Pagkultibar sa Arog-Cristong Pagmansay sa Kadakulaan

“An siisay man na boot na magin dakula sa saindo dapat na iyo an mani paralingkod sa saindo.”​—MATEO 20:26.

1. Ano an pagmansay kan kinaban dapit sa kadakulaan?

HARANI sa suanoy na Egipciong siudad nin Tebas (Karnak sa presenteng aldaw), mga 500 kilometros sa timog nin Cairo, nakatindog an sarong 18 metros an langkaw na estatuwa ni Faraon Amenhotep III. Magigin saditon an pagmate nin saro sa saiyang sadiri kun ikokomparar nia iyan sa grabe kadakulang imahen na idto. An monumentong ini, na daing duwa-duwa na ginibo tanganing pukawon an may pagkangirhat na paggalang sa namamahala, sarong simbolo kan pagmansay kan kinaban sa kadakulaan​—an ipaheling nin saro na sia dakulaon asin importanteng marhay sagkod sa mapupuede asin ipamate sa iba na sinda bakong mahalaga.

2. Anong halimbawa an itinao ni Jesus sa saiyang mga parasunod, asin anong mga hapot an kaipuhan na ihapot niato sa satong sadiri?

² Ikomparar nindo an kalaenan kan pagmansay na ini sa kadakulaan na itinokdo ni Jesu-Cristo. Minsan ngani sia an “Kagurangnan asin Paratokdo” kan saiyang mga parasunod, itinokdo sa sainda ni Jesus na an kadakulaan nakakamtan paagi sa paglilingkod sa iba. Sa huring aldaw kan saiyang buhay digdi sa daga, ipinaheling ni Jesus an kahulogan kan saiyang itinokdo paagi sa paghanaw kan bitis kan saiyang mga disipulo. Kanigoan na mapakumbabang akto nin paglilingkod! (Juan 13:​4, 5, 14) An maglingkod o an paglingkodan​—arin an mas gusto nindo? Napupukaw daw kamo kan halimbawa ni Cristo na  magkaigwa nin pagmawot na magin mapakumbaba na arog nia? Kun siring siyasaton niato an pagmansay ni Cristo sa kadakulaan na laen sa pagmansay na komun sa kinaban.

Likayan an Pagmansay kan Kinaban Dapit sa Kadakulaan

3. Anong mga halimbawa sa Biblia an nagpapaheling kan makamomondong kinaabtan kan mga naghimuyawot nin kamurawayan gikan sa mga tawo?

³ Dakol an halimbawa sa Biblia na nagpapaheling na an pagmansay kan kinaban dapit sa kadakulaan minaresulta sa pagbagsak. Isip-isipa an makapangyarihan na si Aman, na prominente sa palasyo kan hade nin Persia durante kan kaaldawan ni Ester asin Mardoqueo. An paghimuyawot ni Aman nin kamurawayan nagbunga nin pagkapasupog asin kagadanan nia. (Ester 3:5; 6:10-12; 7:​9, 10) Kumusta man an maabhaw na si Nabucodonosor, na nakapay sa kasagsagan kan saiyang kapangyarihan? An saiyang biribid na ideya nin kadakulaan ipinahayag sa mga tataramon na ini: “Bakong ini an Dakulang Babilonya, na pinatindog ko mismo para sa harong kan hade sa kosog kan sakuyang kapangyarihan asin para sa dignidad kan sakuyang kamahalan?” (Daniel 4:30) Dangan yaon man an mapalangkaw na si Hadeng Agripa I, na nag-ako nin dai maninigong kamurawayan para sa saiyang sadiri imbes na magtao nin kamurawayan sa Dios. “Kinakan sia nin mga ulod asin nautsan.” (Gibo 12:21-23) An dai pakasabot kan pagmansay ni Jehova sa kadakulaan an nagin dahelan kan makasusupog na pagbagsak kan gabos na lalaking ini.

