasyon lalong pinagagrabe kan katunayan na si Satanas na Diablo “an namamahala sa kinaban na ini.” (Juan 12:31; 1 Juan 5:19) Si Jehova dai sana nagpahayag nin pagkamondo sa mamondong situwasyon na napapaatubang sa katawohan. Isinugo nia an saiyang bugtong na Aki bilang pantubos tanganing magtao nin kaligtasan, asin sinabi Nia sa sato na puede kitang makaginhawa sa mga epekto nin Adanikong kasalan kun kita matubod sa Saiyang Aki. (Juan 3:16; 1 Juan 4:10) Ihinula man nin Dios na si Jesu-Cristo, na pinaniwalaan kan gabos na autoridad sa langit asin sa daga, lalaglagon si Satanas asin an saiyang enterong maraot na sistema nin mga bagay.—Mateo 28:18; 1 Juan 3:8; Kapahayagan 6:2; 20:10.

4. (a) Ano an itinao ni Jehova tanganing mapakosog an satong kompiansa sa saiyang mga panugang kaginhawahan? (b) Paano kita tinatabangan ni Jehova na mamansayan kun noarin maabot an kaginhawahan?

⁴ Tanganing mapakosog an satong kompiansa sa saiyang mga panuga, ipinasurat nin Dios an abundang ebidensia na an ano man na ihinula nia naootob. (Josue 23:14) Iiniba nia sa Biblia an sarong  rekord kan saiyang ginibo tanganing iligtas an saiyang mga lingkod sa atubangan nin mga situwasyon na garo baga imposible na sa pagheling nin tawo. (Exodo 14:4-31; 2 Hade 18:13–19:37) Asin paagi ki Jesu-Cristo, ipinaheling ni Jehova na kabale sa saiyang katuyohan an pagpaomay sa mga tawo sa “gabos na klase nin kamatean,” pati ngani an pagbuhay sa mga gadan. (Mateo 9:35; 11:3-6) Noarin mangyayari an gabos na ini? Bilang simbag, an Biblia igwa nin paglaladawan kan huring mga aldaw kan daan na sistemang ini, na susundan kan bagong kalangitan asin bagong daga nin Dios. An paglaladawan ni Jesus nakakapareho sa mga panahon na nabubuhayan niato.—Mateo 24:3-14; 2 Timoteo 3:1-5.

Karangahan sa Sarong Banwaan na Nasa Kapurisawan

5. Kan tinatawan nin karangahan an suanoy na Israel, sa ano dinara ni Jehova an saindang atension?

⁵ Base sa paagi nin pagtratar ni Jehova sa suanoy na Israel, manonodan niato kun paano sia nagtao nin karangahan sa sainda sa mga panahon nin kapurisawan. Ipinagirumdom nia sa sainda kun anong klaseng Dios sia. Pinakosog kaini an saindang kompiansa sa saiyang mga panuga. Pinapangyari ni Jehova na an saiyang mga propeta gumamit nin malinaw na mga komparasyon tanganing ipaheling an kalaenan nia bilang an tunay asin nabubuhay na Dios asin kan mga idolo, na dai nakakatabang sa sainda mismo ni sa mga nagsasamba sa sainda. (Isaias 41:10; 46:1; Jeremias 10:2-15) Kan sinasabihan si Isaias na, ‘Rangaha, rangaha an sakuyang banwaan,’ pinahiro ni Jehova an saiyang propeta na gumamit nin mga ilustrasyon asin paglaladawan kan Saiyang mga paglalang tanganing idoon an kadakulaan ni Jehova bilang an iyo sanang tunay na Dios.—Isaias 40:1-31.

6. Anong mga indikasyon an kun beses itinatao kaidto ni Jehova dapit sa kun noarin maeeksperyensiahan an pagliligtas?

⁶ May beses na si Jehova nagtao nin karangahan paagi sa espesipikong pagsabi nin panahon, harani man o harayo, kun noarin ililigtas an saiyang banwaan. Mantang naghaharani an pagkaligtas sa Egipto, sinabihan nia an inaaping mga Israelita: “Saro pang damat an ipapaabot ko ki Paraon asin sa Egipto. Pakatapos kaiyan papahaleon nia kamo digdi.” (Exodo 11:1) Kan an Juda sakyadahon kan tolong magkaalyadong nasyon kan kaaldawan ni Hadeng Josafat, sinabi sa sainda ni Jehova na Sia mainterbenir para sa sainda “nuodma.” (2 Cronica 20:1-4, 14-17) Sa ibong na lado, an saindang pagkaligtas hale sa Babilonya isinurat ni Isaias haros 200 na taon antes pa, asin an dugang na mga detalye itinao paagi ki Jeremias haros sanggatos na taon bago nangyari an pagliligtas. Abaa kanakaparirigon sa boot an mga hulang iyan para sa mga lingkod nin Dios kan naghaharani na an panahon nin pagliligtas!—Isaias 44:26–​45:3; Jeremias 25:11-14.

