Igwa daw Kamo nin “Mapaghalat na Aktitud”?

“Kamo maninigong magin anong klaseng mga tawo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova!”​—2 PEDRO 3:​11, 12.

1, 2. Paano niato puedeng iilustrar an pagkaigwa nin “mapaghalat na aktitud” mapadapit sa aldaw ni Jehova?

ILADAWAN nindo sa isip an sarong pamilya na naghahalat nin mga bisita para sa pamanggihan. Marikas nang nagdadangadang an itinalaan na oras kan pag-abot ninda. An agom na babae sibot-sibot sa ultimong mga aasikasohon sa pamanggihan. Nagtatabang an saiyang agom asin an mga aki ninda tanganing seguradohon na areglado na an gabos. Ganado an boot kan gabos. Iyo, an bilog na pamilya galagang hinahalat an pag-abot kan mga bisita asin inaantisipar an masiram na karakanan saka marahayon na pag-iribaiba.

² Bilang mga Kristiano, may hinahalat kita na orog pa nganing mahalaga. Ano? Tara, hinahalat niato gabos an “aldaw ni Jehova”! Sagkod na umabot iyan, kaipuhan na kita magin arog kan propetang si Miqueas, na nagsabi: “Ki Jehova ako padagos na maghahalat. Mapaheling ako nin mapaghalat na aktitud sa Dios nin sakong kaligtasan.” (Miqueas 7:7) Nangangahulogan daw iyan nin pagigin daing ginigibo? Dai. Kadakol kan gigibohon.

3. Segun sa 2 Pedro 3:​11, 12, ano an dapat na magin aktitud kan mga Kristiano?

³ Tinatabangan kita ni apostol Pedro na magkaigwa kan tamang aktitud mantang naghahalat. Sabi nia: “Kamo maninigong magin anong klaseng mga tawo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova!” (2 Pedro 3:​11, 12) Mangnoha na saro ining eksklamasyon. Dai naghahapot si Pedro. Sa duwa niang surat na ipinasabong nin Dios, sinabi nia kun maninigong magin anong klaseng mga tawo an mga Kristiano. Sinadol man nia sinda na padagos na gumibo nin “banal na mga gawe asin gibo nin diosnon na debosyon.” Minsan ngani mga 30 taon na an nakalihis poon kan itao ni Jesu-Cristo an tanda “kan pagtatapos kan sistema nin mga bagay,” an mga Kristiano dai dapat na magpabaya. (Mateo 24:3) Dapat na “hinahalat asin pinapagdadanay [ninda] na harani sa isip” an presensia kan aldaw ni Jehova.

4. Ano an kalabot sa ‘pagpapadanay na harani sa isip kan presensia kan aldaw ni Jehova’?

⁴ An termino sa Griego na trinadusir digdi na “pinapagdadanay na harani sa isip” literal na nangangahulogan “pinaririkas.” Siempre, dai niato puedeng literal na ‘parikason’ an aldaw ni Jehova. An totoo, “dai [niato] naaaraman an aldaw ni an oras” kun noarin maabot si Jesu-Cristo tanganing hokoman an mga kaiwal kan saiyang Ama. (Mateo 24:36; 25:13) Ipinaliliwanag nin sarong reperensia na an pinakagamot na berbo kan pananaram digdi na “pinaririkas” nangangahulogan “‘padalion’  asin sa siring konektadong marhay sa ‘pagigin maigot, aktibo, interesado sa sarong bagay.’” Kaya sinasadol ni Pedro an mga kapagtubod na magin “makosog an pagmawot” sa presensia kan aldaw ni Jehova. Magigibo ninda ini paagi sa dayaday na pagpapadanay kaiyan sa isip. (2 Pedro 3:​12, nota sa ibaba) Huling haranihon na ngonyan an “dakula asin makangingirhat na aldaw ni Jehova,” iyan man an maninigong nasa isip na aktitud niato.​—Joel 2:31.

