An mga Lingkod ni Jehova Igwa nin Tunay na Paglaom

“An mga nagkawaralat ni Jacob kaipuhan na magin siring sa ambon hale ki Jehova sa tahaw nin dakol na banwaan . . . na dai naglalaom sa tawo.”—MIQUEAS 5:7.

1. Paanong an espirituwal na Israel sarong gikanan nin kaginhawahan?

SI Jehova an dakulang Kaggibo nin oran asin ambon. Basang sanang maglaom na an mga tawo makatatao nin magsalang ambon o oran. Nagsurat si propeta Miqueas: “An mga nagkawaralat ni Jacob kaipuhan na magin siring sa ambon hale ki Jehova sa tahaw nin dakol na banwaan, siring sa ragiri sa ibabaw nin mga pananom, na dai naglalaom sa tawo o naghahalat sa mga aki nin daganon na tawo.” (Miqueas 5:7) Siisay an “mga nagkawaralat ni Jacob” sa presenteng panahon? Sinda an espirituwal na mga Israelita, an natatada kan “Israel nin Dios.” (Galacia 6:16) Para sa “dakol na banwaan” sa daga, sinda siring sa nakagiginhawang “ambon hale ki Jehova” asin “ragiri sa ibabaw nin mga pananom.” Iyo, an linahidan na mga Kristiano ngonyan sarong bendisyon sa mga tawo hale sa Dios. Bilang mga parabalangibog kan Kahadean, ginagamit sinda ni Jehova tanganing itao sa mga tawo an saiyang mensahe nin tunay na paglaom.

2. Taano ta igwa kita nin tunay na paglaom apisar na nabubuhay sa maribok na kinaban na ini?

² Dai maninigong ipagngalas na an kinaban na ini mayo nin tunay na paglaom. Kadaihan nin kasegurohan sa politika, pagbagsak nin moral, krimen, krisis sa pagbuhay, terorismo, mga guerra​—inaasahan niato an siring na mga bagay sa sarong kinaban na dominado ni Satanas na Diablo. (1 Juan 5:19) Dakol an natatakot sa tibaad nakatagama sa ngapit. Minsan siring, bilang mga nagsasamba ki Jehova, dai kita natatakot, ta igwa kita nin seguradong paglaom sa ngapit. Iyan totoong paglaom huli ta iyan basado sa Tataramon nin Dios. May pagtubod kita ki Jehova asin sa saiyang Tataramon huli ta an sinasabi nia pirmeng nagkakatotoo.

3. (a) Taano ta magibo nin aksion si Jehova tumang sa Israel asin Juda? (b) Taano ta minaaplikar ngonyan an mga tataramon ni Miqueas?

³ An ipinasabong nin Dios na hula ni Miqueas nagpapakosog sa sato na lumakaw sa ngaran ni Jehova asin nagtatao sa sato nin basehan para sa tunay na paglaom. Kan ikawalong siglo B.C.E., kan maghula si Miqueas, an katipan na banwaan nin Dios nababanga sa duwang nasyon​—an Israel asin Juda​—asin pareho iyan dai nag-iintindi sa tipan nin Dios. An resulta pagbagsak sa moral, apostasiya sa relihion, asin grabeng materyalismo. Huli kaini, nagpatanid si Jehova na magibo sia nin aksion tumang sa sainda. Siempre, an patanid nin Dios para sa mga katemporanyo ni Miqueas. Minsan siring, an situwasyon sa presenteng panahon kaparehong marhay kan panahon ni Miqueas kaya an saiyang mga tataramon minaaplikar man ngonyan. Magigin risang-risa ini mantang ineestudyaran niato an nagkapirang tampok na kabtang kan pitong kapitulo kan libro ni Miqueas.

An Ihinahayag nin Sumaryo Kaiyan

4. Anong impormasyon an itinatao kan Miqueas kapitulo 1 sagkod 3?

⁴ Helingon niato sa halipot an mga laog kan libro ni Miqueas. Sa kapitulo 1, ibinubuyagyag ni Jehova an pagrebelde kan Israel asin Juda. Bilang  resulta kan saindang pagigin delingkuente, an Israel lalaglagon asin an padusa sa Juda makakaabot pa ngani sa mga tata nin Jerusalem. Ihinahayag kan kapitulo 2 na inaapi kan mga mayaman asin makapangyarihan an mga maluya asin daing maginibo. Pero, may panuga man an Dios. An banwaan nin Dios titiponon sa pagkasararo. Ibinabareta kan kapitulo 3 an mga kapahayagan ni Jehova tumang sa mga namomoon sa nasyon asin delingkuenteng mga propeta. Binibiribid kan mga namomoon an hustisya, asin an mga propeta mga kaputikan an pigtataram. Sa ibong kaini, si Miqueas pinakosog kan banal na espiritu na ibalangibog an maabot na paghokom ni Jehova.