4. Siisay an nasa likod kan mapalangkaw na espiritu kan kinaban?

⁴ Tama sanang magmawot kita na gamiton an satong buhay sa paagi na nagtatao nin onra asin paggalang sa sato. Pero, inaaprobetsaran kan Diablo an pagmawot na ini paagi sa pagpalakop nin mapalangkaw na espiritu, na nagpapabanaag kan saiya mismong mga ambisyon. (Mateo 4:​8, 9) Nungkang lingawan na sia an “dios kan sistemang ini nin mga bagay,” asin determinado sia na palakopon an saiyang kaisipan digdi sa daga. (2 Corinto 4:4; Efeso 2:2; Kapahayagan 12:9) Huling aram an ginigikanan kan siring na kaisipan, linilikayan kan mga Kristiano an pagmansay kan kinaban dapit sa kadakulaan.

5. Naggagarantiya daw nin nagdadanay na satispaksion an mga nagibo, kabantogan, asin kayamanan? Ipaliwanag.

⁵ An sarong ideya na pinapalakop kan Diablo iyo na an sikat na ngaran sa kinaban, mga onra na gikan sa mga tawo, asin dakol na kuarta automatikong minaresulta sa maogmang buhay. Totoo daw iyan? Naggagarantiya daw nin buhay na pano nin satispaksion an mga nagibo, kabantogan, asin kayamanan? Pinapatanidan kita kan Biblia na dai madaya kan siring na kaisipan. An madonong na si Hadeng Salomon nagsurat: “Naheling ko mismo an gabos na kahigosan asin an gabos na kahusayan sa trabaho, na iyan nangangahulogan nin pagriribal nin saro tumang sa saro; ini man daing kapakanan asin paglapag sa doros.” (Eclesiastes 4:4) An dakol na indibiduwal na idinusay an saindang buhay tanganing magin prominente sa kinaban makakasabi na totoo an ipinasabong na konsehong iyan kan Biblia. An sarong halimbawa iyo an sarong lalaki na nagtabang sa pagdisenyo, paggibo, asin pagtesting kan sasakyan na pan-espasyo na ginamit kan tawo pasiring sa bulan. Inisip-isip nia: “Nagpagal ako asin nagin matibay na marhay sa sakong ginigibo. Pero iyan nagin basang sana, o daing kamanungdanan, sa pagtao sako nin nagdadanay na kaogmahan asin katoninongan nin isip.” * An kinabanon na ideya dapit sa kadakulaan, baga man iyan sa langtad nin negosyo, isport, o aling-alingan, dai naggagarantiya nin nagdadanay na satispaksion.

 An Kadakulaan na Nakakamtan Paagi sa Paglilingkod na Motibado nin Pagkamoot

6. Ano an nagpapaheling na sala an pagmansay ni Santiago asin Juan dapit sa kadakulaan?

⁶ An sarong pangyayari sa buhay ni Jesus naghahayag kun ano an kalabot sa tunay na kadakulaan. Si Jesus asin an saiyang mga disipulo paduman kaidto sa Jerusalem para sa Paskua nin 33 C.E. Mantang nasa dalan, an duwa sa mga pinsan ni Jesus, si Santiago asin Juan, nagpaheling nin salang pagmansay dapit sa kadakulaan. Paagi sa saindang ina, ini an hinagad ninda ki Jesus: ‘Ipagboot mo na kami tumukaw sa saimong too asin sa saimong wala, sa saimong kahadean.’ (Mateo 20:21) Para sa mga Judio, an pagtukaw sa too o sa wala ibinibilang na dakulang onra. (1 Hade 2:19) Si Santiago asin Juan ambisyosong nagprobar na kuanon an pinakasikat na puesto. Gusto nindang kuanon an deretso sa mga katongdan na ini nin autoridad. Aram ni Jesus kun ano an nasa isip ninda asin inaprobetsaran an oportunidad na iyan na itanos an saindang salang pagmansay dapit sa kadakulaan.

7. Paano ilinadawan ni Jesus kun paano nakakamtan an tunay na Kristianong kadakulaan?

⁷ Aram ni Jesus na sa mapalangkaw na kinaban na ini, an tawo na ibinibilang na dakula iyo an saro na nagkokontrol asin nagboboot sa iba patin nasusunod tolos an gabos na gusto nia. Alagad sa mga parasunod ni Jesus, an mapakumbabang paglilingkod iyo an sokolan nin kadakulaan. Sinabi ni Jesus: “An siisay man na boot na magin dakula sa saindo dapat na iyo an mani paralingkod sa saindo, asin an siisay man na gustong magin enot sa saindo dapat na iyo an mani oripon nindo.”​—Mateo 20:​26, 27.

