Kadukhaan—Pakanompong sa Permanenteng Solusyon

SA IBONG kan negatibong mga report hale sa bilog na kinaban manongod sa kadukhaan, may mga nagdadanay na optimistiko na igwa pang aktuwal na magigibo. Halimbawa, segun sa sarong bareta sa Manila Bulletin, an Asian Development Bank nagreport na “puedeng haleon kan Asia an kadukhaan sa laog nin 25 taon.” Irinekomendar kan bangko an pagpaoswag sa ekonomiya bilang paagi na mahawas an mga tawo sa labi-labing kadukhaan.

An ibang organisasyon asin gobyerno nagpaluwas nin halabang lista nin mga suhestion asin plano sa pagmamaigot na resolberan an problemang iyan. Kabilang dian an mga: programa sa seguro sosyal, mas marahay na edukasyon, pagkanselar sa utang kan nagpoprogreso pa sanang mga nasyon sa industrialisadong mga nasyon, paghale sa mga olang sa pag-importar tanganing an mga nasyon na may dakulang porsentahe nin mga dukha mas pasil na makakapabakal kan saindang mga produkto, asin baratong istaran para sa mga dukha.

Kan taon 2000, an Junta Heneral kan Estados Unidos nagbugtak nin mga pasohan na magigibo sa 2015. Kaiba digdi an paghale sa labi-labing kadukhaan asin gutom saka an grabeng kawaran nin pagkapantaypantay kan ginaganar sa laog nin mga nasyon. Gurano man tibaad kanoble kan siring na mga pasohan, dakol an nagdududa na iyan magigibo sa kinaban na ini na dai nagkakasararo.

Praktikal na mga Lakdang Tanganing Maatubang an Kadukhaan

Mantang an paglaom para sa tunay na pag-oswag sa bilog na kinaban bakong segurado, saen puedeng dumolok an saro para sa tabang? Arog kan nasambitan na, igwa nin sarong gikanan nin  praktikal na kadonongan na puedeng makatabang sa mga tawo ngonyan na mismo. Ano iyan? Iyan an Tataramon nin Dios, an Biblia.

Ano an nagpagin laen kan Biblia sa gabos na iba pang gikanan nin impormasyon? Iyan hale sa pinakahalangkaw na autoridad, an satong Kaglalang. Ilinaag nia sa mga pahina kaiyan an mga mutya nin kadonongan​—praktikal na mga prinsipyo na aplikable sa gabos na tawo, sa gabos na lugar, asin sa gabos na panahon. Kun iaaplikar, an mga prinsipyong ini puedeng makatabang sa mga dukha na makamit an mas nakakokontentong buhay dawa ngonyan. Helingon niato an pira sanang halimbawa.

Magkaigwa nin tamang pagmansay sa kuarta. An Biblia nagsasabi: “An kadonongan para sa proteksion kun paanong an kuarta para sa proteksion; alagad an bentaha nin kaaraman iyo na an kadonongan mismo nagpapadanay na buhay sa mga nakasasadiri kaiyan.” (Eclesiastes 7:12) Ano an punto? An kuarta bakong an pinakamahalaga sa gabos na bagay. Totoo, nagtatao iyan nin sarong sokol nin seguridad. Pinapangyari kaiyan na mabakal niato an nagkapirang bagay na kaipuhan niato, alagad may mga limitasyon iyan. May mga bagay na orog na dakula an halaga na dai puedeng bakalon nin kuarta. An pagrekonoser sa katunayan na ini matabang sa sato na mapagdanay an materyal na mga bagay sa tamang lugar kaiyan, sa siring malilikayan niato an pagkadiskontento kan mga nakasentro an buhay sa pagparatipon nin kuarta. Dai puedeng bakalon nin kuarta an buhay, alagad an paghiro na may kadonongan puedeng magprotehir sa buhay ngonyan asin puedeng magbukas pa ngani sa posibilidad na daing katapusan na buhay.

Mamuhay sono sa kaya sana nindo. An satong mga gusto bako pirmeng kapareho kan satong mga pangangaipo. Maninigong tawan nin prioridad an satong mga pangangaipo. Pasil sanang kombensiron an satong sadiri na kaipuhan niato an sarong bagay, mantang an totoo iyan gusto sana niato asin bakong pangangaipo. An madonong na tawo gagamiton nguna an hinanapan sa presenteng mga pangangaipo​—pagkakan, gubing, istaran, asin iba pa. Dangan, bago gastohon an ano man na ekstra, dedeterminaran nia kun an natatada sa pondo nia supisyente pa tanganing makabakal nin dugang pang mga bagay. Sa saro sa mga ilustrasyon nia, irinekomendar ni Jesus na an saro ‘tumukaw nguna asin kuentahon an gastos, tanganing helingon kun igwa sia nin igo.’​—Lucas 14:28.

