Magin Andam Kamo Para sa Aldaw ni Jehova

“Kamo . . . magin andam, huli ta sa oras na dai nindo pinaghohona, an Aki nin tawo madatong.”—MATEO 24:44.

1. Taano ta maninigo na magin interesado kita sa aldaw ni Jehova?

IYAN magigin aldaw nin ralaban asin nagpuputok na kaanggotan, nin labi-labing kamondoan asin kapurisawan, nin kadikloman asin kapungawan. An “dakula asin makangingirhat na aldaw” ni Jehova siertong madatong sa maraot na sistemang ini nin mga bagay, kun paanong linamos kan Baha an maraot na kinaban kan kaaldawan ni Noe. Iyan siertong madatong. Pero, “an gabos na mag-apod sa ngaran ni Jehova makaliligtas.” (Joel 2:30-32; Amos 5:18-20) Lalaglagon nin Dios an saiyang mga kaiwal asin ililigtas an saiyang banwaan. May pakamate nin pag-apura, ipinahayag ni propeta Sofonias: “An dakulang aldaw ni Jehova harani na. Iyan harani na, asin igwa nin paghihidale na gayo kaiyan.” (Sofonias 1:14) Pero noarin gigibohon an paghokom na ini nin Dios?

2, 3. Taano ta mahalagang marhay na kita mag-andam para sa aldaw ni Jehova?

² “May labot sa aldaw asin oras na iyan mayo nin siisay man na nakaaaram, ni an mga anghel kan kalangitan ni an Aki, kundi an Ama sana,” an sabi ni Jesus. (Mateo 24:36) Huling dai niato aram an eksaktong oras, mahalagang marhay na isapuso niato an mga tataramon kan satong teksto kan taon para  sa 2004: “Magdanay kamong mapagbantay . . . Magin andam.”​—Mateo 24:​42, 44.

³ Ipinaririsa kun gurano kabigla an pagtipon sa mga andam tanganing iligtas mantang an iba babayaan, sinabi ni Jesus: “An duwa katawo masasa oma: an saro kukuanon asin an saro iwawalat; duwang babae an maggigiling sa gilingan: an saro kukuanon asin an saro iwawalat.” (Mateo 24:​40, 41) Sa kritikal na panahon na iyan, ano daw an magigin personal na kamugtakan niato? Kita daw magigin andam, o kita daw aabotan kan aldaw na iyan na nagpapabaya? Dakula an nakadepende sa ginigibo niatong aksion ngonyan. An pagigin andam niato para sa aldaw ni Jehova naghahagad na likayan niato an sarong aktitud na lakop ngonyan, na labanan niato na maholog sa sarong partikular na espirituwal na kamugtakan, asin na likayan niato an nagkapirang estilo nin pamumuhay.

Likayan an Aktitud na Pagigin Daing Labot

4. Ano an aktitud kan mga tawo kan kaaldawan ni Noe?

⁴ Estudyare an kaaldawan ni Noe. “Huli sa pagtubod si Noe, pakatapos na matawan nin patanid nin Dios dapit sa mga bagay na dai pa naheheling, nagpaheling nin diosnon na takot asin nagtogdok nin dahong para sa pagligtas kan saiyang kasararo sa harong,” an sabi kan Biblia. (Hebreo 11:7) An dahong pambihira asin heling-heling na marhay. Dugang pa, si Noe “sarong parahulit nin katanosan.” (2 Pedro 2:5) An proyekto nin pagtogdok ni Noe ni an saiyang paghuhulit dai nagpahiro sa mga tawo kan saiyang kaaldawan. Taano? Huli ta sinda “nagkakarakan asin nag-iirinom, an mga lalaki nag-aaragom asin an mga babae nagpapaaragom.” An mga hinulitan ni Noe bangkag na marhay sa personal na mga gibo-gibo asin kasingawan kaya “dai sinda nagmangno sagkod na dumatong an baha asin iinanod sinda gabos.”​—Mateo 24:​38, 39.