8. Ano an kahulogan nin pagigin ministro, asin anong mga hapot an puedeng ihapot niato sa satong sadiri?

⁸ An termino sa Griego na trinadusir na “ministro” sa Biblia nanonongod sa saro na may kahigosan asin pagkadesididong naghihingoa na makapaglingkod sa iba. Tinokdoan ni Jesus an saiyang mga disipulo nin sarong mahalagang leksion: An pagsugo sa mga tawo dai ginigibong magin dakula an saro; an paglilingkod sa iba kun motibado nin pagkamoot iyo an nagpapangyaring magin dakula an saro. Hapoton an saindong sadiri: ‘Ano daw kutana an reaksion ko kun ako si Santiago o Juan? Nakua ko daw kutana an punto na an tunay na kadakulaan nakakamtan paagi sa paglilingkod na an motibo iyo an pagkamoot?’​—1 Corinto 13:3.

9. Anong halimbawa an ipinaheling ni Jesus sa saiyang pagtratar sa iba?

⁹ Ipinaheling ni Jesus sa saiyang mga disipulo na an pamantayan nin kinabanon na kadakulaan bakong iyo an pamantayan kan arog-Cristong kadakulaan. Dai sia noarin man naghirong mas nakakalangkaw sa mga pinaglingkodan nia o ipinamate sa sainda na sinda mas hababa. An gabos na klase nin tawo​—mga lalaki, babae, asin aki, mga mayaman, mga dukha, asin an mga makapangyarihan, siring man an midbid na mga parakasala​—nagin  pamugtak an boot sa saiya. (Marcos 10:13-16; Lucas 7:37-50) An mga tawo sa parate daing pasensia sa mga may limitasyon. Iba si Jesus. Minsan ngani may beses na an saiyang mga disipulo nagigin pabiglabigla asin nag-iiriwal, mapasensia nia sindang tinotokdoan, na ipinapaheling sa sainda na sia talagang mapakumbaba asin mahoyo.​—Zacarias 9:9; Mateo 11:29; Lucas 22:24-27.

10. Paano ipinabanaag kan bilog na pamumuhay ni Jesus an daing kapasloan na paglilingkod sa kapakanan nin iba?

¹⁰ An daing kapasloan na halimbawang ipinaheling kan pangenot na Aki na ini nin Dios nagpaheling kun ano talaga an kahulogan kan kadakulaan. Si Jesus dai nagdigdi sa daga tanganing paglingkodan kundi tanganing maglingkod sa iba, na pinapaomayan an “manlaenlaen na helang” asin pinapatalingkas an mga tawo sa kontrol nin mga demonyo. Minsan ngani sia napapagal asin nangaipo nin panahon na magpahingalo, pirme niang ineenot an mga pangangaipo nin iba kisa sa saiyang mga pangangaipo, na hinihingoang rangahon sinda. (Marcos 1:32-34; 6:30-34; Juan 11:​11, 17, 33) An saiyang pagkamoot an nagpahiro sa saiya na tabangan an mga tawo sa espirituwal, na nagbabaklay nin dakol na kilometro sa maalpog na mga tinampo tanganing ihulit an maogmang bareta kan Kahadean. (Marcos 1:​38, 39) Daing duwa-duwa, sineryoso ni Jesus an paglilingkod sa iba.

Arogon an Kapakumbabaan ni Cristo

11. Anong mga kualidad an hinahanap sa mga tugang na lalaki na ninombrahan na maglingkod bilang mga paraataman sa kongregasyon?