Sa Pilipinas, si Eufrosina, sarong nagsosolong magurang na may tolong aki, nakaeksperyensia kan kadepisilan nin paghanapbuhay asin pagsunod sa estriktong badyet poon kan bayaan sia kan saiyang agom pirang taon na an nakaagi. Mantang ginigibo iyan, sinanay nia an saiyang mga aki na marekonoser an dapat na enoton sa badyet. Halimbawa, an mga aki tibaad may maheling na sarong bagay na gusto ninda. Imbes na sabihon na dai puede, nakikipagrasonan sia sa sainda paagi sa pagsabing: “Bueno, puedeng mapasaimo iyan kun gusto mo, alagad kaipuhan mong magpili. An satong kuarta igo sana para sa sarong bagay. Puede kitang magbakal kan bagay na ini na gusto mo, o puede kitang magbakal nin kadikit na karne o mga gulay na panira ta para sa semanang ini. Ngonyan, ano an gusto mo? Magpili ka.” Sa parate, tolos na nasasabotan kan mga aki an punto asin minaoyon na gusto ninda na magkaigwa nin kakanon imbes na ibang bagay.

Manigoan. “Mantang igwa na nin kakanon asin gubing, maninigoan na kita sa mga bagay na ini,” an sabi kan saro pang prinsipyo sa Biblia. (1 Timoteo 6:8) An kuarta mismo dai nagtatao nin kaogmahan. Dakol na mayaman an bakong maogma, mantang dakol na dukha an maogmahon. An mga nasambitan na huri nakanood na manigoan sa simple sanang mga bagay na kaipuhan sa buhay. Nagtaram si Jesus manongod sa pagkaigwa nin ‘simpleng mata’ na nakaturuhok sa mas mahalagang mga bagay. (Mateo 6:22) Tinatabangan kaini  an saro na manigoan. Dakol na dukha an nakamamateng biyong naninigoan huli ta nakultibar ninda an sarong marahay na relasyon sa Dios asin igwa sinda nin maogmang buhay pampamilya​—mga bagay na dai puedeng bakalon nin kuarta.

Pira sana ini sa mga halimbawa kan praktikal na mga suhestion sa Biblia na puedeng makatabang sa mga dukha na makaya an saindang situwasyon. Kadakol pang iba kaini. Halimbawa, likayan an mga bisyo na arog nin paninigarilyo asin paghuego, na nagsasayang sa kuarta; aramon an mas mahalagang mga bagay sa buhay, partikularmente an espirituwal na mga pasohan; kun limitado an empleyo, pagmaigotan na ialok sa iba an saindong abilidad o magtao nin serbisyo na kaipuhan kan iba. (Talinhaga 22:29; 23:21; Filipos 1:9-11) Irinerekomendar kan Biblia an pag-aplikar kan siring na “praktikal na kadonongan asin kakayahan sa pag-iisip” huli ta “sinda magigin buhay sa saimong kalag.”​—Talinhaga 3:​21, 22.

Minsan ngani an mga suhestion sa Biblia tibaad makatao nin nakatatabang na pakaginhawa sa mga nagsasakit sa kadukhaan, an mga hapot manongod sa ngapit yaon pa man giraray. An mga dukha daw segurado nang magdadanay na dukha sagkod lamang? Mareremedyohan pa daw an pagigin bakong magkapantay kan mga mayaman na marhay asin kan dukhang marhay? Siyasaton niato an sarong solusyon na dai naaaraman nin dakol.

An Biblia Nagtatao nin Dahelan na Maglaom

Inaadmitir nin dakol na an Biblia sarong marahay na libro. Minsan siring, sa parate dai ninda aram na nag-aalok iyan nin espesipikong impormasyon na nagtotokdo sa dakulang pagbabago na madali nang mangyari.

Intension nin Dios na humiro tanganing resolberan an mga problema nin katawohan, kaiba na an kadukhaan. Mantang pinatunayan kan mga gobyerno nin tawo na dai ninda kaya o habo nindang gibohon iyan, intension nin Dios na salidahan sinda. Paano? May pagdodoon na sinabi kan Biblia sa Daniel 2:44: “An Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan.”