5. Ano an pananaw kan mga nag-eerok sa Sodoma kan kaaldawan ni Lot?

⁵ Kapareho iyan kan kaaldawan ni Lot. Sinasabi sa sato kan Kasuratan: “Sinda nagkakarakan, sinda nag-iirinom, sinda nagbabarakal, sinda nagpapabakal, sinda nagtatanom, sinda nagtotorogdok. Alagad kan aldaw na si Lot luminuwas sa Sodoma uminoran nin kalayo asin asupre hale sa langit asin linaglag sinda gabos.” (Lucas 17:​28, 29) Pakatapos na patanidan kan mga anghel si Lot manongod sa nagdadangadang na kalaglagan, kinaolay nia an saiyang mga manugang na lalaki manongod sa mangyayari. Pero sa pagheling ninda, “garo sia tawong nagsusuba.”​—Genesis 19:14.

6. Anong aktitud an dapat niatong likayan?

⁶ Kun paano kan kaaldawan ni Noe asin Lot, magigin “siring man kaiyan an presensia kan Aki nin tawo,” an sabi ni Jesus. (Mateo 24:39; Lucas 17:30) Tunay nanggad, an komun na aktitud nin dakol ngonyan iyo an pagigin daing labot. Dapat kitang magmaan na dai maimpluwensiahan kan siring na pananaw. Daing maraot na magpasiramsiram sa kakanon asin inomon nin tama sana. Siring man, an pag-agom areglo nin Dios. Minsan siring, kun an siring na mga bagay magin pinakaimportante sa satong buhay asin napapabayaan na an espirituwal na intereses, kita daw personalmenteng andam para sa makangingirhat na aldaw ni Jehova?

7. Ano an mahalagang marhay na maninigo niatong ihapot bago ponan an ano man na gigibohon, asin taano?

⁷ “Nainaan na an panahon na natatada,” an sabi ni apostol Pablo. “Magpoon ngonyan an mga igwa nin agom na babae magin garo sinda mayo.” (1 Corinto 7:29-31) Limitado na sanang panahon an natatada tangani na taposon niato an satong tao nin Dios na gibohon na paghuhulit kan Kahadean. (Mateo 24:14) Sinadol ni Pablo dawa an mga may agom na dai uboson an panahon sa saiyang agom na huli kaiyan nagigin sekondaryo na sana sa saindang buhay an intereses kan Kahadean. Malinaw nanggad, an inklinasyon nin isip na irinerekomendar ni Pablo iyo an kabaliktaran kan pagigin daing labot. Sinabi ni Jesus: “Kun siring, padagos na hanapon nguna an kahadean asin an . . . katanosan [nin Dios].” (Mateo 6:33) Sa ano man na pagdedesisyon o bago ponan an ano man na gibohon, ini an importanteng ihapot, ‘Paano kaini maaapektaran an sakong pagpapadanay na pangenot sa sakong buhay an intereses kan Kahadean?’

8. Kun an pangaroaldaw na mga aktibidad sa buhay iyo na an nagigin pangenot sa sato, ano an maninigo niatong gibohon?

 ⁸ Kumusta kun marealisar niato na kita sibot-sibot na sa normal na pangaroaldaw na mga aktibidad sa buhay na huli kaiyan napapabayaan na an espirituwal na intereses? Daing gayo daw nin kalaenan an paagi nin pamumuhay niato asin kan satong kataraed na mayo nin tamang kaaraman sa Kasuratan asin dai nagbabalangibog kan Kahadean? Kun iyan an nangyayari, kun siring kaipuhan niatong ipamibi ini. Puedeng pangyarihon ni Jehova na kita magkaigwa nin tamang aktitud nin isip. (Roma 15:5; Filipos 3:15) Matatabangan nia kita na padagos na enoton an intereses kan Kahadean, na gibohon an tama, asin na otobon an satong obligasyon sa saiya.​—Roma 12:2; 2 Corinto 13:7.