7. Ano an parateng kaiba sa mga panuga na pagliligtas, asin ano an nagin epekto kaini sa fiel na mga tawo sa Israel?

⁷ Mahalagang mangnohon na an mga panuga na nagtao nin karangahan sa banwaan nin Dios parateng igwa nin impormasyon manongod sa Mesiyas. (Isaias 53:1-12) Sa sunod-sunod na kapag-arakian, nagtao ini nin paglaom sa fiel na  mga tawo mantang inaatubang ninda an balakid na pagbalo. Sa Lucas 2:​25, mababasa niato: “Uya! igwa nin sarong lalaki sa Jerusalem na an ngaran Simeon, asin an lalaking ini matanos asin magalang, naghahalat kan karangahan nin Israel [an totoo, an pagdatong kan Mesiyas], asin an banal na espiritu nasa saiya.” Aram ni Simeon an Mesiyanikong paglaom na sinasabi sa Kasuratan, asin an paghalat sa kaotoban kaiyan nakaimpluwensia sa saiyang buhay. Dai nia nasabotan kun paano iyan maootob gabos, asin dai sia nabuhay personalmente tanganing maheling na nagkatotoo an ihinulang kaligtasan, alagad naggayagaya sia kan mamidbid nia an Saro na magigin “paagi nin pagliligtas” nin Dios.​—Lucas 2:30.

Karangahan na Itinao Paagi ki Cristo

8. Ano an kalaenan kan tabang na itinao ni Jesus sa hinohona nin dakol na tawo na kaipuhan ninda?

⁸ Mantang ginigibo ni Jesu-Cristo an saiyang daganon na ministeryo, dai nia pirmeng itinatao an tabang na hinohona kan mga tawo na kaipuhan ninda. An nagkapira naghimuyawot nin sarong Mesiyas na mapatalingkas sa sainda sa ikinaoongis na pagdominar kan Roma. Alagad si Jesus dai nagsuportar sa rebolusyon; sinabihan nia sinda na “itao . . . ki Cesar an mga bagay na ki Cesar.” (Mateo 22:21) An kalabot sa katuyohan nin Dios bako sanang pagpatalingkas sa mga tawo sa pagigin dominado nin sarong politikal na rehimen. An mga tawo gustong gibohon na hade si Jesus, alagad sinabi nia na ‘itatao nia an saiyang kalag bilang pantubos na karibay nin dakol.’ (Mateo 20:28; Juan 6:15) Bako pang panahon kaidto na akoon nia an pagigin hade, asin an autoridad na sia mamahala itatao sa saiya ni Jehova, bakong nin diskontentong mga tawo.

9. (a) Ano an mensahe nin karangahan na ibinalangibog ni Jesus? (b) Paano ipinaheling ni Jesus an kahalagahan kan mensahe sa mga situwasyon na personal na inaatubang kan mga tawo? (c) Para sa ano nagtao nin basehan an ministeryo ni Jesus?

