Ano an Inaasahan sa Sato ni Jehova?

“Anong balos an hinahagad sa saimo ni Jehova kundi na gumibo ka nin hustisya asin mamoot sa kabootan asin na magin hababa an boot sa paglakaw sa kaibahan kan saimong Dios?”​—MIQUEAS 6:8.

1, 2. Taano ta tibaad manluya an boot nin nagkapirang lingkod ni Jehova, alagad ano an posibleng makatabang?

SI Vera sarong fiel na Kristiano na mga 75 anyos na asin maluya an salud. “Kun minsan,” sabi nia, “nagtatanaw ako sa bintana asin naheheling ko an sakong Kristianong mga tugang na lalaki asin babae na naghuhulit sa harong-harong. Napapaluha ako huli ta gusto kong makaiba sa sainda, alagad linilimitaran nin helang an paglilingkod ko ki Jehova.”

² Namatean na daw nindo an arog kaiyan? Siempre, an gabos na namomoot ki Jehova gustong maglakaw sa saiyang ngaran asin maabot an saiyang mga kahagadan. Pero, paano kun nagluluya na an satong salud, naggugurang na, o igwa nin mga responsibilidad sa pamilya? Tibaad medyo manluya an boot niato huli ta puedeng maolang kita kan siring na mga kamugtakan na magibo an gabos na hinihimuyawot kan satong puso na gibohon sa paglilingkod sa Dios. Kun ini an satong situwasyon, posibleng marhay na makaparirigon na gayo sa boot an pag-estudyar sa Miqueas kapitulo 6 asin 7. An mga kapitulong ini nagpapaheling na an mga kahagadan ni Jehova rasonable saka naaabot.

Kun Paano Tinatratar nin Dios an Saiyang Banwaan

3. Paano tinatratar ni Jehova an rebeldeng mga Israelita?

³ Helingon nguna niato an Miqueas 6:3-5 asin mangnohon kun paano tinatratar ni Jehova an saiyang banwaan. Girumdomon na kan panahon ni Miqueas an mga Israelita rebelde. Dawa siring, may pagkaludok sindang kinaolay ni Jehova paagi sa mga tataramon na, “O banwaan ko.” Sia nakikimaherak: “O banwaan ko, girumdoma tabi.” Imbes na sahotan sinda sa maringis na paagi, hinihingoa nia na aboton an saindang puso paagi sa paghapot, “Ano an ginibo ko sa saimo?” Ineenkaminar pa ngani nia sinda na ‘magpatotoo tumang’ sa saiya.

4. An halimbawa nin pagkaludok nin Dios maninigong magkaigwa nin anong epekto sa sato?

⁴ Kanigoan na halimbawa an ipinaheheling nin Dios para sa sato gabos! Maski an rebeldeng banwaan nin Israel asin Juda kan kaaldawan ni Miqueas may pagkaludok niang inapod na “banwaan ko” asin kinaolay sinda paagi sa tataramon na “tabi.” Kun siring, maninigo nanggad kitang magpaheling nin pagkaludok asin kabootan sa mga pagtratar niato sa mga miembro kan kongregasyon. Totoo, an nagkapira tibaad bakong pasil na pakiibanan, o tibaad sinda maluya sa espirituwal. Minsan siring, kun namomoot sinda ki Jehova, gusto niato sindang tabangan asin pahelingan sinda nin pagkaludok.

5. Anong pundamental na punto an pinalalataw sa Miqueas 6:​6, 7?

⁵ Sunod, helingon ta an Miqueas 6:​6, 7. Si Miqueas nagbabangon nin sunod-sunod na hapot, na nagsasabi: “Ano an sakong iaatubang ki Jehova?  Ano an sakong ihuhuruhod sa Dios na nasa itaas? Iaatubang ko daw sa saiya an bilog na mga dolot na tinotong, an mga ogbon na baka na sarong taon an edad? Maoogma daw si Jehova sa rinibong karnero, sa manampulong ribong salog nin lana? Itatao ko daw an panganay kong aki huli sa sakong pagrebelde, an bunga kan sakong tulak huli sa kasalan kan sakong kalag?” Dai, dai puedeng paogmahon si Jehova paagi sa “rinibong karnero, sa manampulong ribong salog nin lana.” Alagad may sarong bagay na makakapaogma sa saiya. Ano iyan?