Labanan an Espirituwal na Pagtungka

9. Segun sa Kapahayagan 16:14-16, taano ta mahalagang labanan an espirituwal na pagtungka?

⁹ An mismong hula na nagtataram manongod sa nagdadangadang na “guerra kan dakulang aldaw nin Dios na Makakamhan sa Gabos” sa Armagedon nagpapatanid na an nagkapira tibaad dai magpuka. “Uya! Ako madatong siring sa parahabon,” an sabi kan Kagurangnan na Jesu-Cristo. “Maogma an saro na nagpupuka asin iniingatan an saiyang pan-ibabaw na mga gubing, tanganing dai sia maglakaw na huba asin maheling nin mga tawo an saiyang kasupganan.” (Kapahayagan 16:14-​16) An pan-ibabaw na mga gubing na nasambitan digdi nanonongod sa midbidan niato bilang Kristianong Mga Saksi ni Jehova. Kaiba digdi an satong gibohon bilang mga parabalangibog kan Kahadean asin an satong Kristianong gawe-gawe. Kun kita garo baga mapatorog sa kadaihan nin ginigibo, puedeng hubaon sa sato an satong Kristianong midbidan. Makasusupog asin peligroso iyan. Dapat niatong labanan na maholog sa kamugtakan nin espirituwal na pagtungka o pananamlay. Paano niato malalabanan an siring na inklinasyon?

10. Taano an aroaldaw na pagbasa kan Biblia ta nakatatabang sa sato na magdanay na listo sa espirituwal?

¹⁰ Paorootrong idinodoon kan Biblia an pangangaipo na magpuka asin papagdanayon niato an toltol na pag-iisip. Halimbawa, ipinagigirumdom sa sato kan pagkasaysay sa Ebanghelyo: “Magdanay kamong mapagbantay” (Mateo 24:42; 25:13; Marcos 13:​35, 37); ‘magin andam kamo’ (Mateo 24:44); “magdanay kamong mapagmasid, magpuka kamo” (Marcos 13:33); “padagos na mag-andam” (Lucas 12:40). Pakatapos sabihon na an aldaw ni Jehova biglang madatong sa kinaban na ini, sinadol ni apostol Pablo an mga kapagtubod: “Dai kita magkatorog arog kan ginigibo kan iba, kundi magpuka kita asin papagdanayon niato an  toltol na pag-iisip.” (1 Tesalonica 5:6) Sa ultimong libro kan Biblia, idinodoon kan pinamuraway na si Cristo Jesus an pagigin bigla kan saiyang pagdatong, na sinasabi: “Ako madatong sa madali.” (Kapahayagan 3:11; 22:​7, 12, 20) Dakol man sa Hebreong mga propeta an nagladawan asin nagpatanid dapit sa dakulang aldaw nin paghokom ni Jehova. (Isaias 2:​12, 17; Jeremias 30:7; Joel 2:11; Sofonias 3:8) An aroaldaw na pagbasa kan Tataramon nin Dios, an Biblia, asin an paghorophorop kan satong binabasa marahay na tabang tanganing magdanay na listo sa espirituwal.

11. Taano ta mahalagang marhay an personal na pag-adal kan Biblia sa pagigin puka sa espirituwal?

¹¹ Iyo, pampapuka nanggad sa sato sa espirituwal an maigot na personal na pag-adal kan Kasuratan na ginagamit an mga publikasyon na basado sa Biblia na itinatao kan “fiel asin may diskresion na oripon”! (Mateo 24:45-47) Minsan siring, tanganing an personal na pag-adal magbunga nin mga pakinabang, dapat na iyan progresibo asin daing liwat-liwat. (Hebreo 5:14–​6:3) Dapat tang ilaog sa isip an matagas na espirituwal na kakanon nin regular. Tibaad sarong angat an paghanap nin panahon para dian ngonyan na mga aldaw. (Efeso 5:​15, 16) Sa ibong kaiyan, bakong igo an pagbasa kan Biblia asin mga publikasyon na sono sa Kasuratan kun noarin sana iyan tibaad kombenyente. An regular na personal na pag-adal mahalagang marhay tanganing kita magdanay na “marahay an salud sa pagtubod” asin makapagpuka.​—Tito 1:13.