⁹ An karangahan na itinao ni Jesus kaiba sa “maogmang bareta kan kahadean nin Dios.” Ini an mensaheng ibinalangibog ni Jesus saen man sia magduman. (Lucas 4:43) Idinoon nia an kahalagahan kan mensaheng iyan sa pangaroaldaw na mga problema nin mga tawo paagi sa pagpaheling kan gigibohon nia para sa katawohan bilang Mesiyanikong Namamahala. Tinawan nia nin bagong dahelan na mabuhay an nagdudusang mga indibiduwal paagi sa pagpaomay sa mga buta asin pula (Mateo 12:22; Marcos 10:51, 52), pagpaomay sa lopog (Marcos 2:3-12), paglinig sa nakaririmarima nin makuri na mga helang kan mga kapwa nia Israelita (Lucas 5:12, 13), asin pagpaginhawa sa sainda sa iba pang makamomondong mga helang. (Marcos 5:25-29) Nagtao sia nin dakulang kaginhawahan sa nagmomondong mga miembro nin pamilya paagi sa pagbuhay liwat sa saindang mga aki. (Lucas 7:11-15; 8:49-56) Ipinaheling nia an saiyang kakayahan na kontrolon an peligrosong mga bagyo asin panigoan an pangangaipo nin pagkakan nin dakulang mga kadaklan. (Marcos 4:37-41; 8:2-9) Dugang pa, tinokdoan sinda ni Jesus nin mga prinsipyo sa pamumuhay na makatatabang sa sainda na atubangon nin positibo an  mga problemang yaon asin na matao sa mga puso nin paglaom sa matanos na pamamahala kan Mesiyas. Sa siring, mantang ginigibo ni Jesus an saiyang ministeryo, bako sanang rinanga nia an mga naghihinanyog na may pagtubod kundi itinao man nia an basehan sa pagparigon sa boot nin mga tawo sa madatong pang rinibong taon.

10. Ano an pinagin posible bilang resulta kan atang ni Jesus?

¹⁰ Labing 60 taon pakatapos na iatang ni Jesus an saiyang buhay bilang tawo asin buhayon sia liwat sa langitnon na buhay, si apostol Juan pinasabngan na sumurat: “Mga saradit kong aki, isinusurat ko sa saindo an mga bagay na ini tanganing dai kamo makaginibo nin kasalan. Pero, kun an siisay man makaginibo nin kasalan, igwa kita nin paratabang sa Ama, si Jesu-Cristo, sarong matanos. Asin sia sarong pampagian nin boot na atang para sa satong mga kasalan, pero bako sanang kan sa sato kundi siring man kan sa bilog na kinaban.” (1 Juan 2:1, 2) Huli sa mga pakinabang na tao kan sangkap na atang ni Jesus bilang tawo, kita nararangang marhay. Aram niato na puede kitang magkaigwa nin kapatawadan sa mga kasalan, malinig na konsensia, inooyonan na relasyon sa Dios, asin paglaom na buhay na daing sagkod.—Juan 14:6; Roma 6:23; Hebreo 9:24-28; 1 Pedro 3:21.

An Banal na Espiritu Bilang Pararanga

11. Ano pang probisyon para sa karangahan an ipinanuga ni Jesus bago kan saiyang kagadanan?

¹¹ Mantang kaiba an saiyang mga apostol kaidtong ultimong banggi bago kan saiyang kagadanan bilang atang, si Jesus nagtaram manongod sa saro pang probisyon na itinao kan saiyang langitnon na Ama tanganing rangahon sinda. Si Jesus nagsabi: “Makikimaherak ako sa Ama asin tatawan nia kamo nin saro pang paratabang [pararanga; sa Griego, pa·raʹkle·tos] tanganing makaibanan nindo sagkod lamang, an espiritu kan katotoohan.” Sinierto sa sainda ni Jesus: “An paratabang, an banal na espiritu, . . . matokdo sa saindo kan gabos na bagay asin mapagirumdom sa saindo kan gabos na bagay na isinabi ko sa saindo.” (Juan 14:16, 17, 26) Paano man nanggad nagtao sa sainda nin karangahan an banal na espiritu?

12. Paano nakatabang sa pagtao nin karangahan sa dakol an papel kan banal na espiritu bilang pantabang sa memorya kan mga disipulo ni Jesus?

¹² Kadakol kan itinokdo ni Jesus sa mga apostol. Nungka nanggad nindang malilingawan an eksperyensiang idto, alagad magigirumdoman daw ninda an aktuwal na mga sinabi nia? Malilingawan daw an importanteng mga instruksion dahel sa saindang bakong sangkap na memorya? Sinierto sa sainda ni Jesus na an banal na espiritu an ‘mapagirumdom sa sainda kan gabos na bagay na isinabi nia sa sainda.’ Sa siring, mga walong taon pagkagadan ni Jesus, ikinasurat ni Mateo an enot na Ebanghelyo, na dian irinekord nia an nakaoogmang Sermon sa Bukid ni Jesus, an kadakol na ilustrasyon nia may labot sa Kahadean, asin an detalyadong paliwanag nia kan tanda kan saiyang presensia. Pakalihis nin labing 50 taon, nakasurat si apostol Juan nin sarong masasarigan na pagkasaysay na pano nin kadakol na detalye manongod sa huring pirang aldaw kan daganon na buhay ni Jesus. Nakaparirigon nanggad sa boot an ipinasabong na mga rekord na ini sagkod sa satong kaaldawan!

