Arin na Relihion an Maninigo Nindong Pilion?

‘AN MANLAENLAEN na relihion garo sana manlaenlaen na tinampo pasiring sa sarong dudumanan. Total, saro sana an Dios, bako daw?’ Arog man kaiyan an opinyon nin dakol na nagsasaboot na maski ngani mahalaga an pagigin miembro nin relihion, bako man talagang mahalaga kun arin na relihion an pinipiling sunodon nin saro.

Sa primero, an argumentong ini tibaad garo tama, huling totoo na saro sana an Dios, an Makakamhan sa Gabos. (Isaias 44:6; Juan 17:3; 1 Corinto 8:​5, 6) Minsan siring, dai niato puedeng dai intindihon an risang-risang mga pagkakalaen​—mga kontradiksion pa ngani​—sa tahaw kan dakol na relihiosong grupo na naghihingakong naglilingkod sa tunay na Dios. Nagkakalaen sindang marhay sa saindang mga gibo, sa saindang mga paniniwala, sa saindang mga katokdoan, asin sa saindang mga kahagadan. Dakulang marhay an pagkakalaen kaya an mga miembro nin sarong relihion o grupo nadedepisilan na masabotan o akoon an itinotokdo o pinaniniwalaan kan iba.

Sa ibong na lado, si Jesus nagsabi: “An Dios Espiritu, asin idtong nagsasamba sa saiya dapat na magsamba sa espiritu asin katotoohan.” (Juan 4:24) An pagsamba daw sa Dios sa katotoohan nagtotogot sa pagkaigwa nin dakol na nagkakasarongatan na ideya manongod sa kun siisay an Dios, kun ano an saiyang mga katuyohan, asin kun paano nia gustong sambahon sia? Makatanosan daw na maniwala na bakong importante sa Makakamhan sa Gabos na Dios kun paano niato sia sinasamba?

An Tunay na mga Kristiano Kaidto Asin Ngonyan

An mga Kristiano kan enot na siglo may beses na nagkaigwa nin magkalaen na mga opinyon manongod sa mga bagay-bagay. Halimbawa, nagtataram manongod sa mga taga Corinto, si apostol Pablo nagsabi: “Binaretaan ako manongod sa saindo, mga tugang, kan mga yaon sa harong ni Cloe, na igwa dian sa saindo nin mga dai pagkaoroyon. Ini an boot kong sabihon, na an kada saro sa saindo nagsasabi: ‘Ako ki Pablo,’ ‘Alagad ako ki Apolos,’ ‘Alagad ako ki Cefas,’ ‘Alagad ako ki Cristo.’”​—1 Corinto 1:​11, 12.

Minansay daw ni Pablo na bakong gayong importante an mga pagkakalaen na ini? An lambang indibiduwal daw naggigibo sana kan sadiri man niang paagi tanganing maligtas? Dai nanggad! Si Pablo nagsadol: “Sinasadol ko kamo, mga tugang, paagi sa ngaran kan satong Kagurangnan na si Jesu-Cristo na kamo gabos maninigong magtaram na may pagkaoroyon, asin na dai magkaigwa nin pagkabaranga dian sa saindo, kundi na kamo dayupot na magkasararo sa saro sanang pag-isip asin sa saro sanang paghonahona.”​—1 Corinto 1:10.

Siempre, an pagkasararo sa paniniwala dai puedeng makamit paagi sa pamimirit. Makakamit sana iyan kun an mga indibiduwal maingat na mag-iimbestigar saka makaabot sa asin akoon an parehong mga konklusyon. Sa siring, an personal  na pag-adal kan Tataramon nin Dios asin an onestong pagmawot na iaplikar an nanonodan mahalagang marhay na lakdang tanganing kamtan an klase nin pagkasararo na sinabi ni Pablo. Puede daw na manompongan an siring na pagkasararo? Arog kan natokar na niato, haloy nang bilang sarong grupo an pagtratar nin Dios sa saiyang banwaan. Posible daw na mamidbid an grupong iyan ngonyan?

An mga Pakinabang sa Tamang Pakikiasosyar

An salmistang si David sarong beses naghapot kaidto: “O Jehova, siisay an magigin bisita sa saimong tolda? Siisay an mag-eerok sa saimong banal na bukid?” Iyan tunay na nakakapukaw nin isip na hapot. Itinao ni David an simbag: “Sia na naglalakaw na daing sala asin naggigibo nin katanosan asin nagtataram nin katotoohan sa saiyang puso.” (Salmo 15:​1, 2) An tamang pakasabot sa Biblia mapangyari na mamidbid nin saro an relihion na nakakaabot sa mga kahagadan na iyan nin Dios. Dangan, paagi sa pakikiasosyar sa grupong iyan, makakamtan nin saro an nakakapakosog na pakikiiba sa mga tawong nagsasamba sa Dios sa pagkasararo saka “sa espiritu asin katotoohan.”

Pinatunayan kan Mga Saksi ni Jehova na posibleng makamit an pagkasararo sa pagtubod asin gibo dawa sa barangang kinaban ngonyan. Kabilang sa sainda an dating mga miembro nin dakol na manlaenlaen na relihion asin grupong etniko. An ibang Saksi dating mga agnostiko o ateista. An iba pa dai sana kaidto sineryoso an manongod sa relihion. Naghale sa pagkalaenlaen na ini nin relihion, kultura, asin pilosopiya an mga indibiduwal na igwa ngonyan nin pagkasararo sa relihion na dai naheheling sa kinaban ngonyan.