5. Ano an pinakasumaryo kan Miqueas kapitulo 4 asin 5?

⁵ Ihinuhula kan kapitulo 4 na sa huring kabtang kan mga aldaw, an gabos na nasyon mapasiring sa halangkaw na bukid kan harong ni Jehova tanganing matokdoan nia. Bago kaiyan, an Juda madidistiero sa Babilonya, alagad kakaldahon sia ni Jehova. Ihinahayag kan kapitulo 5 na an Mesiyas mamumundag sa Betlehem nin Juda. Papastoran nia an saiyang banwaan asin kakaldahon sinda sa mapan-aping mga nasyon.

6, 7. Anong mga punto an iinaatubang sa kapitulo 6 asin 7 kan hula ni Miqueas?

⁶ Nakasurat sa Miqueas kapitulo 6 an mga akusasyon ni Jehova tumang sa saiyang banwaan sa porma nin sarong legal na kaso. Ano an ginibo nia tanganing magrebelde sinda? Mayo. An totoo, an saiyang mga kahagadan rasonableng marhay. Gusto nia na an mga nagsasamba sa saiya gumibo nin hustisya asin magin maboot patin hababa an boot mantang sinda naglalakaw sa kaibanan nia. Imbes na gibohon iyan, an Israel asin Juda nagrebelde asin kaipuhan na magdusa kan mga resulta.

⁷ Sa ultimong kapitulo kan saiyang hula, idinenunsiar ni Miqueas an karatan kan saiyang mga katemporanyo. Minsan siring, dai sia nadesganar, ta sia determinadong ‘magpaheling nin mapaghalat na aktitud’ ki Jehova. (Miqueas 7:7) An libro nagtatapos paagi sa sarong kapahayagan nin kompiansa na kaheherakan ni Jehova an saiyang banwaan. Pinatutunayan kan kasaysayan na naotob an linalaoman na ini. Kan 537 B.C.E., kan matapos na an pagdisiplina ni Jehova sa saiyang banwaan, maheherakon niang ibinalik an natatada sa sadiri nindang daga.

8. Paano nindo susumaryohon an mga laog kan libro ni Miqueas?

⁸ Kanigoan karahay na impormasyon an ihinayag ni Jehova paagi ki Miqueas! An ipinasabong na librong ini nagtatao nin nagpapatanid na mga halimbawa kun ano an ginigibo nin Dios sa mga naghihingako  na naglilingkod sa saiya alagad bakong fiel. Ihinuhula kaiyan an mga pangyayari na nangyayari ngonyan. Asin itinatao kaiyan an konseho nin Dios manongod sa kun paano kita maninigong gumawe durante kan masakit na mga panahon na ini tanganing parigonon an satong paglaom.

Nagtaram an Soberanong Kagurangnan na Jehova

9. Segun sa Miqueas 1:​2, ano an gigibohon ni Jehova?

⁹ Siyasaton niato ngonyan nin mas detalyado an libro ni Miqueas. Sa Miqueas 1:​2, mababasa niato: “Pagdangog kamo, O kamong mga banwaan, kamo gabos; magtao ka nin atension, O daga asin an gabos na yaon sa saimo, asin an Soberanong Kagurangnan na Jehova magin logod saksi tumang sa saindo, si Jehova hale sa saiyang banal na templo.” Kun kamo nabubuhay kan panahon ni Miqueas, daing duda na nakua kan mga tataramon na iyan an saindong atension. Sa katunayan, talagang nakukua kaiyan an saindong atension huli ta si Jehova nagtataram hale sa saiyang banal na templo asin kinakaolay bako sanang an Israel asin Juda kundi an mga tawo sa gabos na lugar. Kan kaaldawan ni Miqueas, inignoro kan mga tawo an Soberanong Kagurangnan na Jehova sa halawigon na panahon. Dai na mahahaloy, mababago iyan. Determinado si Jehova na gumibo nin desididong aksion.