Dapat Kitang Gumibo nin Hustisya

6. Anong tolong kahagadan nin Dios an sinasabi sa Miqueas 6:8?

⁶ Sa Miqueas 6:​8, manonodan niato kun ano an inaasahan sa sato ni Jehova. Si Miqueas naghahapot: “Anong balos an hinahagad sa saimo ni Jehova kundi na gumibo ka nin hustisya asin mamoot sa kabootan asin na magin hababa an boot sa paglakaw sa kaibahan kan saimong Dios?” Imbuelto sa tolong kahagadan na ini an satong pakamate, iniisip, asin ginigibo. Dapat kitang makamate na gusto niatong ipaheling an mga kualidad na ini, mag-isip kun paano iyan ipaheheling, asin gumibo nin aksion na ipaheling iyan. Saro-saro niatong estudyaran an tolong kahagadan na ini.

7, 8. (a) Ano an kahulogan kan ‘gumibo nin hustisya’? (b) Anong mga inhustisya an lakop kan kaaldawan ni Miqueas?

⁷ An ‘paggibo nin hustisya’ nangangahulogan nin paggibo kan tama. An paagi nin paghiro nin Dios iyo an pamantayan nin hustisya. Minsan siring, an ginigibo kan mga katemporanyo ni Miqueas bakong hustisya kundi inhustisya. Sa anong mga paagi? Estudyare an Miqueas 6:10. Sa poro kan bersikulong iyan, an mga negosyante sinasabing naggagamit nin “kulang na sokol nin efa,” an boot sabihon, saditon na sokol. Sinasabi pa kan bersikulo 11 na naggagamit sinda nin “gapong pantimbang na may daya.” Asin segun sa bersikulo 12, “an saindang dila tuso.” Sa siring, an madayang mga pansokol, madayang timbangan, asin madayang pagtaram nin putik lakop sa kinaban nin komersio kan kaaldawan ni Miqueas.

⁸ An bakong makatanosan na mga gibo bakong sa sadan sana nangyayari. Lakop man iyan sa korte. Ipinaririsa kan Miqueas 7:3 na “an prinsipe may hinahagad, asin an saro na naghohokom minagibo kaiyan para sa balos.” Sinusuholan an mga hokom tanganing ipaotob ninda an bakong makatanosan na mga sentensia sa daing kasalan na mga tawo. “An dakula,” o maimpluwensiang siudadano, nakikiayon sa mga krimen. Sa katunayan, sinasabi ni Miqueas na “pinag-iiriba,” o pinagkokoordinar kan prinsipe, kan hokom, asin kan dakulang tawo an saindang maraot na mga gibo.

9. Paano naapektaran an Juda asin Israel kan mga inhustisya na ginigibo kan mga maraot?

⁹ An mga inhustisya na ginigibo kan maraot na mga namomoon nakaapektar sa bilog na Juda asin Israel. Sinasabi kan Miqueas 7:5 na an kadaihan nin hustisya nagbunga nin kadaihan nin tiwala sa tahaw nin mga magkaibaiba, dayupot na mga magkakatood, asin dawa mga mag-agom. An bersikulo 6 nagsasabi na ini nagbunga nin mga kamugtakan kun saen nagduduruhagian an haraning magpaparyente na siring kan mga mag-ama asin mga mag-ina.

10. Sa presenteng panahon na kamugtakan na may lakop na inhustisya, paano minagawe an mga Kristiano?

¹⁰ Kumusta man ngonyan? Bako daw na naheheling niato an kaparehong mga kamugtakan? Arog ni Miqueas, napapalibotan kita nin kadaihan nin hustisya, nin pagdeskompiar, asin pagkalaglag kan buhay sosyal asin buhay pampamilya. Pero, bilang mga lingkod nin Dios sa tahaw kan maraot na kinaban na ini, dai niato tinotogotan na makalaog sa Kristianong kongregasyon an espiritu nin bakong makatanosan na pagtratar kan kinaban na ini. Imbes, pinagmamaigotan niato na suportaran an mga prinsipyo nin pagkasadiosan asin integridad, na ipinaheheling ini sa pan-aroaldaw na pamumuhay niato. Tunay nanggad, kita ‘minagawe nin sadiosan sa gabos na bagay.’ (Hebreo 13:18) Bako daw na minaoyon kamo na paagi sa paggibo nin hustisya, nakakamtan niato an nagsosopay na mga bendisyon gikan sa kasararoan nin magturugang na nagpapaheling nin tunay na pagtitiwala?