Maghalat na May “Banal na mga Gawe”

5. Paano niato ikapaheheling na “makosog an pagmawot” niato na maheling an “aldaw ni Jehova”?

⁵ Kun “makosog an pagmawot” niato na makaligtas sa aldaw ni Jehova, ipaheheling niato iyan paagi sa satong “banal na mga gawe asin gibo nin diosnon na debosyon.” An pananaram na “banal na mga gawe” puede nanggad na magpagirumdom sa sato kan sadol ni Pedro: “Bilang makinuyog na mga aki, dai na kamo mamolde sono sa dati nindong mga kamawotan kan kamo yaon pa sa kamangmangan, kundi, kaoyon sa Banal na Saro na nag-apod sa saindo, magin man kamong banal sa gabos nindong gawe, huli ta nasusurat: ‘Kaipuhan kamong magin banal, huli ta ako banal.’”​—1 Pedro 1:14-16.

6. Tanganing magin banal, ano an dapat niatong gibohon?

⁶ Tanganing magin banal, dapat niatong papagdanayon an kalinigan sa pisikal, mental, moral, asin espirituwal. Pinangangandaman daw niato an “aldaw ni Jehova” paagi sa pagpadanay kan satong sadiri na banal bilang mga indibiduwal na nagdadara kan ngaran ni Jehova? Bakong pasil ngonyan na papagdanayon an siring na kadalisayan huli ta an mga pamantayan sa moral kan kinaban dagos-dagos na nagrururo. (1 Corinto 7:31; 2 Timoteo 3:13) Naheheling daw niato na nagdadakula an pagkakalaen kan satong mga pamantayan sa moral asin kan sa kinaban? Kun dai, may dahelan kitang maghadit. Posible daw na an satong personal na mga pamantayan, minsan ngani mas halangkaw kisa kan sa kinaban, nagrururo? Kun iyo, kaipuhan kitang gumibo nin positibong aksion na itanos an mga bagay-bagay tanganing mapaogma an Dios.

7, 8. (a) Paano daw puedeng mawara sa isip niato an kahalagahan kan paggibo nin “banal na mga gawe”? (b) Anong nagtatanos na mga aksion an tibaad kaipuhan?

⁷ Huli sa pagtunga kan pornograpiya sa Internet asin huli ta nagagamit iyan sa pribado, an nagkapira na dati dai nakaheheling kan siring na inmoral na bagay nakakanompong na ngonyan nin “daing katapusan na suplay nin seksuwal na mga oportunidad,” an sabi nin sarong doktor. Kun kita maghahanap kan siring na maating mga site sa Internet, iniignoro nanggad niato an pagboot kan Biblia na “dai kamo dumotdot nin maating bagay.” (Isaias 52:11) Talaga daw na “pinagdadanay [niato] na harani sa isip an presensia kan aldaw ni Jehova”? O tibaad daw idinidigson niato sa satong isip an aldaw na iyan, na nagrarason na dawa inaatian niato an satong isip nin maating mga bagay, may panahon pa man kitang linigon an satong sadiri? Kun may problema kita manongod digdi, kaipuhan tolos-tolos na makimaherak ki Jehova na ‘iharayo an satong mga mata sa pakaheling kan daing halaga asin papagdanayon kitang buhay sa saiyang sadiring dalan’!​—Salmo 119:37.

⁸ An dakulang mayoriya kan Mga Saksi ni Jehova, mga hoben asin gurang, nangangapot sa halangkaw na mga pamantayan nin Dios sa moral asin linilikayan an inmoral na mga pan-akit kan kinaban na ini. Huling aram an pagkaapretado kan satong mga panahon asin kan patanid ni Pedro na “an aldaw ni Jehova madatong siring sa parahabon,” padagos sindang naggigibo nin “banal na mga gawe.” (2 Pedro 3:10) An saindang mga paghiro nagpapatunay na “hinahalat [ninda] asin pinapagdadanay na harani sa isip an presensia kan aldaw ni Jehova.” *

 Maghalat na May mga “Gibo nin Diosnon na Debosyon”