12. Paano kita natatabangan kan Kristianong mga pagtiripon, asamblea, asin kombension na labanan an espirituwal na pagtungka?

¹² An Kristianong mga pagtiripon, asamblea, asin kombension nakatatabang man sa sato na labanan an espirituwal na pagtungka. Paano? Paagi sa pagtotokdo na inaako niato. Sa mga pagtiripon na ini, bako daw na regular na ipinagigirumdom sa sato an kaharanihan kan aldaw ni Jehova? An semanal na Kristianong pagtiripon nagtatao man nin mga oportunidad na ‘dagkahon an lambang saro sa pagkamoot asin sa marahay na mga gibo.’ An siring na pagdagka, o pagpukaw, nakatatabang sa pagigin puka sa espirituwal. Bakong makangangalas na kita pinagbobotan na magtiripon nin regular mantang “naheheling [niato] na an aldaw harani na.”​—Hebreo 10:​24, 25.

13. Paano kita tinatabangan kan Kristianong ministeryo na magpuka sa espirituwal?

¹³ Natatabangan man kita na magdanay na puka kun kita bilog na pusong nakikikabtang sa Kristianong ministeryo. May mas marahay pa daw na paagi tanganing mapagdanay na presko sa isip an mga tanda kan mga panahon asin an kahulogan kaiyan kisa ipakipag-olay iyan sa iba? Asin kun naheheling niato na nag-ooswag an mga inaadalan niato sa Biblia asin minapoon na iaplikar an saindang nanonodan, an sato mismong pakamate nin pag-apura nag-oorog. “Pasariga an saindong isip para sa gibohon,” an sabi ni apostol Pedro, “lubos na papagdanayon an toltol na pag-iisip.” (1 Pedro 1:13) An “danay na dakol an gigibohon sa gibohon kan Kagurangnan” marahay na remedyo sa espirituwal na pagkawara nin animo.​—1 Corinto 15:58.

Likayan an mga Estilo nin Pamumuhay na Nakadadanyar sa Espirituwal

14. Siring kan ilinadawan sa Lucas 21:34-36, nagpatanid si Jesus tumang sa anong mga estilo nin pamumuhay?

¹⁴ Sa saiyang dakulang hula manongod sa tanda kan saiyang presensia, si Jesus nagtao nin saro pa nganing patanid. Sia nagsabi: “Atenderan an saindong sadiri na an saindong mga puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay, asin sa panale an aldaw na iyan mag-abot sa saindo na siring sa sarong siod. Huli ta madatong iyan sa gabos na nag-eerok sa ibabaw kan bilog na daga. Magpuka kamo, kun siring, na sa gabos na panahon nagngangayongayo na magin kamong mapanggana sa pagdulag sa gabos na ining bagay na nakatalagang mangyari, asin sa pagtindog sa atubangan kan Aki nin tawo.” (Lucas 21:34-36) Tamang-tama an pagkaladawan ni Jesus sa mga estilo nin pamumuhay kan mga tawo sa pankagabsan: pagpalabilabi sa kakanon, pagbuburat, asin pamumuhay na nagbubunga nin mga kahaditan.