Paano Nadadangog kan mga Tawo “an Mismong Tingog ni Jehova”?

11. Paano naootob an Miqueas 7:12?

¹¹ Ihinuhula ni Miqueas na sa ibong kan bakong makatanosan na mga kamugtakan, an hustisya makakamtan kan gabos na klase nin tawo. Ihinuhula kan propeta na an mga tawo titiriponon “paghale sa dagat sagkod sa dagat, patin paghale sa bukid sagkod sa bukid” tanganing magin mga parasamba ki Jehova. (Miqueas 7:12) Ngonyan, sa pangultimong kaotoban kan hulang ini, bakong  sarong partikular na nasyon, kundi mga indibiduwal hale sa gabos na nasyon an nakikinabang sa mayong ipinaoorog na hustisya nin Dios. (Isaias 42:1) Paano ini nagigin totoo?

12. Paano nadadangog ngonyan an “mismong tingog ni Jehova”?

¹² Para sa simbag, estudyare an mas naenot na mga tataramon ni Miqueas. An Miqueas 6:9 nagsasabi: “Sa siudad nag-aapod an mismong tingog ni Jehova, asin an tawong may praktikal na kadonongan matatakot sa saimong ngaran.” Paano nadadangog kan mga tawo hale sa gabos na nasyon an “mismong tingog ni Jehova,” asin ano an koneksion kaini sa satong paggibo nin hustisya? Siempre, dai nadadangog nin literal kan mga tawo ngonyan an tingog nin Dios. Minsan siring, paagi sa satong pambilog na kinaban na paghuhulit, an tingog ni Jehova nadadangog kan mga indibiduwal hale sa gabos na rasa asin klase nin pamumuhay. Bilang resulta, an mga naghihinanyog ‘natatakot sa ngaran nin Dios,’ na nagkakaigwa nin reberensial na paggalang dian. Kita naghihiro nanggad na may pagkamakatanosan asin pagkamamomoton paagi sa paglilingkod bilang maigot na mga parabalangibog kan Kahadean. Paagi sa pagpamidbid kan ngaran nin Dios sa gabos na daing ipinaoorog, kita ‘naggigibo nin hustisya.’

Dapat Kitang Mamoot sa Kabootan

13. Ano an kalaenan nin mamomoton na kabootan asin pagkamoot?

¹³ Sunod, pag-olayan niato an ikaduwang kahagadan na nasambitan sa Miqueas 6:8. Inaasahan ni Jehova na kita “mamoot sa kabootan.” An termino sa Hebreo na trinadusir na “kabootan” tinatradusir man na “mamomoton na kabootan,” o  “maimbod na pagkamoot.” An mamomoton na kabootan iyo an aktibong pagtao nin atension sa iba, may pagkaludok na pagmakolog sa sainda. An mamomoton na kabootan laen sa kualidad na pagkamoot. Taano man? An pagkamoot sarong termino na mas mahiwas an aplikasyon, sarong termino na puedeng iaplikar dawa sa mga bagay asin konsepto. Halimbawa, an Kasuratan nagtataram manongod sa sarong tawo na “namomoot sa arak asin lana” asin manongod sa sarong tawo na “namomoot sa kadonongan.” (Talinhaga 21:17; 29:3) Sa ibong na lado, an mamomoton na kabootan pirmeng may labot sa mga tawo, nangorogna sa mga naglilingkod sa Dios. Kun siring nagtataram an Miqueas 7:20 manongod sa “mamomoton na kabootan na itinao ki Abraham”​—sarong tawo na naglingkod ki Jehova Dios.

14, 15. Paano ipinaheheling an mamomoton na kabootan, asin anong ebidensia kaiyan an sinambit?