10. Taano ta may importansia sa sato an mga tataramon sa Miqueas 1:2?

¹⁰ Totoo man iyan sa satong kaaldawan. Ipinaheheling kan Kapahayagan 14:18-20 na nagkokomunikar giraray si Jehova hale sa saiyang banal na templo. Dai na mahahaloy magibo sia nin desididong aksion, asin an katawohan yuyugyugon giraray nin importanteng mga pangyayari. Sa panahon na ini, an maraot na “poon nin ubas kan daga” iaapon sa dakulang pugaan nin ubas kan kaanggotan ni Jehova, sa biyong pagkalaglag kan sistema nin mga bagay ni Satanas.

11. Ano an boot sabihon kan mga tataramon sa Miqueas 1:​3, 4?

¹¹ Hinanyoga an gigibohon ni Jehova. An Miqueas 1:​3, 4 nagsasabi: “Uya! si Jehova maluwas sa saiyang namumugtakan, asin sia mahilig asin babatayan an haralangkaw na lugar kan daga. Asin an mga bukid magkakaturunaw sa irarom nia, asin an mga kababan magkakagaratak, siring sa taro huli sa kalayo, siring sa mga tubig na nagbobolos sa sarong bakilid.” Mahale daw si Jehova sa saiyang langitnon na erokan asin literal na babatayan an mga bukid asin mga kababan kan Dagang Panuga? Dai. Dai nia kaipuhan na gibohon iyan. An kaipuhan sana nia itao an saiyang atension sa daga tanganing magibo an saiyang kabotan. Dugang pa, bakong an literal na daga, kundi an mga nag-iistar an maaapektaran na marhay kan mga bagay na ilinadawan. Kun si Jehova humiro na, an resulta magigin kapahapahamak para sa mga bakong fiel​—na garo baga an mga bukid nagkaturunaw siring sa taro asin an mga kababan nagkagaratak huli sa linog.

12, 13. Kaoyon kan 2 Pedro 3:​10-​12, ano an nagpapangyari na magin segurado an satong paglaom?

¹² An makahulang mga tataramon sa Miqueas 1:​3, 4 tibaad magpagirumdom sa saindo kan saro pang ipinasabong na hula na nagsasabi kan kapahapahamak na mga pangyayari sa daga. Arog kan nakasurat sa 2 Pedro 3:​10, nagsurat si apostol Pedro: “An aldaw ni Jehova madatong siring sa parahabon, na dian an kalangitan mawawara na may nagsasagitsit na ribok, alagad an mga elemento mantang labi-labi kainit matutunaw, asin an daga asin an mga gibo-gibo dian mahahayag.” Kapareho kan hula ni Miqueas, an mga tataramon ni Pedro dai minapanongod sa literal na kalangitan asin daga. Nanonongod iyan sa dakulang kahorasaan na madatong sa maraot na sistemang ini nin mga bagay.

¹³ Sa ibong kan nagdadangadang na grabeng kapahamakan na iyan, an mga Kristiano puedeng magkaigwa nin kompiansa sa ngapit, arog ki Miqueas. Paano? Paagi sa pagsunod sa hatol na makukua sa sunod na mga bersikulo kan surat ni Pedro. An apostol nagkagsing: “Kamo maninigong magin anong klaseng mga tawo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova!” (2 Pedro 3:​11, 12) An satong paglaom para sa ngapit magigin segurado kun kukultibaron niato an makinuyog na puso asin seseguradohon niato na an satong gawe-gawe banal asin an satong buhay pano nin mga gibo nin diosnon na debosyon. Tanganing magin segurado an satong paglaom, dapat man niatong girumdomon na an aldaw ni Jehova talagang madatong.

14. Taano ta maninigong kastigohon an Israel asin Juda?

¹⁴ Ipinaliliwanag ni Jehova kun taano ta  maninigong kastigohon an saiyang suanoy na banwaan. An Miqueas 1:5 nagsasabi: “Huli sa pagrebelde kan Jacob kaya nangyari ini gabos, huli ngani sa mga kasalan kan harong nin Israel. Ano an pagrebelde kan Jacob? Bako daw na an Samaria? Asin ano an haralangkaw na lugar nin Juda? Bako daw na an Jerusalem?” Utang kan Israel asin Juda ki Jehova an sainda mismong pag-eksister. Pero, nagrebelde sinda tumang sa saiya, asin an saindang pagrebelde uminabot pati sa sainda mismong kabiserang mga siudad, an Samaria asin Jerusalem.

Lakop an Maraot na mga Gibo

15, 16. Nagkasala nin anong maraot na mga gibo an mga katemporanyo ni Miqueas?