15. Taano ta maninigo niatong likayan an pagpalabilabi sa kakanon asin inomon?

¹⁵ An sobrang pagkakan asin makosog na pag-inom bakong kaoyon kan mga prinsipyo sa Biblia asin dapat na likayan. “Dai ka makiiba sa mga makosog na parainom nin arak, sa mga paslong parakakan nin karne,” an sabi kan Biblia. (Talinhaga  23:20) Pero tanganing masabing nakadadanyar iyan, dai man kaipuhan na magin siring kaiyan kagrabe an pagkakan asin pag-inom. An saro puedeng patungkaon asin gibohon kaiyan na hugakon bago pa nanggad iyan mangyari. “An hugakon nagpapaheling na sia may pagmawot,” an sabi nin sarong talinhaga sa Biblia, “alagad an saiyang kalag mayong-mayo.” (Talinhaga 13:4) An siring na tawo tibaad gustong gibohon an kabotan nin Dios, alagad an saiyang pagmawot nagdadanay na dai nangyayari huli sa kapabayaan.

16. Paano niato malilikayan na kita magabatan nin mga kahaditan may labot sa satong pamilya?

¹⁶ Ano an mga kahaditan sa buhay na tumang dian si Jesus nagpatanid? Kaiba dian an personal na mga kapurisawan, pagsustento sa pamilya, asin an mga kaagid kaiyan. Bako nanggad madonong na togotan an mga ini na makapagabat sa sato! “Siisay sa saindo na sa paghadit makadadagdag nin sarong maniko sa lawig kan saiyang buhay?” an hapot ni Jesus. Sinadol nia an mga nagdadangog sa saiya: “Dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’ Huli ta an gabos na ini iyo an mga bagay na hinahanap na gayo kan mga nasyon. Huli ta an saindong langitnon na Ama nakaaaram na kaipuhan nindo an gabos na bagay na ini.” Paagi sa pag-enot kan intereses kan Kahadean sa satong buhay asin pagkaigwa nin kompiansa na itatao sa sato ni Jehova an mga pangangaipo niato, makokontrol niato an mga kahaditan asin matatabangan kitang magpuka.​—Mateo 6:25-34.

17. Paano puedeng magbunga nin kahaditan an materyal na mga pinag-aaabot?

¹⁷ An kahaditan puede man na dara kan materyalistikong mga pinag-aaabot. Halimbawa, ginigibong komplikado nin nagkapira an saindang buhay paagi sa pamumuhay nin labi sa makakaya ninda. An nagkapira naenganyar kan mga pakana na biglang pagyaman asin daing kasegurohan na mga pangangapital. Para sa iba, nagin siod an sekular na edukasyon bilang paagi na magkamit nin pinansial na pag-asenso. Totoo, an sarong sokol nin edukasyon puedeng magamit tanganing makakua nin trabaho. Minsan siring, an totoo, huli  sa nakauubos nin panahon na pagmamaigot na kumua nin mas halangkaw na edukasyon, an nagkapira dinanyaran an saindang sadiri sa espirituwal. Kanigoan kapeligrosong kamugtakan iyan mantang nagrarani an aldaw ni Jehova! An Biblia nagpapatanid: “Idtong mga determinadong yumaman nahuhulog sa sugot asin sa siod patin sa dakol na daing isip asin nakararaot na mawot, na nagdadara sa mga tawo sa kalaglagan asin kapahamakan.”​—1 Timoteo 6:9.

18. Tanganing dai maimpluwensiahan kan materyalistikong estilo nin pamumuhay, anong kakayahan an dapat niatong kultibaron?

¹⁸ An kaipuhan tanganing dai maimpluwensiahan kan materyalistikong paagi nin pamumuhay iyo an pagkultibar kan kakayahan na mamidbid an kalaenan kan tama asin sala kun nagdedesisyon. An kakayahan na ini napatatalubo paagi sa regular na pagkakan nin ‘matagas na espirituwal na kakanon na para sa mga maygurang’ asin paagi sa ‘pagpatood kan satong kakayahan nin pagmansay huli sa paggamit.’ (Hebreo 5:​13, 14) An pagsierto “sa orog na mahalagang mga bagay” kun naggigibo nin mga prioridad iingatan man kita sa paggibo nin salang mga pagpili.​—Filipos 1:10.

19. Kun mamansayan niato na kadikiton na sana an panahon niato sa espirituwal na mga gibohon, ano an maninigo niatong gibohon?