9. An diosnon na debosyon maninigong magpahiro sa sato na gibohon an ano?

⁹ An mga “gibo nin diosnon na debosyon” mahalaga man na marhay tanganing mapagdanay niato sa isip an aldaw ni Jehova. Kalabot sa “diosnon na debosyon” an reberensia sa Dios na nagpapahiro sa sato na gibohon an nakapaoogma sa saiyang pagheling. An maimbod na relasyon ki Jehova iyo an nagmomotibar na puersa sa likod kan siring na mga gibo nin diosnon na debosyon. Kabotan nia na “an gabos na klase nin tawo makaligtas asin makaabot sa tamang kaaraman sa katotoohan.” (1 Timoteo 2:4) “Dai . . . mawot [nin Dios] na an siisay man malaglag kundi mawot nia na an gabos makapagsolsol.” (2 Pedro 3:9) Kaya kun siring, bako daw na an satong diosnon na debosyon an maninigong magpahiro sa sato na dagdagan an mga paghihingoa niato na tabangan an mga tawo na makanood manongod ki Jehova asin arogon sia?​—Efeso 5:1.

10. Taano ta maninigo kitang magmaan tumang sa “mapandayang kapangyarihan nin kayamanan”?

¹⁰ An satong buhay magsosopay sa mga gibo nin diosnon na debosyon kun hinahanap nguna niato an Kahadean nin Dios. (Mateo 6:33) Kalabot digdi an pagkaigwa niato nin timbang na pagmansay sa materyal na mga bagay. Nagpatanid si Jesus: “Magpuka kamo asin lumikay kamo sa gabos na klase nin kaaraan, huli ta dawa kun an sarong tawo abunda an saiyang buhay dai minagikan sa mga bagay na saiyang nasasadirihan.” (Lucas 12:15) Minsan ngani tibaad masakit imahinaron na kita nabubuta na sa pagkamoot sa kuarta, marahay na tandaan niato na “an kahaditan kan sistemang ini nin mga bagay asin an mapandayang kapangyarihan nin kayamanan” puedeng ‘makalamos kan tataramon’ nin Dios. (Mateo 13:22) Tibaad bakong pasil an maghanap-buhay. Sa nagkapirang parte kan kinaban, dakol kun siring an nagrarason na tanganing magkaigwa nin mas marahay na buhay, kaipuhan sindang bumalyo sa sarong mas mayaman na nasyon, na binabayaan gayod an saindang pamilya sa laog nin pirang taon. Dawa an nagkapira sa banwaan nin Dios arog kaini an rason. Paagi sa pagduman sa ibang nasyon, tibaad mahimo nindang tawan an saindang pamilya nin modernong mga kagianan. Minsan siring, ano an tibaad mangyari sa espirituwal na kamugtakan kan saindang mga namomotan na walat sa harong? Kun mayo nin naggigibo kan tamang pagkapayo sa harong, magkakaigwa daw sinda kan espirituwalidad na kaipuhan tanganing makaligtas sa aldaw ni Jehova?

11. Paano ipinaheling nin sarong emigranteng trabahador na an mga gibo nin diosnon na debosyon mas mahalaga kisa mga kayamanan?

¹¹ An sarong emigranteng trabahador hale sa Pilipinas nanodan an katotoohan sa Biblia sa mga Saksi ni Jehova sa Hapon. Kan manodan an manongod sa mga paninimbagan nin pagkapayo sono sa Kasuratan, narealisar nia na kaipuhan niang tabangan an saiyang pamilya na magin mga parasamba ki Jehova. (1 Corinto 11:3) An agom nia na walat sa harong kontrang marhay sa bago niang manompongan na pagtubod asin an gusto padagos siang magpadara nin kuarta imbes na magpuli tanganing itokdo sa saiyang pamilya an saiyang mga tinutubod na basado sa Biblia. Minsan siring, huling napahiro kan pagkaapretado kan mga panahon asin pagmakolog sa saiyang mga namomotan, nagpuli sia. Binalosan an saiyang pasensia sa mamomoton na pagtratar sa mga miembro kan saiyang pamilya. Pag-abot nin panahon, an saiyang pamilya nagkasararo sa tunay na pagsamba, asin an agom nia naglaog sa bilog na panahon na ministeryo.