¹⁵ An sarong halimbawa kan karatan kan mga katemporanyo ni Miqueas malinaw na ilinaladawan sa Miqueas 2:​1, 2: “Herak man kan mga nagpapakana nin bagay na nakadadanyar, asin kan mga naggigibo nin maraot, sa saindang mga higdaan! Sa liwanag nin kaagahon sinda naggigibo kaiyan, huli ta iyan nasa kapangyarihan kan saindang kamot. Asin pinagmawot ninda an mga oma asin inagaw an mga iyan; siring man an mga harong, asin kinurua iyan; asin saindang tinikas an pusog na lalaki asin an saiyang pamilya, an lalaki asin an saiyang minanang rogaring.”

¹⁶ An mahanab na mga indibiduwal mata dawa nakahigda sa banggi na nagpapakana kun paano aagawon an mga oma asin harong kan saindang mga kataed. Pagkaaga, naghuhumari sindang gibohon an saindang mga pakana. Dai ninda gigibohon an siring karaot na mga gibo kun ginigirumdom ninda an tipan ni Jehova. An Ley ni Moises igwa nin mga probisyon tanganing protehiran an mga dukha. Segun dian, mayo nin pamilya na maninigong permanenteng mawaran nin rogaring na minana kaiyan. Minsan siring, mayong labot dian an mahanab na mga indibiduwal na idto. Iniignoro ninda an mga tataramon sa Levitico 19:​18, na nagsasabi: “Kamotan mo an saimong kapwa nin siring sa saimo man sana.”

17. Ano an puedeng mangyari kun an mga naghihingakong naglilingkod sa Dios ineenot sa saindang buhay an materyal na mga bagay?

¹⁷ Ipinaheheling kaini kun ano an puedeng mangyari kun malingawan kan mga naghihingakong naglilingkod sa Dios an espirituwal na mga pasohan asin an hinahanap nguna iyo an materyal na mga bagay. Pinatanidan ni Pablo an mga Kristiano kan kaaldawan nia: “Idtong mga determinadong yumaman nahoholog sa sugot asin sa siod patin sa dakol na daing isip asin nakararaot na mawot, na nagdadara sa mga tawo sa kalaglagan asin kapahamakan.” (1 Timoteo 6:9) Kun magin pangenot na pasohan sa buhay nin saro an pagganar nin kuarta, sia garo man sana nagsasamba sa falsong dios​—sa Mamon, o Kayamanan. An falsong dios na iyan mayong ikatataong seguradong paglaom para sa ngapit.​—Mateo 6:24; nota sa ibaba.

18. Ano an mangyayari sa mga materyalistiko kan kaaldawan ni Miqueas?

¹⁸ Dakol sa kaaldawan ni Miqueas an nakanood sa makolog na paagi na an pagsarig sa materyal na mga bagay daing kamanungdanan. Segun sa Miqueas 2:​4, si Jehova nagsasabi: “Sa aldaw na iyan an saro mapatindog manongod sa saindo nin sarong sarabihon asin maagrangay nin sarong lamentacion, nin saro nganing lamentacion. An saro masabi: ‘Inubosan nanggad kita kan satong mga rogaring! An mismong kabtang kan sakuyang banwaan saiyang liniliwat. Hinahale nia iyan sa sakuya! Sa bakong maimbod binabaranga nia an satong mga oma.’ ” Iyo, an mga parahabon na idto nin mga harong asin oma mawawaran kan sadiri nindang eredasyon sa pamilya. Idedeportar sinda sa ibang daga, asin an saindang mga rogaring magigin samsam kan mga “bakong fiel,” o mga tawo kan mga nasyon. Matatapos an gabos na paglaom para sa sarong maginhawang ngapit.

19, 20. Ano an naeksperyensiahan kan mga Judio na nagtiwala ki Jehova?

¹⁹ Minsan siring, an paglaom kan mga nagsasarig ki Jehova dai masusudya. Si Jehova fiel sa saiyang mga pakipagtipan ki Abraham asin David, asin sia may pagkaherak sa mga, arog ki Miqueas, namomoot sa saiya asin nagmomondo huli sa pagkaparayo sa Dios kan saindang mga kahimanwa. Para sa kapakanan kan mga tanos, magkakaigwa nin pagbabalik sa dati sa itinalaan na panahon nin Dios.