¹⁹ An materyalistikong estilo nin pamumuhay puedeng makabuta sa sato, na nagpapangyaring dikit na sana o mayo na kita nin panahon para sa espirituwal na mga gibohon. Paano niato masisiyasat an satong sadiri asin malilikayan na masiod kan siring na estilo nin pamumuhay? Kaipuhan niatong mapagngayongayong horophoropon kun paano asin sagkod saen niato puedeng gibohon na simple an satong pamumuhay. Si Hadeng Salomon kan suanoy na Israel nagsabi: “Mahamis an pagtorog kan sarong naglilingkod, minsan pa kadikit o dakol an saiyang kinakakan; alagad an kadakolan kan mayaman dai nagpapatorog sa saiya.” (Eclesiastes 5:12) An pag-asikaso daw sa dai kaipuhan na materyal na mga rogaring nakauubos nin dakol na oras asin kosog niato? Mientras na dakol an rogaring niato, mas dakol man kitang kaipuhan na manteneron, bayadan sa seguro, asin protehiran. May bentaha daw para sa sato kun gibohon niatong simple an satong pamumuhay paagi sa pagbutas kan nagkapira niatong rogaring?

Maninigo Nanggad Kamong Magin Andam

20, 21. (a) Anong asegurasyon an itinao ni apostol Pedro may labot sa aldaw ni Jehova? (b) Anong mga gawe asin gibo an dapat niatong padagos na ipaheling mantang kita nag-aandam para sa aldaw ni Jehova?

²⁰ Naubos an panahon para sa kinaban kan kaaldawan ni Noe, asin mauubos man iyan para sa presenteng sistema nin mga bagay. Inaasegurar kita ni apostol Pedro: “An aldaw ni Jehova madatong siring sa parahabon, na dian an kalangitan mawawara na may nagsasagitsit na ribok, alagad an mga elemento mantang labi-labi kainit matutunaw, asin an daga asin an mga gibo-gibo dian mahahayag.” Dai makakaligtas an simbolikong kalangitan​—an maraot na mga gobyerno​—ni an simbolikong daga​—an katawohan na siblag sa Dios​—sa init kan naglalaad na kaanggotan nin Dios. Sinasabi kun paano kita magigin andam para sa aldaw na iyan, si Pedro nagkagsing: “Mantang an gabos na bagay na ini tutunawon nin siring, isipon kun dapat na magin anong klase kamong tawo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova!”​—2 Pedro 3:10-12.

²¹ An pag-atender niato nin regular sa Kristianong mga pagtiripon asin pakikikabtang sa paghuhulit kan maogmang bareta kaiba sa mga gawe asin gibong ini nin diosnon na debosyon. Gibohon logod niato iyan na may odok sa pusong debosyon sa Dios mantang mapasensiang hinahalat niato an dakulang aldaw ni Jehova. “[Gibohon niato] an bilog [niatong] makakaya na sa katapustapusi makua [nin Dios na] daing digta asin dai nin kanawayan patin nasa katoninongan.”​—2 Pedro 3:14.

Nagigirumdoman daw Nindo?

• Taano ta maninigo na kita magin andam para sa aldaw ni Jehova?

• Kun an normal na mga okupasyon sa buhay iyo na an nagigin pangenot sa sato, ano an maninigo niatong gibohon?

• Ano an makatatabang sa sato na labanan an espirituwal na pagtungka?

• Anong nakadadanyar na mga estilo nin pamumuhay an dapat niatong likayan, asin paano?

[Mga Hapot Para sa Pag-adal]

[Mga Ritrato sa pahina 20, 21]

An mga tawo kan kaaldawan ni Noe dai nagmangno kan nagdadangadang na paghokom​—kamo daw nagmamangno?

[Ritrato sa pahina 23]

Puede daw nindong gibohon na simple an saindong pamumuhay tanganing magkaigwa nin mas dakol na oras para sa espirituwal na mga gibohon?