An Kagayonan kan mga Linalang ni Jehova

‘Ika Mas Mamuraway Kisa Kabukidan’

AN PAGMASID sa pagsirang nin saldang sa mag-aagahon sa alitoktok kan Bukid nin Fuji sarong dai malilingawan na eksperyensia. Minatunga an kolor kalayong saldang, na liniliwanagan an maputing niebe asin an abohon na darakulang gapong lava. Sa pagpoon nin saro na naman na aldaw, an klarong anino kan bukid marikas na minalakop nin dakol na kilometro sa mga bulod asin kababan.

Arog kan Bukid nin Fuji​—na kun isurat sa mga tipo nangangahulogan “daing kapareho”​—nungkang dai kita napapangalas sa mamuraway na kabukidan. Tara, puede kitang pakumbabaon huli sa grabeng kadakulaan kaiyan! Grabe an kamurawayan kan kabukidan kaya dakol na tawo an naniwala na an pinakahalangkaw na mga alitoktok, na sa parate natatahoban nin alopoop asin panganoron, iniistaran nin mga dios.

An iyo sanang Dios na tunay na natatawan nin pag-omaw kan mga alitoktok nin bukid iyo an saindang ekspertong Kaglalang, si Jehova. Sia sana an “Naghaman kan kabukidan.” (Amos 4:13) Haros un-kuarto kan daga an mabukid, asin kan lalangon nin Dios an satong planeta, nagbugtak sia nin mga puersa na sa katapustapusi nakahaman nin pambihirang mga alitoktok asin kabukidan. (Salmo 95:4) Halimbawa, pinaniniwalaan na an mahiwas na kabukidan kan Himalaya asin Andes naporma paagi sa grabeng mga paghiro sa irarom kan daga asin paagi sa paghiro kan mga kabtang kan pinakaibabaw kan daga.

Kitang mga tawo dai lubos na nakasasabot kun paano asin taano ta nagkaigwa nin kabukidan. Sa katunayan, dai niato kayang simbagon an mga ihinapot na ini sa matanos na si Job: “Haen ka kan lalangon ko [ni Jehova] an daga? . . . Sa ano nagkakamurugtak an mga patongtongan kaiyan?”​—Job 38:4-6.

Minsan siring, aram nanggad niato na an satong buhay nakadepende sa kabukidan. Inapod iyan na mga torre nin tubig nin naturalesa, huli ta an kabukidan an ginigikanan kan gabos na pangenot na salog asin kabanga kan mga tawo sa daga an nagdedepende sa kabukidan para sa tubig. (Salmo 104:13) Segun sa magasin na New Scientist, “anom sa 20 pangenot na pagkakan na tinanom sa kinaban an naggigikan sa kabukidan.” Sa irarom nin balanseng kamugtakan sa ekolohiya sa ipinanuga nin Dios na bagong kinaban, “magkakaigwa nin abundang tipasi sa ibabaw kan daga; maglilipwas sa alitoktok kan kabukidan.”​—Salmo 72:16; 2 Pedro 3:13.

Para sa dakol, an pagsambit sa kabukidan nagpapagirumdom sa sainda kan Alpes sa Europa. An mga alitoktok na ini, kabale na an Bukid nin Civetta na naheheling digdi, nagtatao nin nakaoogmang marhay na patotoo sa Kaglalang kan mga iyan. (Salmo 98:8) Inoomaw kaiyan si Jehova, an saro na ‘ineestablisar nin pusog an kabukidan paagi sa kapangyarihan nia.’​—Salmo 65:6. *

Tunay nanggad na nakapupukaw nin may pagkangirhat na paggalang an kagayonan kan Alpes, pati na an mga alitoktok asin kalabaan kaiyan na natatahoban nin yelo, an mga bakilid kaiyan na natatakopan nin niebe, an mga kababan asin danaw kaiyan, asin an mga kaawagan kaiyan. Sinabi ni Hadeng David na si Jehova “an Saro na nagpapatubo nin berdeng doot sa kabukidan.”​—Salmo 147:8.

An kabubulodan​—arog kan mga bulod na ini sa Guilin, Tsina​—garo baga bakong gayong pambihira kisa Alpes, alagad napapalaen an kagayonan kan mga iyan. Sa gilid kan Salog nin Li, an mga raya-raya  nin nakauldot na mga alitoktok nin gapong puti pinahahanga an mga bisita huli sa kagayonan kaiyan. An pagmasid sa malinaw na tubig na nagbobolos sa pag-oltanan nin maalopoop na kabubulodan tibaad ipagirumdom an mga tataramon kan salmista: “Sinusugo nia [ni Jehova] an mga burabod pasiring sa mga kababan kan sapang masulog; sa pag-oltanan nin kabukidan padagos sindang nagbobolos.”​—Salmo 104:10.

Angay sanang mapahanga kita kan kabukidan huli ta rinerekonoser niato iyan bilang mamuraway na kabtang kan mamomoton na probisyon kan Kaglalang para sa ikararahay asin ikaoogma kan katawohan. Pero, minsan ngani tibaad makangingirhat iyan, an kabukidan dai ikakokomparar sa kamurawayan ni Jehova. Sia totoong “mas mamuraway kisa kabukidan.”​—Salmo 76:4.

[Mga Nota sa Ibaba]

[Kahon/Ritrato sa pahina 9]

Dies porsiento kan populasyon sa kinaban an nag-iistar sa mabukid na mga lugar. Alagad iyan bakong olang na dai mapanggaganahan para sa mga nagpapahayag kan maogmang bareta kan Kahadean nin Dios. An mga ministrong Kristianong ini sibot na marhay sa dakol na haralangkawon na rehion. Asin “abaang gayon sa ibabaw kan kabukidan kan mga bitis kan nagdadara nin maogmang bareta, kan nagbabalangibog nin katoninongan, kan nagdadara nin maogmang bareta dapit sa orog karahay, kan nagbabalangibog nin kaligtasan!”​—Isaias 52:7.

“An haralangkaw na bukid para sa mga kanding na bukidnon,” an awit kan salmista. (Salmo 104:18) An mga kanding na bukidnon, arog kan kahangahanga an sungay na layas na kanding nin Nubia, kaiba sa pinakasegurado an tindog sa gabos na nag-iistar sa bukid. Naglalakaw iyan sa mga gati na hayakpit na marhay na garo baga dai maaagihan. An layas na kanding sinangkapan tanganing mag-istar sa masakit maabot na mga lugar. An sarong dahelan kaini iyo an pagkagibo sa mga kuko kaiyan. An baak kaiyan puedeng bumuka sa gabat kan kanding, na nagpapangyari sa hayop na iyan na makatungtong nin marigon kun nagtitindog o naglalakaw sa hayakpit na nakauldot na mga gapo. Totoo nanggad, an layas na kanding sarong obra maestra sa pagkadisenyo!

[Ritrato sa pahina 9]

Bukid nin Fuji, Honshu, Hapon