13. Paano an banal na espiritu nagserbing paratokdo sa enot na mga Kristiano?

¹³ Apuera pa sa basta pagpagirumdom sa sainda kan mga tataramon, tinokdoan kan banal na espiritu an mga disipulo asin giniyahan sinda na mas lubos na masabotan an katuyohan nin Dios. Kan kaiba pa ni Jesus an saiyang mga disipulo, may mga sinabi sia sa sainda na dai ninda nasabotan nin malinaw kan panahon na idto. Minsan siring, kan huri, huling napahiro kan banal na espiritu, si Juan, Pedro, Santiago, Judas, asin Pablo nagsurat nin mga paliwanag kan dugang pang mga pangyayari sa katuyohan nin Dios. Sa siring an banal na espiritu nagserbing paratokdo, na nagtatao nin mahalagang marhay na garantiya na sinda ginigiyahan nin Dios.

14. Sa anong mga paagi tinabangan kan banal na espiritu an banwaan ni Jehova?

¹⁴ An milagrosong mga balaog kan espiritu nakatabang man na linawon na hinale na nin Dios an saiyang pabor sa Israel sa laman asin itinao na iyan sa Kristianong kongregasyon. (Hebreo 2:4) An bunga kan espiritung iyan sa buhay nin mga indibiduwal mahalaga man sa pagmidbid sa tunay na mga disipulo ni Jesus. (Juan 13:35; Galacia 5:22-24) Asin pinakosog kan espiritu an mga miembro kan kongregasyon na iyan na magin pusoan asin daing takot na mga saksi.​—Gibo 4:31.

 Tabang Kun Ginigipit nin Makuri

15. (a) Anong mga pangigipit an napaatubang sa mga Kristiano kaidto asin sa presente? (b) Taano an mga nagtatao nin pagparigon sa boot ta tibaad kun minsan nangangaipo man na tawan kaiyan?

¹⁵ An gabos na deboto ki Jehova asin maimbod sa saiya nag-aagi nin sarong klase nin paglamag. (2 Timoteo 3:12) Minsan siring, dakol na Kristiano an napasairarom nin pangigipit na makuring marhay. Sa presenteng mga panahon, an nagkapira pinaghanap nin mga sururog asin iinapon sa mga kampo de konsentrasyon, bilanggoan, asin mga kampo nin pagtrabaho sa irarom nin mga kamugtakan na bakong makatawo. An mga gobyerno nagin aktibong mga paralamag, o tinogotan ninda an tampalasan na mga elemento na manribok na dai napadudusahan. Dugang pa, an mga Kristiano napaatubang sa seryosong mga problema sa salud o grabeng krisis sa pamilya. Tibaad makaeksperyensia man nin pangigipit an sarong maygurang na Kristiano na sunod-sunod an kapagtubod na tinatabangan na makaatubang sa masakit na mga situwasyon. Sa siring na mga kamugtakan, an nagtatao nin pagparigon sa boot tibaad nangangaipo man na tawan kaiyan.

16. Kan si David nasa grabeng pangigipit, paano sia nag-ako nin tabang?

¹⁶ Kan si David linalapag ni Hadeng Saul tanganing gadanon, si David nagdolok sa Dios bilang saiyang Paratabang: “O Dios, dangoga an sakong pamibi,” an pakimaherak nia. “Sa limpoy nin saimong mga pakpak ako magpapaili.” (Salmo 54:2, 4; 57:1) Nag-ako daw nin tabang si David? Iyo. Durante kan panahon na iyan, ginamit ni Jehova si Gad na propeta asin si Abiatar na saserdote tanganing tumao nin paggiya ki David, asin ginamit Nia si Jonatan na aki ni Saul tanganing pakosogon an hoben na si David. (1 Samuel 22:​1, 5; 23:9-13, 16-18) Tinogotan man ni Jehova an mga Filisteo na sakyadahon an daga, sa siring irinayo an atension ni Saul sa saiyang paglapag.—1 Samuel 23:​27, 28.

