Mga Bobon na Dai Nateteneran nin Tubig

KAN mga panahon kan Biblia, an mga bobon mga kinalot sa irarom kan daga na nangorognang ginamit na sarayan nin tubig. May mga panahon, sa Dagang Panuga, na an mga iyan an solamenteng paagi na mapagdanay an mahalagang marhay na suplay nin tubig.

Sa pagrekord kan sarong kapahayagan nin Dios, sinambit ni propeta Jeremias an mga bobon sa piguratibong sentido, na sinasabi: “An sakuyang banwaan nakakomiter nin duwang karatan; binayaan ninda ako na burabod nin buhay na katubigan, asin nagkotkot sinda nin mga bobon, raot na mga bobon, na dai nateteneran nin tubig.”​—Jeremias 2:​13, King James Version.

Pakatapos na bayaan an saindang Dios, si Jehova​—“an burabod nin buhay na katubigan”—​an mga Israelita buminalyo sa daing kasegurohan na militar na mga pakikipag-alyansa sa paganong mga nasyon asin sa pagsamba sa daing kosog, falsong mga dios. An siring na linalaoman na mga lugar nin pailihan luminuwas sanang mga bobon na nagsasarumsom an tubig, sa paggamit kan pagbabaing ni Jeremias, na mayo nin kakayahan na magprotehir o magligtas.​—Deuteronomio 28:20.

Igwa daw nin leksion para sa sato ngonyan digdi sa makasaysayan na halimbawang ini? Arog kaidtong kaaldawan ni Jeremias, an daing sagkod na Dios, si Jehova, nagpapadagos na iyo an solamenteng Gikanan nin nagtatao nin buhay na katubigan. (Salmo 36:9; Kapahayagan 4:11) Solamente gikan saiya, paagi sa saiyang Aki, si Jesu-Cristo, na an katawohan mag-aako nin buhay na daing katapusan. (Juan 4:​14; 17:3) Pero, kapareho kan mga katemporanyo ni Jeremias, dakol sa katawohan ngonyan an minapili na haboan asin paluyahon pa ngani an puersa kan tataramon nin Dios na ipinahayag sa Biblia. Imbes, saindang ibinubugtak an saindang pagsarig sa basta kombenyenteng politikal na mga solusyon, basang na mga pangangatanosan nin tawo, asin daing kamanungdanan na mga ideolohiya asin pilosopiya na naglalapastangan sa Dios. (1 Corinto 3:​18-​20; Colosas 2:8) Malinaw an pagpipilian. Saen nindo ibubugtak an saindong tiwala? Magtitiwala daw kamo sa “burabod nin buhay na katubigan,” si Jehova, o sa “raot na mga bobon, na dai nateteneran nin tubig”?

[Ritrato sa pahina 32]

Dalipay na estatuwa nin sarong inang diosa na nanompongan sa sarong Israelitang lolobngan

[Credit Line]

Rinetrato sa karahayan nin boot kan British Museum