12. Taano ta maninigo niatong enoton sa buhay an espirituwal na intereses?

¹² An situwasyon niato puedeng iagid sa situwasyon  nin mga indibiduwal sa sarong edipisyo na nasosolo. Madonong daw na may pagkatarantang magpabalikbalik tanganing mangua nin materyal na mga bagay hale sa nag-aarab-adab na edipisyo na mabagsak na? Imbes, bako daw na orog pa nanggad na mahalaga na iligtas an buhay​—niato mismo asin kan satong pamilya saka kan iba pang nakaistar sa edipisyo? Bueno, an maraot na sistemang ini nin mga bagay marikas na nag-aabante pasiring sa pagbagsak kaiyan, asin buhay an nakataya. Sa pakarealisar kaini, maninigo nanggad na enoton nguna niato an espirituwal na intereses asin maigot na magkonsentrar sa nagliligtas-buhay na paghuhulit kan Kahadean.​—1 Timoteo 4:16.

Kaipuhan Kitang Magin “Daing Digta”

13. Maninigo na booton niato na kita nasa anong kamugtakan pagdatong kan aldaw ni Jehova?

¹³ Idinodoon an halaga nin pagpapadanay nin mapaghalat na aktitud, si Pedro nagsasabi: “Mga namomotan, mantang naghahalat kamo kan mga bagay na ini, giboha an bilog nindong makakaya na sa katapustapusi makua [nin Dios na] daing digta asin dai nin kanawayan patin nasa katoninongan.” (2 Pedro 3:14) Apuera sa sadol nia na gumibo nin banal na mga gawe asin gibo nin diosnon na debosyon, idinodoon ni Pedro an halaga na kita makua ni Jehova sa katapustapusi bilang mga indibiduwal na lininig kan mahalagang marhay na dugo ni Jesus. (Kapahayagan 7:​9, 14) Naghahagad ini na an saro magtubod sa atang ni Jesus asin magin nagdusay saka bautisadong lingkod ni Jehova.

14. Ano an kalabot sa pagigin “daing digta”?

¹⁴ Sinasadol kita ni Pedro na gibohon an satong pinakamakakaya na kita makuang “daing digta.” Pinagdadanay daw niato na daing digta an satong gubing na Kristianong gawe-gawe asin personalidad, na dai naaatian kan kinaban? Kun may marisa kitang digta sa satong bado, tolos-tolos na hinihingoa niatong haleon iyan. Kun paboritong gubing an kalabot, nangorognang maingat niatong linilinigan iyan. Iyan man daw an saboot niato kun an satong Kristianong gubing mamantsahan, sabi ngani, huli sa sarong depekto sa satong personalidad o gawe-gawe?

15. (a) Taano an mga Israelita ta dapat na gumibo nin mga kabingkabing sa gayad kan saindang mga gubing? (b) Taano ta lataw an kalaenan kan mga lingkod ni Jehova sa presenteng panahon?

¹⁵ An mga Israelita kaidto dapat na gumibo nin “mga kabingkabing sa gayad kan saindang mga gubing” asin “magbugtak nin asul na bogkos sa itaas kan mga kabingkabing sa gayad kan gubing.” Taano? Tanganing magirumdoman ninda an mga togon ni Jehova, kuyogon iyan, asin “magin banal” sa saindang Dios. (Bilang 15:38-40) Bilang mga lingkod ni Jehova sa presenteng panahon, lataw an kalaenan niato sa kinaban huli ta kinukuyog niato an mga ley asin prinsipyo nin Dios. Halimbawa, pinagdadanay niato an kalinigan sa moral, iginagalang niato an kabanalan nin dugo, asin linilikayan niato an gabos na klase nin idolatriya. (Gibo 15:​28, 29) Dakol an naggagalang sa sato huli sa marigon na determinasyon niato na magdanay na daing digta.​—Santiago 1:27.

