Mga Hapot Hale sa mga Parabasa

Ano an nangyari durante kan insidenteng nakasurat sa Exodo 4:24-26, asin kiisay na buhay an nameligro?

Si Moises pasiring sa Egipto kaiba an saiyang agom, si Zipora, asin an saiyang mga aking lalaki, si Gersom asin Eliezer, kan mangyari an minasunod na insidente: “Nangyari sa dalan sa lugar na dadagosan na si Jehova sinabat sia asin padagos na naghanap nin paagi na gadanon sia. Sa katapustapusi kuminua si Zipora nin kiskisan na gapo asin ginurot an kublit sa poro kan pisot kan saiyang aki asin idinuta nia iyan sa mga bitis nia asin sinabi: ‘Huli ta ika sarong nobyo nin dugo sa sako.’ Bilang resulta tinogotan na nia siang humale. Kan panahon na iyan sinabi nia: ‘Sarong nobyo nin dugo,’ huli sa pagturi.” (Exodo 4:​20, 24-26) Minsan ngani an halipot na kotasyon na ini bakong malinaw asin dai masisierto an kahulogan kaiyan, an Kasuratan nagtatao nanggad nin liwanag sa mga bersikulong ini.

Dai malinaw na sinasabi kan pagkasaysay na ini kun kiisay na buhay an namemeligro. Minsan siring, makatanosan na makakokonklusyon kita na bakong buhay ni Moises iyan, huling nag-ako pa sana sia nin sugo hale sa Dios na pangenotan an mga Israelita paluwas sa Egipto. (Exodo 3:10) Minalataw na harayo an posibilidad na namemeligro an buhay ni Moises sa anghel nin Dios mantang ootobon na nia an asignasyon na iyan. Kun siring iyan buhay kan saro sa saiyang mga aking lalaki. An ley na itinao ki Abraham bago kaidto mapadapit sa pagturi nagsasabi: “An lalaking bakong turi na dai mapaturi kan laman kan saiyang kublit sa poro kan pisot, an kalag nganing iyan dapat na pohoon sa saiyang banwaan. Linapas nia an sakong tipan.” (Genesis 17:14) Minalataw na napabayaan ni Moises na turion an saiyang aking lalaki, asin sa siring nameligro an buhay kan aking lalaki sa anghel ni Jehova.

Kiisay na mga bitis an dinutaan kan ginurot ni Zipora an kublit sa poro kan pisot kan saiyang aking lalaki sa pagprobar na husayon an mga bagay? An anghel ni Jehova an may kapangyarihan na gadanon an bakong turi na aking lalaki. Kun siring, rasonable sana na an kublit sa poro kan pisot idinuta ni Zipora sa mga bitis kan anghel, na ipinaheheling iyan sa saiya bilang tanda na sinunod na nia an tipan.

Pambihira an sinabi ni Zipora na “ika sarong nobyo nin dugo sa sako.” Ano an ipinaririsa kaiyan manongod sa saiya? Paagi sa pagkuyog nia sa mga kahagadan kan tipan nin pagturi, rinekonoser ni Zipora an sarong pakipagtipan ki Jehova. An tipan nin Ley na kan huri ginibo sa mga Israelita nagpaheling na sa sarong pakipagtipan, puedeng isipon na si Jehova sarong agom na lalaki asin an katipan sarong agom na babae. (Jeremias 31:32) Huli kaini, sa pag-apod ki Jehova (paagi sa saiyang representanteng anghel) na “sarong nobyo nin dugo,” minalataw na rinerekonoser ni Zipora an saiya mismong pagpasakop sa mga kondisyon kan tipan na iyan. Garo man sana inako nia an sarong posisyon nin sarong agom na babae sa tipan nin pagturi, na si Jehova Dios an nagseserbing agom na lalaki. Sa paano man, huli sa saiyang desididong akto nin pagkuyog sa kahagadan nin Dios, dai na nameligro an buhay kan saiyang aking lalaki.