Mga Hapot Hale sa mga Parabasa

Ano an boot sabihon ni Jesus kan sinabi nia sa saiyang mga disipulo: “Naheheling ko na si Satanas na nahulog na hale sa langit siring sa kikilat”?

Kapipili pa sana ni Jesus nin 70 disipulo, asin “isinugo [nia] sinda nin manduwaduwa na maenot sa saiya sa kada siudad asin lugar na saiya mismong dudumanan.” Kan bumalik an 70, naggagayagaya sinda sa kapangganahan kan saindang misyon. “Kagurangnan, minsan an mga demonyo ipinapasakop sa samo paagi sa paggamit kan ngaran mo,” an sabi ninda. Sa puntong iyan, sinabi ni Jesus: “Naheheling ko na si Satanas na nahulog na hale sa langit siring sa kikilat.”​—Lucas 10:​1, 17, 18.

Sa primero, garo baga si Jesus nagtataram manongod sa sarong pangyayari na nangyari na. Pero, 60 taon pakatapos sambiton ni Jesus an mga tataramon sa enotan, an gurang nang apostol na si Juan naggamit nin kaagid na pananaram, na nagsurat: “Ihinulog an dakulang dragon, an enot na halas, an inaapod Diablo asin Satanas, na ilinalagalag an bilog na ineerokan na daga; ihinulog sia sa daga, asin an saiyang mga anghel ihinulog kaiba nia.”​—Kapahayagan 12:9.

Kan isurat ni Juan an mga tataramon na idto, nag-eerok pa kaidto sa langit si Satanas. Paano niato naaraman? Huli ta an Kapahayagan libro nin hula, bakong nin kasaysayan. (Kapahayagan 1:1) Huli kaini, kan kaaldawan ni Juan, si Satanas dai pa ihinulog sa daga. Sa katunayan, ipinapaheling kan ebidensia na nangyari sana ini dai nahaloy pakatapos na si Jesus patukawon sa trono bilang Hade kan Kahadean nin Dios kan 1914. *​—Kapahayagan 12:1-10.

Kun siring, taano ta nagtaram si Jesus manongod sa pagpalayas ki Satanas hale sa langit na garo baga iyan nangyari na? Isinusuherir nin nagkapirang intelektuwal na sinasaway ni Jesus an saiyang mga disipulo huli sa pagpaheling nin salang pag-orgolyo. Naniniwala sinda na garo man sana nia sinasabi: ‘Dinaog nindo an mga demonyo, alagad dai kamo magin mahambog. Si Satanas nagin mapalangkaw, asin nagresulta iyan sa saiyang biglang pagbagsak.’

Dai kita puedeng magin dogmatiko sa bagay na ini. Minsan siring, minalataw na mas posibleng naggagayagaya si Jesus kaiba kan saiyang mga disipulo asin nagtaram manongod sa pagbagsak ni Satanas sa ngapit. Orog kisa siisay man sa saiyang mga disipulo, aram na marhay ni Jesus an maisog na pagkaanggot kan Diablo. Imahinara an namatean na kagayagayahan ni Jesus kan madangog nia na an makapangyarihan na mga demonyo ipinasakop sa saiyang bakong sangkap na tawong mga disipulo! An pananakop na ini sa mga demonyo patanaw sana sa ngapit kun si Jesus, bilang si Miguel na arkanghel, makilaban na ki Satanas asin palayason sia sa langit pasiring sa daga.

Kan sabihon ni Jesus na naheling nia si Satanas na “nahulog na,” malinaw na idinodoon nia an kasiertohan kan pagbagsak ni Satanas. Kaagid ini kan iba pang hula sa Biblia na nagtataram manongod sa mga pangyayari sa ngapit na garo baga nangyari na. Halimbawa, mangnohon an magkaibahan na paggamit kan past tense asin future tense sa hula manongod sa Mesiyas sa Isaias 52:13–​53:12. Posibleng marhay na ipinapahayag kaidto ni Jesus an kompiansa na an pagpalayas ki Satanas sa langit mangyayari sono sa katuyohan kan Saiyang Ama. Sierto man si Jesus na sa itinalaan na panahon nin Dios, si Satanas asin an saiyang mga demonyo ihuhulog sa bungaw asin sa huri lalaglagon nin sararoan sana.​—Roma 16:20; Hebreo 2:14; Kapahayagan 20:1-3, 7-10.

[Nota sa Ibaba]