Kaipuhan Kitang Magin “Dai nin Kanawayan”

16. Ano an kalabot sa pagdadanay niato na “dai nin kanawayan”?

¹⁶ Sinasabi man ni Pedro na dapat kitang makua na “dai nin kanawayan.” Paano iyan posible? Sa pankagabsan an digta puedeng punason o linigon alagad an kanawayan dai. An kanawayan nagpaparisa na may nasa laog na sala, may diperensia. Sinadol ni apostol Pablo an mga kapwa Kristiano sa Filipos: “Padagos nindong gibohon an gabos na bagay na mayo nin mga paggumodgumod asin diriskutiran, tanganing magin kamong daing katuyawan asin inosente, mga aki nin Dios na daing kanawayan sa tahaw nin biko asin piripit na kapag-arakian, na sa tahaw kaiyan kamo nagliliwanag siring sa mga ilaw sa kinaban.” (Filipos 2:​14, 15) Kun  kukuyogon niato an sadol na iyan, lilikayan niato an mga paggumodgumod asin diriskutiran patin paglilingkodan an Dios huli sa dalisay na motibo. Pahihiroon kita kan pagkamoot ki Jehova asin sa satong kapwa mantang ihinuhulit niato “an maogmang baretang ini kan kahadean.” (Mateo 22:35-40; 24:14) Dugang pa, padagos niatong ibabalangibog an maogmang bareta minsan ngani tibaad dai nasasabotan kan kadaklan na tawo kun taano ta ibinoboluntaryo niato an satong panahon sa paghihingoang tabangan an iba na makanood manongod sa Dios asin sa saiyang Tataramon, an Biblia.

17. Ano an maninigo na magin motibo niato kun hinihingoa niato na maabot an mga pribilehio sa Kristianong kongregasyon?

¹⁷ Huling mawot niato na kita makuang “dai nin kanawayan,” marahay na siyasaton niato an satong motibo sa gabos niatong ginigibo. Binayaan na niato an paagi nin paghiro kan kinaban na huli sa maimot na mga dahelan, arog baga kan pagmamaigot na magkamit nin mga kayamanan o kapangyarihan. Kun hinihingoa niato na maabot an mga pribilehio sa Kristianong kongregasyon, logod na an satong motibo magdanay na dalisay asin logod na kita pirmeng motibado nin pagkamoot ki Jehova asin sa iba. Nakagiginhawang maheling an espirituwal na mga lalaki na “naghihingoang maabot an katongdan nin paraataman” na may kagayagayahan asin mapakumbabang pagmawot na magpaoripon ki Jehova asin sa mga kapagtubod ninda. (1 Timoteo 3:1; 2 Corinto 1:24) Tunay nanggad, an mga kualipikadong maglingkod bilang kamagurangan ‘pinapastoran an aripompon nin Dios nin gikan sa boot; bakong huli sa pagkamoot sa madayang pakinabang, kundi may kaigotan; ni nagpapakangkagurangnan sa mga mana nin Dios, kundi nagigin mga halimbawa sa aripompon.’​—1 Pedro 5:1-4.

Kaipuhan na Kita “Nasa Katoninongan”

