Gibohon o Dai Paggibohon sa Iba?

AN HABO nindong gibohon sa saindo, dai man nindo paggibohon sa iba.” An kasabihan na ini sa etika iinaatribwir sa bantog na paratokdo asin pilosopong Intsik na si Confucio. Ngonyan, pakalihis nin mga 2,500 na taon, dakol pa man giraray an naniniwala na nagibo na nin saro an saiyang moral na obligasyon paagi sana sa dai paggibo nin ano man na maraot sa iba.

Daing duwa-duwa, may halaga an susundon na ini nin gawe-gawe na itinao ni Confucio. An Biblia, sa ibong na lado, naghahayag nin saro pang aspekto nin gawe-gawe asin interaksion nin tawo. Apuera sa mga kasalan na tuyong ginigibo tumang sa sarong kapwa tawo, an Biblia nagtataram manongod sa kasalan huli sa dai paggibo. An Kristianong disipulo na si Santiago nagsurat: “Kun naaaraman nin saro kun paano gigibohon an tama alagad ta dai nia iyan ginigibo, iyan kasalan para sa saiya.” (Santiago 4:17) Imbes na pagbotan sana an mga Kristiano na dai maggibo nin maraot sa iba, itinao ni Jesu-Cristo an hatol na ini: “An gabos na boot nindong gibohon sa saindo nin mga tawo, gibohon man nindo sa sainda.”​—Mateo 7:12.

Sa kapoonpooni katuyohan nin Dios na an bilog na katawohan trataron an lambang saro sa paagi na gusto nindang magin pagtratar sa sainda. Sia an nagpaheling kan pinakamarahay na halimbawa sa pagpahayag nin pagmakolog para sa ikakarahay kan iba paagi sa paglalang nia sa mga tawo: “Linalang nin Dios an tawo sa saiyang ladawan, sa ladawan nin Dios linalang nia sia; linalang nia sindang lalaki asin babae.” (Genesis 1:27) Nangangahulogan ini na mamomoton na tinawan nin Dios an mga tawo nin konsensia, na, kun sinasanay nin tama, magiya sa sainda na trataron an iba sa paagi na gusto man nindang magin pagtratar sa sainda.

Dakol ngonyan an nawawaran na nin paglaom asin mayo nang maginibo sa kamot kan mga tawong daing konsiderasyon asin sadiri sana an iniintindi. Malinaw nanggad, an kaipuhan bako sanang dai paggibo nin maraot asin nakakadanyar sa iba kundi, imbes, paggibo nin marahay asin nakakatabang sa sainda. Huli kaini, an Mga Saksi ni Jehova boluntaryong naggigibo nin positibong aksion tanganing tabangan an iba na manodan an makangangalas na paglaom na yaon sa Tataramon nin Dios. Kun minadalaw sinda sa saindang pagtaraed dara an maogmang bareta hale sa Biblia, ginigibo ninda iyan sa espiritu nin pagkamoot, na ginigibo sa iba an gusto man nindang gibohon sa sainda.