17. Kan nasa makuring pangigipit, kiisay nagpatabang si Jesus?

¹⁷ Si Jesu-Cristo mismo napasairarom nin makuring pangigipit mantang naghaharani an katapusan kan saiyang daganon na buhay. Lubos niang aram kun paano an saiyang igagawe makaaapektar sa ngaran kan saiyang langitnon na Ama asin kun ano an magigin kahulogan kaiyan sa ngapit kan bilog na katawohan. Odok siang namibi, na ‘napasa labi-labing kasakitan’ pa ngani. Sinegurado nin Dios na si Jesus mag-ako kan suporta na kaipuhan nia durante kan masakit na panahon na idto.—Lucas 22:41-44.

18. Anong karangahan an itinao nin Dios sa enot na mga Kristiano na pinaglamag nin makuri?

¹⁸ Maisog na marhay an paglamag sa mga Kristiano pagkaestablisar kan kongregasyon kan enot na siglo kaya an gabos apuera sa mga apostol nagkasuruwaysuway hale sa Jerusalem. An mga lalaki asin babae pisikal na ginuruyod hale sa saindang  harong. Anong karangahan an itinao sa sainda nin Dios? An garantiya hale sa saiyang Tataramon na sinda igwa nin “rogaring na orog karahay asin nagdadanay,” sarong seguradong pamana sa kalangitan kaiba ni Cristo. (Hebreo 10:34; Efeso 1:18-20) Mantang sinda padagos na naghuhulit, naheling ninda an ebidensia na an espiritu nin Dios nasa sainda, asin an saindang mga eksperyensia nagtao sa sainda nin dugang na dahelan na maggayagaya.—Mateo 5:​11, 12; Gibo 8:1-40.

19. Minsan ngani nag-agi si Pablo nin makuring paglamag, ano an saboot nia manongod sa karangahan na itinatao nin Dios?

¹⁹ Pag-abot nin panahon, si Saulo (Pablo), na mismong dating madahas na paralamag, pinaglamag man huli ta sia nagin Kristiano. Sa isla nin Chipre, igwa nin sarong pararatak na naghingoang olangon an ministeryo ni Pablo paagi sa paggamit nin pandadaya asin pagbiribid. Sa Galacia, si Pablo ginapo asin binayaan sa paghonang sia gadan na. (Gibo 13:8-10; 14:19) Sa Macedonia, sia pinagpakol. (Gibo 16:​22, 23) Pakatapos na madahas na pagsururogan sa Efeso, sia nagsurat: “Kami napasairarom nin grabeng pangigipit na dai na kaya kan samong kosog, kaya dai na talaga kami nin kasiertohan minsan manongod sa samong buhay. Sa katunayan, namatean niamo sa samong sadiri na nag-ako na kami kan silot nin kagadanan.” (2 Corinto 1:8, 9) Alagad sa surat man sanang iyan, isinurat ni Pablo an nakararangang mga tataramon na kinotar sa parapo 2 kan artikulong ini.—2 Corinto 1:3, 4.

20. Ano an eestudyaran niato sa sunod na artikulo?

²⁰ Paano kamo makakapakikabtang sa pagtao kan siring na karangahan? Dakol sa kaaldawan niato an nangangaipo kaiyan kun nakaeeksperyensia nin kamondoan, magsalang dahelan sa kalamidad na biglang minaabot sa rinibo o dahelan sa kahorasaan na nagpapasakit nin makuri sa sainda sana. Sa masunod na artikulo, eestudyaran niato kun paano matao nin karangahan sa arin man kaiyan na kamugtakan.

Nagigirumdoman daw Nindo?

• Taano ta an karangahan hale sa Dios an may pinakadakulang halaga?

• Anong karangahan an itinatao paagi ki Cristo?

• Paano nagin pararanga an banal na espiritu?

• Tumao nin mga halimbawa kan karangahan na itinao nin Dios kan nasa makuring pangigipit an saiyang mga lingkod.

[Mga Hapot Para sa Pag-adal]

[Mga Ritrato sa pahina 15]

Ipinaheheling sa sato kan Biblia na si Jehova nagtao nin karangahan paagi sa pagligtas sa saiyang banwaan

[Mga Ritrato sa pahina 16]

Si Jesus nagtao nin karangahan paagi sa pagtokdo, sa pagpaomay, asin sa pagbuhay liwat sa mga gadan

[Ritrato sa pahina 18]

Si Jesus nag-ako nin tabang hale sa itaas