18. Sa anong mga kualidad midbid na marhay an Mga Saksi ni Jehova?

¹⁸ Sa katapustapusi, sinasabihan kita ni Pedro na kita makuang “nasa katoninongan.” Tanganing maotob an kahagadan na ini, kaipuhan kitang magkaigwa nin pakipagkatoninongan ki Jehova asin sa satong kapwa. Idinodoon ni Pedro an halaga nin pagkaigwa nin “malaad na pagkamoot sa lambang saro” asin nin pagpapadanay nin katoninongan sa satong mga kapwa Kristiano. (1 Pedro 2:17; 3:​10, 11; 4:8; 2 Pedro 1:5-7) Tanganing mapagdanay an satong katoninongan, dapat kitang magkaminorootmootan. (Juan 13:​34, 35; Efeso 4:​1, 2) An satong pagkamoot asin katoninongan partikularmenteng naririsa kun igwa kita nin internasyonal na mga kombension. Sa sarong kombension sa Costa Rica kan 1999, an sarong paratinda sa aeropuerto naanggot huli ta an saiyang tindahan dai tinutuyong nalipodan kan lokal na mga Saksi na maogmang nagsasarabat sa nag-aarabot na delegado. Minsan siring, sa ikaduwang aldaw narisa nia an pagkamoot asin katoninongan na ipinaheling sa entusiastikong pag-ako sa mga delegado, minsan ngani dai sinda personal na midbid kan lokal na mga Saksi. Sa ultimong aldaw, an paratinda uminiba sa maogmang pag-ako asin nakiolay na sia adalan sa Biblia.

19. Taano ta mahalagang marhay na maghingoang magkaigwa nin pakipagkatoninongan sa mga kapagtubod?

 ¹⁹ An satong sinseridad sa paghihingoang magkaigwa nin pakipagkatoninongan sa satong espirituwal na mga tugang na lalaki asin babae puede nanggad na magkaigwa nin epekto sa kun gurano kita kaodok na naghahalat sa aldaw ni Jehova asin sa saiyang ipinanugang bagong kinaban. (Salmo 37:11; 2 Pedro 3:13) Ipamugtak ta baga na nasasakitan kitang papagdanayon an pakipagkatoninongan sa sarong kapagtubod. Maiimahinar daw niato na kita matoninong na nag-eerok kaiba nia sa Paraiso? Kun an sarong tugang igwa nin tumang sa sato, maninigo na tolos-tolos kitang ‘makipagkatoninongan sa saiya.’ (Mateo 5:​23, 24) Mahalagang marhay an paggibo kaiyan tanganing kita magkaigwa nin pakipagkatoninongan ki Jehova.​—Salmo 35:27; 1 Juan 4:20.

20. An “mapaghalat na aktitud” maninigo na maheling sa anong mga paagi?

²⁰ Sato daw mismong “hinahalat asin pinapagdadanay na harani sa isip an presensia kan aldaw ni Jehova”? An odok na pagmawot niato na maheling an katapusan kan karatan maheheling sa satong pagdadanay na banal sa inmoral na kinaban na ini. Dugang pa, an odok na paghimuyawot niato sa pagdatong kan aldaw ni Jehova asin sa buhay sa irarom kan pamamahala kan Kahadean maheheling sa satong mga gibo nin diosnon na debosyon. Asin an pag-antisipar niato na mabuhay sa matoninong na bagong kinaban naheheling sa satong paghihingoa na magkaigwa nin pakipagkatoninongan sa satong mga kapagtubod ngonyan. Paagi kaiyan, ipinaheheling niato na kita igwa nin “mapaghalat na aktitud” asin “pinapagdadanay [niato] na harani sa isip an presensia kan aldaw ni Jehova.”

[Nota sa Ibaba]

Nagigirumdoman daw Nindo?

• Ano an boot sabihon kan ‘papagdanayon na harani sa isip an presensia kan aldaw ni Jehova’?

• Paano naheheling an “mapaghalat na aktitud” may koneksion sa satong gawe-gawe?

• Taano ta mahalagang marhay an “mga gibo nin diosnon na debosyon”?

• Ano an dapat niatong gibohon tanganing kita makua ni Jehova na “daing digta asin dai nin kanawayan patin nasa katoninongan”?

[Mga Hapot Para sa Pag-adal]

[Ritrato sa pahina 11]

An “mapaghalat na aktitud” naheheling sa banal na mga gawe

[Mga Ritrato sa pahina 12]

An paghuhulit kan Kahadean nagliligtas-buhay

[Ritrato sa pahina 14]

Mantang hinahalat niato an aldaw ni Jehova, hingoahon niato na magkaigwa nin pakipagkatoninongan sa iba