¹⁴ Segun sa Miqueas 7:​18, an propeta nagsasabi na an Dios “may dakulang kaogmahan sa mamomoton na kabootan.” Sa Miqueas 6:​8, sinasabihan kita na bako sanang magpaheling nin mamomoton na kabootan kundi mamotan man an kualidad na iyan. Ano an manonodan niato sa mga tekstong ini? An mamomoton na kabootan ipinaheheling nin gikan sa boot asin suelto huli ta gusto niatong ipaheling iyan. Arog ni Jehova, nawiwili kita, o naoogmang marhay, sa pagpaheling nin mamomoton na kabootan sa mga nangangaipo.

¹⁵ Ngonyan, an siring na mamomoton na kabootan sarong tanda kan banwaan nin Dios. Helinga an saro sanang halimbawa. Kan Hunyo 2001, sarong tropikal na bagyo an nagresulta sa mahiwason na pagbaha sa Texas, E.U.A., na ruminaot nin rinibong harong, kaiba an ginatos na harong kan mga Saksi ni Jehova. Tanganing tabangan an saindang Kristianong mga tugang na nangangaipo, mga 10,000 na Saksi an gikan sa boot asin daing bayad na nagtao kan saindang panahon asin kosog. Sa laog nin labi sa kabangang taon, an mga boluntaryo nagtrabaho nin daing kapagalan, na ginagamit an saindang mga aldaw, banggi, asin katapusan kan semana sa pagtogdok liwat nin 8 Kingdom Hall asin labing 700 na harong para sa saindang Kristianong mga tugang. An mga dai makakagibo kan siring na trabaho nagdonar nin mga kakanon, gamit, asin kuarta. Taano an gabos na rinibong Saksing ini ta nagtabang sa saindang mga tugang? Huli ta ‘namomoot sinda sa kabootan.’ Asin abaa kanakaoogmang maaraman na an siring na mga gibo nin mamomoton na kabootan ipinaheheling kan satong mga tugang sa bilog na kinaban! Iyo, an pag-abot sa kahagadan na “mamoot sa kabootan” bakong pagabat, kundi sarong kagayagayahan!

Magin Hababa an Boot sa Paglakaw sa Kaibahan nin Dios

16. Anong ilustrasyon an nagtatabang na idoon an pangangaipo na magin hababa an boot sa paglakaw sa kaibahan nin Dios?

¹⁶ An ikatolong kahagadan na manonompongan sa Miqueas 6:8 iyo an “magin hababa an boot sa paglakaw sa kaibahan kan saimong Dios.” Nangangahulogan ini nin pagrekonoser sa satong mga limitasyon asin pagdepende sa Dios. Sa pag-ilustrar: Imahinara an sarong sadit na aking babae na nagkakapot nin higot sa kamot kan saiyang ama mantang sinda naglalakaw na may bagyo. Aram na marhay kan aking babae na limitado an saiyang kosog, alagad may kompiansa sia sa saiyang ama. Dapat na aram man niato an satong mga limitasyon alagad may kompiansa kita sa satong langitnon na Ama. Paano niato mapagdadanay an kompiansang ini? An sarong paagi iyo an pirmeng pagsaisip kun taano ta madonong na magdanay na dayupot sa Dios. Ipinagigirumdom sa sato ni Miqueas an tolong dahelan: Si Jehova an satong Paraligtas, satong Paragiya, asin satong Protektor.

17. Paano ilinigtas, giniyahan, asin prinotehiran ni Jehova an saiyang banwaan kan suanoy na mga panahon?

¹⁷ Segun sa Miqueas 6:​4, 5, an Dios nagsasabi: “Itinukad taka hale sa daga nin Egipto.” Iyo, si Jehova an Paraligtas kan Israel. Sinabi pa ni Jehova: “Isinugo ko sa enotan mo si Moises, Aaron asin Miriam.” Si Moises asin Aaron an ginamit na maggiya sa nasyon, asin si Miriam an naggiya sa mga babae kan Israel na magbayle para sa kapangganahan. (Exodo 7:12; 15:​1, 19-21; Deuteronomio 34:10) Nagtao si Jehova nin paggiya paagi sa saiyang mga lingkod. Sa bersikulo 5, ipinagigirumdom ni Jehova sa nasyon nin Israel na prinotehiran nia sinda tumang ki Balac asin Balaam asin na prinotehiran nia an mga Israelita durante kan huring kabtang kan saindang pagbaklay poon sa Sitim sa Moab sagkod sa Gilgal sa Dagang Panuga.