¹¹ Kan huring kabtang kan mga taon nin 1800, idinoon an tamang espiritu na maninigong kultibaron kan Kristianong mga paraataman kan nagpipili nin mga lalaki na magigin nagbibiaheng mga representante na matao kan mga pangangaipo kan banwaan nin Dios. An hinahanap, segun sa Zion’s Watch Tower kan Setyembre 1, 1894, mga lalaking “mahoyo​—tanganing dai sinda magin maabhaw . . . , mapakumbaba an kaisipan na naghihingoa na ihulit bako an saindang sadiri, kundi an Cristo​—na dai magpapahayag kan sadiri nindang kaaraman, kundi kan saiyang Tataramon nin simple asin may puersa.” Malinaw nanggad, an tunay na mga Kristiano maninigo na dai noarin man maghingoang magkamit nin paninimbagan tanganing panigoan an personal na ambisyon o tanganing magin prominente, magkaigwa nin kapangyarihan, asin kontrol sa iba. Pirmeng ginigirumdom nin sarong mapakumbabang paraataman na an saiyang mga paninimbagan sarong “marahay na gibo,” bakong halangkaw na posisyon na matao nin kamurawayan sa saiyang sadiri. (1 Timoteo 3:​1, 2) An gabos na magurang sa kongregasyon asin ministeryal na lingkod maninigong gibohon an saindang pinakamakakaya tanganing mapakumbabang maglingkod sa kapakanan nin iba asin mangenot sa sagradong paglilingkod, na nagtatao nin angay na halimbawa tanganing arogon nin iba.​—1 Corinto 9:19; Galacia 5:13; 2 Timoteo 4:5.

12. Anong mga hapot an puedeng ihapot sa saindang sadiri kan mga naghihingoang magkapribilehio sa kongregasyon?

¹² An siisay man na tugang na lalaki na naghihingoang magkapribilehio tibaad nangangaipong hapoton an saiyang sadiri: ‘Naghahanap daw ako nin mga oportunidad na maglingkod sa iba, o igwa daw  ako nin tendensia na gusto kong ako an paglingkodan? Andam daw ako na gibohon an nakakatabang na mga gibohon na dai tolos naheheling nin iba?’ Halimbawa, an sarong hoben na lalaki tibaad andam na magtao nin mga pahayag sa Kristianong kongregasyon alagad tibaad nag-aalangan na magtabang sa mga may edad na. Tibaad nagugustohan nia an pakikiasosyar sa responsableng mga lalaki sa kongregasyon pero nag-aalangan sa pakikikabtang sa paghuhulit. Marahay na hapoton nin siring na hoben na lalaki an saiyang sadiri: ‘Sa pangenot daw nakakonsentrar ako sa mga aspekto kan paglilingkod sa Dios na nagbubunga nin pagigin midbid asin inoomaw? Nagmamaigot daw akong magin prominente?’ An paghingoang magkamit nin personal na kamurawayan bako nanggad pag-arog ki Cristo.​—Juan 5:41.

13. (a) Ano an puedeng magin epekto sa iba kan mapakumbabang halimbawa nin sarong paraataman? (b) Taano ta masasabi na bakong opsional para sa sarong Kristiano an kapakumbabaan, o pagigin may kababaan an pag-isip?

¹³ Kun kita naghihingoang arogon an kapakumbabaan ni Cristo, napapahiro kitang paglingkodan an iba. Isip-isipa an halimbawa nin sarong paraataman sa sona na nag-iinspeksion sa mga trabaho nin saro sa mga sangang opisina kan Mga Saksi ni Jehova. Sa ibong kan sibot-sibot na iskedyul asin magabat na pasan nin paninimbagan, an paraataman na ini nagpondo tanganing tabangan an sarong hoben na tugang na lalaki na nasasakitan sa pag-adjust kan mga setting nin sarong stitching machine. “Dai ako makapaniwala!” an isinaysay kan tugang na lalaki. “Sinabi nia sako na nagpapadalagan sia nin kaparehong klase nin makina kan sia hoben pa kaidto na naglilingkod sa Bethel, asin nagigirumdoman nia kun gurano kadepisil na makua an tama nanggad na mga setting. Tinabangan nia ako sa makinang idto sa harohalawig na panahon minsan ngani kadakol pa siang ibang mahalagang bagay na kaipuhan na gibohon. Talagang hinangaan ko iyan.” Nagigirumdoman pa kan tugang na iyan, na saro nang paraataman ngonyan sa sarong sangang opisina kan Mga Saksi ni Jehova, an aktong iyan nin kapakumbabaan. Dai man logod kita noarin man magsaboot na kita halangkawon na tangani na gumibo nin hababang klaseng mga bagay o na kita importanteng marhay tangani na gumibo nin hababang klaseng mga trabaho. Imbes, kaipuhan na kita maghagkos nin “kababaan nin pag-isip.” Iyan bakong opsional. Kabtang iyan kan “bagong personalidad” na dapat isolog nin sarong Kristiano.​—Filipos 2:3; Colosas 3:​10, 12; Roma 12:16.