Pagkatapos na haleon an mga “kahadean,” o mga gobyernong ini, mahiro an ninombrahan mismo nin Dios na Namamahala. An Namamahalang iyan bakong tawo kundi sarong makapangyarihan na langitnon na persona na arog mismo nin Dios, na igwa nin abilidad na makagibo nin dakulang mga pagbabago na kinakaipuhan tanganing mahale an kawaran nin pagkapantaypantay sa presente. Pinili nin Dios an saiya mismong Aki tanganing gibohon ini. (Gibo 17:31) Ilinaladawan kan Salmo 72:12-14 an gigibohon kan Namamahalang ini, na sinasabi: “Ililigtas nia an dukha na naghahagad nin tabang, siring man an nagsasakit nin makuri asin an siisay man na mayo nin paratabang. Maheherak sia sa hababa asin sa dukha, asin an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag, asin an saindang dugo magigin mahalagang marhay sa saiyang mga mata.” Kanigoan kamakangangalas na paglaom! Magkakaigwa nin pakaginhawa sa katapustapusi! An ninombrahan nin Dios na Namamahala mahiro para sa mga dukha asin hamak.

 Kaya mareresolberan sa panahon na iyan an kadakol na problema na may koneksion sa kadukhaan. An bersikulo 16 kan Salmo 72 nagsasabi: “Magkakaigwa nin abundang tipasi sa ibabaw kan daga; maglilipwas sa alitoktok kan kabukidan.” Mayo na nin kakulangan nin kakanon na resulta nin tiggutom, kakulangan nin kuarta, o depektosong administrasyon.

An ibang problema mareresolberan man. Halimbawa, dakulang porsentahe kan nag-iistar sa daga an mayong sadiring harong ngonyan. Minsan siring, an Dios nanunuga: “Sinda siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan. Dai sinda matogdok asin iba an maontok; dai sinda matanom asin iba an makakan. Huli ta magigin siring sa mga aldaw nin kahoy an mga aldaw kan sakuyang banwaan; asin an ginibo kan saindang mga kamot lubos na gagamiton kan sakuyang mga pinili.” (Isaias 65:​21, 22) An gabos magkakaigwa kan sadiri niang harong asin mag-oogma sa saiyang trabaho. Kaya nanunuga an Dios nin lubos asin permanenteng solusyon sa kadukhaan. Mayo na nin mahiwas na siwang sa pag-oltanan nin mayaman asin dukha, mayo na nin mga tawong maglalapigot tangani sanang mabuhay.

Kun madangog sa kaenot-enote an mga panugang ini sa Biblia, tibaad magsaboot an saro na bako iyan realistiko. Minsan siring, an pagsiyasat na marhay sa Biblia nagpapaheling na an gabos na panuga nin Dios kan nakaagi naotob. (Isaias 55:11) Kaya iyan bako sanang pagsabing kun mangyayari iyan. Imbes, an tunay na hapot iyo an, Ano an dapat nindong gibohon tanganing makinabang kun mangyari na iyan?

Yaon daw Kamo Dian?

Mantang iyan gobyerno nin Dios, dapat kitang magin an klase nin mga tawo na aakoon nin Dios bilang mga siudadano sakop kan pamamahalang iyan. Dai man nia kita pinabayaan na daing aram kun paano makakualipikar. Sinasabi sa Biblia an mga giya.

An ninombrahan na Namamahala, an Aki nin Dios, matanos. (Isaias 11:3-5) Sa siring, an mga inako tanganing mabuhay sakop kan gobyernong ini inaasahan man na magin matanos. An Talinhaga 2:​21, 22 nagsasabi: “An mga tanos iyo an mag-eerok sa daga, asin an mga daing katuyawan iyo an matatada dian. Kun dapit sa mga maraot, sinda popohoon sa mismong daga; asin kun manongod sa mga madaya, sinda hahaleon dian.”

Igwa daw nin ano man na paagi na manodan kun paano maootob an mga kahagadan na ini? Iyo, igwa. Paagi sa pag-adal kan Biblia asin pag-aplikar kan mga giya kaiyan, puede nindong makamit an makangangalas na ngapit na ini. (Juan 17:3) Maoogma an mga Saksi ni Jehova na tabangan kamo sa pag-adal na iyan. Inaagda niamo kamo na aprobetsaran an oportunidad na ini na makabilang sa sarong sosyedad na nungka nang makaeeksperyensia nin kadukhaan asin inhustisya.

[Ritrato sa pahina 5]

Eufrosina: “Nakatabang sa sakong pamilya an estriktong badyet tanganing magkaigwa kan kaipuhan ninda”

[Mga Ritrato sa pahina 6]

Dai puedeng bakalon nin kuarta an marahay na relasyon sa Dios asin maogmang buhay pampamilya