18. Paano naghihiro an Dios bilang satong Paraligtas, Paragiya, asin Protektor ngonyan?

¹⁸ Mantang kita naglalakaw sa kaibahan nin  Dios, iliniligtas nia kita tumang sa kinaban ni Satanas, ginigiyahan kita paagi sa saiyang Tataramon asin saiyang organisasyon, asin pinoprotehiran kita bilang sarong grupo kun kita inaatake kan mga paratumang. Sa siring igwa kita nin bastanteng dahelan na kumapot nin higot sa kamot kan satong langitnon na Ama mantang naglalakaw kita sa kaibahan nia sa mabagyong huring kabtang kan satong pagbaklay pasiring sa mas dakula pa sa suanoy na Dagang Panuga​—an matanos na bagong kinaban nin Dios.

19. Sa anong paagi na an kababaan nin boot konektado sa satong mga limitasyon?

¹⁹ An pagigin hababa an boot sa paglakaw sa kaibahan nin Dios nagtatabang sa sato na magkaigwa nin realistikong pagmansay sa satong mga kamugtakan. Totoo ini huli ta kabale sa pagpaheling nin kababaan nin boot an pakaaram sa satong mga limitasyon. Tibaad nalilimitaran nin kagurangan o nagluluyang salud an satong nagigibo sa paglilingkod ki Jehova. Minsan siring, imbes na togotan ini na magpaluya sa satong boot, marahay na girumdomon na inaako nin Dios an satong mga paghihingoa asin pagsasakripisyo ‘sono sa kun ano an nasa sato, bakong sono sa kun ano an mayo sa sato.’ (2 Corinto 8:12) Tunay nanggad, inaasahan ni Jehova na kita maglilingkod sa saiya nin bilog na kalag, na ginigibo kun ano an itinotogot kan satong mga kamugtakan. (Colosas 3:23) Kun odok asin maigot na ginigibo niato an satong bilog na  makakaya sa paglilingkod sa saiya, kita binebendisyonan nin abunda nin Dios.​—Talinhaga 10:22.

An Mapaghalat na Aktitud Nagbubunga nin mga Bendisyon

20. An pakaaram sa ano maninigo na magtabang sa sato na ipaheling an mapaghalat na aktitud na arog kan ki Miqueas?

²⁰ An pakaeksperyensia sa bendisyon ni Jehova nagpapahiro sa sato na arogon an aktitud ni Miqueas. Sinabi nia: “Mapaheling ako nin mapaghalat na aktitud sa Dios nin sakong kaligtasan.” (Miqueas 7:7) Paano konektado an mga tataramon na ini sa satong paglakaw na may kababaan nin boot sa kaibahan nin Dios? An pagkaigwa nin mapaghalat na aktitud, o pasensia, nakatatabang sato na malikayan an pagkadesganar ta dai pa naabot an aldaw ni Jehova. (Talinhaga 13:12) An totoo, minamawot niato gabos an katapusan kan maraot na kinaban na ini. Minsan siring, kada semana rinibong tawo an minapoon pa sanang maglakaw sa kaibahan nin Dios. An pakaaram kaiyan nagtatao sato nin dahelan na magpaheling nin mapaghalat na aktitud. An sarong haloyan nang Saksi nagsabi may koneksion digdi: “Sa pagsalingoy sa labing 55 taon sa paghuhulit, kombensido ako na daing nasayang na ano man sa sako sa paghalat ko ki Jehova. Sa kabaliktaran, nalikayan ko an dakol na kamondoan.” Nakaeksperyensia na daw kamo nin kaagid kaiyan?

21, 22. Paano naootob sa kaaldawan niato an Miqueas 7:14?