An basehan kan siring na pagkasararo iyo an Tataramon nin Dios, an Biblia. Siempre, aram kan Mga Saksi ni Jehova na dai ninda puedeng diktahan an iba kun ano an dapat gibohon. Alagad inaapresyar ninda an pribilehiong mag-enkaminar sa iba na makanood sa Biblia tanganing ibasar sa masarig na pundasyon na iyan an saindang pagpili kun dapit sa pagsamba. Sa paaging ini, dakol pa an makikinabang man sa pagsamba sa Dios “sa espiritu asin katotoohan.”

Ngonyan, dakula an peligro na magin biktima kan nakakadanyar na mga impluwensia asin pan-aakit. Mahalagang marhay an pagpili kan tamang klase nin kairiba. An Biblia nagsasabi na “sia na naglalakaw na kaiba nin mga madonong magigin madonong” asin na an “maraot na pag-iriba nakakaraot sa marahay na mga ugale.” (Talinhaga 13:20; 1 Corinto 15:33) An pakikiasosyar sa tunay na mga parasamba nin Dios sarong proteksion. Kun siring, an Biblia nagpapagirumdom sa sato: “Konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magparinigonan nin boot, asin lalo na ta naheheling nindo na an aldaw harani na.” (Hebreo 10:​24, 25) Kanigoan na bendisyon kun an tunay na mga magkatood, espirituwal na mga tugang na lalaki asin babae, mamomoton na nagtitinarabangan tanganing otobon an saindang mga paninimbagan sa atubangan nin Dios!

Kinompirmar ni Ottmar an punto de vistang ini. Baga man pinadakula sa sarong pamilyang Katoliko sa Alemania, nagpondo sia sa pagsimba. Sia nagpapaliwanag: “Basta magsimba ako, kun paano ako naglaog na nakakamateng daing halaga iyo man giraray pagluwas ko.” Minsan siring, nagdanay an saiyang pagtubod sa Dios. Dangan nakaolay nia an mga Saksi ni Jehova asin nakombensir na sinda an tunay na mga lingkod nin Dios. Naheling nia an pangangaipo na makiasosyar sa sainda. Sabi nia ngonyan: “Huling aktibo sa pambilog na kinaban na organisasyon, igwa ako nin katoninongan nin isip asin puso. Progresibo akong natatabangan na magkaigwa nin mas tamang kaaraman sa Biblia. Iyan sarong bagay na mahalagang marhay sa sako personalmente.”

Sarong Pangagda sa mga Naghahanap

An mga tawong parareho an isip na dayupot na nagtatrabaho bilang sarong grupo mas epektibo nanggad na mahahaman an sarong trabaho kisa mga indibiduwal na nagtatrabaho nin kanya-kanya. Halimbawa, an panhuring mga instruksion ni Jesus sa saiyang mga parasunod iyo an: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” (Mateo 28:​19,  20) Paano lubos na magigibo an siring na trabaho kun mayo nin pagdirehir o organisasyon? Paano makukuyog nin saro an pagboot na ini sa Kasuratan kun sia nagmamaigot na maglingkod sa Dios nin independiente?

Durante kan nakaaging taon, an Mga Saksi ni Jehova sa bilog na kinaban nagdistribwir nin 91,933,280 libro, pulyeto, asin brosyur, patin 697,603,247 magasin na basado sa Biblia, na paagi kaiyan napaabotan kan mensahe hale sa Tataramon nin Dios an ginatos milyones na tawo sa 235 kadagaan. Pambihira nanggad na patotoo na an paghihingoa kan nagkakasararo asin organisadong marhay na grupo mas dakol an nahahaman kisa paghihingoa nin indibiduwal na mayong nagtatabang!

Dugang pa sa pagdistribwir nin mga babasahon sa Biblia, an Mga Saksi ni Jehova namamayo nin mga pag-adal sa Biblia na daing bayad tanganing tabangan an mga tawo na lubos na masabotan an mga kahagadan nin Dios. Kan nakaaging taon, sa promedyo, 5,726,509 siring na pag-adal sa Biblia an pinamayohan kada semana sa mga indibiduwal o grupo. An pagtotokdong ini sa Biblia nakatabang sa minilyon na tawo na magkaigwa nin masarig na pagbabasaran sa pagpili ninda kun dapit sa pagsamba. Inaagda kamo na pag-adalan an mga kahagadan nin Dios na yaon sa Biblia. Dangan puede na kamong pumili.​—Efeso 4:13; Filipos 1:9; 1 Timoteo 6:20; 2 Pedro 3:18.

Kun gusto nindong paogmahon an Dios, mahalagang marhay an pagigin miembro nin relihion​—alagad bakong basta arin sanang relihiosong grupo o denominasyon. Minsan siring, an saindong pagpili nin relihion kaipuhan nindong ibasar sa tamang kaaraman sa Biblia, bakong sa mayong patunay na mga doktrina o sabi-sabi. (Talinhaga 16:25) Pag-adalan an mga kahagadan para sa tunay na relihion. Ikomparar iyan sa sadiri nindong mga paniniwala. Dangan pumili oyon dian.​—Deuteronomio 30:19.

[Mga Ritrato sa pahina 7]

An Mga Saksi ni Jehova igwa nin pagkasararo sa sarong nababangang kinaban