²⁰ Nangyari iyan kan 537 B.C.E., pagkatapos na bumagsak an Babilonya asin kan an natatada sa mga Judio bumalik sa saindang dagang tinuboan. Kan panahon na iyan, an mga tataramon sa Miqueas 2:12 nagkaigwa nin enot na kaotoban. Si Jehova nagsasabi: “Totoong gayo na sasarayon ko si Jacob, kamo gabos; totoong gayong sasarayon ko an mga nawawalat pa sa Israel. Sa pagkasararo  ibubugtak ko sinda, siring sa aripompon sa toril, siring sa kahayopan sa tahaw kan sabsaban kaiyan; sinda magigin maribok huli sa mga tawo.” Abaa kamamomoton si Jehova! Pagkatapos na disiplinahon an saiyang banwaan, tinogotan nia an natatada na bumalik asin maglingkod sa saiya sa daga na itinao nia sa mga apoon ninda.

Risang Marhay na mga Pagkakaagid sa Satong Kaaldawan

21. Paano an mga kamugtakan sa presenteng panahon nakakaagid sa mga kamugtakan kan kaaldawan ni Miqueas?

²¹ Mantang ineestudyaran niato an enot na duwang kapitulo kan Miqueas, napangalas daw kamo kun gurano nanggad nagkakapareho an situwasyon ngonyan? Arog kan panahon ni Miqueas, dakol ngonyan an naghihingako na naglilingkod sa Dios. Minsan siring, arog kan Juda asin Israel, sinda nagkakabaranga asin nagralaban pa ngani sa guerra. An dakol sa mga mayaman sa Kakristianohan inaapi an mga dukha. Paorog nang paorog na kinokonsinte kan mga namomoon sa relihion an mga gibo-gibo na malinaw na kinokondenar sa Biblia. Bakong makangangalas na an Kakristianohan madali nang matapos pati na an iba pang kabtang kan “Dakulang Babilonya,” an pankinaban na imperyo nin falsong relihion! (Kapahayagan 18:1-5) Pero arog kan nangyari kan panahon ni Miqueas, si Jehova magkakaigwa nin fiel na mga lingkod na nawawalat sa daga.

22. Anong duwang grupo an naglalaom sa Kahadean nin Dios?

²² Kan 1919, an fiel na linahidan na mga Kristiano biyo nang suminuhay sa Kakristianohan asin pinonan na ibalangibog an maogmang bareta kan Kahadean sa gabos na nasyon. (Mateo 24:14) Sa primero, hinanap ninda an mga nawawalat pa sa espirituwal na Israel. Dangan an “ibang karnero” pinonan na tiponon, asin an duwang grupo nagin “sarong aripompon, sarong pastor.” (Juan 10:16) Minsan ngani naglilingkod sinda ngonyan sa Dios sa 234 kadagaan, an gabos na fiel na nagsasambang ini ki Jehova totoong ibinugtak “sa pagkasararo.” Sa ngonyan, an toril nin mga karnero “maribok huli sa mga tawo”​—mga lalaki, mga babae, asin mga aki. An saindang paglaom, bakong sa sistemang ini nin mga bagay, kundi sa Kahadean nin Dios, na sa dai na mahahaloy magiya pasiring sa sarong daganon na paraiso.

23. Taano ta kombensido kamo na segurado an saindong paglaom?

²³ May labot sa fiel na mga nagsasamba ki Jehova, an ultimong bersikulo kan Miqueas kapitulo 2 nagsasabi: “An saindang hade maagi sa atubangan ninda, na si Jehova an nasa enotan ninda.” Naheheling daw nindo an saindong sadiri na yaon sa parada nin kapangganahan na iyan, na sinusundan an saindong Hade, si Jesu-Cristo, na si Jehova mismo an nasa enotan? Kun iyo, mapapasaindo an kombiksion na segurado an kapangganahan asin an saindong paglaom. Ini magigin orog pa nganing malinaw mantang ineestudyaran niato an dugang pang tampok na mga kabtang kan hula ni Miqueas.

Ano an Isisimbag Nindo?

• Kan kaaldawan ni Miqueas, taano ta nagdesisyon si Jehova na gumibo nin aksion tumang sa Juda asin Israel?

• Ano an puedeng mangyari kun an mga naghihingakong naglilingkod sa Dios ineenot sa saindang buhay an materyal na intereses?

• Pakatapos estudyaran an Miqueas kapitulo 1 asin 2, taano ta kombensido kamo na segurado an saindong paglaom?

[Mga Hapot Para sa Pag-adal]

[Ritrato sa pahina 9]

An hula ni Miqueas makapakokosog sato sa espirituwal

[Mga Ritrato sa pahina 10]

Arog kan Judiong mga natatada kan 537 B.C.E., sinusuportaran kan espirituwal na mga Israelita asin kan saindang kairiba an tunay na pagsamba