²¹ An paglakaw sa kaibahan ni Jehova daing duda na nagtatao sa sato nin pakinabang. Siring kan satong mababasa sa Miqueas 7:​14, an banwaan nin Dios ikinomparar ni Miqueas sa mga karnero na tiwasay na nag-eerok sa kaibahan kan saindang pastor. Sa mas dakulang kaotoban kan hulang ini ngonyan, an natatada sa espirituwal na Israel saka an “ibang karnero” nakakanompong nin katiwasayan sa kaibahan kan saindang pinagtitiwalaan na Pastor, si Jehova. Sinda nag-eerok nin “solo sa sarong kadlagan​—sa tahaw nin sarong tatamnan,” na sa espirituwal na paagi siblag sa kinaban na ini na paorog nang paorog na nagigin maribok asin peligroso.​—Juan 10:16; Deuteronomio 33:28; Jeremias 49:31; Galacia 6:16.

²² An banwaan ni Jehova nagkakamit nin abundansia, arog kan ihinula man sa Miqueas 7:14. Sa pagtaram manongod sa mga karnero, o banwaan nin Dios, si Miqueas nagsabi: “Pakakanon mo sinda sa Basan asin Galaad.” Kun paanong an mga karnero sa Basan asin Galaad nagkakakan sa matubang na mga sabsaban asin nagtatalubo, an banwaan nin Dios ngonyan nagkakamit man nin abundansia sa espirituwal​—saro pang bendisyon para sa mga may kababaan nin boot na naglalakaw sa kaibahan nin Dios.​—Bilang 32:1; Deuteronomio 32:14.

23. Anong leksion an manonodan niato sa pag-estudyar sa Miqueas 7:​18, 19?

²³ Sa Miqueas 7:​18, 19, itinatampok kan propeta an kamawotan ni Jehova na patawadon an mga nagsosolsol. Sinasabi kan bersikulo 18 na si Jehova “nagpapatawad kan sala” asin “dai na nag-iintindi kan paglapas.” Segun sa bersikulo 19, “iaapon [nia] sa kaladman kan dagat an gabos nindang kasalan.” Ano an sarong leksion na makukua niato digdi? Puede niatong hapoton an satong sadiri kun inaarog niato si Jehova sa bagay na ini. Pinatatawad daw niato an mga sala na tibaad nagigibo sa sato kan iba? Kun an mga siring nagsosolsol asin naghihingoang magbago, sierto na bobooton niatong ipabanaag an pagigin andam ni Jehova na magpatawad nin lubos asin permanente.

24. Paano kamo nakinabang sa hula ni Miqueas?

²⁴ Paano kita nakinabang sa pag-estudyar na ini sa hula ni Miqueas? Ipinagirumdom kaiyan sato na si Jehova nagtatao nin tunay na paglaom sa mga dayupot sa saiya. (Miqueas 2:1-13) Pinarigon an boot niato na gibohon an gabos na posibleng paagi na suportaran an tunay na pagsamba tanganing makalakaw kita sa ngaran nin Dios sagkod lamang. (Miqueas 4:1-4) Asin inasegurar kita na ano man an satong kamugtakan, maaabot niato an mga kahagadan ni Jehova. Iyo, an hula ni Miqueas talagang nagpapakosog sa sato na maglakaw sa ngaran ni Jehova.

Ano an Isisimbag Nindo?

• Segun sa Miqueas 6:​8, ano an hinahagad sa sato ni Jehova?

• Ano an kaipuhan tanganing kita ‘makagibo nin hustisya’?

• Paano niato ikapaheheling na kita ‘namomoot sa kabootan’?

• Ano an kalabot sa ‘pagigin hababa an boot sa paglakaw sa kaibahan nin Dios’?

[Mga Hapot Para sa Pag-adal]

[Mga Ritrato sa pahina 21]

Sa ibong kan maraot na mga kamugtakan kan kaaldawan nia, naotob ni Miqueas an mga kahagadan ni Jehova. Kaya makaootob man kamo

[Ritrato sa pahina 23]

Gumibo nin hustisya paagi sa pagpatotoo sa mga tawo sa gabos na klase nin pamumuhay

[Mga Ritrato sa pahina 23]

Ipaheling na namomotan nindo an kabootan paagi sa pagtao kan mga pangangaipo kan iba

[Ritrato sa pahina 23]

Gibohon an makakaya nindo mantang may kababaan nin boot na rinerekonoser an saindong mga limitasyon