“Nakanompong Ako nin Pakikikatood, Pagkamoot, Asin Atension”

“PAAGI kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) Arog kan sinabi ni Jesus, an pagkamoot nagin an midbidan kan enot na mga Kristianong magturugang. Si Tertuliano, na nagsurat labing sanggatos na taon pagkagadan ni Cristo, kinotar an mga nagmamasid sa pagsabi: ‘Helinga nindo kun gurano an pagkaminorootmootan ninda asin kun gurano sinda kaandam pa ngani na magadan para sa lambang saro.’

Puede pa daw na makanompong nin siring na klase nin pagkamoot sa kinaban? Iyo. Halimbawa, estudyaran an sarong surat na naresibi kan sangang opisina nin Mga Saksi ni Jehova sa Brazil. An nagpadara, sarong babae na si Marilia, suminurat:

“Mantang nag-iistar sa Villa Mercedes, Argentina, an sakong ina, na saro sa Mga Saksi ni Jehova, nagkahelang nin osteoartritis na nagin dahelan na maparalisar sia poon habayan pababa. Sa enot na walong bulan kan saiyang pagkahelang, an mga Saksi sa Villa Mercedes an mamomoton asin makonsiderasyon na nag-ataman sa saiya. Sinda an nag-asikaso kan gabos na bagay, na linilinigan an saiyang harong asin inaandam an saiyang kakanon. Minsan kan nasa ospital, pirmeng may kaibanan si Nanay, aldaw-banggi.

“Si Nanay asin ako nakabalik na sa Brazil, kun saen padagos pa siang nagpaparahay kan saiyang helang. An mga Saksi sa lugar na pinag-iistaran mi ngonyan ginigibo an gabos nindang makakaya tanganing tabangan si Nanay sa saiyang pagrahay.”

Tinapos ni Marilia an saiyang surat: “Inaako ko na bako akong Saksi, alagad nakanompong ako nin pakikikatood, pagkamoot, asin atension sa mga Saksi.”

Tunay nanggad, igwa pa nin mga tawo na minagawe na may tunay na Kristianong pagkamoot. Sa paggibo kaini, saindang ipinaheheling an puedeng magin puersa kan mga katokdoan ni Jesus sa satuyang buhay.