Kun Paano Magkakaigwa kan Arog-Cristong Pagmansay sa Kadakulaan

14. Paanong an paghorophorop sa satong relasyon sa Dios asin sa satong kapwa tawo makakatabang sato na makultibar an tamang pagmansay sa kadakulaan?

¹⁴ Paano kita magkakaigwa kan tamang pagmansay sa kadakulaan? An sarong paagi iyo an paghorophorop sa satong relasyon ki Jehova Dios. Huli sa saiyang kamahalan, kapangyarihan, asin kadonongan labaw nanggad sia sa inaabot kan isip nin maluyang mga tawo. (Isaias 40:22) An paghorophorop sa satong relasyon sa satong kapwa tawo nakakatabang man sato na makultibar an kababaan nin pag-isip. Halimbawa, tibaad mas matibay kita sa iba sa nagkapirang bagay, alagad tibaad mas matibay sinda sa mga aspekto nin buhay na orog nanggad na mahalaga, o an satong Kristianong mga tugang tibaad may nagkapirang kualidad na mayo sa sato. Sa katunayan, an dakol na mahalagang marhay sa pagheling nin Dios habo na magin prominente huli sa saindang mahoyo asin mapakumbabang ugale.​—Talinhaga 3:34; Santiago 4:6.

15. Paano ipinapaheling kan integridad kan banwaan nin Dios na mayo nin basehan an siisay man na magsaboot na sia nakakalabi sa iba?

¹⁵ An mga eksperyensia kan mga Saksi ni Jehova na nag-agi nin pagbalo huli sa saindang pagtubod malinaw na nagpapaheling kan puntong ini. Parateng marhay na an ibinibilang kan kinaban na mga ordinaryo iyo an nakapagpadanay kan saindang integridad sa Dios sa irarom nin grabeng mga pagbalo. An paghorophorop sa siring na mga halimbawa makakatabang sato na magdanay na  mapakumbaba asin nagtotokdo sato na ‘dai mag-isip dapit sa satong sadiri nin orog kisa maninigong isipon.’​—Roma 12:3. *

16. Paano makukultibar kan gabos na miembro kan kongregasyon an kadakulaan bilang pag-arog sa modelong itinao ni Jesus?

¹⁶ An gabos na Kristiano, hoben asin gurang, maninigong maghingoang kultibaron an arog-Cristong pagmansay sa kadakulaan. Sa kongregasyon, may manlaenlaen na trabaho na dapat gibohon. Nungkang ikaanggot kun ipagibo sa saindo an garo baga hababang klaseng mga bagay. (1 Samuel 25:41; 2 Hade 3:11) Mga magurang, ineenkaminar daw nindo an saindong mga aki asin mga tinedyer na maogmang gibohon an ano man na asignasyon na ipinapagibo sa sainda, baga man sa Kingdom Hall, sa asamblea, o sa lugar nin kombension? Naheheling daw ninda kamo na naggigibo nin hababang klaseng mga trabaho? Nagigirumdoman na marhay nin sarong tugang na lalaki, na naglilingkod ngonyan sa pankinaban na opisina prinsipal kan Mga Saksi ni Jehova, an halimbawa kan saiyang mga magurang. Sabi nia: “An pagheling ninda sa gibohon na paglinig sa Kingdom Hall o sa lugar nin kombension nagsasabi sako na ibinibilang ninda iyan na mahalaga. Sa parate nagboboluntaryo sindang gibohon an mga trabaho na para sa kapakinabangan kan kongregasyon o sa kasararoan nin magturugang, minsan ngani garo baga menos nanggad paghelingon an mga trabahong idto. An aktitud na ini nakatabang sako na akoon nin gikan sa boot an ano man na asignasyon digdi sa Bethel.”

17. Sa anong mga paagi puedeng magin bendisyon sa kongregasyon an mapakumbabang mga babae?

¹⁷ Mapadapit sa pag-enot sa intereses nin iba kisa sa sadiring intereses, marahayon na halimbawa niato si Ester, na nagin reyna kan Imperyo nin Persia kan ikalimang siglo B.C.E. Minsan ngani nag-iistar sa palasyo, andam siang isapeligro an saiyang buhay sa kapakanan kan banwaan nin Dios, na minahiro kaoyon kan Saiyang kabotan. (Ester 1:​5, 6; 4:14-16) Ano man an saindang kamugtakan sa pagbuhay, an mga Kristiana ngonyan puedeng magpaheling nin espiritu na arog kan ki Ester paagi sa pagparigon sa boot kan mga nagmomondo nin makuri, pagdalaw sa mga may helang, pakikikabtang sa paghuhulit, asin pakikikooperar sa kamagurangan. Kanigoan na bendisyon sa kongregasyon an siring na mapakumbabang mga tugang na babae!

An mga Bendisyon sa Arog-Cristong Kadakulaan

18. Anong mga pakinabang an nakakamtan paagi sa pagpaheling nin arog-Cristong kadakulaan?

¹⁸ Dakol na pakinabang an aanihon nindo kun papagdadanayon nindo an arog-Cristong pagmansay sa kadakulaan. An daing kapasloan na paglilingkod sa iba nagtatao nin kagayagayahan sa sainda sagkod sa saindo. (Gibo 20:35) Mantang gikan sa boot asin galaga kamong nagpapagal para sa kapakanan kan saindong mga tugang, napapamahal kamo sa sainda. (Gibo 20:37) Mas mahalaga, an saindong ginigibo tanganing suportaran an kapakanan kan mga kapwa Kristiano minamansay ni Jehova bilang kawiliwiling atang nin pag-omaw sa saiya.​—Filipos 2:17.

19. Ano an maninigo na magin determinasyon niato may labot sa arog-Cristong pagmansay sa kadakulaan?

¹⁹ An lambang saro sa sato kaipuhan na siyasaton an sadiri niang puso asin ihapot: ‘Sagkod sana daw ako sa tataramon kun dapit sa pagkultibar sa arog-Cristong pagmansay sa kadakulaan, o magmamaigot nanggad ako na isagibo iyan?’ Malinaw an saboot ni Jehova sa maabhaw. (Talinhaga 16:5; 1 Pedro 5:5) Logod na ipaheling kan satong mga paghiro na kita naoogmang marhay sa pagpaheling kan arog-Cristong pagmansay sa kadakulaan, baga man sa Kristianong kongregasyon, sa satong buhay pampamilya, o sa pagtratar niato sa satong kapwa tawo sa aroaldaw​—na ginigibo an gabos na bagay sa ikakamuraway asin ikakaomaw nin Dios.​—1 Corinto 10:31.

[Mga Nota sa Ibaba]

Ikakapaliwanag daw Nindo?

• Taano ta maninigo niatong likayan an kinabanon na pagmansay dapit sa kadakulaan?

• Ano an sokolan ni Jesus sa kadakulaan?

• Paano maaarog kan mga paraataman an kapakumbabaan ni Cristo?

• Ano an makakatabang sa sato na makultibar an arog-Cristong kadakulaan?

[Mga Hapot Para sa Pag-adal]

[Kahon sa pahina 17]

Siisay an May Arog-Cristong Kadakulaan?

An saro na gustong paglingkodan o an saro na andam na maglingkod?

An saro na gustong hangaan o an saro na nag-aako nin hababang klaseng mga gibohon?

An saro na ilinalangkaw an saiyang sadiri o an saro na ilinalangkaw an iba?

[Ritrato sa pahina 14]

Sarong higanteng imahen ni Faraon Amenhotep III

[Ritrato sa pahina 15]

Aram daw nindo kun ano an dahelan kan pagbagsak ni Aman?

[Mga Ritrato sa pahina 16]

Naghahanap daw kamo nin mga oportunidad na paglingkodan an iba?